نێچیرڤان بارزانی دووپاتیێ ل هه‌ماهه‌نگیێ دناڤبه‌را پێشمه‌رگه‌ی و له‌شكرێ ئیراقێ دا دكه‌ت
نێچیرڤان بارزانی، سه‌رۆكێ هه‌رێما كوردستانێ، پێشوازی ل فیلیب ڤاندین بولكه، بالیۆزێ به‌لجیكا ل ئوردن و ئیراقێ كر.
د كۆمبوونه‌كێ دا پێشڤه‌برنا په‌یوه‌ندیێن ئیراقێ و هه‌رێما كوردستانێ ل گه‌ل به‌لجیكا و رۆلێ به‌لجیكا د چارچۆڤێ هه‌ڤپه‌یمانیا نێڤده‌وله‌تی دژی داعشێ دا، دووماهی پێشهاتێن پرۆسا سیاسی ل ئیراقێ و په‌یوه‌ندیێن هه‌ولێرێ و به‌غدا هاتنه باسكرن.
هه‌ردو ئالیان دووپاتی ل پێشڤه‌برنا په‌یوه‌ندیان و به‌رفره‌هكرنا بوارێن هاریكاریا هه‌ڤپشك كر و د هه‌ڤرا بوون كو هێشتا داعش مه‌ترسیه‌كا راسته‌قینه‌یه و گه‌فه ل سه‌ر ئاسایشا ئیراقێ و ده‌ڤه‌رێ، بۆ وێ چه‌ندێ ژی ئیراق پێدڤی ب به‌رده‌وامیا پشته‌ڤانیا نێڤده‌وله‌تی یا هه‌ی.
بالیۆزێ به‌لجیكا سوپاسی و پێزانینێن وه‌لاتێ خوه بۆ رۆلێ هه‌رێما كوردستانێ د به‌رهنگاریا داعشێ دا و قوربانیێن پێشمه‌رگه‌ی ده‌ربری و دووپاتكر كو وه‌لاتی وی وه‌كو هه‌ڤپشكه‌كێ پێگیر ب پشته‌ڤانیا ئیراقێ و هه‌رێما كوردستانێ دێ مینیت.
ژ ئالیێ خوه‌ڤه سه‌رۆكێ هه‌رێما كوردستانێ سه‌ره‌رای ده‌ربرینا سوپاس و پێزانینێن هه‌رێما كوردستانێ بۆ پشته‌ڤانی و هاریكاریێن به‌لجیكا د شه‌رێ دژی تیرۆرێ دا، دووپاتی ل پێدڤیا هاریكاریێ و هه‌ماهه‌نگیێ د ناڤبه‌را له‌شكرێ ئیراقێ و پێشمه‌رگه‌ی كر ب تایبه‌تی ل وان ده‌ڤه‌رێن ڤالاهیا ئه‌منی لێ هه‌ی.
ره‌وشا شنگالێ و ئاواره‌بوونا خه‌لكێ ده‌ڤه‌رێ ژ ئه‌نجامێ پێشهاتێن ئه‌منی، ره‌وشا ناڤخوه‌یا هه‌رێما كوردستانێ و گرنگیا دانوستاندنێ بۆ لێكتێگه‌هشتنێ، پرسا ئازادیا راده‌ربرینێ، ره‌وشا ده‌ڤه‌رێ ب گشتی، چه‌ند ته‌وه‌رێن دی یێن كۆمبوونێ بوون.
