سه‌رۆكێ‌ كۆمه‌لا به‌كاربه‌ران: بابه‌تێ‌ گۆشتێ‌ تێكه‌لێ‌ مه‌ به‌حسكری بۆ سالا 2019 دزڤڕیت

سه‌رۆكێ‌ كۆمه‌لا به‌كاربه‌ران: بابه‌تێ‌ گۆشتێ‌ تێكه‌لێ‌ مه‌ به‌حسكری بۆ سالا 2019 دزڤڕیت

72

دهۆك، نه‌وزاد هلۆری:

ده‌ما چه‌ند رۆژایه‌ ل تۆڕێن جڤاكی و ده‌زگه‌هێن راگه‌هاندنێ‌ ژی ل زار ده‌ڤێ‌ سه‌رۆكێ‌ كۆمه‌لا به‌كاربه‌ران بابه‌تێ‌ هه‌بوونا گۆشتێ‌ قودیكا یێ‌ تێكه‌ل ژ گۆشتێ‌ به‌راز و كه‌ر و هه‌سپ و مریشك و چێلان به‌لاڤبوویه‌، كارگێریا پارێزگه‌ها دهۆكێ‌ و ئالیێن شوله‌ژێ‌ ل گه‌ل سه‌رۆكێ‌ كۆمه‌لا ناڤبری كۆمبوون و د ئه‌نجام دا دیاربوو، كو ئه‌ڤ بابه‌ته‌ بۆ سالا 2019ێ‌ دزڤڕیت و د نوكه‌ دا ئه‌ڤ جۆرێ‌ گۆشتی د بازاری دا نینه‌.

ملله‌ت عسمه‌ت، سكرتێرێ‌ رۆژنامه‌ڤانیێ‌ پارێزگارێ‌ دهۆكێ‌ د كۆنگره‌یه‌كێ‌ رۆژنامه‌ڤانی گۆت: (نوچه‌یه‌ك ل سه‌ر هه‌بوونا جۆره‌ گۆشته‌كێ‌ نه‌ساخله‌م و دوور ژ رێنمایێن ساخله‌میێ‌ ل ده‌زگه‌هێن راگه‌هاندنێ‌ و تۆرێن جڤاكی به‌لاڤبوویه‌، وه‌سا دایه‌ دیاركرن، كو ئه‌ڤ جۆرێ‌ گۆشتی ل بازارێ‌ دهۆكێ‌ هه‌یه‌، پشتی دووڤچوونێ‌ مه‌ دوو روهنكرن به‌لاڤكرن و دایه‌ دیاركرن، كو بێ‌ پشكنین و دووڤچوون چو تشته‌ك ده‌ربازی ناڤا بازاری نابیت، ئه‌ڤ زانیاریه‌ ل چاڤدێریا بازرگانی ژی هاته‌ پشتڕاست كرن، ئه‌م وه‌كو كارگێریا پارێزگه‌ها دهۆكێ‌ ل گه‌ل ئالیێن شوله‌ژێ‌ و ئه‌و كه‌سێ‌ ڤه‌كۆلین كری و سه‌رۆكێ‌ كۆمه‌لا به‌كاربه‌ران ل دهۆكێ‌ كۆمبووین، ئه‌م گه‌هشتینه‌ ئه‌نجامه‌كی و هه‌موو زانیاری ژی ژ لایێ‌ كاوه‌ی، سه‌رۆكێ‌ كۆمه‌لا به‌كاربه‌ران ڤه‌ هاتنه‌ روهنكرن).

هه‌ر د كۆنگره‌ی دا كاوه‌ عه‌بدولعه‌زیز، سه‌رۆكێ‌ كۆمه‌لا به‌كاربه‌رێن كوردستانێ‌ دیار كر كو ئه‌و بابه‌تێ‌ وی ل راگه‌هاندن و تۆرێن جڤاكی ئازراندی بۆ سالا 2019ێ‌ دزڤڕیت و وی پشتبه‌ستن ب ڤه‌كۆلینه‌كێ‌ كریه‌ و گۆت: (د كۆمبوونه‌كێ‌ دا ل گه‌ل ئالیێن شوله‌ژێ‌ مه‌ به‌حسا ئازراندنا بابه‌تی كر، د نوكه‌ دا مه‌ چو به‌لگه‌ ل به‌ر ده‌ست نینن، كو ئه‌ڤ جۆرێ‌ گۆشتێ‌ تێكه‌ل ژ گۆشتێ‌ به‌راز و كه‌ر و هه‌سپ و چێلان هه‌بیت، ژ به‌ركو مه‌ چو یاسا نینن بوو ئه‌نجامدانا پشكنینێن ب ڤی جۆری، بابه‌ت یێ‌ كه‌ڤنه‌ و هه‌ر ل وی ده‌می هاتیه‌ ژناڤبرن، مه‌ مه‌ره‌م ب تنێ‌ ئه‌وه‌، كو هشیاریێن باشتر بۆ لژنه‌یێن په‌یوه‌ندیدار و وه‌لاتیان ژی بكه‌ین، داكو گیانێ‌ وه‌لاتیان یێ‌ پاراستی بیت).

کۆمێنتا تە