سه‌رۆكێ حوكمه‌تێ بڕیار دا سیسته‌مێ غازێ بهێته راگرتن
ئه‌ڤرۆ:
سه‌رۆكێ حكومه‌تا هه‌رێما كوردستانێ ئالیێن په‌یوه‌ندیدار راسپاردن، پێداچوونێ د هه‌موو ئه‌و جهێن گشتی و تایبه‌ت دا بكه‌ن، یێن سیسته‌مێ غازێ ب كار دئینن.
مه‌سرور بارزانی، سه‌رۆكێ حكومه‌تا هه‌رێما كوردستانێ دوهی 22/11/2022 سه‌رپه‌رشتییا كۆمبوونه‌كا تایبه‌ت ب ئه‌گه‌رێ ڕوودانێن په‌قینێن غازێ ل سلێمانیێ و دهۆكێ كر، ل ده‌ستپێكا كۆمبوونێ، پرس و سه‌ره‌خوه‌شیێن خوه ئاراسته‌ی بنه‌مال و كه‌سوكارێن قوربانیان كرن و هیڤیا چاره‌سه‌ربوونێ بۆ بریندارێن هه‌ردو ڕوودانان خواست.
مه‌سرور بارزانی، سه‌رۆكێ حكومه‌تا هه‌رێما كوردستانێ ڕاگه‌هاند: د كۆمبوونا دوهی دا مه به‌حس ل گیانفیدایی و قوربانیدانا ڕائید عه‌لی به‌رواری، جێگرێ رێڤه‌به‌رێ پۆلیسێن هه‌وارهاتنا دهۆكێ و پۆلیسێن هاریكار كر، كو پێناڤ پاراستنا گیانێ وه‌لاتیان و ب تایبه‌ت قوتابیان خوه كرنه قوربانی.
سه‌رۆكێ حكومه‌تا هه‌رێمێ د كۆمبوونێ دا ئالیێن په‌یوه‌ندیدار یێن حكومه‌تێ راسپاردن، كو پێداچوون د هه‌موو ئه‌و جهێن گشتی و تایبه‌ت دا بهێته كرن یێن ڤی جۆرێ سیسته‌می ب كار دئینن و ڤه‌كۆلینێن رژد و هوور ل دۆر جۆرێ غازێ و ئالیێن بجهئینه‌ر و ئه‌گه‌رێن ڕوودانا سلێمانی و دهۆكێ بكه‌ن و ب كارئینانا ئه‌ڤی سیسته‌می ل جهێن دهێنه بكارئینان دڤێت بهێنه ڕاگرتن.
