داخواز ژ مه هاتبووكرن سترانه‌كێ ب له‌شكرێ ئیراقێ بێژین
سندس سالح سلێڤانەی:
هونه‌رمه‌ندێ دیارێ باژێرێ زاخۆ (سه‌لام یوسف) دیاركر كو ل نێزیك ئه‌و دێ دو سترانێن خوه یێن نوو به‌لاڤكه‌ت، یا ئێكێ ب ناڤێ (ژیانا من) ژ په‌یڤ و ئاوازێن هونه‌رمه‌ند (وه‌لید یوسف) سترانا دویێ ژی ب ناڤێ (ئه‌ز كوردستانم) ژ په‌یڤ و ئاوازێن هونه‌رمه‌ند (عیسا عه‌بدوللا) ی نه، هه‌ر دو ستران ب پشته‌ڤانیا هونه‌رمه‌ندان (كه‌ریم حه‌یده‌ر و هه‌وار میكائیل) هاتینه تۆماركرن، هه‌ر دو سترانان دكه‌ته دیاری بۆ وان كه‌سێن حه‌زژ ده‌نگێ وی دكه‌ن و ب گۆتنا وی هژماره‌كا دی یا سترانان ل به‌رده‌ستن.
ناڤهاتی، د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ل سالا (1977) ئه‌ز ل باژێرێ مووسل دژیام، ژیێ من شازده سال بوون من هوزان دنڤیسین و هنده‌ك جاران ژی ل ئاهه‌نگ و شه‌هیانان بێی مۆزیك به‌س ب ده‌ربه‌گێ، ئانكو (تۆمبلكێ) ستران دگۆتن، پاشان ل (1979) ل گه‌ل سازێ و تۆمبلكێ من ستران دگۆتن، ل وی ده‌می ئه‌ز داخبارێ ده‌نگێ هونه‌رمه‌ندان (ته‌حسین تەهای و بشار زاخۆیی و محه‌مه‌د ته‌یب تاهر) بووم و من سترانێن وان دگۆتن، د دووڤدا ده‌نگێ هه‌ردو هونه‌رمه‌ندێن زاخۆ( ئه‌رده‌وان زاخۆیی و ئه‌یاز یوسف) ژی گه‌له‌ك كارتێكرن ل من كرن و ئه‌وان ئه‌ز هاندام یێ به‌رده‌وامبم، له‌ورا هه‌تا نوكه ئه‌م یێ ل سه‌ر ڕێبازا وان دچین و هیڤیا من ئه‌وه ئه‌ز شیابم خزمه‌ته‌كا بچووك بۆ هونه‌رێ كوردی پێشكێش بكه‌م و كه‌یفا من ب هه‌موو ئامیره‌یێن مۆزیكێ دهێت، ب تایبه‌ت ژی یێن كوردی.
هه‌روه‌سا گۆت: زێده‌تر ئه‌ز ب ده‌نگێ هه‌ردو هونه‌رمه‌ندێن نه‌مر(ته‌حسین تاهای و محه‌مه‌د ته‌یب تاهر) داخبارم و هه‌موو سترانێن وان بۆ من گه‌له‌ك دخۆشن، بۆ زانین من پتری (160) سترانان هه‌نه و هاتینه تۆماركرن و نوكه پتری (10) سترانێن دی ل به‌ر ده‌ستن به‌س نه‌هاتینه تۆماركرن، هه‌روه‌سا ژبه‌ر هنده‌ك ئه‌گه‌ران هه‌ر ژ سالا (1983) هه‌تا سالا (1990) ئه‌م نه‌دشیاین ب دلێ خوه سترانان بێژین، ل سالا (1986) مه تیپه‌كا هونه‌ری هه‌بوو داخواز ژمه هاته كرن سترانه‌كێ ب له‌شكه‌رێ ئیراقێ بێژین، هه‌روه‌سا به‌ری گۆتنا هه‌ر سترانه‌كێ من هوزان د هه‌لبژارتن و نیشا گه‌له‌ك كه‌سان ددا و هه‌تا ئه‌ز رازی نه دبووم من نه دگۆتن، له‌ورا گه‌له‌كا فه‌ره سترانبێژ بۆ خوه ل هه‌لبه‌ستڤان و ئاوازدانه‌رێن باش بگه‌ڕیت، هه‌تا بشێت سترانێن باش و سه‌ركه‌فتی بێژیت و ب دیتنا من مۆزیكا كه‌ڤن تامه‌كا تایبه‌ت هه‌بوو، ل دووماهیێ دبێژم هه‌ر دله‌كێ ئه‌ڤیندار و ب كول دێ دلێ خوه كه‌مه ده‌ستمال دا پاقژبكه‌ت رۆنكێن شل، هه‌ر دله كێ ب كه‌یف و شاهی دێ دلێ خوه بۆ كه‌م شه‌مال، دا رێكا وی ببیته رۆناهی.
