سه‌وه‌فان ل چوكێ یان حه‌وزێ و فه‌قه‌راتا بیت پێدڤیه نه‌خۆش هاتنوچوونێ بكه‌ت
ئه‌ڤرۆ، شڤان لقمان:
د. به‌هزاد به‌هجه‌ت بامه‌رنی، تایبه‌تمه‌ندێ نه‌خۆشیێن هه‌ستی و شكه‌ستنان دیاركر سه‌وه‌فانا گه‌هان نه‌خۆشیه‌كا به‌ربه‌لاڤه دناڤ جڤاكێ مه‌دا ب تایبه‌تی سه‌وه‌فانا چۆكێ، سه‌وه‌فانا چۆكێ د ژیێ پێنجی ساڵیێ و سه‌ردا و ل ده‌ف ژنان پتر ژ زەلامان په‌یدا دبیت، ژ نیشانێن ڤێ نه‌خوشیێ ئێشانا چۆكێ د ده‌ته رانی یان بنێ پێی یانژی وه‌رمینا چوكی، هه‌روه‌سا قفلبوونا چوكی ده‌مێ روونشتن و رابوونێ، ئه‌ڤه ئه‌و نیشانن كو نه‌خۆش سه‌ره‌دانا نۆشداری دكه‌ت.
تایبه‌تمه‌ندێ هه‌ستی و شكه‌ستنان دا زانین ئه‌گه‌رێن دروستبوونا سه‌وه‌فانا چۆكان تێكچوونا كركرێن چۆكینه كو گرانی دكه‌ڤیته سه‌ر و هه‌ستی نێزیكی ئێك دبن و دبیته ئه‌گه‌رێ ئێشانێ، و گۆت: سه‌وه‌فان ل ده‌ف ژنێ زێده‌تره، چونكو هورمونێن ژنێ د عه‌مرێ چل هه‌تا پێنجی سالیێ كێمدبن و هێزا كركر و هه‌ستی كێمدبیت و سه‌وه‌فان په‌یدادبیتن، هه‌روه‌سا ته‌عدای دهێته كرن سه‌ر چوكی و حه‌وزێ ژنێ ده‌مێ دووگیانیێ دا و كێشا زێده یا ژنێ كاریگه‌ریێ دروست دكه‌ت، هه‌روه‌سا كێمیا هاتنووچوونا ژنێ د جڤاكێ مه‌دا كو ده‌ركه‌تنا وێ یا سنورداره .
هه‌روه‌سا ئه‌وژی دیاركر چاره‌سه‌ریا سه‌وه‌فانێ پێدڤیه نه‌خۆش كێشا له‌شێ خوه كێم بكه‌ت ئه‌گه‌ر یا زێده‌بیت، هه‌روه‌سا زەحمه‌تێ بو چوكان دروست نه‌كه‌تن وه‌كی نه چه‌مینیت ل بن خوه ڤه و بۆ ده‌ستاڤێ پێدڤیه یا غه‌ربی ب كاربینیت و ده‌ره‌ج و ئه‌ڤرازیان كێمكه‌ت، هه‌روه‌سا خوه ب پارێزیت ژ سه‌رمایێ و گه‌له‌ك هاتنوچوونێ ئه‌نجامبده‌ت و غاردان و خوه هه‌لاڤێتن چێنابن بۆ ڤێ نه‌خۆشیێ، هه‌روه‌سا دگه‌ل ڤان دێ ده‌رمان هێنه ب كارئینان كو چه‌ندین جورن و ئه‌ڤ ده‌رمان و چاره‌سه‌ریه دهێنه بكار ئینان بو راوه‌ستاندنا سه‌وه‌فانێ “چ چاره‌سه‌ریێن دووماهی ئینان ب ڤێ نه‌خوشیێ نینن” ئه‌گه‌ر سه‌وه‌فان گه‌هشتبیته قۆناغێن پێشكه‌فتی وی ده‌می پێدڤی ب نشته‌رگه‌ریێ یه ئه‌وژی نشته‌رگه‌ریا گوهورینا گه‌ها چوكێ یه ، سه‌وه‌فان ل چۆكێ پتره ژ حه‌وزێ.
ل دووماهیێ د. به‌هزاد به‌هجه‌ت بامه‌رنی، دیاركر سه‌وه‌فان ل چوكێ بیت یان حه‌وزێ بیت یان فه‌قه‌راتا بیت پێدڤیه نه‌خۆش هاتنوچوونێ بكه‌ت به‌رده‌وام، هه‌روه‌سا وه‌رزشێ ئه‌نجامبده‌ت ده‌مێ هاتنوچوون كێم بیت دێ هه‌ستی خاڤ بیت و ماسولكه لاواز بیت، هه‌روه‌سا كركرك دێ لاوازبیت و پێدڤیه شێوازێ ژیانا خوه بگوهۆریت و ل دووف رێنمایێن نۆشداری بچیت.
