رێڤه‌به‌رێ گشتیێ ژێده‌رێن ئاڤێ: ئیداره‌كرنا ئاڤێ ب ڤی شێوه‌ی بیت دێ كاره‌سات په‌یدابن
هه‌ولێر، قائید میرۆ
به‌رپرسه‌كێ حوكمه‌تا هه‌رێما كوردستانێ هۆشداریێ دده‌ت ل دۆر پرسا هشكه‌سالیێ و دبێژیت: ئه‌گه‌ر ئیداره‌كرنا ئاڤێ نه‌هێته گۆهۆڕین و ب ڤی ده‌ست و داری سه‌ره‌ده‌ری دگه‌ل ئاڤێ بهێته‌كرن، ب تایبه‌تی ئاڤا بن ئه‌ردی دێ چه‌ند سالێن داهاتی كاره‌سات په‌یدابن و ئاماژه‌كر، حوكمه‌تا هه‌رێما كوردستانێ پلان هشكه‌سالیێ به‌رهه‌ڤكریه و چه‌ندین پڕۆژه دێ بهێنه بجهئینان.
دكتۆر كاروان هه‌ورامی، رێڤه‌به‌رێ گشتیێ ژێده‌رێن ئاڤێ بۆ رۆژناما ئه‌ڤرۆ دیار كر “هشكه‌سالیێ تنێ كاریگه‌ری لسه‌ر عێراق و هه‌رێما كوردستانێ نه‌بوویه، به‌لكۆ لسه‌ر ئاستێ جیهانێ كاریگه‌ری هه‌بوویه هه‌ر ل ئه‌فریقا هه‌تا دگه‌هیته ناڤه‌ڕاستا ئاسیا، مخابن سال بۆ سالێ كاریگه‌ریێن هشكه‌سالیێ زێده‌تر ده‌ر دكه‌ڤن، دیارده‌یا هشكه‌سالیێ پێدڤی ب پلانێن موكم هه‌یه، حوكمه‌تا هه‌رێما كوردستانێ د چوارچوڤێ به‌رهنگاربوونا هشكه‌سالیێ پلانه‌ك به‌رهه‌ڤكریه و پلانا حوكمه‌تێ ل سه‌ر دو ئاستانه، یا ئێكێ لسه‌ر بنه‌مایێ ژێرخانا ئاڤێ كار دهێته‌كرن و بۆ ڤێ مه‌ره‌مێ ژی بڕیاره ل چه‌ند رۆژێن داهاتی 13 پڕۆژه بهێنه راگه‌هاندن و بكه‌ڤنه بیاڤێ بجهئینانێ دا، پڕۆژێن حوكمه‌تێ د بیاڤێن ئاڤدێری و چێكرنا سكرا و راكێشانا ئاڤێ یه، ئه‌ڤه ژێر بۆ گرنگیدان ب ژێرخانا ئاڤێ یه و دێ هه‌موو بزاڤه‌ك هێته‌كرن بۆ ڤێ چه‌ندێ پڕۆژه بۆ كێمكرنا كاریگه‌ریێن هشكه‌سالیێ بهێنه بجهئینان، به‌لێ به‌رهنگاربوونا هشكه‌سالیێ و بابه‌تێ ئاڤێ ل سه‌ر دو ئاستایه ئه‌و ژی حوكمه‌ت و وه‌لاتی، واته دڤێت وه‌لاتی و جڤاكژی هاریكاربن بۆ پرسا ئاڤێ.
دكتۆر كاروان هه‌ورامی گۆت ژی “مه ئاریشه هه‌یه بۆ پاراستنا ئاڤا بن ئه‌ردی، چونكه قانوونه‌كا گونجای نینه بۆ پاراستنا ئاڤا بن ئه‌ردی و قانوونه‌كا سه‌رده‌میانه ل هه‌رێما كوردستانێ نینه بۆ پاراستنا ئاڤا بن ئه‌ردی، پڕۆژه قانوونه‌ك هه‌یه و ل په‌رله‌مانێ كوردستانێ خواندنا دویێ بۆ هاتیه‌كرن، به‌لێ ئه‌و ژی مایه و كار لسه‌ر نه‌هاتیه‌كرن، ل هه‌موو جیهانێ ئیداره‌دان و سه‌ره‌ده‌ری كرن دگه‌ل بابه‌تێ ئاڤێ ب شێوازه‌كێ پێشكه‌فتیه و هاتیه گۆهۆڕین، پێدڤیه رێڤه‌برنا ئاڤێ لسه‌ر بنه‌مایێ فه‌لسه‌فه‌یا ئابوری و ژینگه‌هی بڕێڤه‌بچیت، پاراستنا ئاڤێ تێكه‌لی بابه‌تێن سیاسی هاتیه‌كرن و هنده‌ك خه‌لك ب ئاشكرا داخوازێ ل وه‌لاتیان دكه‌ن پیڤه‌رێن ئاڤێ بهێنه لێڤه‌كرن ئه‌ڤێ چه‌ندێ زیانێن مه‌زن بۆ نفشێ داهاتی هه‌نه، ب ڤی ده‌ست و داری ئیداره‌یا ئاڤێ بهێته‌كرن ل هه‌رێما كوردستانێ ناگه‌هینه 10 سالێن دی كاره‌ساتێن مه‌زن دێ په‌یدابن، نابیت ب ڤی شێوه‌ی ئاڤا بن ئه‌ردی بهێته بكارئینان پاشه‌ڕۆژه‌كا باش نابیت بۆ كه‌رتێ ئاڤێ، هژماره‌كا زۆرا بیرێن نه‌قانوونی هاتینه لێدان و رێژه‌كا زۆرا ئاڤا بن ئه‌ردی بهه‌روه‌دچیت، نوكه ئه‌م یێ پێداچوونێ دكه‌ین بۆ بابه‌تێ چاندنێ و بكار ئینانا ئاڤێ پلان ئه‌ڤه ئابووریه‌كا دروست د كه‌رتێ ئاڤێ دا بهێته‌كرن و ئه‌و سامانێ نه‌ته‌وه‌یی و نیشتیمانی بهێته پاراستن، ده‌ركرنا قانوونێن باش و پلانێن حوكمه‌تێ دێ هاریكاربن بۆ ڤێ چه‌ندێ هه‌رێما كوردستانێ بشێت سه‌ره‌ده‌ریه‌كا زانستیانه دگه‌ل كه‌رتێ ئاڤێ بكه‌ت.
