وه‌زاره‌تا سامانێن سروشتی: ئاگه‌هداری خوه‌ڤه‌كێشانا هیچ كۆمپانیه‌كا په‌ترۆلی نینین

وه‌زاره‌تا سامانێن سروشتی: ئاگه‌هداری خوه‌ڤه‌كێشانا هیچ كۆمپانیه‌كا په‌ترۆلی نینین

ئه‌ڤرۆ:

ده‌نگوباسه‌ك ل ده‌زگه‌هێن راگه‌هاندنا ئیراقی به‌لاڤببوو كو كۆمپانیا “په‌یكه‌ر هیوز” كو كۆمپانیه‌كا ئه‌مریكی یا تایبه‌ته‌ ب خزمه‌تگوزاریێن په‌ترۆلی ل هه‌رێما كوردستانێ خوه‌ڤه‌كێشایه‌ ژ هه‌رێمێ، به‌لێ وه‌زاره‌تا سامانێن سروشتی ل هه‌رێما كوردستانێ دبێژیت، ئاگه‌هداری خوه‌ڤه‌كێشانا هیچ كۆمپانیه‌كێ نینن، سه‌رۆكێ لژنا وزێ و سامانێن سروشتی ژی ل په‌رله‌مانێ كوردستانێ دبێژیت، ژ هیچ ژێده‌ره‌كێ كوردی ئه‌ڤ ده‌نگوباسه‌ ب شێوه‌كێ فه‌رمی ب مه‌ نه‌گه‌هشتیه‌.

ئه‌حمه‌د موفتی، بریكارێ وه‌زاره‌تا سامانێن سروشتی ل هه‌رێما كوردستانێ گۆت” سه‌باره‌ت خوه‌ڤه‌كێشانا كۆمپانیا به‌یكه‌ر هیوز هیچ پێزانینه‌ك ب مه‌ نه‌هاتیه‌ دان و ئه‌م د ئاگه‌هدار نینین و ب فه‌رمی ژی هیچ بابه‌ته‌كێ ب ڤی شێوه‌ی نه‌گه‌هشتیه‌ مه‌”.

ژ ئالیێ خوه‌ڤه‌ عه‌لی حه‌مه‌ سالح، سه‌رۆكێ لژنا وزێ و سامانێن سروشتی ل په‌رله‌مانێ كوردستانێ گۆت” من ئه‌ڤ ده‌نگوباسه‌ ل ده‌زگه‌هێن راگه‌هاندنا ئیراقی دیتیه‌، به‌لێ هه‌تا نوكه‌ ژ هیچ ژێده‌ره‌كێ كوردی من نه‌دیتیه‌ و دێ دووڤچوونا زێده‌تر بۆ كه‌ین، هه‌روه‌سا كۆمپانیێ ب خوه‌ ژی هیچ ده‌نگوباسه‌ك سه‌باره‌ت ڤی بابه‌تی به‌لاڤ نه‌كریه‌”.

كۆمپانیا به‌یكه‌ر هیوز كۆمپانیه‌كا ئه‌مریكی یا تایبه‌ته‌ ب خزمه‌تگوزاریێن په‌ترۆلی، ل هه‌رێما كوردستانێ خزمه‌تگوزاریێن په‌ترۆلی وه‌كو كارێن گرێدای ب كولانا بیرێن په‌ترۆلی و پێشڤه‌برنا كیلگێن په‌ترۆلی پێشكێشی كۆمپانیێن كاری د بلۆكێن په‌ترۆلی دا دكه‌ت”.

ژ بلی كۆمپانیا به‌یكه‌ر هیوز، ژ ئه‌گه‌رێ ڤه‌ژاندنا كه‌رتێ په‌ترۆلا هه‌رێما كوردستانێ پشتی سالا 2018 هه‌ژماره‌كا زۆر ژ كۆمپانیێن خزمه‌تگوزاریا په‌ترۆلی ل هه‌رێما كوردستانێ كاردكه‌ن كو هه‌ژمارا وان 1800كۆمپانی یه‌.

به‌یكه‌ر هیوز ل سالا 1970 ل ویلایه‌تا تێكساس یا ئه‌مریكی هاتیه‌ دامه‌زراندن و سالانه‌ نێزیكی 20 ملیار دۆلار داهاتێ وێ یه‌، ل سه‌ر ئاستێ جیهانێ 54 هزار كارمه‌ند وكاركه‌ر یێن هه‌ین، ئه‌و كۆمپانیه‌ سه‌ر ب كۆمپانیا ئه‌مریكی یا مه‌زن “جێنیرال ئێلێكتریك” ڤه‌یه‌.

کۆمێنتا تە