جه‌بار یاوه‌ر:ئاسمانێ ئیراقێ یێ به‌ره‌لایه
هه‌ولێر، قائید میرۆ
به‌رپرسه‌كێ وه‌زاره‌تا پێشمه‌رگه راگه‌هاند، ژئالیێ دستووری ڤه پاراستنا ئاسمانێ هه‌رێما كوردستانێ ئه‌ركێ حوكمه‌تا ئیراقێ یه، به‌لێ ئیراقێ شیانێن پاراستنا ئاسمانی نینن ژبه‌ر نه‌بوونا سیسته‌مێ پێشكه‌فتی یێ رادارێ و دبێژیت، وه‌زاره‌تا پێشمه‌رگه داخوازكریه بۆ بده‌ستڤه‌ئینانا فڕۆكێن بێ فڕۆكه‌ڤان و هه‌ڤپه‌یمانان بودجه ژی مه‌زاختیه، مخابن حوكمه‌تا ئیراقێ یا رازی نینه پێشمه‌رگه ببیته خودانێ فڕۆكه‌یێن بێ فڕۆكه‌ڤان.
فه‌ریق جه‌بار باوه‌ر، ئه‌میندارێ گشتیێ وه‌زاره‌تا پێشمه‌رگه بۆ رۆژناما (ئه‌ڤرۆ) گۆت” ژبه‌ر پێشكه‌فتنا ته‌كنه‌لۆژیایێ پتریا وه‌لاتێن جیهانێ د ده‌مێ نوكه‌دا فڕۆكێن بێ فڕۆكه‌ڤان بكاردئینن، به‌لێ هه‌تا نوكه هێزێن پێشمه‌رگه‌ی نه‌بووینه خودانێ فڕۆكێن بێ فڕۆكه‌ڤان، ئه‌ڤه د ده‌مه‌كی دایه پتریا له‌شكرێن جیهانێ فڕۆكێن درۆن هه‌نه و ل ئیراقێ ژی له‌شكرێ ئیراقێ و پۆلیسێن فیدڕال و حه‌شدا شه‌عبی فڕۆكێن درۆن هه‌نه، هه‌تا گه‌له‌ك جارا ئه‌م دبینین ل ده‌ڤه‌رێن كوردستانێ بۆ لێدانا چه‌كدارێن داعشێ و ئارمانجێن سه‌ربازی دهێنه بكارئینان، ل هه‌رێما كوردستانێ چه‌ند جاران هاتینه بكارئینان بۆ ئه‌نجامدانا هێرشان و زیان هه‌بووینه، مه ژی وه‌كو وه‌زاره‌تا پێشمه‌رگه بزاڤ كرینه بۆ بده‌ستڤه‌ئینانا فڕۆكێن بێ فرۆكه‌ڤان، به‌لێ ژبه‌ر نه‌بوونا رازیبوونا ئیراقێ و بودجه‌كا تایبه‌ت هه‌تا نوكه نه‌شیاینه ببینه خودانێن وان جۆره فرۆكان، به‌لێ مه داخواز ژ هه‌ڤپه‌یمانان كریه درۆنان بده‌نه وه‌زاره‌تا پێشمه‌رگه ئه‌وژی رازیبووینه، مخابن حوكمه‌تا ئیراقێ یا رازی نینه و رێگره ، هه‌ڤپه‌یمانان بودجه ژی بۆ كڕینا درۆنان بۆ پێشمه‌رگه‌ی مه‌زاختیه، تنێ مایه ئیراق رازی بیت، مه‌ره‌ما وه‌زاره‌تا پێشمه‌رگه ئه‌وه درۆن بۆ پاراستنا ئاخا هه‌رێما كوردستانێ بهێنه بكارئینان، بتایبه‌تی بۆ هێلێن به‌رگریێ دگه‌ل داعشێ و د ده‌مێ رێڤه‌چوونا ئۆپه‌ڕاسیۆنێن سه‌ربازی بهێنه بكارئینان نه‌كو بۆ مه‌ره‌مێن دی، چونكه فڕۆكێن بێ فڕۆكه‌ڤان بۆ مه‌ره‌مێن سیخۆریێ و چه‌ندین مه‌ره‌مێن دی ژی دهێنه بكارئینان”.
جه‌بار یاوه‌ر گۆت ژی” ژئالیێ دستووری ڤه پاراستنا ئاسمانێ هه‌رێما كوردستانێ ئه‌ركێ حوكمه‌تا ئیراقێ یه، مخابن حوكمه‌تا فیدڕال ئه‌ركێ خوه بجهنه‌ئینایه بۆ پاراستنا ئه‌سمانێ هه‌رێما كوردستانێ، له‌وڕاژی گه‌له‌ك جاران فڕۆكێن شه‌ڕكه‌ر و یێن بێ فڕۆكه‌ڤان ژی ده‌ربازی ئاسمانێ هه‌رێما كوردستانێ دبن و سنورێن ئیراقێ دهێنه تۆپبارانكرن و ئیراق نه‌شیایه ئه‌رد و ئاسمانێن خوه بپارێزیت، چونكه هێشتا ژلئالیێ فڕۆكێن شه‌ڕكه‌ر یا لاوازه بۆ پاراستنا ئاسمانێ ئیراقێ و سیسته‌مه‌كێ پێشكه‌فتی یێ به‌رگریا ئه‌سمانی نینه بۆ به‌رسڤدانا هه‌ر به‌زاندنه‌كا سنورێ ئیراقێ، هه‌تا سیسته‌مێ چاڤدێریا ئه‌سمانی نینه ل ئیراقێ، كو نوكه ب سیسته‌مێ رادارێ چاڤدێریا ئه‌سمانی دهێته‌كرن ل هه‌موو جیهانێ و وه‌لاتێن پێشكه‌فتی، ئه‌ڤه‌ژی هۆكاره ئه‌سمانێ ئیراقێ یێ به‌ره‌لایه، ب گۆره‌ی ئامارێن به‌رده‌ستێ مه ژ ده‌ستپێكا ئه‌ڤساله هه‌تا دووماهیا هه‌یڤا بۆری ٢٠٠ جاران سنورێ ئیراقێ هاتیه بنپێكرن ب فڕۆكه و توپباران و چه‌كێ سڤك، ژوان ژی ٩٣ێ جاران ب رێیا فڕۆكه و درۆنان بوویه و گه‌له‌ك جاران ژی ئه‌و فڕۆكه ب كیراتیا زێده‌تری ٢٠٠ كیلۆمه‌تران هاتینه د ناڤا ئاخا ئیراقێ دا، هه‌روه‌سا ژوان دوو بنپێكرنێن هاتینه‌كرن ژلایێ ئیرانێ و ٩١ جاران ژی ژئالیێ توركیا ڤه بوویه، مخابن ئیراق نه‌شیایه رێگریێ بكه‌ت”.
