گەنجێن دهۆكێ‌ ب هەموو كاران رازی نابن و زوو رەت دكەن

گەنجێن دهۆكێ‌ ب هەموو كاران رازی نابن و زوو رەت دكەن

10

ئەڤرۆ

هەرهین محەمەد:

رێڤەبەرێ‌ كار ل دهۆكێ‌ دیار كر، هەر كارەكێ‌ هەبیت ل دەستپێكی دەلیڤە بۆ گەنجێن مەیە، بەلێ‌ گەنجێ‌ مە هەموو دەمان ب هەموو كاران رازی نابیت و یا گرنگ ئەوە گەنج ب هندەك كاران رازی بیت، نەكو هەر ل دەستپێكێ‌ رەت بكەت و گۆت: د سالا بوری دا 257 كەس ژلایێ‌ مە ڤە بووینە خودان كار.

عەبدولكەریم شێخ حماد، رێڤەبەرێ‌ كار ل دهۆكێ‌ بۆ بەرپەرێ‌ گەنجان یێ‌ رۆژناما ئەڤرۆ گۆت: قانونا كاری هەیە ل پەرلەمانێ‌ كوردستانێ‌ هاتیە پەسەندكرن وەكو دی ژی مە گەلەك رێنما هەنە گرێدای كرێكارێن بیانی نە و بەشێ‌ بكارخستنێ‌ بۆ دیتنا دەلیڤێن كاری بۆ خەلكی و نوكە ب گشتی چو رێنمایێن نوو نەهاتینە و وەكو یێن بەرێ‌ نە، بەلێ‌ ل نێزیك قانون دێ‌ هێتە گوهۆرین.
گۆت: نوكە مە هەماهەنگی ل گەل چەند رێكخراوەكان هەیە كو پتر بشێن دەلیڤێن كاری بۆ گەنجان بینین و یا گرنگ ئەوە گەنجێ‌ مە ژی ب هندەك كاران رازی بیت، نەكو هەر ل دەستپێكێ‌ رەت بكەت و ئەڤ بابەتە گرێدای هەموویانە و ئەم هەموو بزاڤێ‌ دكەین گەنجان ب دامەزرینین ل سەر كاران و هەر كارەكێ‌ هەبیت دەستپێكی بۆ گەنجێ‌ مەیە و مافێ‌ وی یە ببیتە خودان كار، بەلێ‌ هندەك كار هەنە گەنجێ‌ مە ناكەت و هندەك ژی رازی دبن وی كاری بكەن.
زێدەتر دبێژیت: بۆ ڤێ‌ مەرەمێ‌ ژی بەری چەندەكێ‌ خودانێ‌ كومپانیەكا چێكرنا قالبێن ئاسنی بوو د گۆت زەحمەتەكا مەزن دبینم ب كرێكارێ مە ڤە هەتا فێری لكاندنێ‌ دبن، هەر دیسا مەترسی ژی ل سەر هەیە و تەحەمولا وی كاری ناكەن و ل دەمەكێ‌ نێزیك دەست ژ كاردكێشن، هەكە یێ‌ بیانی بیت بۆ ڤی كاری دبیت خوە بگریت و كاربكەت و مە هەنە بۆ خزمەتكارێن نافمالێ‌ و خودانكرنا زارۆیان ل ڤێرێ‌ ژی مە كێشە هەیە و هەكە كرێكارێ‌ خومالی هەبیت دێ‌ بۆ سێ‌ چار دەمژمێران كاركەت، چونكو خودان زارۆكن و خودان كری ژی دڤێت 24 دەمژمێران ل مالا وی كاربكەت و دبیت نەخوش د مال دا هەبن.
عەبدولكەریمی زێدەتر گۆت ژی: رێڤەبەریا كار د دەمێ‌ سالا بوری دا گەلەك كەس ب كار ئێخستینە و هەتا نوكە د بەردەوامین و مە خول ژی ڤەكرینەوە و خولێن چەوانیا داگرتنا سیڤیەكی، یان چەوانیا چوونا بازارێ‌ كاری و ماف و ئەركێن خودان كاری چنە و نوكە مە گرێبەستەك ل گەل رێكخراوا كار یا نێڤدەولەتی (ilo) ئەم كاردكەین و ب هاریكاریا وان بشێن رێژا بێ‌ كاریێ‌ كێم كەین و د سالا بوری دا 257 كەس ژلایێ‌ مە ڤە بووینە خودان كار و دیسان مە خولێن راهێنانێ‌ بۆ 400 كەسان ڤەكرینە و پروسێس یا بەردەوامە بزاڤێ‌ دكەین رێژا بێكاریێ‌ كێم بكەین.

کۆمێنتا تە