د سینه‌مایێ دا پتر حه‌ز ژ كارێ ده‌نگی دكه‌ت
دهۆك، زنار تۆڤی:
هێڤار عومه‌ر فلمسازه‌كه، ل باژێرێ هه‌ولێرێ دژیت، د دیداره‌كێ دا بۆ رۆژناما ئه‌ڤرۆ دیاركر: كو ل سالا 2013 وی ده‌ست ب كارێ چێكرنا فلمان كرییه و ل ده‌ستپێكێ كارێ شانۆیێ دكر، پاشی چوویه كۆلیژا هونه‌رێن جوان پشكا سینه‌مایێ خواندییه ل هه‌ولێرێ، هه‌ر چه‌نده ئه‌و كارێ ده‌نگی دكه‌ت، دیسان وی د زنجیرا درامایی دا یا ب ناڤێ (چه‌رخ و فه‌له‌ك) دا كار كرییه، كو ژ ده‌رهێنانا بیلال شاكری بوو، هه‌روه‌سا وه‌كو هاریكارێ ده‌نگی ژی د چه‌ند فلمان دا كار كرییه، وی پیشه‌یێ ده‌نگی ژبه‌ر هندێ هه‌لبژارت، چونكی ل كوردستانێ ڤالاهی د وی بیاڤی دا هه‌یه، له‌وما وی ئه‌و چه‌نده هه‌لبژارت.
ناڤهاتی گۆت: نوكه هژماره‌كا كه‌سان د بیاڤێ ده‌نگی دا ل كوردستانێ كار دكه‌ن، ئه‌ڤه ژی جهێ دلخۆشییێ یه، كو ئێدی ئه‌م دشێین پشت به‌ستنێ ل سه‌ر خۆ بكه‌ین و پێدڤی ژ ده‌رڤه نه‌بین، هه‌تا نوكه من ئه‌زموون د سێ فلمێن درێژ دا هه‌یه، دووماهی فلمێ مه ب ناڤێ (ده‌كان) بوو، كو ژ ده‌رهێنانا حه‌سه‌ن عه‌لی بوویه، ئه‌و فلم ل سه‌ر شۆره‌شا ئیلۆنێ بوویه، ئه‌ڤ چه‌نده بۆ من شانازی بوویه، كو ئه‌ز بشێم فلمه‌كێ ب وی ره‌نگی دروست بكه‌م، هه‌روه‌سا من كارێ ئه‌كته‌رییێ و كامیرێ و سیناریست و هاریكارێ ده‌رهێنه‌ری ژی كرییه، هه‌روه‌سا ل قووناغا چارێ یا خواندنێ من فلمه‌ك دروستكر ب ناڤێ (هێتفۆن)، كو ژ ده‌رهێنانا من بوو، ل سه‌ر ئاستێ كۆلیژێ من پلا ئێكێ ب ده‌ست ڤه ئینا، خۆشترین كار بۆ من كارێ ده‌نگییه د بیاڤێ سینه‌مایێ دا.
