بەرێ بنیاتی بۆ هەژمارەكا پڕۆژەیان ل ئاكرێ هاتە دانان و هەژمارەك ژی هاتنە ڤەكرن
رەمەزان زەكەریا:
ب بەرهەڤبوونا د. عەلی تەتەر، پارێزگارێ دهۆكێ و هەژمارەكا بەرپرسێن حزبی و حكومی و دەڤەردارێن ئاكرێ و بەردەڕەش و رێڤەبەرێن میری، دوهی 1/10/2024 بەرێ بنیاتی بۆ هەژمارەكا پڕۆژەیان هاتە دانان و هەژمارەك ژی هاتنە ڤەكرن.
پارێزگارێ دهۆكێ د سەرەدانا خۆ دا بۆ ئاكرێ ئاشكرا كر، ئەو پڕۆژەیێن هاتینە ڤەكرن و بەرێ بنیاتی بۆ هاتینە دانان ل سەر بودجەیا تایبەت و گەشەپێدانا پارێزگەهان بوویە ب گوژمێ نەه ملیار و 558 ملیۆن دیناران.
ئەو پڕۆژەیێن هاتینە بەرێ بنیاتی بۆ هاتینە دانان و هاتینە ڤەكرن ب ڤی رەنگێ ل خوارێ بووینە:
بەرێ بنیاتی بۆ پڕۆژەیێ دروستكرنا قوتابخانەكا 18 رێزی ل سەنتەرێ ناوچەداریا دینارتە، ل گەل دروستكرنا قوتابخانەكا 18 رێزی ل سەنتەرێ ناوچەداریا بجیل ب گوژمێ سێ ملیار و 530 ملیۆن و 696 هزار دیناران هاتە دانان، دیسا ڤەكرنا قوتابخانەكا 12 رێزی ل گەرەكا گولان ل سەنتەرێ دەڤەرداریا ئاكرێ ب گوژمێ ملیارەك و 239 ملیۆن و 696 هزار دیناران.
هەروەسا بەرێ بنیاتی بۆ هەژمارەكا پڕۆژەیان ب گوژمێ چار ملیار و 787 ملیۆن و 639 هزار دیناران ل سەر بودجەیا تایبەت یا ئەڤ سالە یا پارێزگەها دهۆكێ هاتە دانان، كو دێ ل سەنتەرێ دەڤەرداریا ئاكرێ و ناوچەداریێن بجیل و دینارتە و گردەسێن هێنە بجهئینان، دیسا دروستكرنا یاریگەهەكا 11 یاریكەری ل ناوچەداریا بجیل و دابینكرنا مۆكێتی بۆ مزگەفت و كەنیسە و تەكیا و هۆلێن ئایینی ل سنوورێ دەڤەرداریا ئاكرێ.
