بسپۆره‌كێ زانستێن سیاسی: ئیران دخوازیت سه‌رۆك وه‌زیره‌كێ‌ لاواز و بێ‌ ده‌ستهه‌لات ل...

بسپۆره‌كێ زانستێن سیاسی: ئیران دخوازیت سه‌رۆك وه‌زیره‌كێ‌ لاواز و بێ‌ ده‌ستهه‌لات ل ئیراقێ هه‌بیت

ئه‌ڤرۆ ، زنار تۆڤی:

د. نه‌وزاد هێتۆتی، بسپۆرێ زانستێن سیاسی ل زانكۆیا سه‌لاحه‌دین ل هه‌ولێرێ‌، د دیداره‌كی دا بۆ رۆژناما ئه‌ڤرۆ رادگه‌هینیت، د نوكه‌ دا ته‌كتیكا ئیرانێ‌ گوهۆرین ب سه‌ر دا هاتیه‌ بۆ دروستكرنا حوكمه‌تا نوو یا ئیراقێ، ژ ئالیه‌كی ڤه‌ ئیران یا بزاڤان دكه‌ت، هه‌ڤپه‌یمانێن وێ‌، حوكمه‌تا نوو یا ئیراقێ دروست بكه‌ن، ژئالیه‌كێ دیتر ڤه‌ یا بزاڤان دكه‌ت كۆمه‌كا گرۆپێن میلیشیاین وه‌كو عه‌سائیب ئه‌هلولحه‌ق و حزبوللا رۆلێ‌ ئوپۆزسیۆنێ‌ ب گێرن و پشكداریێ‌ د حكومه‌تێ‌ دا نه‌كه‌ن، ئیرانێ‌ چه‌ندین مه‌ره‌م ب ڤێ‌ چه‌ندێ‌ هه‌نه‌، ژ وان ژی دخوازیت ل سه‌ر ئاستێ‌ ژ ده‌رڤه‌ وه‌سا خوه‌ نیشان بده‌ت، كو ئه‌و گرۆپێن میلیشیێن سه‌ر ب ئیرانێ‌ ڤه‌ پشكدار نینن د حكومه‌تێ‌ دا و حوكمه‌تا بهێت یا ئیراقێ چو په‌یوه‌ندی ب وان ڤه‌ نینه‌، هه‌روه‌سا ل سه‌ر ئاستێ‌ ناڤخوه‌یی یێ‌ شیعان ژی ئیران دێ‌ وه‌سا خوه‌ نیشان ده‌ت، كو گرۆپێن میلیشیێن شیعی چو رۆل نینه‌ د حوكمه‌تا نوو دا و پشكدار نابن، داكو خوه‌ ژ به‌رپرسیاره‌تیێ‌ ڤه‌دزن، هه‌روه‌سا ئیرانێ‌ دخوازیت ڤان گاڤان بهاڤێژیت، ژ پێخه‌مه‌ت وه‌سا خوه‌ نیشان بده‌ت، كو ئه‌و هه‌ڤسۆزن ل گه‌ل موقته‌دا سه‌دری، ئه‌ڤه‌ بۆ هندێ‌ یه‌، داكو سه‌در تۆره‌ نه‌بیت و دیسان رێ‌ ل سه‌دری بگرن، داكو حوكمه‌تا نوو نه‌هێته‌ رۆخاندن، د هه‌مان ده‌مدا ژ ده‌رڤه‌ی حوكمه‌تێ‌ وه‌كو گرۆپێن میلیشیان به‌رده‌وام بن و بشێن نه‌یارێن خوه‌ بكه‌نه‌ ئارمانج ل ناڤخوه‌ و ده‌رڤه‌ی ئیراقێ، بێی كو ئه‌و به‌رپرسیار بن.

نه‌وزاد هێتوتی زێده‌تر دبێژیت”: ئیران دخوازیت سه‌رۆك وه‌زیره‌كێ‌ كارتۆنی ل ئیراقێ هه‌بیت، ئانكو سه‌رۆك وه‌زیره‌كێ‌ لاواز بیت، یێ‌ بێ‌ ئیراده‌ و بێ‌ ده‌ستهه‌لات بیت، چو جاران ئیران ل گه‌ل هندێ‌ نه‌بوویه‌، كو ئه‌و كه‌سێ‌ ببیته‌ سه‌رۆك وه‌زیرێن ئیراقێ خه‌لك ده‌نگی بده‌تێ‌، یان كۆتله‌كا مه‌زن یا په‌رله‌مانی ل پشت بیت، داكو نه‌شێت ژ بریار و ئه‌جندایێن ئیرانێ‌ ده‌ركه‌ڤیت، هه‌روه‌سا د نوكه‌ دا هه‌كه‌ چارچۆڤێ‌ هه‌ماهه‌نگیێ‌ بشێت حوكمه‌تا نوو یا ئیراقێ پێكبینیت، دێ‌ كه‌سه‌ك ژ رێزا دووێ‌ بیته‌ سه‌رۆك وه‌زیر، ب ره‌نگه‌كێ‌ كو وی سه‌رۆك وه‌زیری چو پشته‌ڤانیا هه‌لبژارتنان و خه‌لكی ل گه‌ل نه‌بیت، كه‌سه‌كێ‌ لاواز و بێ‌ ده‌ستهه‌لات بیت و ژ بریارێن ئیرانێ‌ ده‌رنه‌كه‌ڤیت، هه‌روه‌سا بۆ ئیرانێ‌ و چارچۆڤێ‌ هه‌ماهه‌نگیێ‌ گه‌له‌ك یا گرنگه‌ كو پارتی و هه‌ڤپه‌یمانیا سیاده‌ پشكداریێ‌ د حوكمه‌تێ‌ دا بكه‌ن، بۆ هندێ‌ داكو شه‌رعیه‌تێ‌ بده‌نه‌ حوكمه‌تا ئیراقێ، چونكی یا دیاره‌ لدووڤ ئه‌نجامێن هه‌لبژارتنان سه‌در دناڤا پێكهاتێ‌ شیعی دا زۆرینه‌یه‌ و مافێ‌ هندێ‌ هه‌بوو حوكمه‌تێ‌ پێك بینیت، لێ‌ ئیرانێ‌ و هه‌ڤپه‌یمانێن وێ، ئه‌و مافه‌ بۆ نه‌هێلا، دیسان پارتی و هه‌ڤپه‌یمانیا سیاده‌ پترین رێژا ده‌نگان دناڤا كورد و سوننه‌یان دا ب ده‌ستڤه‌ ئیناینه‌، هه‌كه‌ ئه‌و ژی پشكداریێ‌ د حوكمه‌تا نوو دا نه‌كه‌ن، دێ‌ حوكمه‌ته‌ك دروست بیت كو دێ‌ بیته‌ حوكمه‌تا سه‌رنه‌كه‌فتی د هه‌لبژارتنان دا و لده‌ف هه‌رسێ‌ پێكهاتان چو شه‌رعیه‌تا هه‌لبژارتنان نابیت، هه‌روه‌سا هه‌كه‌ پرۆسا سیاسی ب ڤی ره‌نگی بچیت، دێ‌ بیته‌ پرۆسه‌كا سه‌یر و سه‌مه‌ر یا دیمۆكراسی ل جیهانێ‌، هه‌كه‌ ئالیێن سه‌رنه‌كه‌فتی حوكمه‌تێ‌ پێك بینن، ب ڤێ‌ چه‌ندێ‌ دبیت جڤاكێ‌ نێڤده‌وله‌تی دانپێدانێ ب وێ‌ حوكمه‌تێ‌ نه‌كه‌ت و ب حوكمه‌ته‌كا شه‌رعی نه‌هێته‌ ناساندن، له‌وما ئیران و چارچۆڤێ‌ هه‌ماهه‌نگیێ‌ ژی باش ڤێ‌ راستیێ‌ دزانن و دێ‌ هه‌موو بزاڤان كه‌ن ل گه‌ل پارتی و هه‌ڤپه‌یمانیا سیاده‌ رێكبكه‌ڤن ژ بۆ پێكئینانا حوكمه‌تا نوو یا ئیراقێ”.

کۆمێنتا تە