د پلانێ دایە كەرتێ گەشتیاری بهێتە ڤەژاندن
ئەڤرۆ
هەولێر، قائید میرۆ
بەرپرسەكێ دەستەیا گەشت و گوزارێ راگەهاند، بڕیارە سال بۆ سالێ هژمارا گەشتیاران بهێتە زێدەكرن و كەرتێ گەشتیاری بهێتە ڤەژاندن. هەروەسا دبێژیت: هەر كەسەكێ پڕۆژێ گەشتیاری هەبیت دێ مفاداربیت ل قەرێ بانكا ناڤەندی و دەلیڤێن كاری دێ پەیدابن بۆ وەلاتی و دەرچوویێن پشكێن گەشت و گوزارێ.
سیروان تۆفیق، رێڤەبەرێ بازاڕكرنێ ل دەستەیا گەشت و گوزارێ بۆ رۆژناما ئەڤرۆ دیار كر «پلانا گەشت و گوزارێ هاتیە دانان و حوكمەتا هەرێما كوردستانێ گرنگیەكا تایبەت ب كەرتێ گەشتیاری ددەت مینا كەرتەكێ گرنگ بۆ زێدەكرنا داهاتێ هەرێما كوردستانێ و گەشەكرنا ئابورێ هەرێمێ، ئێك ژ وان خالێن ناڤا كابینا نەهێ یا حوكمەتا هەرێما كوردستانێ هاتین تایبەتە ب كەرتێ گەشت و گوزارێ و پێشڤەبرنا كەرتێ گەشتیاری هەر سال گۆرەی پلانەكا دەستەیا گەشت و گوزارێ گەشتیار دهێنە هەرێمێ و سال بۆ سالێ ژی هژمارا هاتنا گەشتیاران د زێدەبوونێ دایە، هەتا پلان هەیە هەتا سالا 2030ێ رێژا هاتنا گەشتیاران بگەهینینە 20 ملیۆن گەشتیاران، ئەڤە ژی دێ بیتە ئەگەرێ پەیدابوونا دەلیڤێن كاری بۆ خەلكێ كوردستانێ و ڤەژاندنا كەرتێ گەشتیاری، چونكو چەندی هژمارا گەشتیاران زێدەببیت دێ كاریگەری هەبن ل سەر بازاڕی و جهێن گەشتیاری دێ ڤەژین.
ل دۆر كۆمپانیێن گەشتیاری ژی سیروان تۆفیق گۆت «پشتی دووماهی هاتنا پەژیكا ڤایرۆسا كۆرۆنایێ، تۆماركرنا كۆمپانی و نڤیسینگەهێن گەشتیاری زێدەكریە، د دەمێ نوكە دا نێزیكی 500 كۆمپانی و نڤیسینگەهێن گەشتیاری ل هەرێما كوردستانێ هەنە و كار دكەن، بەردەوام ژی هژمارا كۆمپانی و نڤیسینگەهێن گەشتیاری د زێدەبوونێ دایە، هەرێما كوردستانێ سرۆشتەكێ جوان هەیە بۆ ئینانا گەشتیاران ل دەرڤە و سالانە ل دەڤەرێن ناڤەڕاست و باشوورێ عێراقێ هژمارەكا زۆرا گەشتیاران سەرەدانا جهێن گەشتیاری دكەن.
زێدەتر گۆت: ئەم د گەشبینین ل داهاتی دێ كەرتێ گەشتیاری بیتە ژێدەرێ ژیانا وەلاتیێن هەرێما كوردستانێ، چونكە دەلیڤێن كاری دێ پەیدابن و بازاڕ دێ تژی بیت ژ گەشتیاران ل هەموو جیهانێ ژی گەشتیار بووینە ژێدەرێ داهاتی و پەیداكرنا دەلیڤێن كاری بۆ وەلاتیان، ب تایبەتی مە لبەرە ب رێیا بانكا ناڤەندیا عێراقێ قەری بدەینە وان كەسێن پڕۆژێن بچووك و ناڤنجی یێن گەشتیاری رێڤەدبەن، هەر كەسەكێ دەرچوویێ زانكۆیێ یان وەلاتی ژی بیت پڕۆژێ گەشتیاری هەبیت دێ مفاداربیت ل قەرێ بانكا ناڤەندی، بەلێ هێشتا رێنمایێن مفاداربوونا ڤی قەری نەهاتینە دەركرن.
