د. فوئاد حسێن: هەبوونا داعشێ ل سنۆرێ ئیراقێ و سووریێ جهێ دلتەنگیێیە
وەزیرێ دەرڤەیێ ئیراقێ راگەهاند: لڤینێن داعشێ ل سنۆرێ ئیراقێ – سووریێ جهێ دلتەنگیێیە.
د. فوئاد حسێن، وەزیرێ دەرڤەیێ ئیراقێ گۆت» ئیراق رێزێ ل خواستا خەلكێ سووریێ دگریت و پەیوەندی ژی ل گەل وەزیرێ دەرڤەیێ نوو یێ سووریێ یا كری».
ل دۆر لڤینێن داعشێ ل سنۆرێن ئیراقێ و سووریێ، وەزیرێ دەرڤەیێ ئیراقێ گۆت» جهێ دلتەنگیێیە» هەروەسا ئەو رێكخراوا تیرۆرستی ژی ب «گەفەكا مەترسیدار» هەژمارت.
د. فوئاد حسێنی ئاماژە ب وێ چەندێ ژی كر» پێشهاتێن ل سووریێ دێ كاریگەری ل سەر دەڤەرێ هەبیت».
ژ ئالییەكێ دیڤە، عەمید حەیدەر كەرخی، رێڤەبەرێ راگەهاندنێ و پەیوەندییان ل فەرماندەیێ زێرەڤانێن سنۆری یێن ئیراقی دیاركر كو هێزێن زێرەڤانێن سنۆری ل سەر سنۆرێ ئیراقێ و سووریێ یێن بەلاڤبووین و پێرابوونێن توند یێن وەرگرتین بۆ رێگریكرنێ ل هەر گەفەكێ یان هاتنا ناڤ ئاخا ئیراقێ.
رێڤەبەرێ راگەهاندنێ و پەیوەندییان ل فەرماندەیێ زێرەڤانێن سنۆری یێن ئیراقی دیاركر ژی كو سەرەرای دانانا كامیرەیێن چاڤدێریێ و ئاسێكرنا سنۆری و لێدانا خەندەكان، پڕۆسەیا دانانا دیوارێ كۆنكرێتی ژی یا بەردەوامە.
دیاركر ژی» ل مەها بۆری هێزێن زێرەڤانێن سنۆری دانانا دیوارێ كۆنكرێتی ب درێژییا 90 كیلۆمەتران ل سەر سنۆرێ سووریێ، ژ شنگالێ هەتا رەبیعە ب دووماهی ئینا و نوكە زێدەتر ژ 260 كیلۆمەتران دیوارێ كۆنكرێتی ل سەر سنۆرێ ئیراقێ و سووریێ یێ هاتیە دانان و پلان یا هەی درێژییا وی دیوارێ كۆنكرێتی بگەهیننە 400 كیلۆمەتران «.
