ئه‌یاد عه‌لاوی داخوازا پێكئینانا حوكمه‌ته‌كا به‌روه‌خت دكه‌ت
ئه‌ڤرۆ:
سه‌رۆكێ هه‌ڤپه‌یمانیا نیشتمانی یا ئیراقی، ده‌ستپێشخه‌ریه‌ك بۆ ده‌ربازبوون ژ ره‌وشا سیاسی یا نوكه ل ئیراقێ راگه‌هاند كو حوكمه‌ته‌كا به‌روه‌خت بهێته پێكئینان و ئه‌و كه‌سێ دهێته راسپاردن ئازادی پێ بهێته دان.
ئه‌یاد عه‌لاوی، سه‌رۆكێ هه‌ڤپه‌یمانیا نیشتمانی یا ئیراقی، ده‌ستپێشخه‌ریه‌ك راگه‌هاند و ئاماژه كر كو هیچ گونه‌هه‌ك ژ وێ چه‌ندێ مه‌زنتر نینه بێرێزی ب دستووری و ژڤانێن دستووری بهێته كرن.
عه‌لاوی به‌رچاڤكر، ژ پێخه‌مه‌ت به‌رژه‌وه‌ندیا وه‌لاتیان، پێدڤیه ژڤانه‌ك بۆ كۆمبوونه‌كا نیشتمانی بۆ سه‌ركردێن ئالیێن سیاسی یێن ئیراقی بێ مه‌رج بهێته دیاركرن.
هه‌روه‌سا دبێژیت” گاڤێن راگرتنا وان پێشێلكاریێن ب ژڤانێن دستووری هاتینه كرن، پێكئینانا حوكمه‌تا به‌روه‌خت، ده‌ركرنا قانوونه‌كا نووب ۆ هه‌لبژارتنان، هه‌لبژارتنا كۆمسیۆنه‌كا نوو بۆ هه‌لبژارتنان ل ئیراقێ بۆ ب رێڤه‌برنا هه‌لبژارتنێن پاقژ و زه‌لال كو بشێت بریارێن دادگه‌ها فیدرالی یا بلند ل ئیراقێ بجهبینیت، گره‌نتیا نوونه‌راتیا گه‌لێ ئیراقێ بكه‌ت”.
سه‌باره‌ت پۆستێ سه‌رۆك وه‌زیران، عه‌لاوی گۆت” ململانێیه‌كا راسته‌قینه ل سه‌ر پۆستێ سه‌رۆك وه‌زیران یا هه‌ی، له‌وما ئه‌و كه‌سێ دهێته راسپاردن بۆ حوكمه‌تا به‌روه‌خت، پێدڤیه ئازادی پێ بهێته دان بۆ هه‌لبژارتنا وان كه‌سێن ل كابینا وی كاربكه‌ن، ب مه‌رجه‌كی ستانداردا وی دادپه‌روه‌ری و ده‌ستپاكی بیت”.
هه‌ڤده‌م سه‌باره‌ت كه‌سایه‌تیا سه‌رۆك وه‌زیران رۆهنكر” پێدڤیه ئه‌و كه‌سه یێ ئازا و چاڤ نه‌ترس بیت و نه‌كه‌ڤیته دبن كاریگه‌ریا وه‌لاتێن هه‌رێمی و ده‌رڤه و هه‌ڤسه‌نگیێ د په‌یوه‌ندیێن ئیراقێ ل گه‌ل ده‌ڤه‌رێ بپارێزیت
