ب جهئینانا رێككه‌فتنا هه‌ولێر و به‌غدا ره‌وشا شنگالێ دێ ئارام بیت
دهۆك، له‌زگین جۆقی:
ده‌سته‌یا بلندا بنگه‌هێ لالش به‌یاننامه‌یه‌ك ل سه‌ر خرابیا ره‌وشا شنگالێ به‌لاڤكر و تێدا هاتیه: پشتی بۆرینا زێده‌تر ژ حه‌فت سالان، مخابن ژ ئه‌گه‌رێ هه‌بوونا گرۆپێن چه‌كدارێن نه‌شه‌رعی و نه‌یاسایی، خه‌لكێ شنگالێ ژ به‌ر نه‌بوونا ئارامیێ ژیانا كه‌مپان هه‌لبژارتی یه.
بنگه‌هێ لالش خویا ژی كریه، پشتی رێكخراوا تیرۆرستیا داعش ل رێكه‌فتی 3/8/2014 شنگال داگیر كری و ب ده‌هان كۆمكۆژی ئه‌نجام داین و ب هه‌زاران كه‌س ژ كه‌چ و ژنان ره‌ڤاندین و ب هزاران كه‌س ئاواره ده‌ربه‌ده‌ر بوون، لێ مخابن ژ وی ده‌می و هه‌تا نوكه ژ ئه‌گه‌رێ هه‌بوونا گرۆپێن چه‌كدارێن نه‌شه‌رعی و نه‌یاسایی، خه‌لكێ شنگالێ نه‌شێت ڤه‌گه‌ڕیته سه‌ر وار و مالێن خوه.
ئاشكرا ژی كریه، ل رێكه‌فتی 2/5/2022ێ شه‌ر د ناڤبه‌را سۆپایێ ئیراقێ و هێزێن سه‌ر ب په‌كه‌كێ ڤه ل شنگالێ روودا و دووباره خه‌لكێ وێ ده‌ڤه‌رێ ئاواره و ده‌ربه‌ده‌ر بوون و تێدا هاتیه: “ئه‌م دخوازین رێككه‌فتنا د ناڤبه‌را هه‌ولێر و به‌غدا یا ل دۆر شنگالێ بهێته بجهئینان، چونكو خالێن وێ رێككه‌فتنێ د به‌رژه‌وه‌ندیا شنگال و شنگالیان دانه و ئارامی دێ بۆ ده‌ڤه‌رێ ڤه‌گه‌ڕیت، هه‌روه‌سان پشته‌ڤانیا داخوازیێن خوه‌پێشادانێن مه‌ده‌نی یێن شنگالێ دكه‌ین و دخوازین رێز ل ئیراده و هیڤی و داخوازیێن وان بهێته‌گرتن”.
د به‌یاننامه‌یا بنگه‌هێ لالش دا هاتیه: “ئه‌م دخوازین وه‌لاتێن جیهانێ و جڤاكێ نێڤده‌وله‌تی كۆمكۆژیا ئێزدیان ب جێنۆساید بده‌ته نیاسین، ئاڤادانی ل شنگالێ ده‌ست پێ بكه‌ت، ئاشتی و ئارامی بۆ ده‌ڤه‌رێ بهێنه دابینكرن، داكو ئاواره ڤه‌گه‌ڕنه سه‌ر جهـ و وارێن خوه و ژیانا خوه ب ئارامی ببه‌نه سه‌ر”.
