كازمی و سه‌ركردێن سیاسی یێن ئیراقی: نابیت ململانێیا توركیا و گرۆپێن چه‌كدار ل ئیراقێ بهێته ئێكلاكرن
ئه‌ڤرۆ:
سه‌رۆك وه‌زیرێن ئیراقێ، مسته‌فا كازمی، ل گه‌ل هه‌ردو سه‌رۆكایه‌تیێن دی یێن ئیراقی و سه‌ركردێن ئالیێن سیاسی و نوونه‌رێن وان كۆمبوو بۆ باسكرا پرسا نۆپبارانكرنا سنوورێ زاخۆ و تێدا هاته دووپاتكرن كو نابیت ململانێیا د ناڤبه‌را توركیا و گرۆپێن چه‌كدار ل ئیراقێ بهێته ئێكلاكرن.
نڤیسینگه‌ها رۆژنامه‌ڤانیا سه‌رۆك وه‌زیرێن ئیراقێ د به‌یاننامه‌كێ دا به‌لاڤكر كو هه‌رسێ سه‌رۆكایه‌تیێن ئیراقێ و سه‌ركردێن سیاسی و حزبی و نوونه‌رێن وان ل سه‌ر داخوازناما مسته‌فا كازمی، سه‌رۆك وه‌زیرێن ئیراقێ كۆمبوون.
ب گۆره‌ی وێ به‌یاننامێ، ئه‌و كۆمبوونه بۆ دانوستاندنێ بوو ل دۆر پێشهاتێن ره‌وشا ئه‌منی ژ ئه‌گه‌رێ ده‌ستدرێژیێن توركیا ل سنوورێ پارێزگه‌ها دهۆكێ، ئاماژه ب وێ چه‌ندێ ژی هاتیه دان كو د وێ كۆمبوونێ دا كازمی هوورده‌كاریێن هه‌لویستێن سیاسی و مه‌یدانی و پێشڤه‌چوونا وان باسكر ل گه‌ل وان پیرابوونێن ل چه‌ندین ئالیان هاتینه وه‌رگرتن بۆ به‌رگریكرنێ ژ سه‌روه‌ریا ئاخا ئیراقێ.
هه‌روه‌سا كامی باسێ گاڤێن دبلۆماسی و وێ سكالایێ كر كو پێشكێشی جڤاتا ئاسایشا نێڤده‌وله‌تێ و نه‌ته‌وێن ئێكگرتی دێ هێته كرن ل دۆر وی بابه‌تی.
د وێ به‌یاننامێ دا هاتیه ژی، پشكداربوویێن كۆمبوونێ دووپاتی ل سه‌ر رێزگرتنێ ل ئیراقێ و بنه‌مایێن جیرانیێ كر ل گه‌ل رێگریێ ل هه‌موو ده‌ستدرێكرنه‌كێ ل سه‌ر وه‌لاته‌كێ جیران ژناڤ سنوورێ ئیراقێ و ئاماژه‌كر كو پشكداربوویێن كۆمبوونێ ره‌تكر كو ئیراق ببیته مه‌یدانه‌ك بۆ ئێكلاكرنا ململانێیا د ناڤبه‌را گرۆپێن چه‌كدار یێن نه شه‌رعی و له‌شكرێ توركیا. هه‌روه‌سا پشكداربوویێن كۆمبوونێ داخواز ژ حوكمه‌تێ كر كو هه‌موو پێرابوونان بگریته‌به‌ر بۆ رێگریێ ل دووباره‌بوونا وان ده‌ستدرێژیان.
ژ ئالیه‌كێ دی ڤه نه‌ته‌وێن ئێكگرتی هێرشا ل سه‌ر ده‌ڤه‌را گه‌شتیاریا په‌ره‌خ ل سنوورێ ئیدارا سه‌ربخوه یا زاخۆ شه‌رمزاركر و داخوازا ڤه‌كۆلینه‌كا بله‌ز ل هێرشێ كر بۆ وێ چه‌ندێ ئالیێ به‌رپرسیار بهێته ئاشكراكرن.
فه‌رحان حه‌ق، جێگرێ په‌یڤدارێ سكرتێرێ گشتیێ نه‌ته‌وێن ئێكگرتی د به‌یاننامه‌كێ دا گۆت” ئه‌نتۆنیۆ گوتێرێز، سكرتێرێ گشتیێ نه‌ته‌وێن ئێكگرتی هێرشا خویناوی یا تۆپبارانكرنا سنوورێ ده‌ڤه‌را زاخۆ شه‌رمزار دكه‌ت گو بوو ئه‌گه‌رێ گیان ژ ده‌ستدانا 9 كه‌سیچن سڤیل و برینداربوونا 26 كه‌سێن دی”.
ب گۆره‌ی وێ به‌یاننامێ، سكرتێرێ گشتیێ نه‌ته‌وێن ئێكگرتی داخوازا ڤه‌كۆلینه‌كا هوور و بله‌ز د روودانێ دا دكه‌ت بۆ وێ چه‌ندێ هه‌لومه‌رجێ پشت هێرشێ بهێته دیاركرن و به‌رپرسیار بهێته ده‌ستنیشانكرن .
