گرنگە هەر ژنەكا راگەهاندنكار ئارمانجەك هەبیت
دلڤین رەشید:
مەدیاكار(سەمەر تروكی) د دیدارەكێ دا بۆ رۆژناما ئەڤرۆ دیاركر كو ئەو خەلكا باژێرێ دهۆكێ یە، دەرچویا پەیمانگەها ئەرارات/ پشكا دەرمانسازی، ئەڤە نێزیكی دوسالانە هاتیە د جیهانا راگەهاندنێ دا، بۆ ماوێ هەشت هەیڤان ل رادیۆیا دهۆك كار كریە، نوكە بێژەرا دەنگوباسێن سیاسی یە ل دەزگەهی گاڤ، دخوازیت د بوارێ میدیایێ دا شیانێن خوە بەر ب پێشڤە ببەت وەك ژنەكا مەدیاكار.
ناڤهاتیێ گۆت: برایێن من رێخۆشكەر بوون كو بهێمە دكارێ راگەهاندنێ دا، پشتەڤانی و هاریكاریا وان هێزەكا مەزن بوو بۆ من بچم د بوارێ راگەهاندنێ دا، ب بشێم ب ڤێ رێكی خزمەتا خەلكێ خوە یێ دهۆكێ بكەم، ب دیتنا من ژن ژی دشێت رۆلێ خوە ببینت، ئەگەر خودان هیڤی و ئا رمانج بیت، دبیت ئاستەنگ هەبن، بەلێ رێزگرتن دناڤبەرا هەردو رەگەزان دا دناڤ دەزگەهێ راگەهاندنێ دا، دێ بیتە ئەگەرێ سەركەفتنێ دكاری دا و یا گرنگە ژنا راگەهاندنكار دقوناغا ئەڤرۆ دا و ل سەردەمێ سۆشیال میدیایێ دا كەساتیا خوە ب پارێزیت ژیانا خوە یا تایبەت دگەل كارێ خوە یێ میدیایێ تێكەل نەكەت، چنكو راگەهاندن كارەكی مرۆڤایە تیە دڤێت ب دورستی سەرەدەری دگەل بهێتەكرن.
