پڕۆژەیێ هاریكاریكرنا ڕزگاربوویان د ڤێ حەفتیێ دا دێ هێتە بجهئینان
دهۆك، لەزگین جوقی:
سەرۆكێ دەستەیا بلندا بنگەهێ لالشێ دیار كر، د ڤێ حەفتیێ دا پڕۆژەیێ هاریكاریا ڕزگاربوویان، ئەوێ ژ لایێ مەسرور بارزانی، سەرۆكێ حوكمەتا هەرێما كوردستانێ ڤە، ب ڕێیا بنگەهێ لالشێ هاتیە را گەهاندن دێ كەڤیتە د وارێ بجهئینانێ دا.
سەعید جردۆ، سەرۆكێ دەستەیا بلندا بنگەهێ لالشێ خویا ژی كر، ئەڤ پڕۆژە دێ ب رێكا بنگەهێ لالشێ و نڤیسینگەهێن سەر ب وی ڤە دێ هێتە بجهئینان و هەیڤانە پتری سێ هزار ڕزگاربوویان دێ بەخشینا دارایی وەرگرن.
ل سالە 2014 تێرۆرستێن داعشێ پتری شەش هزار كچ و ژن و زارۆكێن ئێزدی ل شنگالێ رەڤاندن و بێ سەروشوونكرن، ب پشتەڤانیا حوكمەتا هەرێما كوردستانێ نڤیسینگەهەك بۆ رزگاربوویێن ئێزدی هاتە ڤەكرن و هەتا نوكە پتری سێ هزار و 500 رەڤاندیێن ئێزدی هاتینە رزگاركرن.
