رێژەیەكا باش یا بارانێ ل پارێزگەها دهۆكێ باریە و ل هندەك جهان لەهی دروستكرینە
پێلەكا دژوار یا بارانبارینی هەرێما كوردستانێ ڤەگرتیە و رێژەیەكا باش یا بارانێ باریە و پلێن گەرمێ ژی هاتینە خوار، هەر ژ بەر رەوشا سەقای و پاراستنا گیانێ وەلاتیان، حوكمەتا هەرێما كوردستانی دوهی 20/11/2023 كرە بهێنڤەدان ل هەمی دام و دەزگەهان، ل سنوورێ پارێزگەها دهۆكێ د 24 دەمژمێرێن بۆری دا رێژەیەكا باش یا بارانێ باریە و ئێكەم بەفرا ئەڤ سالە ژی ل سنوورێ پارێزگەهێ باری، ل هندەك دەڤەران لەهی دروستبووینە و ئاستەنگی بۆ هاتنوچوونێ ژی پەیداكرینە و ئاڤ ژی چوویە د ناڤ هندەك مالان دا، دیسا باران و هڕوبای ل سنوورێ چەندین رێڤەبەریێن بەلاڤكرنا كارەبێ ل پارێزگەها دهۆكێ ئالۆزیێن كارەبێ روودان.
ئیسماعیل مستەفا، بەرپرسێ ڕاگەهاندنێ ل سەرۆكاتیا باژێرڤانیا دهۆكێ دیار كر كو تیمێن سەرۆكاتیا باژێرڤانیێ و كۆمپانیا (ئەرتووش) یا گرێبەست بۆ دەمێ نێزیكی دو مەهانە كار دكەن و بەرهەڤیێن وەرزێ زفستانێ دكەن، داكو زیانێن لەهیان ل سەر وەلاتیان كێم بن و گۆت: «تیمێن مە د ناڤ باژێڕی دا هاتینە بەلاڤكرن».
ژ لایەكێ دیڤە ل سەنتەرێ دەڤەرداریا ئاكرێ ل گەرەكا خرگا ژ بەر بارینا رێژەكا زۆرا بارانێ كەڤرەك ژ چیای دكەڤیتە خوار و ب مالا وەلاتیەكی دكەڤیت و زیانێن مەزن گەهاندنە مالا وی.
دیسا ژ ئەنجامێ بارینا بارانێن زۆر ل سنوورێ دەڤەرداریا ئامێدیێ ژی ئاستێ ئاڤا رووبارێ زێ و سپنە ل دێرەلۆكێ پتری دو میتران بلند بوویە و زیان ژی گەهشتینە وەلاتیان و بەرپرسێ پشكا كەشناسیا ئامێدیێ ژی بۆ رۆژناما ئەڤرۆ دیار كر، بۆ ئێكەم جارە ب ڤی ئاستی باران ل سەرێك بباریت، كو كێمتر ژ 15 دەمژمێرا ١٥٠ ملیمێن بارانێ بارینە.
ل سەر ئاستێ پارێزگەها دهۆكێ د 24 دەمژمێرێن بۆری دا پترین رێژەیا بارانێ ل سنوورێ دەڤەرداریا ئامێدیێ باریە، كو ل ناوچەداریا چەمانكێ د دەمێ 15 دەمژمێران دا 159 ملیمێن بارانێ بارینە، دیسا كێمترین رێژە ژی ل سنوورێ هەر دو دەڤەرداریێن سێمێل 28 ملیم و شێخان ژی 32 ملیمێن بارانێ بارینە، دیسا ل سەنتەرێ باژێرێ دهۆكێ ژی پتری 46 ملیمێن بارانێ بارینە.
