ل بارزان و ئاكرێ 120 سالیا ژ دایكبوونا بارزانیێ نەمر هاتە ساخكرن
ئاكرێ، رەمەزان زەكەریا:
ب هەلكەفتا رۆژا ژ دایكبوونا بارزانیێ نەمر ل بارزان و ئاكرێ چەندین چالاكی هاتنە ئەنجامدان و چەندین دار هاتنە چاندن.
شەوان یوسف بارزانی، سەرۆكێ رێكخراوا هەناسە پلاس یا نێڤدەولەتی بۆ ژینگەهێ بۆ ئەڤرۆ گۆت: «ب هەلكەفتا 14ێ ئادارێ و 120 سالیا رۆژا ژ دایكبوونا بارزانیێ نەمر رێبەرێ نەتەوا كورد، رێكخراوا ناڤبری ل گەل كۆمەكا ژینگەهـدۆستێن دەڤەرێ كۆمەكا بالندان ئازادكرن و بەردانە د ناڤ ژینگەها دەڤەرێ دا».
گۆتژی: «ئەڤ بالندێن هاتینە ئازادكرن ب هاریكاریا ژینگەهـدۆست رەزا هەسنی و فەرماندا ژینگەها بارزان و رێڤەبەریا گەشتوگوزار و چەندین رێڤەبەرێن دام و دەزگەهێن دەڤەرێ بووینە، مەبەست ژێ پاراستنا ژینگەهێیە».
دیسا ل دەڤەرا ئاكرێ ژی 120 دار ب هەلكەفتا ژ دایكبوونا بارزانی نەمر هاتنە چاندن، هەروەسا تەخ و چینێن كوردستانێ سەردانا مەزارێ نەمران ل بارزان كرن و چەندین دار ژی هاتنە چاندن.
مستەفایێ بارزانی ل رۆژا 14/3/1903 هاتیە سەر دونایێ و ل رۆژا 1/3/1979 مالئاڤایی كریە.