جێگرا جڤاتا پارێزگه‌ها دهۆكێ‌:بریارا ناحیه‌ بوونا خانكێ‌ دێ‌ مفایه‌كی مه‌زن گه‌هینیته‌ خه‌لكێ‌...

جێگرا جڤاتا پارێزگه‌ها دهۆكێ‌:بریارا ناحیه‌ بوونا خانكێ‌ دێ‌ مفایه‌كی مه‌زن گه‌هینیته‌ خه‌لكێ‌ ده‌ڤه‌رێ‌

16

سێمێل، دلڤین ره‌شید:

جێگرا جڤاتا پارێزگه‌ها دهوكێ‌ دیار كر، ب بریارا  مه‌سرور بارزانی سه‌روكێ‌ حكومه‌تا هه‌رێما كوردستانێ‌، كومه‌لگه‌ها خانكێ‌ ب فه‌رمی بوویه‌ ناحیه‌، د ده‌مه‌كی دا بوو جڤاتا پارێزگه‌ها  دهۆكێ‌ ل 4-5-2016 پێشنیازا ناحیه‌بوونا خانكێ‌ یا كو ژلایێ‌ كارگێریا پارێزگه‌ها دهۆك ڤه‌ هاتبوو دان، پاش هاتبوو بلندكرن بۆ ئه‌نجومه‌نێ‌ وه‌زیران.

 

بێریڤان سلیم شه‌مو، جێگرا جڤاتا پارێزگه‌ها دهوكێ‌ بۆ رۆژناما ئه‌ڤرۆ دیار كر، ب بریارا  مه‌سرور بارزانی سه‌روكێ‌ حكومه‌تا هه‌رێما كوردستانێ‌، كومه‌لگه‌ها خانكێ‌ ب فه‌رمی بوو ناحیه‌، دده‌مه‌كیدا بوو ئه‌نجومه‌نێ‌ پارێزگه‌ها دهوكێ‌ ل 4-5-2016 پێشنیازا ناحیه‌ بوونا خانكێ‌ یا كو ژلایێ‌ كارگێریا پارێزگه‌ها دهۆك ڤه‌ هاتبوودان، پاش هاتبوو بلندكرن بۆ ئه‌نجومه‌نێ‌ وه‌زیران، راسته‌ ئه‌ڤه‌ ده‌مه‌كی درێژ بوو خه‌لكێ‌ خانكێ‌ چاڤه‌ری ڤێ‌ بریارێ‌ بوون، به‌لێ‌ ژبه‌ر قه‌یرانێن دارایی ئه‌ڤ بریار بۆ ده‌مه‌كی هاتبوو  پاش ئێخستن.

ناڤهاتی گۆت ژی: ل گوره‌ی یاسایا ژماره‌ 3 سالا 2009 ژ مادا 6 برگا 13 ژ بۆ ناحیه‌ بوونا هه‌ر ده‌ڤه‌ره‌كێ‌، ئه‌ڤه‌ ژی ژ ده‌ستهه‌لاتێن ئه‌نجومه‌نی نه‌، بێگومان هه‌ر ل ده‌مێ‌ ئه‌ڤ پێشنیاز هاتیه‌ دان بۆچونێن خه‌لكێ‌ خانكێ‌ ژی هاتینه‌ وه‌رگرتن، ئه‌و بوو لژنه‌كا ده‌مكی هاتبوو پێكئینان و سه‌ره‌دانا كۆمه‌لگه‌ها خانكێ‌ كربون ژ بۆ وه‌رگرتنا را و بۆچۆنێن وان، چونكو پێشتر خه‌لكێ‌ خانكێ‌ ب خوه‌ ژی ب داخوازه‌كا فه‌رمی  داخاز كربون كۆمه‌لگه‌ها وان ببیته‌ ناحیه‌.

بێریفان سلیم ئه‌و چه‌نده‌ ژی دیار كر، ئه‌گه‌ر هات و ئه‌ڤ بریاره‌ كه‌ته‌ د وارێ‌ جێبه‌جێكرنێ‌ دا، بێگومان دێ‌ مفایه‌كێ‌ مه‌زن گه‌هینیته‌ خه‌لكێ‌ ده‌ڤه‌را خانكێ‌ ژ لایێ‌ خزمه‌تگوزاری ڤه‌ و دێ‌ بودجه‌یه‌كا تایبه‌ت بۆ هێته‌ ته‌رخانكرن و یه‌كێن ئیداری ژی دێ‌ ل ده‌ڤه‌رێ‌ زێده‌ بن، ئه‌ڤه‌ ژی دێ‌ كار ئاسانیه‌كی بۆ ژیانا خه‌لكێ‌ ده‌ڤه‌رێ‌ په‌یداكه‌ت، ب شێوازه‌كێ‌ گشتی دێ‌ ده‌لیڤێن كاری بۆ ئاكنجیێن ده‌ڤه‌رێ‌ به‌رفره‌هتر لێ‌ هێن.

ل دووماهیێ‌ گۆت: داخازێ‌ ژ سه‌روكێ‌ حكومه‌تا هه‌رێما كوردستانێ‌ و پارێزگارێ‌ دهۆكێ‌ دكه‌ین پتر فوكسا حكومه‌تێ‌ بكه‌ڤیته‌ سه‌ر ناحیا خانكێ‌، چونكو ده‌ڤه‌ره‌كا نوویه‌ و به‌رێ‌ پرۆژان بكه‌ڤیته‌ وێ‌ ده‌ڤه‌رێ‌ ب كریار گرنگیه‌كا زێده‌تر ب ناحیا خانكێ‌ بهێته‌ دان، سه‌ره‌ده‌ریه‌كا باش دگه‌ل خزمه‌تگوزاریێن ڤێ‌ ده‌ڤه‌رێ‌ بهێته‌ كرن.

کۆمێنتا تە