ده‌سته‌یه‌ك بۆ باوه‌ریدان ب دامه‌زراوه و پرۆگرامێن په‌روه‌ردێ و خواندنا بلند هاته دامه‌زراندن
ئه‌ڤرۆ:
مه‌سرور بارزانی سه‌رۆكێ حوكمه‌تا هه‌رێما كوردستانێ دوهی 5/12/2022 سه‌رپه‌رشتیا كۆمبوونا به‌رهه‌ڤیا ده‌ست ب كاربوونا ده‌سته‌یا باوه‌ریدان ب دامه‌زراوه و پرۆگرامێن په‌روه‌ردێ و خواندنا بلند ل هه‌رێما كوردستانێ كر، كو یاسایا وێ هه‌ژمار 6 یا سالا 2022 ل 4/8/2022 كه‌فتیه د بیاڤێ ب جهئینانێ دا.
سه‌رۆكێ حوكمه‌تێ دوپاتی ل گرنگیا هه‌بوونا وێ ده‌سته‌یێ كر و ئاماژه ب وێ چه‌ندێ كر، ئارمانجا سه‌ره‌كی ژ دامه‌زراندنا وێ ده‌سته‌یێ ئه‌وه، كۆمه‌كا پیڤه‌ر و ستانداردێن كارپێكری یێن نێڤده‌وله‌تی یێن هه‌ڤگرتی بۆ خواندن و پرۆگرامێن په‌روه‌ردێ و خواندنا بلند ل هه‌رێما كوردستانێ بهێنه دانان و كار بۆ كێمكرنا جوداهیا ئاستێ كولیتیا زانستی ل ناڤه‌ندێن خواندنێ و زانكۆیێن كه‌رتێ تایبه‌ت و گشتی بكه‌ت بۆ پشتڕاست بوون ژ بلندكرنا ئاستێ په‌روه‌رده‌یی و زانستی یێ دامه‌زراوه‌یێن په‌روه‌ردێ و خواندنا بلند ل هه‌رێما كوردستانێ.
سه‌رۆكێ حكومه‌تێ خویا كر، پیڤه‌رێن گونجای بۆ چه‌سپاندنا بنه‌مایێن باوه‌ریدان ب رێیا رێكخستنا پرۆسه‌یا پێداچوون و چاڤدێریكرن و پشته‌ڤانیكرنا هه‌ردو وه‌زاره‌تێن په‌روه‌ردێ و خواندنا بلند بۆ گه‌شه‌پێدا شیانێن مرۆڤی و ب ده‌ستڤه‌ئینانا باوه‌رنامه‌یێن باوه‌ریێ بۆ زانكۆ و قوتابخانه‌یان بهێنه دانان.
