ئه‌ندامه‌كێ جڤاتا سه‌ركردایه‌تیا پارتێ ل كه‌ركووكێ:ب ئه‌ره‌بكرن ب به‌رنامه ب رێڤه دچیت
هه‌ولێر، سولین سلێمان
ئه‌ندامه‌كێ سه‌ركردایه‌تیا پارتی دیموكراتی كوردستان ل كه‌ركوكێ رادگه‌هینیت، ل پارێزگه‌ها كه‌ركوكێ پرۆسا ب ئه‌ره‌بكرنێ ب هه‌موو شێوازه‌كی ب به‌رنامه ب رێڤه‌دچیت.
لوقمان حسێن، ئه‌ندامێ جڤاتا سه‌ركردایه‌تیا پارتی ل كه‌ركوكێ كو د هه‌مان ده‌مدا رێڤه‌به‌رێ ناحیا سه‌رگه‌رانه یا سه‌ر ب قه‌زا دوبز ڤه، بۆ رۆژناما ئه‌ڤرۆ گۆت” هه‌ر ژ ده‌سپێكا پرۆسا ب ئه‌ره‌بكرنێ ل راگه‌هاندنێن داموده‌زگه‌هێن حكومی رێ نه‌هاتیه دان زمانێ كوردی كار پێ بهێته‌كرن”.
گۆت ژی” ئه‌ڤ پرۆسه د نوكه دا گه‌له‌ك یا به‌رچاڤه وهه‌موو پارێزگه‌ها كه‌ركوكێ ڤه‌گرتیه و ب هاریكاریا ده‌زگه‌هێن حكومی ئه‌ڤ پرۆسه دهێته بجهئینان، بۆ نموونه د بابه‌تێ چاندنێدا و داگیركرنا زه‌ڤیێن جوتیارێن كورد ژ ئالیێ وه‌لاتیێن ئه‌ره‌ب ڤه و دیسا ژی پرۆسا په‌روه‌رده‌كرنێ ژی داگیركریه و رێ ناده‌ن زمانێ كوردی بهێته بكارئینان د راگه هاندنێن حكومی دا”.
لوقمان حوسێن ئاماژه‌كر” ب هزاران خێزانێن ب رێیا ب ئه‌ره‌بكرنێ ئیناینه دناڤ كه‌ركوكێ دا و فورمێن خوارنێ و ناسنامێن وان ڤه‌گوهاستینه ژ بۆ كه‌ركوكێ و ئه‌ره‌ب یێن هه‌ین بێ به‌لگه ل كه‌ركوكێ ئاكنجی دكه‌ن و ئاسانكاری بۆ وان دهێنه كرن د وی بیاڤیدا”.
زیچده‌تر دبێژیت” هه‌تا نوكه ڤه‌گوهاستنا وان كه‌سێن ئه‌ره‌ب ژ بۆ پارێزگه‌ها كه‌ركوكێ یا به‌رده‌وامه وهنده‌ك ژ وان ژ پارێزگه‌هێن به‌غدا و دیوانیه ژ بۆ كه‌ركوكێ دهێنه ڤه‌گوهاستن”.
ئاشكرا ژی كر” نێزیكی ئێك ملیۆن و ٢٠٠ هزار دونه‌مێن ئه‌ردێ كوردان ژ ئالیێ ئه‌ره‌بان ڤه هاتینه داگیركرن”.
پتر رۆهنكر” ئه‌ز دبینم ئێك رێیا چاره‌سه‌ریێ یا هه‌ی ئه‌وژی مه به‌رنامێ ئاساییكرنا ره‌وشا كه‌ركوكێ هه‌یه ئه‌وژی حه‌شد و له‌شكر د ناڤ وان باژێراندا بچنه ژ ده‌رڤه و پێشمه‌رگه ڤه‌گه‌ریت و راكان جبوری ژی ژ پۆستێ پارێزگه‌رێ كه‌ركووكێ بهێته گوهۆرین”.
خویاكر ژی” پێدڤیه لژنه‌ك بهێته دانان داكو ڤان بریارێن ب ئه‌ره‌بكرنێ هه‌لوه‌ه‌شینیت ژبه‌ركو د نوكه دا گه‌له‌ك یا به‌رچاڤه بۆ نموونه ل حه‌ویجه و ریاز و عه‌باسیێ ٢٥٠ رێڤه‌به‌ر و هاریكارێن وان هه‌موو ئه‌ره‌بن كوی ێن هاتینه ڤه‌گۆهاستن بۆ ناڤ كه‌ركوكێ”.
وی ئه‌ندامێ جڤاتا سه‌ركردایه‌تیا پارتی ل كه‌ركووكێ دیاركر ژی” ئه‌ندامێن ده‌زگه‌هێن ئه‌منی ل كه‌ركوكێ خه‌لكێ ڤێ پارێزگه‌هێ نینن و كه‌س هاریكاریا وان ناكه‌ت، پولیسێن فیدرالی و له‌شكر زێده‌تر خه‌لكێ باشوورێ ئیراقێ نه، لێ ئه‌وێن نوكه ژ حه‌شدا شه‌عبی نه و پتر ئاسانكاری بۆ دهێنه كرن له‌وما ڤه‌گه‌راندنا هێزێن پێشمه‌رگه‌ی كاره‌كێ فه‌ره”.
دیسا دبێژیت” د ده‌مێ بۆری دا رێ ل جوتیاران هاتبوو گرتن كو كار ل سه‌ر ئه‌ردێ خوه بكه‌ن و گه‌نمێ خوه بدرن، له‌وما یا پێدڤیه ره‌وشا كه‌ركوكێ ئاسایی ببیته‌ڤه وئه‌و به‌رنامێن ب ئه‌ره‌بكرنێ بهێنه هه‌لوه‌شاندن و بده‌نه ده‌ستێ دادگه‌هێ”.
