ئۆپۆزسیۆنا سووریێ ژ هه‌لوه‌ستێ وه‌زیرێ ده‌رڤه یێ توركیا دلگرانه
ئه‌ڤرۆ:
وه‌زیرێ ده‌رڤه یێ توركیا راگه‌هاند كو ئه‌و به‌رهه‌ڤن ل گه‌ل رژێما سووریێ پێكڤه شه‌رێ هه‌سه‌دێ بكه‌ن، چونكی گرنگه هه‌سه‌ده ژناڤ بچیت و دڤێت سووریا ژی هه‌لوه‌ستێ خوه ل هه‌مبه‌ر ئۆپۆزسیۆنێ بگوهۆریت، ئۆپۆزسیۆنا سووریێ ژی دلگرانیا خوه ل هه‌مبه‌ر هه‌لوه‌ستێ نوو یێ توركیا دیار دكه‌ت.
مه‌ولوود چاڤوش ئوغلۆ وه‌زیرێ ده‌رڤه یێ توركیا به‌ری چه‌ند رۆژان بۆ كه‌نالێ خه‌به‌ر تورك راگه‌هاند كو ل ته‌هرانێ وان كۆمبوونه‌كا باش ل گه‌ل به‌رپرسێن ئیرانێ كرن و توركیا ب ره‌نگه‌كێ ئاشكرا بۆ ئیرانێ دیار كر كو دڤێت مه‌ترسیا هه‌سه‌دێ نه‌مینیت، چونكی هه‌سه‌ده بوویه مه‌ترسی بۆ توركیا و هه‌روه‌سا هه‌سه‌ده مه‌ترسیه‌كا مه‌زنه بۆ سووریێ ژی، ژ به‌ر هندێ توركیا به‌رهه‌ڤه هاریكاریا سووریێ بكه‌ت دا هه‌موو ئاخا خوه ژ تیرۆرستان ب تایبه‌تی ژی ژ هه‌سه‌دێ پاقژ بكه‌ت.
وه‌زیرێ ده‌رڤه یێ توركیا ئه‌و یه‌ك ژی دیار كر كو هه‌لوه‌ستێ ئیرانێ گه‌له‌ك باش بوو و ئه‌و چاڤه‌رێ نه كو شام ژی پشته‌ڤانیێ ل هه‌لوه‌ستێ توركیا بكه‌ت، چونكی زوو یان ژی دره‌نگ هه‌سه‌ده دێ بیته ئاریشه‌كا گه‌له‌ك مه‌زن بۆ سووریێ و نها ده‌مه‌كه گونجایه كو شام ژی خوه ژ هه‌سه‌دێ قورتال بكه‌ت و ژ بۆ ڤێ یه‌كێ ژی توركیا به‌رهه‌ڤه ب هه‌موو ره‌نگه‌كێ هاریكاریا سووریێ بكه‌ت و گۆت: (لێ دڤێت شام هه‌لوه‌ستێ خوه ل هه‌مبه‌ر هێزێن دی یێن ئۆپۆزسیۆنا سووریێ بگوهۆڕیت، چونكی ئه‌و ئۆپۆزسیۆنه‌كا نه‌رمن و داخوازیێن وان ژی هه‌نه و دڤێت شام وان به‌رچاڤ وه‌ربگریت).
پشتی داخۆیانیا وه‌زیرێ ده‌رڤه یێ توركیا هێزێن ئۆپۆزسیۆنا سووریێ كو چه‌ند سالن توركیا پشته‌ڤانیێ ل وان دكه‌ت نه‌رازیبوونا خوه ل هه‌مبه‌ر هه‌لوه‌ستێ توركیا دیار كرن و راگه‌هاندن كو یا توركیا دكه‌ت خیانه‌ته و ئه‌و یه‌ك ب چو ره‌نگه‌كێ ناهێته قه‌بوولكرن، هه‌روه‌سا گرۆپێن چه‌كدارێن سووری ژی ل عه‌فرینێ دژبه‌ریا خوه ل هه‌مبه‌ر سیاسه‌تا توركیا دیار كرن و راگه‌هاندن كو ئه‌و یه‌ك ب چو ره‌نگه‌كێ ناهێته قه‌بوولكرن و عه‌ره‌بێن ل عه‌فرینێ ژی ل دژی سیاسه‌تا توركیا ده‌ست ب خوه‌نیشادانان كرن.
ئه‌و یه‌ك د ده‌مه‌كێ دایه كو به‌ری نها ل رۆسیا چه‌ندین هه‌ڤدیتن د ناڤبه‌را شاندێن توركیا و رۆسیا دا برێڤه چوون و توركیا داخواز ژ شامێ كر كو ئه‌و به‌رهه‌ڤن پێكڤه ئێرشی هه‌سه‌دێ بكه‌ن و هه‌موو ده‌ڤه‌رێن باكورێ سووریێ ژ ده‌ستێ وان ده‌رخینن، لێ ل هه‌مبه‌ر داخوازیا توركیا شامێ ژی داخواز كربوو كو دڤێت توركیا به‌ری هه‌ر تشته‌كێ هه‌موو هێزێن خوه ژ ئاخا سووریێ ڤه‌كێشیت و هه‌روه‌سا ده‌ست ژ پشته‌ڤانیا گرۆپێن چه‌كدار به‌رده‌ت، لێ ئه‌و یه‌ك ژ ئالیێ توركیا ڤه ب توندی هاته ره‌تكرن و ژ به‌ر هندێ ژی هه‌تا نها د ناڤبه‌را توركیا و سووریێ دا ب فه‌رمی چو رێككه‌فتن نینن، لێ توركیا به‌رده‌وام كار دكه‌ت دا بشێت شامێ رازی بكه‌ت ئێرشی باكورێ سووریێ بكه‌ت، لێ ژ به‌ر هه‌بوونا هێزێن ئه‌مریكا ل باكورێ سووریێ هه‌تا نها رژێما شامێ نه‌شیایه تشته‌ك وه‌سا بكه‌ت.
هه‌ژی ئاماژه‌پێدانێ یه كو ده‌مه‌كه رێككه‌فتنه‌كا سه‌ربازی د ناڤبه‌را له‌شكرێ سووریێ و هێزێن سووریا دیموكرات دا هاتیه كرن و ل گۆر رێككه‌فتنێ هه‌ر دو ئالی دێ پێكڤه سنۆرێن سووریێ ژ ئێرشێن توركیا پارێزن و ئه‌و یه‌ك ژی بوویه جهێ دلگرانیا توركیا، چونكی هه‌كه هێزێن سووریێ ل ده‌ڤه‌رێن سنۆری بجه ببن وی ده‌می توركیا نه‌شێت ئێرشی هێزێن سووریا بكه‌ت و ل ئالیێ دی رۆسیا ژی پشته‌ڤانیێ ل رێككه‌فتنا سه‌ربازی یا د ناڤبه‌را هه‌سه‌دێ و له‌شكرێ سووریێ دا دكه‌ت.
چاڤدێرێن سیاسی ژی دیار دكه‌ن كو ده‌مه‌كه توركیا كار بۆ هندێ دكه‌ت ل گه‌ل رژێما سووریێ هنده‌ك رێككه‌فتنان بكه‌ت و ئارمانجا سه‌ره‌كی یا توركیا ژی ئه‌وه دا رێڤه‌به‌ریا خوه‌سه‌ر ژناڤ بچیت و هه‌روه‌سا كورد ل سووریێ نه‌گه‌هنه مافێن خوه، لێ نها ره‌وش گه‌له‌ك هاتیه گوهۆرین، چونكی رژێما سووریێ نها نه‌شێت ئێرشی رۆژئاڤایی كوردستانێ بكه‌ت، ژ به‌ر كو هه‌م هێزێن ئه‌مریكا ل رۆژئاڤایێ كوردستانێ بجه بووینه و هه‌روه‌سا وه‌لاتێن ئۆرۆپی ب تایبه‌تی ژی فره‌نسا رێ ناده‌ت كو تشته‌ك وه‌سا روو بده‌ت و پشته‌ڤانیێ ل كوردان دكه‌ن، ژ به‌ر هندێ ژی نها ب ساناهی نابیت كو شام بشێت ئێرشی هێزێن سووریا دیموكرات بكه‌ت.
