چار بریندارێن تۆپبارانا په‌ره‌خێ‌ د نه‌خۆشخانا زاخۆ دا ماینه‌

چار بریندارێن تۆپبارانا په‌ره‌خێ‌ د نه‌خۆشخانا زاخۆ دا ماینه‌

7

زاخۆ،عه‌لی حاجی:

رێڤه‌به‌رێ‌ ساخله‌میا زاخۆ بۆ رۆژناما ئه‌ڤرۆ دیار كر، پشتی نه‌شته‌رگه‌ری بۆ هه‌شت گه‌شتیارێن عه‌ره‌ب یێن د تۆپبارانا گوندێ‌ په‌ره‌خێ‌ دا بریندار بووین هاتیه‌ ئه‌نجامدان، چار ژ وان بۆ به‌غدا هاتنه‌ ڤه‌گوهاستن و ل سه‌ر داخوازیا وان چار بریندارێن دیتر نوكه‌ ماینه‌ ل زاخۆ و د بن چاڤدێریا تیمێن نۆشداری دانه‌.

دكتۆر شاكر عه‌بدولره‌حمان گۆت: “پشتی تۆپبارانا گوندێ‌ په‌ره‌خێ‌، كو بوویه‌ ئه‌گه‌رێ‌ گیان ژ ده‌ستدانا نه‌ه كه‌سان و زێده‌تری 25 كه‌سێن دیتر بریندار بووین، ئێكسه‌ر تیمێن مه‌ یێن نۆشداری هاتنه‌ راسپاردن، كو نه‌شته‌رگه‌ریێ‌ بۆ برینداران ئه‌وێن پێدڤی بكه‌ن و هنده‌ك بریندارێن دیتر ژی ژ به‌ر دژواریا برینێن وان ژ بۆ نه‌خۆشخانا هه‌وارهاتنێ‌ ل دهۆكێ‌ هاتنه‌ ڤه‌گوهاستن، دوهی و ل دووڤ داخوازیا وان برینداران چار ب رێیا ئه‌مبۆنلانسان بۆ هه‌ولێرا پایته‌خت هاتنه‌ ڤه‌گوهاستن و ل وێرێ‌ دا ژی ب فرۆكه‌كێ‌ بۆ به‌غدا هاتنه‌ هنارتن، به‌لێ‌ چار نه‌خوه‌شێن دیتر ل سه‌ر داخوازیا وان نوكه‌ ماینه‌ ل نه‌خۆشخانا زاخۆ یا گشتی و د بن چاڤدێریا تیمێن نۆشداری دانه‌”.

هه‌ر ل دۆر روودانا گوندێ‌ په‌ره‌خێ‌ گوهدار شێخۆ، سه‌رپه‌رشتێ‌ ئیدراه‌یا سه‌ربخویا زاخۆ د كۆنگره‌یه‌كێ‌ رۆژنامه‌ڤانی دا گۆت: “مه‌ داخواز ژ وه‌زاره‌تا پێشمه‌رگه‌ی و هێزێن پاسه‌وانێن سنووری كریه‌، كو خالێن خوه‌یێن ئه‌منی ل سه‌ر سنوورێ‌ د ناڤبه‌را هه‌رێما كوردستانێ‌ و توركیا دا زێده‌ بكه‌ن، داكو روودانێن ب ڤی ره‌نگی دوباره‌ نه‌بن”.

هه‌ر د وی كۆنگرێ‌ رۆژنامه‌ڤانی دا ئه‌مه‌ل جه‌لال، سه‌رۆكا ده‌سته‌یا گشتی یا گه‌شت و گوزارێ‌ ل كوردستانێ‌ دیار كر، تۆپبارانا سۆپایێ‌ توركیا لێدانه‌ ل كه‌رتێ‌ گه‌شتیاری یێ‌ هه‌رێما كوردستانێ‌ و ئه‌و دێ‌ د ده‌مه‌ك نێزیك دا مه‌زنترین چالاكیان ل وان جهێن گه‌شتیاری ئه‌نجام ده‌ن، دا كو دوباره‌ باوه‌ریێ‌ بۆ تیمێن گه‌شتیاری دروست بكه‌ن كو ئه‌و ده‌ڤه‌ره‌ د ئارامن.

کۆمێنتا تە