هزرێن بەندەیاتیێ
رەیان رەمزی
ئەز یێ د كۆلانەكێ دا دژیم كو ئەڤ كۆلانە هەمی وەكی ئێك هزر دكەن، دبیت ژبەر هندێ بیت كو جهێ مە هەمیان وەكی ئێكە.. كۆلانا سەرەكی ژبۆ كەناری..! نەخێر دبیت ژبەر هندێ بیت ئەڤ كۆلانە یا هاتیە نیاسین ب كۆلانا بەندەیان یان ژی ئەم دشێن بێژین خزمەتكاران، ئەرێ ئەگەر هۆسا بیت بۆچی ئەز نە وەكی وانم..! ئێڤاریان هەمی پەنجەرەیێن ژۆرێن خۆ ڤەدكەن و تا كو كەمەرێ خو د پەنجەرەیاندا د ئینە دەر و لاڤا دكەن كو خودێ وان بپارێزیت، هەمی ئێڤاریان دێ بینی كو پەنجەرەیێن ڤان مالێن وێران د ڤەكرینە ب تنێ پەنجەرا خانیێ من نەبیت، كو د وی دەمی دا ئەز دهێمە لسەر مێزا خۆ یا كەڤن ئەوا كو پێپكەكێ وێ من شیرێ خۆ یێ جەنگان ڕاگرتی، و مۆما خو هلدكەم و جارەكا دی لاپەرەكێ مەزن د ئینمە دەر و ب پێنوسێ خۆ یێ حبری وان تشتان د نڤیسم یێن كو ئەزمانێ من نەشێت بێژیت، نە ژبەر ترسێ بەلكو ژبەر هندێ یە كو كەس تێناگەهیت و كەس نینە گوهداریا وێ دیتنا من یا جێواز بكەتن، ئەگەر هەبن دێ من ب كافر دەنە نیاسین ژبەركو جێواز هزر دكەم، هاتنا من یا ئەڤ جارە ژبۆ سەر فێ مێزێ یا جێوازە، ئەو ژی دێ بریارێ دەم یان دێ دگەل ڤی خەلكی بم و بمە بەند یان ژی دێ یێ ئازاد بم و دێ هزرا خو دوبارە دەربڕم..! دڤان هزراندا دوبارە غەرقیبووم من ئاگەه ژ چ نە ما بوو، د دەمەكی دا من گوه ل شكاندنا پەنجەرەیا ژۆرا خۆ بوو و دەنگێ گازیەكێ دهیتە من و دبێژیت: «.. هێێ بیرمەند هێێ بیرمەند..». یا راستی ژی بۆ من یا سەیر بوو ژبەركو ئەڤە ٥٣ سالێن تەمەنێ من دەرباز بوون و كەسێ هۆسا گازی من نە كریە، ئەز ب لەز بەرەڤ پەنجەرەیێ چووم ژ ڕاستا بۆ من زێدە یا سەیر بوو ژبەركو بارانێ جارەكا دی سەمایا خۆ ل فێ دەڤەرێ كرە ڤە و هاوەلاتیێن فێ كۆلانێ هەمی یێن دەركەڤتینە ژ دەرڤە و گازی دكەن ئەم ئازادی… ئەم نە بەندن..، ژ راستا ژی بۆ من هەستەكێ سەیر بوو، سەڕارای هندێ كو من چ ئومێد نە مابوون بەلێ پا من هەر بزاڤ كرن و نوكە ژی چاڤێن من بوونە هەڤالبەندێن ئەسمانی و باران باراندن ژبۆ ڤی دیمەنێ جوان و جوانیا ئازادیێ.
