مه‌سعوود بارزانى.. ئه‌و كه‌سێ د دیرۆكا كوردان دا دوباره‌ نه‌بیت

مه‌سعوود بارزانى.. ئه‌و كه‌سێ د دیرۆكا كوردان دا دوباره‌ نه‌بیت

11

به‌یار زاویته‌ى

ده‌مێ مرۆڤ به‌حس ل دیرۆكا شۆرشێن كوردى دكه‌ت و ب تایبه‌ت ل چه‌رخێ بیستێ، دیارترین سه‌ركردێ دهێته‌ بیرا مرۆڤى بارزانیێ نه‌مره‌، بارزانیێ نه‌مر ئه‌و سه‌ركرده‌ بوو یێ ناڤێ كوردان ل جیهانێ بلندكرى و كورد بۆ دونیایێ داینه‌ نیاسین، هه‌روه‌سا مه‌سعوود بارزانى ژى وه‌كو قوتابیه‌كێ رێبازا پیرۆزا بارزانیێ نه‌مر بوویه‌ سه‌ركرده‌یه‌ك كو ب دیتنا من د دیرۆكا كوردان دا دوباره‌ نابیت.
بۆ پشتراستكرنا ڤێ گۆتنێ ژى هه‌كه‌ به‌راوردیه‌كێ د ناڤبه‌را شۆرشا ئیلۆنا مه‌زن و شۆرشا گولانا پێشكه‌فتنخواز دا بكه‌ین، دێ بۆ مه‌ دیار بیت كو مه‌سعوود بارزانى ئه‌و كه‌سایه‌تیه‌ كو د دیرۆكێ دا دوباره‌ نابیت! كاودانێن ده‌ستپێكرنا شۆرشا ئیلۆنێ گه‌له‌ك ژ كاودانێن شۆرشا گولانێ جودا بوون، به‌رى ده‌ستپێكرنا شۆرشا ئیلۆنێ كو ب سه‌ركردایه‌تیا بارزانیێ نه‌مر بوو، بارزانیێ نه‌مر وه‌كو سه‌ركرده‌یه‌كێ خودان سه‌ربۆر و شاره‌زا د سیاسه‌ت و شۆرشان دا كو پێشتر پشكدارى د شۆرشێن بارزان یێن ئێك و دو دا كربوو، هه‌روه‌سا پشكدارى د كۆمارا كوردستان دا ل مهابادێ و خودان په‌یوه‌ندیێن گه‌له‌ك ب هێز بوو د گه‌ل كه‌سایه‌تیێن جیهانێ و كاروانێ وى یێ دیرۆكى بۆ ئێكه‌تییا سۆڤێتا به‌رێ و گه‌له‌ك سه‌ربۆرێن دى، هه‌روه‌سا پشتى كۆده‌تایا سالا 1958 ژ ئالیێ عه‌بدولكه‌ریم قاسمى ل سه‌ر رژێما شاهاتیێ ل ئیراقێ كو ل سه‌ر داخوازا فه‌رمى یا حوكمه‌تا وى ده‌مى بارزانیێ نه‌مر ژ سۆڤێتێ ڤه‌گه‌ریا و هه‌موو گه‌لێن ئیراقێ و ب تایبه‌ت كوردان پێشوازیه‌كا مه‌زن لێ كر و هه‌موو ل ده‌ردۆرا وى كۆمبوون، پشتى سێ سالان ژ ڤێ روودانێ بارزانیێ نه‌مر شۆرشا ئیلۆنێ ده‌ستپێكر و هه‌موو گه‌لێ كوردستانێ ب هه‌موو پێكهاته‌یان د گه‌ل دا بوون و ئه‌نجام نه‌چاركرنا رژێما به‌عس بوو كو دانپێدانێ ب مافێن گه‌لێ كورد بكه‌ت و به‌یانا 11 ئادارا 1970 بهێته‌ راگه‌هاندن، ئانكو ئه‌ركێ بارزانیێ نه‌مر بۆ ده‌ستپێكرنا شۆرشێ وه‌سا یێ ب زه‌حمه‌ت نه‌بوو وه‌كو ده‌سپێكرنا شۆرشا گولانێ ب سه‌ركردایه‌تیا سه‌رۆك مه‌سعوود بارزانى، ژبه‌ركو گه‌لێ كورد هه‌موو ل ده‌ردۆرا وى كۆم ببوون و پشته‌ڤانیه‌كا ب هێز ل شۆرشێ و سه‌ركردایه‌تیا وێ كر.
لێ د شۆرشا گولانێ دا ره‌وش گه‌له‌ك گه‌له‌ك جودا بوو و كاره‌كێ گه‌له‌ك ب زه‌حمه‌ت بوو دوباره‌ شۆرش سه‌رهلده‌ت و گه‌لێ كورد ل ئێك كۆم ببیت و ژبه‌ر ڤان ئه‌گه‌ران:
رێككه‌فتنامه‌یا خیانه‌تكاریا جه‌زائیرێ و ئه‌نجامێ وێ نسكۆیا 1975 كورد خستنه‌ ره‌وشه‌كا گه‌له‌ك ب زه‌حمه‌ت، شۆرش ژناڤچوو و رژێما ئیراقێ دگه‌ل رژێما شاهێ ئیرانێ رێككه‌فت بوون و كورد ده‌ربه‌ده‌ر و ئاواره‌ كرن، بێهیڤبوونه‌كا مه‌زن په‌رێن خوه‌ ل سه‌ر گه‌لێ كورد دا راكێشا بوو، سه‌ركردایه‌تیا پارتى و شۆرشێ پرت و به‌لاڤه‌ بوون و چ تشته‌ك د ده‌ستێ سه‌ركردێن مایى دا نه‌مابوو، دگه‌ل ڤێ هه‌موویێ ژى بارزانیێ نه‌مر تووشى نه‌خۆشیا گران ببوو و ل ژێر فشارێن ساواكێ (هه‌والگێریا رژێما شاهێ ئیرانێ) ڤه‌گوهاست بوو ته‌هرانێ و ژ كوردان دوور كربوو، فشارێن هه‌ردو رژێمان بۆ ڤه‌گه‌ریانا كوردان ژ ئیرانێ و خوه‌راده‌ستكرنا وان بۆ رژێما ئیراقێ زێده‌ ببوون، هه‌موو كه‌سان وه‌كو له‌شه‌كێ مرى به‌رێخوه‌ ددا پارتى و سه‌ركردایه‌تیا شۆرشێ، د گه‌ل ڤێ چه‌ندێ ژى هنده‌ك كه‌سان هنده‌ك رێكخستنێن دى یێن سیاسى دامه‌زراندن و ل شوونا پشته‌ڤانییا پارتى و شۆرشێ بكه‌ن، دژایه‌تییه‌كا ئاشكرا دكر و ئاسته‌نگ بۆ پارتى دروست دكرن.
ژ ئالیه‌كێ دى ڤه‌ رژێما به‌عس ل ئیراقێ و پشتى خومالیكرنا په‌ترۆلێ و رێككه‌فتنێن مه‌زن د گه‌ل ئێكه‌تیا سۆڤێتا وى ده‌مى كو هه‌موو به‌رهه‌ڤى بۆ پشته‌ڤانیكرنا رژێما به‌عس دیار كربوون و پێشكه‌فتیترین چه‌كێن وى سه‌رده‌مى دابوونه‌ رژێمێ، رژێما به‌عس ژى ل وى ده‌مى به‌تران ببوو و دگۆتن (الى الابد) ئانكو كورد هه‌تا هه‌تایێ نه‌مان و ئێدى ده‌نگێ وان بسه‌رناكه‌ڤیت، ئه‌ڤه‌ و زێده‌بارى پیلانێن ناڤده‌وله‌تى ل دژى گه‌لێ كورد و ب تایبه‌ت ئه‌مریكا و بریتانیا و توركیا ژى رۆله‌كێ كارا هه‌بوو.
حنێر ل ڤێرێ یه‌، پشتى ڤێ ره‌وشا وه‌سا یا خراب كه‌سه‌ك هه‌بیت بشێت دوباره‌ گه‌لێ كورد راكه‌ته‌ سه‌رپێیان و شۆرشه‌كا دى و ب شێوه‌یه‌كێ پێشكه‌فتیتر ده‌ستپێبكه‌ت، ئه‌ڤه‌ ژى د هزرا هنده‌ك كه‌سان دا ب تنێ خه‌یاله‌ك بوو كو چ جاران بجه ناهێت، ئها د ڤى ده‌مى دا سه‌رۆك مه‌سعوود بارزانى و د ژیێ 29 سالیێ دا و دگه‌ل سه‌ربۆرێن گه‌له‌ك كێم یێن سیاسى و سه‌ربازى كو ب تنێ 12 سالێن خزمه‌تێ د شۆرشێ دا هه‌بوون و سه‌ربۆرا وى گه‌له‌ك ژ یا بارزانیێ نه‌مر كێمتر بوو، مل ب ملێ ئدریس بارزانیێ هه‌رده‌م ساخ (كو هه‌ردو قوتابیێن سه‌ركه‌فتى و ژیرێن رێبازا بارزانیێ نه‌مر بوون) و دگه‌ل هه‌ژماره‌كا سه‌ركردێن دلسۆز مینا (جه‌وهه‌ر نامق سالم، كه‌ریم شنگالى، ئازاد به‌روارى و محه‌مه‌د ره‌زا) و ب تنێ پشتى 40 رۆژان ژ رێككه‌فتنا جه‌زائیرێ ئێكه‌م كۆمبوون كر و شیا بنگه‌هێ دوباره‌ رێكخستن و ده‌ستپێكرنا شۆرشێ دانیت، هووركاتیێن ده‌ستپێكرنا شۆرشا گولانا پێشكه‌فتنخواز ژى گه‌له‌كن پێدڤى ناكه‌ت د ڤێ گۆتارێ به‌حس بكه‌م، لێ پشتى وێ ره‌وشێ و گاڤێن سه‌رۆك بارزانى ئه‌نجام ددیار بوون كا شۆرشا كوردى گه‌هشته‌ چ ئاست و ئه‌نجامێن وێ چ بوون، ژ به‌ر ڤێ ئێكێ ب دیتنا من كه‌سایه‌تیا مه‌سعوود بارزانى و ئه‌و كار و بزاڤێن وى كرین بۆ سه‌رهلدانا شۆرشا گولانێ و هشیاركرنا گه‌لێ كورد و گه‌هاندنا ده‌نگێ كوردان بۆ جیهانێ د دیرۆكا كوردان دا دوباره‌ نابیت.

کۆمێنتا تە