كه‌ڤالێ وێ یێ زیندانكری هاته ئازادكرن
هه‌رهین محه‌مه‌د:
هونه‌رمه‌ندا شێوه‌كار دونیا ده‌هام د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: پتریا كه‌ڤالێن من ده‌ربرینێ ژ هه‌ست و سۆز و هیڤێن من دكه‌ن و هه‌موو كه‌ڤالێن من گرێدای كچێ و ئه‌و خه‌ونێن ژ زارۆكینیێ بخوه دانیت و هه‌تا مه‌زن دبیت و به‌ر ب پێشڤه دچیت و دبینم ژن نیڤا جڤاكی یه و جڤاكێ مه‌ژی یێ زاڵه ل سه‌ر هیڤیێن وێ و هێشتا یا زارۆك دبێژنێ فلان تشت چێنابیت و ب مخابنی ڤه دبێژم خه‌لك ب چاڤه‌كێ كێم ته‌ماشه‌ی ئه‌وێ كچێ دكه‌ت و هه‌رده‌مێ به‌حسێ وێنه‌یان دكه‌ت یا ژ وان ڤه به‌حسێ تشته‌كێ گه‌له‌ك یێ كرێت دكه‌ت و نوزانن ئه‌ڤه تشته‌كێ خودایی یه.
ناڤهاتیێ گۆتژی: هه‌ر كه‌ڤاله‌كێ ئه‌ز چێكه‌م ل دووڤ ده‌می دمینت و هه‌ر كه‌ڤاله‌كێ ب دروستی ل سه‌ر كاربكه‌م دسێ رۆژان دا ب دووماهی دئینم و ئه‌گه‌ر ژ من بهێته داخوازكرن ژی كه‌ڤالێن خوه دفرۆشم و گه‌له‌ك جاران ژی من فرۆتینه و ده‌مێ دفرۆشم ژی دلێ من دیفرانینه هه‌كه بزانم بهایی ده‌نه وی كه‌ڤالی، به‌لێ هه‌كه بزانم چ بهای نا ده‌نه كه‌ڤالێ من ل ئه‌وی ده‌می بۆ بخه‌م دكه‌ڤم و به‌ری كه‌ڤالی بفرۆشم ژی دبێژمی هه‌كه دێ دانی جهه‌كێ نه‌ژ هه‌ژی، یان دێ هاڤێژی كه‌ڤالێ خوه نافرۆشم.
ناڤهاتیێ ئه‌و چه‌نده‌ژی گۆت: گه‌له‌ك یا كه‌یفخوشبووم ده‌مێ كه‌ڤالێ من ل خولا شازدێ یا گه‌له‌ریا دهۆك هاتیه هه‌لاویستن و من هه‌ست ب خوه‌شیێ كر، چونكو هنده‌ك كه‌ڤال هه‌نه دهنده‌ك ژوران ڤه هاتینه زیندان كرن و چو كه‌سان نه‌دیتینه ئه‌ڤرۆ ئه‌ز گه‌له‌كا ب به‌ختم كو كه‌ڤالێ من یێ زیندانكری هاته ئازادكرن گۆت: ده‌مێ ئه‌و كه‌سێن بلند ده‌مێ به‌حسێ هونه‌ری دكه‌ن گه‌له‌ك ب چاڤه‌كێ كێم سه‌حدكه‌نێ و دبینم گه‌له‌ك جاران ژی خه‌له‌تی ژ هونه‌رمه‌ندی بخوه و كارێ خوه گه‌له‌ك بێ بهادكه‌ت و هه‌كه هونه‌رمه‌ند بێ بها كه‌ت خه‌لك چو بكه‌ت.
