د دو یاریێن ئاگرین دا دهۆك و زاخۆ دێ كلاسیكۆیێن كوردستانی مێڤان كەن
قەیس وەیس:
چاڤەڕێ دهێتە كرن ئەڤرۆ دەست ب هەڤڕكیێن گەڕا دویێ ژ وەرزێ نوو یا خولا ستێرێن ئیراقێ یا فوتبۆلێ ب ئەنجامدانا چار یارییان بهێنە كرن، كلاسیكۆییا ئێكێ یا كوردستانی دێ زاخۆ مێڤاندارییا نەورۆز كەت و كلاسیكویا دویێ سوبەهی دهۆك مێڤاندارییا هەولێرێ بكەت.
زاخۆ و نەورۆز د كلاسیكۆیا خوە سەپاندنێ دا
جەماوەرێ وەرزشی یێ یانەیا زاخۆ ب ژڤانن بۆ پشتەڤانی و دیتنا یارییا ئەڤرۆ یا تیما وان یا فوتبۆلێ د ئێكەم پێنگاڤا خوە دناڤ ئەرد وجەماوەرێ خوە دا هاڤێژیت دەمێ ل دەمژمێر هەشت شەڤ مێڤاندارییا یانەیا نەورۆز یا سلێمانیێ بكەت دهێتە هژمارتن ئێكەم كلاسیكۆیا كوردستانی ل وەرزێ ئەڤ سالە دناڤبەرا هەردو یانەیان دا، كوڕێن خابووری د یارییا خوە یا ئێكێ دا ئەوا ئێكشەمبییا بۆری هاتییە كرن ل باژێرێ بەغدا بێ گۆل دگەل تەلەبە وەكهەڤبوو، هەمان ئەنجامێ یانەیا نەورۆز بەرانبەر كەربەلا بوو، دیدارێن هەردو یانەیان شەش جاران بەرانبەر ئێك بووینە، سێ سەركەفتن بۆ زاخۆ و سێ بۆ نەورۆزێ، چو وەكهەڤی نەبووینە، راهێنەرێ كوڕێن خابووری یێ قەتەرییە تەلال ئەلبلۆشی، راهێنەرێ نەورۆز یێ بەرازیلی یە جییۆڤانی ڤیێرا ئەوێ كۆپا 2007ێ بۆ هەلبژارتیێ ئیراقێ ئینایی، زاخۆ دێ پشت گەرمییا جەماوەرێ خوە بزاڤێن سەركەفتنێ كەن، د بەرانبەر دا تیما نەورۆز ژی پارییەكێ ب سانەهی نابیت و دبیت ببیتە ئاستەنگ بۆ كوڕێن خابوری.
كلاسیكۆیا قەرەبووكرنێ و شەڕێ سێ خالان
ژلایێ خوەڤە تیما یانەیا دهۆك دێ یارییا خوە یا دویێ دناڤ ئەرد و جەماوەرێ خوە دا كەت دەمێ سوبەهی ئەینی ل دەمژمێر هەشتی شەڤ مێڤاندارییا یانەیا هەولێر بكەت دوەمین كلاسیكۆیا كوردستانی و ئێك ژ بهێزترین كلاسیكۆییان دخولا ستێرێن ئیراقێ دا ئەوا هەموو پشتەڤانێن ئیراقێ و كوردستانێ گرنگیێ پێ دەن، ئەڤ یارییە بۆ یانەیا دهۆك گەلەك یا گرنگە و دڤێت جەماوەرێ خوە ئاشت بكەت پشتی د یارییا گەڕا ئێكێ دا سەرباری ب جوانترین شێوە ئاهنگا ڤەكرنا خولێ مێڤان كربوو، لێ نەشیا بەرانبەر مێڤانا خوە یانەیا زەورا ب سەركەفتی ، پشتی تیما بەغدایی شیایی ب گۆلەكێ سەركەڤیت، د بەرانبەر دا یانەیا هەولێر د یارییا خوە یا ئێكێ دا ل یاریگەها خوە شیابوو ب دو گۆلان بەرانبەر گۆلەكێ سەركەفتنێ ل سەر یانەیا دیالا ئینابوو، ئەڤ یارییە دێ ب حەق و حسابات بیت بۆ هەردو یانەیان، دهۆكێ دڤێت قەرەبوویا خالێن یاریێن بۆری و ئاشت كرنا جەماوەرێ خوە بكەت و بەردەوامیێ بدەتە رێژەیا زێدەتر یا سەركەفتنا، هەولێرێ دڤێت تۆلێن وەرزێ بۆری ڤەكە و سەركەفتنێ بینت، بۆ زانین د دیدارێن دناڤبەرا وان دا 32 یاری بووینە، 12 سەركەفتن بۆ دهۆكێ، بەرانبەر نەهـ سەركەفتێن هەولێرێ و 11 وەكهەڤی هاتینە.
ژ یاریێن دی یێن ئەڤرۆ، دیالا- شورتە، ئەلكەرمە- ئەلنەفت، ئەلزەورا- ئەلكەرخ، سوبەهی رۆژا ئەینی، ئەلقوە ئەلجەوییە- ئەلمینا، ئەلقاسم- ئەلكارەبا، كەربەلا- ئەلنەجەف، رۆژا شەمبی، نەفت میسان- نەفت ئەلبەسرا، ئەلتەلەبە- ئەلحدود.
