ده‌ستهه‌لات و ئۆپۆزسیۆنا توركیا كار بۆ بده‌ستڤه‌ئینانا ده‌نگێن كوردان دكه‌ن

ده‌ستهه‌لات و ئۆپۆزسیۆنا توركیا كار بۆ بده‌ستڤه‌ئینانا ده‌نگێن كوردان دكه‌ن

14

ئه‌ڤرۆ:

كۆمپانیێن راپرسیان دیار دكه‌ن كو هه‌لبژارتنێن ڤێجارێ ل توركیا دێ گه‌له‌ك جودا بن ژ یێن بۆری، چونكو د هه‌لبژارتنێن هه‌ری دووماهیێ یێن باژێرڤانیان دا ب ده‌نگێن كوردان ئاكپارتی ژ باژێرڤانیێن مه‌زن ژ ده‌ست دان و نها ترسا ئاكپارتیێ ژ هندێ هه‌یه‌ كو هه‌مان سیناریۆ دوباره‌ ببیت.

كۆمپانیا بوپار یا راپرسیان دیار دكه‌ت كو وان به‌ری چه‌ند رۆژان راپرسیه‌ك ل باژێرێن مه‌زن یێن كوردان ئانكۆ ل ئامه‌دێ، مێردینێ، ئاگری، موش و وانێ كرینه‌ و د ئه‌نجاما راپرسیێ دا دیار بوویه‌ كو پتر ژ ٧٥% ژ كوردان بۆ هه‌لبژارتنێن سه‌رۆك كۆمارێ پشته‌ڤانیێ ل ئه‌ردۆغانی ناكه‌ن و هه‌روه‌سا پتر ژ نیڤا كوردان ژی ڤێجارێ به‌رهه‌ڤ نینن كو د هه‌لبژارتنان دا ده‌نگێ خوه‌ بده‌نه‌ ئاكپارتیێ، لێ ئه‌و یه‌ك رامانا هندێ ژی ناده‌ت كو كورد پشته‌ڤانیێ ل ئۆپۆزسیۆنێ دكه‌ن.

هه‌مان كۆمپانیێ ئه‌و یه‌ك ژی دیار كریه‌ كو نها هه‌م ئاكپارتی و هه‌م ژی ئۆپۆزسیۆنا توركیا ب هه‌موو ره‌نگه‌كێ كار بۆ هندێ دكه‌ن كو كورد ده‌نگێ خوه‌ بده‌نه‌ وان، چونكو ل گۆر ئه‌زموونا چه‌ند سالێن بۆری و هه‌روه‌سا ئه‌نجامێن راپرسیان دیار دبیت هه‌ر ئالیه‌ك كورد پشته‌ڤانی لێ بكه‌ت دێ شانسێ وێ بۆ ده‌ستهه‌لاتێ پتر بیت، ژ به‌ر هندێ ژی نها ئه‌ردۆغان هه‌لوه‌ستێ خوه‌ ل هه‌مبه‌ر كوردان نه‌رم كریه‌ و هه‌روه‌سا هنده‌ك ژ به‌رپرسێن ئاكپارتیێ به‌حسێ ده‌ستپێكرنا قۆناغه‌كا نوو یا ئاشتیێ دكه‌ن كو دیاره‌ ئارمانج ژێ بده‌ستڤه‌ئینانا ده‌نگێن كوردانه‌.

ل ئالیێ دی به‌ری چه‌ند رۆژان ئه‌حمه‌د تورك سیاسه‌تمه‌دارێ ناڤدار یێ باكورێ كوردستانێ ژی راگه‌هاند كو یێن نها خوه‌ كرینه‌ ئۆپۆزسیۆن به‌ری نها د ناڤ ده‌ستهه‌لاتێ دا بوون و وان ژی زۆرداریه‌كا گه‌له‌ك مه‌زن ل كوردان كریه‌، پارتا كۆماری هه‌تا نها دانپێدانێ ب مافێن كوردان ناكه‌ت، چاوا دێ كورد د هه‌لبژارتنان دا پشته‌ڤانیێ ل وان كه‌ن و هه‌روه‌سا ده‌ستهه‌لاتا نها ژی گه‌له‌ك زۆرداری ل كوردان كریه‌ و كورد ژی نه‌چار نینن ده‌نگێ خوه‌ بده‌نه‌ وان، ژ به‌ر هندێ ژی دڤێت ئێدی كورد بخوه‌ ببنه‌ فاكته‌رێ سه‌ره‌كی یێ سیاسه‌تا توركیا و ژ به‌ر هندێ ژی ئه‌م دبێژین كو دڤێت قۆناغه‌كا نوو ل توركیا ده‌ستپێ بكه‌ت كو تێدا رۆل و پێگه‌هێ كوردان یێ دیار بیت.

چاڤدێرێن سیاسی ژی دیار دكه‌ن كو بۆ ئه‌ردۆغانی و هه‌ڤالێن وی ئاشكرا بوویه‌ كو نه‌شێن ڤێجارێ ب ساناهی بهێنه‌ سه‌ر ده‌ستهه‌لاتێ، ژ به‌ر هندێ ژی نها به‌حسێ ده‌ستپێكرنا قۆناغه‌كا نوو دهێته‌ كرن، لێ هه‌كه‌ تشته‌ك وه‌سا هه‌بیت ژی ئه‌و یه‌ك كارتێكرنه‌كا وه‌سا مه‌زن ل هه‌لوه‌ستێ كوردان ناكه‌ت، چونكو كورد ژ ئاكپارتیێ گه‌له‌ك تووره‌ نه‌ و زه‌حمه‌ته‌ ڤێجارێ ده‌نگێ خوه‌ بده‌نه‌ ئاكپارتیێ.

کۆمێنتا تە