باج ل سهر بهایێن كهلوپهلێن خارنێ هاته ههلگرتن
ههولێر، سولین سلێمان
حۆكمهتا ههرێما كوردستانێ پێخهمهت ئهرزانبون و ئینانا خارنێ ب بهایهكێ گونجای دا كو بگههیته دهستێ وهلاتیان، بریار دایه ژ بۆ ماوێ دو ههیڤان باجێ ل سهر ئینانا خارنێ ههلگریت دا كو وهلاتی مفای ژێ ببینن و ب بهایهكێ كێمتر خارنێ بكرن.
نهوزاد شێخ كامل، رێڤهبهرێ گشتیێ بازرگانیا ههرێما كوردستانێ بۆ رۆژناما ئهڤرۆ گۆت: ئهڤ بریارا حۆكمهتێ ههمی مادێن خارنێ ڤهدگریت و ژ بۆ ماوێ دو ههیڤان دێ بهردهوام بیت، ئهڤ بریاره دێ بیته ئهگهرێ وێ كێمتر پاره ژ بازرگانان بهێته وهرگرتن.
گۆت ژی: ئهڤ بریاره د نۆكه دا هاتیه جێبهجێ كرن و ئهو بازرگانێن خارنێ و كهلوپهلێن خارنێ دئیننه د ههرێمێ دا باج ژێ ناهێته وهرگرتن، چونكو مه دو فروكهخانه ههنه، ئهڤ بریاره ژی ل ههر شهش جهان دهێنه جێبهجێكرن و ئهڤه ههیڤهكه ئهڤ بریاره دهرچوویه ژ ئهگهرا وێ ژی د نۆكه دا بازرگان مژوولی ئینانا كهلوپهلانن ژ بۆ ههرێما كوردستانێ.
ئاشكرا ژی كر: پێدڤیه وهلاتی هشیار بن و رێكێ نهدهن وهكی سهردهمێ باجا فروشیار بهایا ل سهر وانا گران بكهن، چونكو مه ئهڤ بریار دایه بها ئهرزان ببن و وهلاتی مفای ژێ ببینن، چونكو بهری ڤێ بریاری باج ژ بازرگانان دهاته وهرگرتن و ئهو ژی نهچار بون بهایێ خارنێ ل سهر وهلاتیان گران بكهن، لێ د نۆكه دا ئهڤ چهنده ژ بۆ ماوهكی نامینیت و وهلاتی دێ شێت ب بهایهكێ كێمتر ژ بهرێ وان كهلوپهلێن خارنا بكریت.
ژ لایهكێ دووڤه گۆت: د داهاتیهكا نێزیك دا كاریگهریێن ڤێ بریارێ دێ زێدهتر لێ هێن، چونكو بریار هێشتا یا نوویه و هێدی هێدی پتر كاریگهریێن ڤێ بریارێ زێدهتر لێ دهێن.
رێڤهبهرێ گشتیێ بازرگانیا ههرێمێ ئاماژه ب وێ چهنده ژی دا و گۆت: ئارمانجا حۆكمهتێ ژ ڤی بریاری ئهوه دا كو بارگرانی زۆر نهكهڤیته سهر وهلاتیان و ئهڤ بریاره ببیته ئهگهرا وێ بها بهێنه دابهزاندن و ههر بازرگانهك ژی پشتی ڤێ بریارێ ئهگهر دیسا ب گرانی كهلوپهلێن خارنێ بفروشیت دێ هێته سزادان.
ساماڵ عهبدلرهحمان رێڤهبهرێ گشتیێ گومركا ههرێما كوردستانێ دهربارێ ڤێ بریارێ ژ بۆ رۆژناما ئهڤرۆ گۆت: ئهڤ بریاره ل ههمی جهێن فهرمی یا هاتیه جێبهجێكرن و رۆژانه ههر بازرگانهك خارنێ دئینیت باج ژێ ناهێته وهرگرتن و ب مهرجهكی ئهو 15 ماده بن كو حۆكمهتێ دهستنیشان كرینه و خارن و مادێن سهرهكی بن.
گۆتژی: ل دور ڤێ بریارێ تاكو دو ههڤێن دی ئهڤ بریاره دێ بهردهوام بیت، لێ دیسا ژی حۆكمهت دێ بریارێ دهت كو ئهڤ چهنده هێشتا بهردهوام بیت ههروهسا ئهڤ بریاره مادێن بیناسازی و كهلوپهلێن دی ڤهناگریت.