پارێزگارێ دهۆکێ بەرێ بنیاتی بۆ هەژمارەكا پڕۆژەیان ل شێخان دانا و هەژمارەك ژی ڤەكرن
د. عەلی تەتەر، پارێزگارێ دهۆكێ دوهی 3/11/2025 سەرەدانا دەڤەرداریا شێخان كر و بەرێ بنیاتی بۆ هەژمارەكا پڕۆژەیان ل سنۆرێ دەڤەرداریێ دانا و هەژمارەكا پڕۆژەیان ژی ڤەكرن.
د چارچوڤێ ئەو گرنگیا حكومەتا هەرێما كوردستانێ ددەتە رێك پران و خۆشكرنا هاتنوچوونا وەلاتییان دوهی د. عەلی تەتەر، پارێزگارێ دهۆكێ و ب ئامادەبوونا سالح حەیدەر، بەرپرسێ لقێ بیست یێ پارتی ل شێخان و سەردار یەحیا، دەڤەردارێ شێخان بەرێ بنیاتی بۆ پڕۆژەیێ چێكرنا جۆتسایدێ (نەهدارا ل شیخان بۆ باعەدرێ) ب درێژاهیا حەفت كیلۆمەتران و 600 مەتران و ب گوژمێ 15ملیار و 498 ملیۆن دیناران دانا.
دیسا هەر دوهی د. عەلی تەتەر، پارێزگارێ دهۆكێ و ب ئامادەبوونا سالح حەیدەر، بەرپرسێ لقێ بیست یێ پارتی و سەردار یەحیا، دەڤەردارێ شێخان بەرێ بنیاتی بۆ چێكرن و قێركرنا رێكێن ناڤخۆیی بۆ گوندێن (سمریت و سەرۆكانی) ل دەڤەرداریا شیخان ب گوژمێ 947 ملیۆن دیناران و ب درێژاهیا سێ كیلۆمەتران و 500 مەتران دانا.
دیسا هەر دوهی ل دەڤەرداریا شێخان د. عەلی تەتەر، پارێزگارێ دهۆكێ پڕۆژەیێ رێكێن گوندێن (نێروەكا و دەكان) ب درێژاهیا حەفت كیلۆمەتران و رێكا گوندێ (دەحلا نوو) ل سنۆرێ ناوچەداریا ئەترووش ب گوژمێ 460 ملیۆن دیناران ڤەكرن.
دیسا هەر دوهی د. عەلی تەتەر، پارێزگارێ دهۆكێ سەرا ناوچەداریا كەلەكچی ل سنۆرێ دەڤەرداریا شێخان دا و پڕۆژەیێ قێركرنا رێكا گوندێن (زیناڤا كەڤن و زیناڤا نوو و زیناڤا حاجۆ) ل سنۆرێ ناوچەداریا كەلەكچی ب درێژاهیا دو كیلۆمەتران و 800 مەتران و ب گوژمێ 310 ملیۆن دیناران ڤەكر.
هەژی گوتنێ یە ئەو پڕۆژێن دوهی پارێزگارێ دهۆكێ ڤەكرین و بەرێ بنیاتی بۆ داناین 9 پرۆژەبوون و د بیاڤێن جودا جودا دابوون، وەكو: رێك و پڕۆژەیێن ئاڤێ و كارەبێ هەموو ل سەر بودجا حكومەتا هەرێما كوردستانێ ب گوژمێ 18 ملیار و 675 ملیۆن دیناران دێ كەڤنە د خزمەتا خەلكێ دەڤەرداریا شێخان دا.
