به‌ره‌ڤانیا باژێری ل دهۆكێ: دانانا سیسته‌مێ غازێ بێ مه‌رج یا ب مه‌ترسییه
دهۆك، له‌زگین جوقی:
په‌ێڤدارێ رێڤه‌به‌ریا به‌ره‌ڤانیا باژێری ل پارێزگه‌ها دهۆكێ دیار كر، ئه‌و تانكێ غازێ یێ شه‌ڤا دی ل دهۆكێ په‌قی هزار و 700 لیترێن غازێ د ناڤ دا بوون و تانك هه‌یه 10 ته‌نێن غازێ د ناڤ دانه ل سه‌ر بانێن خانیان هاتینه دانان بێ جهه‌كێ پاراستی بیت و مه‌رجێن خوه‌پاراستنێ هه‌بن، ئه‌ڤه ژی یا ب مه‌ترسییه.
بێوار عه‌بدولعه‌زیز، په‌یڤدارێ رێڤه‌به‌ریا به‌ره‌ڤانیا باژێری ل پارێزگه‌ها دهۆكێ دیار كر، گه‌له‌ك تانكێن غازێ بێ مه‌رج یێن هاتینه دانان و رێنمایێن خوه‌پاراستنێ د ناڤ دا نینن، گه‌له‌ك ژی بێ ئاگه‌هداریا به‌ره‌ڤانیا باژێری یێن هاتینه دانان، ئه‌ڤه ژی یا ب مه‌ترسییه و گۆت: “د پاشه‌رۆژێ دا گه‌له‌ك روودانێن دلته‌زین دێ ژێ په‌یدا بن له‌ورا ژی بڕیارا راگرتنا سیسته‌مێ غازێ ل هه‌رێما كوردستانێ ژ لایێ سه‌رۆكێ حكومه‌تا هه‌رێما كوردستانێ ڤه پێنگاڤه‌كا گه‌له‌كا باشه بۆ پێداچوونێ د سیسته‌مێ غازێ دا، ئه‌م هیڤیدارین وه‌لاتی رێنمایان بجه بینن، داكو تووشی روودانێن دلته‌زین نه‌بن”.
ئاشكرا ژی كر، ل پارێزگه‌ها دهۆكێ گه‌له‌ك تانكێن غازێ بێ مه‌رجێن خوه‌پاراستنێ یێن هاتینه دانان و د پاشه‌رۆژێ دا دێ بنه مه‌ترسی ل سه‌ر ژیانا وه‌لاتیان و گۆت: “ئه‌م به‌رده‌وام شیره‌تان ل خه‌لكێ خوه دكه‌ین، ده‌مێ سیسته‌مێ غازێ ب كار دئینن مه‌رج و رێنمایان بجه بینن”.
