دهۆك ڤەگەڕیا و دێ هەمبێزا پایسكلڤانێن كوردستانێ كەت
ئەڤرۆ
د داخویانیەكێ دا سەرۆكێ ئێكەتیا پایسكلڤانێن هەرێما كوردستانێ دیار كر پارێزگەها دهۆكێ هاتیە دەستنیشانكرن بۆ مێڤانداریا قارەمانیێ ل سەر چار ئاستێن جودا بۆ كوڕان و كچان و دێ هەلبژارتیێ كوردستانێ ژی هێتە پێكئینیان ژبۆ پشكداریێن دەرڤە.
زێدەتر هشیار فەریق بۆ رۆژناما ئەڤرۆ گۆت: د دووماهی كۆمبوونا خوە یا ئێكەتیا پایسكلڤانان چەند بڕیار و راسپاردە هەبوون ژ وانا ل 22ێ مەها بهێت پارێزگەها دهۆكێ دێ مێڤانداریا قارەمانیا كوردستانێ كەت بۆ قۆناغا ئێكێ ل سەر ئاستێ، تازەپێگەهشتی، لاوان و پێشكەفتیان بۆ هەردو رەكەزێن كوڕ و كچ ئەڤە دبیتە قارەمانیا ئێكێ پشتی پێنچ سالێن دووركەفتنێ، هەروەسان بڕیار هاتیە دان بدانانا لژنەكا تایبەت ژبۆ ژێگرتنا یاریزانێن خودان شیان بۆ ناڤ رێزێن هەلبژارتیێ كوردستانێ خوە بەرهەڤكرن بۆ قارەمانیێن داهاتی و دێ بزاڤێ كەین راهێنەرەكێ خودان سەربۆر یێ وەلاتێ ئیرانێ بۆ هەلبژارتیێ مە دەستنیشانكەین ژبۆ زێدەتر مفا وەرگرتن ژ شیانێن وی.
ژلایەكێ دووڤە ناڤهاتی گۆت: د كۆمبوونێ دا بڕیار هاتە دان رێكخستنا خولێن دادڤانیێ و راهێنەران كو دێ ب سەرپەرشتیا شارەزایێن ڤێ یاریێ هێتە بڕێڤەبرن، ئەڤ پێنگاڤە هات پشتی ب سۆپاسی ڤە لژنەیا ئۆلمپیا كوردستانێ كو پشتەڤانیا خوە بۆ پلان و بەرنامێن مە یێن ئەڤ سالە دیاركری و پرانیا وان پەسەندكرینە و ئەڤە ژی دێ بیتە ئەگەر لڤین و پێشكەفتن د یاریا پایسكلان ل كوردستانێ دا دیاربیت، بهیڤی نە ل دووڤ پلانێن خوە بشێن ب گەهینە ئەوێ ئارمانجا مە دڤێت ئەوژی پێشئێخستنا وەرزشا كوردستانێ یە.