لیوا عەبدولخالق تەلعەت: ل هەموو كۆلیژێن سەربازی یێن ئیراقێ دێ كوردان پشك تێدا هەبیت
نوونەرێ حوكمەتا هەرێما كوردستانێ ل فەرماندەیا ئۆپەراسیۆنێن هەڤپشكێن ئیراقێ دیار كر، ب بزاڤێن سوپاسالارێ پێشمەرگەی، ژ نوكە وێڤە كوردان ل هەموو كۆلیژێن سەربازی یێن ئیراقێ دێ پشك هەبیت، كو ئەڤە پێشتر نەبوویە.
لیوا عەبدولخالق تەلعەت، زێدەتر بۆ رۆژناما ئەڤرۆ گۆت: «ل ئیراقێ بڕیار هاتییەدان ل هەموو كۆلیژێن سەربازی پشكەكا قوتابیێن كورد بهێنە وەرگرتن، كو ل كۆلیژا پۆلیسان و سەربازییا ئێك و دو ل گەل كۆلیژا بەرگرییا نیشتمانی و سەرۆكاتیا ئەركانان پێكدهێن، ئەڤە جارا ئێكێیە هەژمارەكا قوتابیێن كورد ل وان كۆلیژان دهێنە وەرگرتن، لەوا هەر كۆلیژەكا سەربازی هەبیت و قوتابیان وەربگریت، پشكا كوردان ل دووڤ پارێزگەهێن هەرێما كوردستانێ تێدا دێ هێتە دیاركرن».
ناڤهاتی گۆتژی: «پێشتر ل ئیراقێ ئەو بڕیارە نەبوو، بەلێ ب بزاڤێن فەریق عیسا عزێر، سوپاسالارێ پێشمەرگەی، ئەو بڕیارە هاتەدان، سالانە ل هەموو كۆلیژێن سەربازی ڕێژەكا قوتابیێن كورد دێ هێنە وەرگرتن و ئەڤە دەستكەفتەكێ باشە بۆ كوردان».
