ئەڤ سالە ژی دێ بەرهەمێ ناڤخۆ چیتە دەرڤە
هەولێر: قائید میرۆ
بەرپرسەكا وەزارەتا چاندنێ ئاشكرا كر، حوكمەتا هەرێما كوردستانێ یا رژدە ل سەر پشتەڤانیا جوتیاران و پەیداكرنا بازاڕی بۆ بەرهەمێ نافخۆ، لەوڕا ژی كار بۆ هنارتنا بەرهەمێ نافخۆ بۆ بازاڕین دەرڤە دهێتەكرن. هەروەسا دبێژیت: پڕۆژە قانوونەك ل دور ئاسایشا خوارنێ دهێتە بەرهەڤكرن و پێشكێشی پەرلەمانێ ئیراقێ هێتەكرن.
دكتۆر زێدا محەمەد، رێڤەبەرا گشتیا پلاندانانێ ل وەزارەتا چاندنێ بۆ رۆژناما ئەڤرۆ دیار كر” ل چەند رۆژێن بووری لیژنا بلندا نیشتیمانی بۆ ئاسایشا خوارنێ كۆمبوو و تێدا دانوستان ل دور ڤی پرۆژەی هاتنەكرن یێ نوكە دهێتە بەرهەڤكرن گرێدایئاسایشا خوارنێ و پشتی ب دووماهی دهێت دێ هێتە هنارتن بۆ پەرلەمانێ ئیراقێ هەتا ببیتە قانوون، بەلێ ئەو رەشنڤیسا بەری نوكە هاتیە بەرهەڤكرن هەرێما كوردستانێ هندەك تێبینی لسەر هەبووینە و چەند خالەك داینە حوكمەتا ئیراقێ هەتا كار لسەر بهێتەكرن و پێدڤیە پێشنیارێن هەرێما كوردستانێ ژی ل بەرچاف بهێنە وەرگرتن.
زێدەتر دبێژیت: وەزیرێ چاندنا ئیراقێ سەرۆكایەتیا ڤێ لیژنا ئاسایشا خوارنێ دكەت و چەندین كۆمبوونی ژی هەتا نوكە هاتینە بڕێڤەبرن، رێكخراوا فاو مینا هەرێما كوردستانێ هندەك تێبینی هەبوون ل سەر ڤی پڕۆژەی، بیاڤێن ژینگەهێ و ئاڤێ و دامەزراندنا دەزگەهەكی بۆ كوالێتیا خوارنێ و چەندین بیاڤێن دی تێدا هەنە، ئەگەر ب دروستی كار لس ەر بهێتەكرن و ببیتە قانوون ل پەرلەمانی ئەڤە بێگومان دێ گۆهۆڕین پەیدابن و دێ كاریگەریێن خۆ هەبن ل سەر ئاسایشا خوارنێ، بۆ مە ژی وەكی هەڕێما كوردستانێ گرنگیا خۆ هەیە و پشكدارین، ئەز باوەرم بەری پڕۆژە بچیتە پەرلەمانی دێ محەمەد شیاع سودانی سەرۆك وەزیرێن ئیراقێ ژی دگەل لیژنێ كۆمبیت.
ل دۆر هنارتنا بەرهەمێ نافخۆ بۆ دەرڤە دكتۆر زێدا محەمەد گۆت” نڤیسینگەها سەرۆكێ حوكمەتا هەرێما كوردستانێ سەرپەرشتیا ڤێ پرۆسێ دكەت و ل سالێن بۆری چەندین بەرهەمێن نافخۆ یێن جووتیارێن هەرێما كوردستانێ هاتینە هنارتن بۆ بازاڕێن جیهانێ و سیاسەتا حوكمەتێ و كابینا نەهێ ژی ئەڤە پشتەڤانیا جووتیاری بهێتەكرن و بازاڕ بۆ بەرهەمێ نافخۆ بهێتە ڤەدیتن، بێگومان بۆ ئەڤ سالە ژی كار دهێتەكرن بۆ هنارتنا بەرهەمێ جوتیاران و ل گۆرەی پێدڤی دێ بەرهەم هێتە هنارتن بۆ دەرڤە، ب تایبەتی ژی نوكە كار یێ دهێتەكرن بەرهەمێ ئاژەلی فرێكەن بۆ بازاڕێن دەرڤە، چونكە هەرێما كوردستانێ ژلایێ بەرهەمێ مریشك و بەرهەم ئینانا هێكا گەشەیەكا زۆر كریە و زۆر جارا زێدەی خواستا بازاڕێ نافخۆ بەرهەم هەیە و دچیتە پارێزگەهێن ناڤەڕاست و باشوورێ ئیراقێ.
