مە ب شێوەیەکێ جودا بیرەوەریا هەرسێ هونەرمەندێن نەمر یێن زاخۆ ساخکر

مە ب شێوەیەکێ جودا بیرەوەریا هەرسێ هونەرمەندێن نەمر یێن زاخۆ ساخکر

4

زاخۆ، دلۆڤان هالۆ:

دلخاز موسا، ڕێڤەبەرێ ڕێڤەبەرییا ڕەوشەنبیری و هونەری ل زاخۆ د دیدارەکێ دا بۆ ڕۆژناما ئەڤرۆ دیار کر مە وەکو ڕێڤەبەریا ڕەوشەنبیری و هونەری ل زاخۆ ب هەڤکاری ل گەل سەندیکا هونەرمەندێن کوردستانێ نڤیسینگەها زاخۆ و تیپا ڕۆژ یا هونەری، ل پارکا سەباح زاخۆیی بیرەوەرییا وەغەرکرنا هەر سێ هونەرمەندێن نەمر ئەڕدەوان زاخۆیی و ئەیاز یۆسف و عەبدولواحد زاخۆیی ساخکر.
ناڤهاتی ئاماژە ب وێ چەندێ ژی کر کو مە ئەڤ سالە ب شێوەیەکێ جیاواز بیرەوەرییا ڤان هەر سێ هونەرمەندێن نەمر ساخ کر، کو ل دەستپێکێ مە سەرەدانا گۆڕێن وان کر، پاشان ل بەرامبەر پەیکەرێن ئەڕدەوانی و ئەیازی و عۆدا سەباحی سترانێن هەر سێ هونەرمەندان ژ لایێ تیپا ڕۆژ هاتنە گۆتن.
گۆت ژی:»ساخکرنا ڤێ بیرەوەرییێ وەکو وەفادارییەکێ بوو بەرامبەر ڕەنج و خزمەت و خەباتا مەزن یا ڤان هەر سێ هونەرمەندێن نەمر د بیاڤێ بزاڤا هونەری دا ل زاخۆ ب تایبەت د بیاڤێ سترانا کوردی یا هەڤچەرخ دا کو ڕۆلەکێ بەرچاڤ و کاریگەر هەبوون، و ل سالێن حەفتێ و هەشتیان ئەڕدەوانی و ئەیازی ب سترانێن خوە یێن نەتەوەیی ورەیا خەلکێ و پێشمەرگەیی ب شێوەیەکێ جوان و بهێز بلند دکرن، لەوما وەکو قوتابخانەیەكا هونەری ل ڤی باژێڕی دهێنە دانان و بووینە سۆمبولا باژێڕێ زاخۆ».
زێدەتر ژی گۆت:»تەمامکەرێ ڤێ قوتابخانا هونەری ل زاخۆ، هونەرمەندێ نەمر عەبدولواحد زاخۆیی ژی ل سەر ڕێبازا وان بەردەوامی دا هونەرێ خوە یێ ستران گۆتنێ و وی ژی خزمەتەکا مەزن پێشکێشکر، ئەو ژی بوو ستێرەکا گەش ل عەسمانێ هونەرا کوردی».

کۆمێنتا تە