هه‌وه‌كا هشیاركرنا شۆفێر و وه‌لاتیان ل زاخۆ ده‌ست پێكر
زاخۆ، عه‌لی حاجی:
به‌رپرسێ راگه‌هاندنا رێڤه‌به‌ریا هاتنوچوونا ئیداره‌یا سه‌ربخوه یا زاخۆ دیار كر د ئه‌ڤ ساله دا 174 روودانێن هاتنوچوونێ دروست بووینه و د ئه‌نجام دا شه‌ش كه‌سان گیانێ خوه ژ ده‌ست دایه.
رائید محه‌مه‌د سلێمان، به‌رپرسێ راگه‌هاندنا رێڤه‌به‌ریا هاتنوچوونا ئیداره‌یا سه‌ربخوه یا زاخۆ گۆت: “مه د رۆژا جیهانی یا روودانێن ترافیكی دا ده‌ست ب هه‌وه‌كێ كریه ژ بۆ زێده‌تر هشیاركرنا شۆفێر و وه‌لاتیان، دیسا ب مه‌ره‌ما كێمكرنا روودانێن هاتنوچوونێ و قوربانیێن وان، پێدڤی یه جڤاكێ مه یێ هه‌ڤكار بیت، ژ به‌ركو ئه‌م ب تنێ نه‌شێین وان روودانان كێم بكه‌ین”.
ناڤهاتی گۆتژی: “د ده‌مێ 11 مه‌هێن بۆری دا ل سنوورێ ئیداره‌یا سه‌ربخوه یا زاخۆ 174 روودانێن هاتنوچوونێ رووداینه و د ئه‌نجام دا 64 كه‌س بریندار بووینه و شه‌ش كه‌سان ژی گیانێ خوه ژ ده‌ست دایه”.
ل دۆر هه‌وێن هشیاركرنا شۆفێر و وه‌لاتیان رائید محه‌مه‌د گۆت: “ئه‌ڤ هه‌وه د گرنگن، دا كو هشیاریا جڤاكی زێده‌تر لێ بهێت و هاریكار بن ژ بۆ پێگیریكرن ب یاسا و رێنمایێن هاتنوچوونێ، پێخه‌مه‌ت پاراستنا گیانێ وه‌لاتیان”.
