بەرێ بنیاتی بۆ هەژمارەكا پڕۆژەیێن خزمەتگوزاری ل ئامێدیێ هاتە دانان
ئەڤرۆ
ئامێدیێ، مەحمود نهێلی:
د سەرەدانەكی دا بۆ دەڤەرا ئامێدیێ د. عەلی تەتەر پارێزگارێ دهۆكێ و شاندێ د گەل دا ل گەل رێڤەبەرێن دام و دەزگەهێن میری و دەڤەردارێ ئامێدیێ دوهی 26/3/2023 ب گوژمێ چار ملیار و 475 ملیۆن دیناران بەرێ بنیاتی بۆ هەژمارەكا پڕۆژەیێن خزمەتگوزاری دانا.
پارێزگارێ دهۆكێ د كۆنگرەیەكێ رۆژنامەڤانی دا دیار كر، ئەو ل ئامێدیێ بەرهەڤبووینە بۆ دانانا بەرێ بنیاتی بۆ هەژمارەكا پڕۆژەیان و گۆت: “ئەڤ پڕۆژە یێن جودا جودانە و ژ 16 پڕۆژەیێن گرێدایی ب ژیانا خەلكێ دەڤەرێ ڤە، وەك: قێركرنا جادەیان و پڕۆژەیێن ئاڤێ و كارەبێ و پەروەردێ پێك دهێن، ئەڤ پڕۆژەیە بەردەوامیا پڕۆژەیێن گەشەپێدانا پارێزگەهێ یێن سالا 2022 نە، كو رازیبوون ل سەر چێكرنا وان هاتیە كرن، دیسا پشتی چەند رۆژێن دی دێ جارەكا دی هێینەڤە دەڤەرێ بۆ دانانا بەرێ بنیاتی بۆ هەژمارەكا پڕۆژەیێن دیتر یێن سالا 2023”.
پارێزگارێ دهۆكێ خویا ژی كر، پڕۆژە ل سەرانسەری پارێزگەهێ دێ د بەردەوام بن و رۆژانە بەرێ بنیاتی بۆ پڕۆژەیێن نوو دهێتە دانان، هەموو ژی پڕۆژەیێن گرنگن و گرێدایی ژیانا رۆژانە یا وەلاتیانن، پشتی ب دووماهی هاتنا ڤان پڕۆژەیان ژی دەست بجهئینانا هندەك پڕۆژەیێن دیتر د بیاڤێ گەشتیاری و بیاڤێن دیتر دا كەن، كو پڕۆژەیێن ستراتیژی نە و دێ ڤەژینەكا باشتر دەنە دەڤەرێ.
پارێزگاری سوپاسیا سەرۆكێ حوكمەتا هەرێما كوردستانێ مەسرۆر بارزانی ژی كر كو گرنگیەكا پتر دایە ڤێ دەڤەرێ و گۆت: “پشتی سەرەدانا سەرۆكێ حوكمەتێ بۆ ڤێ دەڤەرێ، پڕۆژە باش ب رێڤە دچن و پڕانیا پڕۆژەیێن سالا 2020 ب دووماهی هاتینە و یێن سالا 2021 ژی دێ كەڤنە د خزمەتا خەلكێ دەڤەرێ دا، دیسا هندەك ژ پڕۆژەیێن سالا 2022 ژی ب دووماهی هاتینە و كەفتینە د خزمەتا وەلاتیان دا و هندەك ژی ل ژێر بجهئینانێ نە و هندەك ژی هاتینە راگەهاندن و ئێك پرۆژە بتنێ مابوو ئەو ژی یێ هاتیە رەوانە كرن و ل دەمەكێ نێزیك دێ هێین و بەرێ بنیاتی بۆ دانین”.
پارێزگاری گۆتژی: “كوردستان یا مە هەموویانە و بخوینا هزارەهان شەهیدان هاتیە رزگاركرن، لەو دڤێت مە بیر و باوەر ب ئاخا خوە و دۆزا خوە هەبیت و نەكەڤینە ژێر كارتێكرنا نڤیسەرەكی یان رۆژنامەڤانەكی، حوكمەتا مە و مللەتێ مە رێیا راست یا گرتی و دێ یا بەردەوام بیت، هەكە كێماسی هەبن دێ پێداچینە ڤە و بزانین ئەگەر چ نە و بزاڤان كەین راستڤەكەین، گازندێن خەلكێ مە د دجهێ خوە دانە و رەخنێن خەلكی ژی دێ دانینە سەر سەر و سەرچاڤێن خوە”.
