رێڤه‌به‌رێ نڤسینگه‌ها به‌رهنگاربوونا تاوانێن رێكخستی: بازرگانیا ب مرۆڤان ژلایێ وه‌لاتیێن بیانی ڤه‌...

رێڤه‌به‌رێ نڤسینگه‌ها به‌رهنگاربوونا تاوانێن رێكخستی: بازرگانیا ب مرۆڤان ژلایێ وه‌لاتیێن بیانی ڤه‌ دهێته‌ كرن

6

هه‌ولێر، قائید میرۆ:
سالانه‌ ب هه‌لكه‌فتا رۆژا به‌رهنگاربوونا بازرگانیێ ب مرۆڤان چه‌ندین چالاكی ل جیهانێ دهێنه‌ ئه‌نجامدان، رێڤه‌به‌رێ به‌رهنگاربوونا تاوانێن رێكخستی ل وه‌زاره‌تا ناڤخۆ یا حوكمه‌تا هه‌رێما كوردستانێ ئاشكرا كر، چه‌ندین كه‌س ب تۆمه‌تا بازرگانیێ ب مرۆڤان هاتینه‌ سزادان و دبێژیت: هه‌ر كه‌سه‌كێ بازرگانی ل هه‌مبه‌ر بهێته‌ كرن وه‌ك مرۆڤ دشێت سكالایێ تۆمار بكه‌ت.
عه‌قیدێ مافپه‌روه‌ر دارا فارووق نه‌جاڕ، رێڤه‌به‌رێ نڤسینگه‌ها به‌رهنگاربوونا تاوانێن رێكخستی بۆ رۆژناما ئه‌ڤرۆ دیار كر، حوكمه‌تا عیراقێ رێكه‌فتنا به‌رهنگاربوونا بازرگانیا ب مرۆڤان ئه‌ڤا ژلایێ نه‌ته‌وێن ئێكگرتی هاتیه‌ ده‌ركرن ئیمزا كریه‌ و گۆت: (ل سالا 2012ێ عیراقێ‌ جێبه‌جێكرنا قانوونا به‌رهنگاریا بازرگانیێ ب مرۆڤان ده‌ركریه‌ و سالا 2018ێ‌ په‌رله‌مانێ كوردستانێ ژی هه‌مان قانوون ب هژماره‌ شه‌ش په‌سه‌ند كریه‌ و كار بڤێ قانوونێ دهێته‌ كرن ل هه‌رێما كوردستانێ).

عه‌قیدێ مافپه‌روه‌ر دا زانین كو وه‌زاره‌تا ناڤخۆ یا حوكمه‌تا هه‌رێما كوردستانێ رێڤه‌به‌ریه‌ك بناڤێ به‌رهنگاربوونا بازرگانیێ ب مرۆڤان دانا بو، به‌لێ ڤێ دووماهیێ ئه‌و رێڤه‌به‌ریه‌ هاتیه‌ گۆهۆڕین بۆ به‌رهنگاربوونا تاوانێن رێكخستی و شه‌ش نڤیسنگه‌هێن خوه‌ ژی ل باژێڕێن هه‌رێما كوردستانێ ڤه‌كرینه‌ و گۆت: (نڤیسینگه‌هێن به‌رهنگاربوونا تاوانێن رێكخستی د به‌رده‌وامن ل دووفچوونا كه‌یسێن گرێدایی ب بازرگانیا مرۆڤان و تاوانێن رێكخستی، زۆربه‌یا وان تاوانێن دهێنه‌ تۆمار كرن ژلایێ وه‌لاتیێن بیانی ڤه‌ دهێنه‌ ئه‌نجامدان، بتایبه‌تی لدۆر كرێكارێن بیانی).
دارا فاروق نه‌جاڕ گۆتژی: (ئه‌م نه‌شێین رێژا بازرگانیێ ب مرۆڤان دیار بكه‌ین، ژبه‌ركو زۆربه‌یا باده‌كێن هاتینه‌ تۆماركرن ل ده‌رڤه‌ی هه‌رێما كوردستانێ هاتینه‌ ئه‌نجامدان بۆ نموونه‌ چه‌ندین تاوان هاتینه‌ تۆمار كرن و تێدا دیار بوویه‌ ل وه‌لاتێن بیانی ب پیلانه‌كێ‌ وه‌لاتی هاتینه‌ ڤه‌گوهاستن بۆ ناڤا هه‌رێما كوردستانێ بناڤێ ڤه‌گوهاستنا وان بۆ وه‌لاتێن ئه‌ورۆپا، به‌لێ ئه‌و كه‌سێن بازرگانی ب ئه‌ڤان كه‌سان كرین ل هه‌رێما كوردستانێ هێلاینه‌ و ئه‌و ژی نه‌چار بووینه‌ ل كوردستانێ بمینن و كار بكه‌ن).
عه‌قید دارا ئه‌و چه‌نده‌ ژی گۆت: (چه‌ندین سكالا ل نڤیسینگه‌هێن سه‌ر ب رێڤه‌به‌ریا مه‌ هاتینه‌ تۆمار كرن و هاتینه‌ بلند كرن بۆ دادگه‌هێ، هه‌تا نوكه‌ حه‌فت باده‌ك گه‌هشتینه‌ دادگه‌ها بلند یا تاوانان و هاتینه‌ سزادان، ئه‌ڤێن هاتینه‌ حوكمدان و سزادان هه‌موو وه‌لاتیێن بیانینه‌ و چو وه‌لاتیه‌كێ هه‌رێما كوردستانێ تێدا نینه‌).
عه‌قیدێ مافپه‌روه‌ر دارا فارووق نه‌جاڕ دا زانین كو هنده‌ك بابه‌تێن هه‌ی دكه‌ڤنه‌ د چوارچوڤێ قانوونێن دی دا نه‌ك قانوونا بازرگانیێ ب مرۆڤان وه‌كی تاوانێن بازرگانیێ ب له‌ش فرۆشان وان قانوونا تایبه‌ت هه‌یه‌، هه‌روه‌سا گرتنا كه‌سه‌كی ب بارمته‌ دچیته‌ د چارچوڤێ قانوونه‌كا دی یا تایبه‌ت دا و گۆت: (چه‌ندین باده‌ك هاتینه‌ تۆمار كرن پشتی دووڤچوون و پێڕابوون ل دادگه‌هێ بۆ هاتینه‌ كرن كه‌فتینه‌ چارچوڤێ سه‌خته‌كاریێ، چونكه‌ ده‌ستكاریا ڤیزایێ هاتیه‌ كرن، یانژی زۆر جاران وه‌لاتی هاتینه‌ سه‌ردا برن و گرێبه‌ستا هه‌ڤژینیێ هاتیه‌ سه‌خته‌ كرن و ژلایێ دادگه‌هێ ڤه‌ ب تاوانا سه‌خته‌كاریێ هاتینه‌ سزادان و پێڕابوونێن قانوونی هه‌مبه‌ر هاتینه‌ وه‌رگرتن).

کۆمێنتا تە