بەرنامەیێ هەست و هەلبەست، ژ بەرهەڤكرن و پێشكێشكرنا هەردو هۆزانڤانان (بورهان زێباری و شەعبان سلێمان)ە و ل كەنالێ عەسمانیێ ئاڤا بەهدینان دھێتە بەخشكرن. خەلەكا دوازدێ ژ بەرنامەی بۆ ئەحمەدێ نالبەند هاتبوو تەرخانكرن، كو هەر خەلەكەك بۆ شاعرەكێ كلاسیكێ كورد هاتیە دیاركرن و بەرنامە ب خوە یێ جوانە و دو كەسێن هۆزانڤان ل دەڤەرا بەهدینان و ب (ئیلقائا) وە یا شعری شیایین ناڤۆدەنگیەكێ بۆ خوە پەیدا بكەن؛ هەر ئەڤ ئیلقائا هەنێ یە ژی ڤی بەرنامەی خوشتر لێكەت، ژبەركو ژبلی ژیانا شاعرێ دەستنیشانكری و ژین و ژیارا وی، چەند پارچەیەك ژ شعرێن وان ژی دهێنە خواندن و ئەڤە رەوشەكێ و دەولەمەندیەكێ ددەتە بەرنامەی.
دەما من بینەریا بەرنامەی دكر، سەرنجا من ل سەر چەند خالان راوەستیا و من هەست كر، یان دویڤچوون و پێزانینێن ھەردو پێشكێشكاران ل سەر نالبەندی دكێمن، یان ژبەر كورتیا دەمێ بەرنامەی كو بتنێ (22 خولەك و 42 چركە) بوون، نەشیاینە ژ دەرحەق دەركەڤن، كو خوە بەردەنە ناڤ هووردەكاریێن بەرنامەی. لێ تشتێ ئەز پالدایمە ڤێ نڤیسینێ ئەوبوو، دەما روو ب روو من گەل (بورهان زێباری) ئێك ژ پێشكێشكارێن بەرنامەی ئاخفتی و من گۆتییێ كو ئەو هۆزانا وە د بەرنامەی دا خواندی ئەڤا نالبەند ب كورێ خوە دبێژیت، ئەو نە هۆزانا نالبەندی بوو، بەلكو یا عەبدوللایێ مەلا حەسەنی بوو و ئەو ژێدەرێ هەوە ئەو هۆزان ژێ وەرگرتی ژی كو پەرتووكا (هۆزانڤانێت كورد)ە یا نڤیسەر سادق بەهائەددین ئامێدی، هۆزان بخوە خەلەت یا هاتیە وەرگرتن و بلاڤكرن و د هۆزانێ دا زمانێ عەرەبی و كوردی تێكەلە و شوینا ئەڤ پێشكێشكارە بێژیتە من ژێدەرێ تە چییە و تە چ دیڤچوون بۆ كرینە كو نەیا وی بیت؟ گوت: نەخێر ئەڤە شێوازێ شعرێن نالبەندی یە و هەكو ب كوردی و كرمانجی دبێژن، هەر هوو.
راستی بۆ من یا سەیر بوو، ژبەركو ژێدەرێن كۆمڤەكرنا شعرێن نالبەندی گەلەك چەقن و ئێك ژوانان سادق بەهائەددین ئامێدی بوو و پەرتووكا وی هۆزانڤانێت كورد، لێ ئەڤ پەرتووكە ژ شاشیان یا بێ بەهر نینە؛ ژبەركو من بخوە ژی پەرتووكەك ب ناڤێ (شاعرێن بامەرنێ… 14 شاعرێن كلاسیك) هەیە و من ڤەكۆلین ل سەر ڤان شاعران كریە، ئەز ناچمە سەر بابەتێ كانێ نالبەند خەلكێ ئامێدیێ بیت یان بامەرنێ و 30 سالان بەری نالبەند بهێتە سەردنیایێ، بابێ وی هاتیە بامەرنێ و نالبەند ل بامەرنێ ژ دایكبوویە و ژبەركو ل بامەرنێ چەندین شاعرێن دی یێن كلاسیك هەبووینە، وەكی حوسنی بامەرنی و ئەحمەدێ بابك و عەبدولرەحمان ئەفەندی و شێخ غیاسەددین، رێ نالبەند ژی یا ڤەكری بوویە و یا ژ ڤێ دیدارێ من دڤیا ل سەر راوەستم، شعرا مرنا كورێ نالبەندی یە، د دەمێ خوەدا دەما من دیوانا حوسنی بامەرنی دروستدكر، ئەز ب سەر شاعرەكی هلبووم ئەو ژی (عەبدوللایێ مەلا حەسەن) و چەندین شعرێن شاعرێن دەڤەرێ دناڤ پەرتووكەكێدا نڤیسی بوون، كو ئەو دەست خەت بۆ سالێن پێنجی و شێستان و پێهەل دزڤری و نوكە ژی لدەف منە، چەند شعرێن ناڤبری ژی دناڤدا بووینە و چەندین شعرێن شاعرێن دی یێن بەهدینان یێن كلاسیك.
دەما من پرسیار ڤێ شعرێ ژێ كری و گوتیێ ئەڤ شعرە یا نالبەندیە؟! گوت: نەخێر یا منە و من وەرگێرانەكا روحی دایە شعرا نالبەندی، ئەڤا ب زمانێ عەرەبی نڤیسی و نازناڤێ ناڤبری ژی د شعرێ دا هەیە كو (عەبدێ خودێ) یە و ل دووماهیا مالكێن ڤێ شعرێ هوسا دبێژیت:
یێ ب سێ‌ ژن بوو، دل لێ‌ كون بوو، نە روهن بوون، هەردو چاڤ
گیا تەر بوو، چاوا زەر بوو، ژ ئەحمەدی، ئومێد بری
عەبدێ‌ خودێ‌، كرە كوردی، ئەڤ رەسائا، ئەحمەدی
كر دیاری، ل سەر مەزاری، پاشی كو ئەحمەد مری (شاعرێن بامەرنێ.. 14 شاعرێن كلاسیك)
تشتێ سەیر، ئەڤا د پەرتووكا (هۆزاڤانێت كورد) ژی دا هاتی، بڤی رەنگی یە:
ئاگرێ‌ بەردایە من مرنا كوری
مات ابنی بان غبنی
طار تبني فی الهوا‌ء
انە دا‌ء عظیم ربنا انت الدوا‌ء
(هۆزانڤانێێت كور، لاپەرە )
و ئەو شعرا سادق بەهائەددین ئامێدی تێكەل كری، ب ڤی رەنگی یە:
سەد جار شوكور الله چ كر
بەرخێ‌ مە بر شەڤ هات و مر
مە شكەستە پشت قووەت چ رشت
ئەو تشت و مشت پوچ بون تەمام
(باغێ كوردا، بەرگێ سێ لاپەرە 440).
و شعرا عەرەبی یا هاتیە وەرگێران، ئەڤەیە:
مات ابني بان غبني طار تبني بالهواء
انه داء عظيم ربنا انت الدواء
ذاب بالي ضاق حالي فات مالي ما العلاج
زاد قبحي ساء صبحي قل ربحي في السماء
(باغێ‌ كوردا ـ بەرگێ‌ پێنجێ‌ ـ لاپەرە 231).
شعرا سیێ ژی، نالبەندی ب ڤی رەنگی گۆتییە:
حەمد بۆ رەبێ‌ كەریمێ‌ لەم یەزەل
شول هەمی تەقدیر كرن ڕۆژا ئەزەل
وی ژ خزینا رەحمەتێ‌ دا من كورەك
هەر وەكی شیر و شەكەر دائیم دگەل
(باغێ‌ كوردا ـ بەرگێ‌ سێ‌ ـ لاپەرە 438).
ل دووماهیێ دبێژمە پێشكێشكاری، كو باوەردكەم وی ئاگەھـ ژ پەرتووكا من ژی هەبوویە و هەكە نەبیت ژی، دڤیابا دویڤچوون كربایە و راستی و دروستیا ڤەگوهاستنێ ئەمانەتا دیرۆكی یە.

کورتەچیڕۆکا ب ناڤێ (عەشقا ئاخێ)، ژ نڤیسینا (ئیسماعیل موستەفا)یە. چیرۆکنڤیسی د ڤێ چیرۆکێ دا، ڤیایە دیمەنەکێ دەروونی و جەستەیی دروست بکەت؛ کو هۆسا نیشان بدەت هەر جهێ مرۆڤ لێ بیت، ل بن هەر ناسنامەیەکێ بیت و دیرۆکا وی جهی چەند هاتبیتە شێواندن، لێ ئەڤ شێواندنە نەشێت گرێدانا مرۆڤی ب ئاخێ ڤە بقەتینیت.
نڤیسەری دڤێت بێژیت کو عەشقا ئاخێ نە بتنێ درووشمەکێ هزری یێ ڤەقەتیایە، بەلکو هێزەکا فیزیکی و موگناتیسی یە، کو دشێت ل دووراتیا هزاران کیلومەتران ژی، مرۆڤی راوەستینیت. د ڤێ چیڕۆکێ دا کو ل باژێرەکێ نامۆ هاتیە نڤیسین، هەرچەندە جهـ ب زمان و کەلتۆر و نڤیسینێن جودا هاتبیتە گوهۆڕین، لێ نڤیسەر مە هایداری تشتەکێ کویرتر دکەت: ئەگەر چەند گوهۆڕین و تێکدان بھێنە کرن ژی، ئاخ ناهێتە گوهۆڕین و ئەوا مە ب ملەتێ مە ڤە گرێددەت، هەر ئاخە.

تەکنیکا ڤەگێڕانێ و ڕۆلێ ڤەگێڕی:
د تەکنیکا ئەدەبی دا (ڤەگێڕ و نڤیسەر) دو کەساتیێن جودانە، لێ د ڤێ کورتەچیڕۆکێ دا کو ب تەکنیکا «کەسێ ئێکێ» هاتیە نڤیسین، ڤەگێڕ گەلەک نێزیکی کەساتیا خودیێ نڤیسەری ب خۆیە. ئەم دشێین بێژین ڤەگێڕ نوینەرێ نڤیسەری یە، دا بشێت ئێش و هەستێن وی د جیهانا چیڕۆکێ دا ب رێیا کرداران نیشان بدەت.

ڕۆلێ ڤەگێڕی د عەشقا ئاخێ دا:
تێکەلبوونا جەستەی و ئاخێ: وەکی دەما دبێژیت: (ل رێڤەچوونێ‌، دێ‌ بێژی ئێك پی یێن من دگریت، وەناكەت خۆش برێڤە بچم)؛ ئەڤ دیمەنە دیار دکەت کو حەزا نیشتمانی نەک بتنێ هەستن، بەلکو وەک هێزەکا راکێشانێ د جەستەی دا بەرهەڤ دبیت و پێیان تێكدئالینیت و رێڤەچوونێ گران دكەت.
وینەیێن سروشتی د چیڕۆكێ دا: دەما دبێژیت: (ئەو چیا و دارستانا ل پشت باژێری، دێ‌‌ بێژی پرچەكا درێژە ب سەر من دا هاتی، هێزا جوانییا ڤان دیمەنان ژ رێڤەچوونێ‌ گیرۆ دكرم). ل ڤێرێ ڤەگێڕ ب رێیا وێنەیێن ئەدەبی، تێکەلبوونا سروشتی دکەتە نموونە کو نیشتمان بۆ وی نە بتنێ ئاخە، بەلکو ژینگەهەکە د ناڤ جەستە و هشا وی دا دژیت.
مۆزیك وەک بزوێنەرێ ئاگەھداركرنێ: د دیمەنەکێ دی یێ چیڕۆکێ دا، دەما دبێژیت: (د وان كێلیكێن خۆشی و ئارامییێ‌ دا، دەنگێ‌ ژنەكێ‌ ب زمانێ‌ من د ستراند ئەز هەژاندم…)، بکارئینانا سترانێ ب زارێ جوان حاجۆی (دیاربەکر مالا منە) ژ لایێ ژنەکا ئەسمەرا شرین ژ رەنگێ ئاخێ، ڕۆلێ بزوێنەری دگێڕیت و ناخێ ڤەگێڕی دھەژینیت. ل ڤێرێ ڤەگێڕ بریارا «تەویک دانێ» ددەت؛ کو تەویک لێدان د کەلتۆرێ مە دا، بلندكرنا ھەستێ سەرسامبوونێ یە و شکاندنا بێدەنگیێ یە، بەرامبەر دەنگەکێ خۆش.
دارشتنا خەریبیێ د ناڤ خەلكی دا: ل دوماهیێ دەما دبێژیت: (لێ‌ زڤڕیم، لێ‌ د ناڤ بۆشاتییا مرۆڤان دا من بەرزە كر، وی دەمی كەلا خەریبییێ‌ پرچك ئینانە گیانێ‌ من، رۆندكان بێ‌ دەستویری روی یێن من شویشتن).
ئەنجام:
ل دوماهیێ دشێین بێژین: نڤیسەری ب رێیا ڤەگێڕی، چەمکێ «عەشقا ئاخێ»، ژ رەهەندەکێ هزری یێ رویت ب ڕێكا ئاستێ هەستپێکرنەکا جەستەیی و دەروونی (گرانبوونا رێڤەچوونێ، لێدانا دل و گریانا نەگەهانی). ئەڤە ژی وە دکەت خواندەڤان ب خۆ ژی د ناڤ وی هەستێ خەریبیێ و حەزکرنا وەلاتیدا بهێتە کشاندن.
ل دووماھیێ دشین بێژین كو نڤیسەری برێكا ڤەگێڕی «عەشقا ئاخێ»، ژ رەھەندەكێ ھزركی بگەھینیتە ئاستێ ھەستپێكرنەكا جەستەیی، وەك (گرانبوونا پرێڤەچوونێ، گری و لێدانا دلێ)، كو د ئەنجامدا خواندەڤان ژی د ناڤ وی ھەستێ خەریبیێ و حەزكرنا وەلاتیدا نقۆ دبیت.
عەشقا ئاخێ، كورتەچیڕۆك، ئیسماعیل مستەفا، رۆژناما ئەڤرۆ،ھژمار (4030)، 3/8/2026.

ژ فێقی، هژیر و مژمژە و هنار، هێشتا من چ فێقیێن دی زێدە نەكرین، هەڤالێ من گۆت: ژ هنارێ ژی هنارا ئەرمشتێ، ئەڤ سوحبەتا من و هەڤالێ من بەری چار هەیڤان بوو و وێ رۆژێ من گۆتێ: تە گۆت هنارا ئەرمشتێ، تو چ دبێژی ئەم هنارا ئەرمشتێ ل ئەرمشتێ بخوە بخووین؟ مە كرە پلان و ل ترۆمبێلێ سیار بووین و بۆ زاخۆ، مە تونێل دەربازكر و بۆ سەر دەستێ راستێ و ئەم ل چەند سندوقێن هناران دەركەفتین، لبن كەپرەكا داری و ب راستی ژی یێ بڤێت هنارەكا خۆش بخۆت، دێ هەلبژارتنا وی یا ئەرمشتێ بیت.
تشتێ سەرنجا من راكێشای، نە بتنێ هنار بوون، چایدانكەكێ چایێ دناڤ پەلان رابوو و من شەرم كر بێژمێ مام، مە هنار كڕین، لێ مە چایەك ژی دڤێت و مە خوە سوحبەت خۆش كر، مامێ بەرێخوەدامە و بەرچاڤكا من ب ستوویێ مندا شۆر بووی، مامێ گۆت: دیارە هین خواندەڤانن و هەما ئێكسەر گۆت: هین چ دبێژن بۆ نفشێ ڤێگاڤێ، ب دیتنا وە هەر خێزانەك چەند زارۆكان بینیت بەسن؟ من گۆتێ‌ مام، ل سالدەمەكی هەمیان حەز ژ هەسپان دكر، نە ژبەركو دجوان بوون، لێ وەك نوكە ترۆمبێل نەبوون، بار ژی ژ جهەكێ دبرنە جهەكی و مرۆڤ ژی ل پشتێ سیار دبوون و ئەو ژی ژ جهەكی دبرنە جهەكی و لێ نوكە پێدڤیاتیا مە ب هەسپی نەما، ژبەركو ئێدی ترسا مە ژ هەلگرتنا باری و ڤەگوهاستنێ نەما، ترۆمبێل هاتن ل سەردەمەكی هەبوونا زارۆكی یان كو دەستێ كاری، ئەو دێ چیتە ناڤ رەزی، بەر پەزی، جوتیاریێ و كارۆبارێن ناڤمالێ، ئەگەر مرۆڤ پیر ژی بوو، یێ زارۆك هەبان، یانكو رەزیل نابیت و لێ نوكە تشت هاتنە گوهورین، هەمی تشت بەردەستە، گرەنتیا ژیانێ، موچێ خانەنشینێ و چەند زارۆك دكێم بن، یان كو ژیانەكا خۆشتر و مسوگەرتر. مامێ گۆت: وەی هین سەرچاڤان و ئەڤە سندوقەكا هناران دیاری بۆ هەوە، من گۆتێ مام، ئەم ئێك هنار ژی ب هەروە نابەین، لێ ژ كەرەما خوە دو گلاسێن چایێ ژ چایدانكێ هەنێ بەسن، مامێ گۆت: وەی سەرچاڤان.

عەبدولڕەحمان بامەرنی

كورتەچیڕۆكا «سێ خەون» ژ نڤیسینا (شیان كانیساركی)یە و د رۆژناما (ئەڤرۆ) دا هاتییە بەلاڤكرن، چیڕۆك ب كورتی بەحسا سێ خەونان دكەت، د ھەر خەونەكێ دا تشتەك دھێتە ژ دەستدان: ژ دەستدانا بابی (تایبەت و خێزان)، ژ دەستدانا چیایی (سروشت و جھـ) و ژ دەستدانا وەلاتی (نەتەوە). د ڤێ كورتەچیڕۆكێدا ڤەگێڕ سێ رۆلان دگێریت، كەسێ ئێكەم (ئەز)، ڤەگێر و ھەم كارەكتەرێ سەرەكییە ژی. تشتێ ئەز پالدایمە ڤێ نڤیسینێ، ھونەرێ ڤەگێڕانا خودیێ چیڕۆكێ ب خوە بوویە و چاوان خواندەڤانی ھەمان ترس و گومان و ھەستێن ڤەگێڕی ھەبن.
سێ خەون و سێ دەنگ و سێ ھۆشداری، ئەڤ دوبارەكرنا سێ جاریێ، رەنگە رێسایەكا كەڤن بیت و گەلەك جاران د ناڤ چیڕۆك و چیڤانۆكێن كوردیدا جھێ خوە دگریت و د چیڕۆكێ دا سێ جاران دەنگێ ھۆشداریێ و ب سێ ئاستان كارەكتەرێ چیڕۆكێ ژ خەوێ ھشیار دكەت و بڤی رەنگی: (بلند، بلندتر، گەلەك بلندتر)، ئەڤ سێ ئاستێن ھەنێ، تەئكیدكرنا ھۆشداریەكێ نە، كو نڤیسەرێ چیڕۆكێ مە د بازنەیەكێدا دزڤڕینیت و دەما ئەم ل چیڕۆكێ و جۆرێ ئاخفتنێ و توندیا دەنگی دنێڕین؛ ل خەونا ئێکێ دەنگ ھەوالی یان خەبەری د گەھینتێ كو (بابێ تە مر). لێ ل دەنگێ دووێ، ئەوی رەخنە دكەت و ب تۆنەكا بلندتر دبێژیتێ (ھەر وەکی تو یێ بێ گوھی؟). ئەڤ گوھۆڕینێن ل سەر ئاستێ ئاخفتنێ دا دھێن، بنیاتەكێ ھلكێشایی دروست دكەن ژ راگەھاندنێ بۆ ھشیاریێ یان ھۆشداریێ و ئەڤە ل سەر لەشێ ڤەگێڕی ژی دیار دبیت، جارا ئێكێ دەنگ ل بەر گوھێ وییە و جارا دووێ وەك لێحەیتاندنەكا نەرم دھێت، دەما دبێژیتێ ھەروەكو تو یێ بێ گوھی و ل جارا سیێ یان خەونا سیێ، ملێ وی د ھەژینیت، ب رامانا ھۆشدارییەكێ ژ ئاستێ گوھلێبوونێ بۆ ھەستكرنێ ڤە دچیت.
د چیڕۆكێ دا چ دھێتە دیتن؟ رەشبینی ب ھێزتر دیار دبیت، باب بەرزە دبیت و چیا ل جھێ خوە نامینن و ب گوھگرتنا دەنگێ قەرەبالغییێ ل ناڤ گۆڕستانێ، ڤەگێڕ خوە ل سەر چۆكێن خوە ناگریت، بەلێ د ھەمان دەمدا ئەم دشێین بێژین، رەشبینیا د چیڕۆكێدا یا ھۆشداریێ یە، چەند جارەكێ دەنگ ڤەگێڕی ژ خەو رادكەت، ھۆشدارییەكێ ددەتێ، ھشیار ببە، وی ژ خەوێ ھشیار دكەت و ب ھشیاربوونا ڤەگێڕی د چیڕۆكێدا، خواندەڤان ژی ھشیار دبیت.
ئەگەر ئەم ل گرێ و ئالۆزیێن د ناڤا چیرۆكێدا بنێڕین، ل دەستپێكێ، ھۆشداری دھێت كو (بابێ تە مر)، لێ ئەو ڤێ ھۆشداریێ نەرێ دكەت و بەرەف خەوا خوە دچیت، جارا دووێ ھۆشداریێ ددەتێ كو چیا ل جھێ خوە نەمانە و دیسان ھشیار دبیت و ب بینینا چیا، ھۆشداریێ دوبارە نەرێ دكەتەڤە و بەرەف خەوێ دچیت، لێ د ھۆشداریا سیێ دا دەما دبێژیتێ ئەگەر ئەڤێن دی بۆ تە دگرنگ نەبن، رابە وەلات چوو، ئێدی بابەت دھێتە گوھۆڕین و نڤیسەر چیڕۆكا خوە ل بەر خواندەڤانی دھێلیتە ڤەكری، ژ بەر کو بابێ وی ل ناڤ نڤینێن خۆ نینە. ئایا مریە؟ ئایا ئەو قەرەبالغ بۆ جەنازەیێ وی یە؟ ئەڤە ژی ئێک ژ نیشانێن چیڕۆکا نوویە.
لڤێرە ئەم د شێین گرێیا چیڕۆكێ ل سەر ڤان بنەمایان دابەش بكەین، كارەكتەر: (ڤەگێڕ، باب، دەنگ و دبیت دەنگ لڤێرە زێدەتر دەنگێ وژدانێ بیت). ململانێ: (دناڤبەرا ڤەگێڕی و دەنگیدایە یان ئەم دشێین بێژین دناڤبەرا ڤەگێڕی و ھشیاركرنا وی ژ راستیێ. گوند: دیمەنێن د ڤێ چیڕۆكێدا دھێنە دیتن (گوند، خانی، گۆڕستان).
ژ دەستدان د ڤێ چیڕۆكێدا، ب سێ ئاستان ھاتیە مەزراندن: باب ب چاڤان ھاتیە دیتن، چیا ب ھەستێ ھاتینە دیتن و وەلات ب بێدەنگییێ ھاتیە ژ دەستدان و ئەڤ ژ دەستدانێن ھەنێ نەك بتنێ روودانەكێ ڤەدگێڕن، بەلكو وەكو پرۆسەیەكێ دھێنە پیشاندان و ھەوەكا ھشیاربوونێ یە. چیڕۆكنڤیسی دڤێت بێژیتە مە (ڤێرا بگەھن)! ئەڤە ژی ب زەلالی د چیڕۆكێدا دیارە، ژبەركو ڤەگێڕ ژ وەلاتی بارناكەت، بەلكو وەلات ژبن پێیێن وی دچیت و چیا نامینن و گوند بێدەنگ دبن و ئەڤ ئاوارەبوونا ھەنێ، ھەمی ب بێدەنگی د ناڤ نڤینێن وی یێن نڤستنێ و دناڤ جھێ ویدا رووددەن.
ئەگەر چیڕۆكێ ھەمی لێكدەینەڤە، ل خەونا ئێکێ ژ دەستدان ب دیتنێ دھێتە پشتڕاستکرن، ڤەگێڕ بابێ خۆ «ل سەر ناھلیکا خۆ درێژکری» دبینیت و ڤەگێڕ دبێژیت: «گیانێ من زڤڕی لەشێ من ڤە»، ب رامانا مرنا بابێ وی پارچەیەكە ژ مرنا ڤەگێڕی بخوە و یێ چیڕۆكنڤیسی ژ نێزیك ژی ناس بكەت، دێ ھەست پێكەت كو ئەو یێ كەفتیە بن كاریگەریا ژ دەستدانان و رەنگە ژ دەستدانا بابی ژ ھەمی ژ دەستدانێن دی مەزنتر بیت یان ھۆسا ئەم د چیڕۆكێ گەھشتبین.
ئەڤ پارچەیا دووماھیێ ژ كورتەچیڕۆكێ، ھەمی تشتەكی ل بەر خواندەڤانی دھێلیتە ڤەكری: «ئەڤ جارە ڕۆژ زویتر هەلاتبوو، من چ چیا نە ل نزاری و نە ژی ل بەڕۆژی نەدیتن، ئێدی پێیێن من گران بوون و نەشیان لەشێ من هەلگرن، کەفتم سەر چۆکێن خوە، گوند یێ بێدەنگ بوو، ب تنێ دەنگێ قەڕەبالغەکێ ل ڕەخێ گۆڕستانا گوندی دهات، ئەز ب لەز و بەز زڤڕیم ژۆر دا بابێ خوە ژ خەوێ هشیار بکەم و بێژمێ کا ئەڤە چییە ژ دەرڤە چێدبیت، لێ ل سەر جهێ خوە نەبوو».
ــــــــــــــــــــــــــــــــ
ژێدەر: سێ خەون، كورتەچیڕۆك، رۆژناما ئەڤرۆ ھژمار (4065)، 22/9/2026.

هەر چالاكیەكا د ناڤ باژێری دا بهێتەكرن، دڤێت بهێتە هەلسەنگاندن، ئەرێ مە شیایە ب رێكا ڤێ چالاكیێ چ بگەهینین؟ خالێن مە یێن سەركەفتی تێدا چ بوونە و ئەم دێ چاوا شێین پێنگاڤێن باشتر بهاڤێژین و تایبەت ژی، ئەگەر ئەو چالاكیێن هەنێ ل سەر ئاستێ پارێزگەهێ بخوە بن و دیدارا بامەرنێ ژی ل ڤی ئاستی بوو و پارێزگەهێ پشتەڤانیا وێ یا دارایی كر. لێ هندەك راستی هەنە و من دڤێت د ڤێ نڤیسینێ دا ئاماژێ پێ بدەم.
ئەڤ دیدارە كو بۆ سالا دووێ یە دهێتە گێران، ژ بیرۆكەیا گرۆپێ مالا بامەرنیان بوویە و پالپشتیا داراییا پارێزگەها دهۆكێ. بەری ئەز بچمە سەر بابەتێ خوە، دێ هندەكێ بەحسا ڤی گرۆپی كەم، گرۆپەكێ خوە بەخشە و چەندین چالاكی هەنە، چ یێن رەوشەنبیری بن و چ یێن جڤاكی بن و ئەڤ دیدارە ژی ب ڤی رەنگی، راستە ب سوپاسیڤە چەند لایەنان پشكداری د سەرخستنا دیدارێ دا هەیە، لێ ناهێتە هەڤبەركرن ئەگەر ئەڤ گرۆپە نەهێتە پێش و ئەڤێن ل رۆژێن دیدارێ ئامادە بووین، دشێن دیدەڤانیا ڤێ چەندێ بدەن، ژ وێ خوارنا ژلایێ گوندیان و خوە بەخش دهاتە چێكرن و ل سەر مێهڤانێن دیدارێ دھاتە بەلاڤكرن و ئەو گەنجێن خوە ددانە بەر هەر كارەكی هەتا دووماهیێ كو ئەڤە بابەتێ من نینە، بەلكو درووشمێ دیدارێ بخوە یە. (هەمەجۆریا مە ژێدەرێ هێزا مەیە) و دەركەفتنا ڤی درووشمی بخوە ژی گرێدان ب گرۆپی و پێكهاتەیا بامەرنێ ڤە هەیە و مە ڤیایە رەنگڤەدەتە سەر هەمی جومگەیێن هەرێمێ و چاوا؟ ل بامەرنێ ئەگەر بتنێ تاخێ (شیڤا هرچا) بۆ نموونە وەربگرین، تا 47 مالان مە یێن هژمارتین كو ھەر ئێك ژوان ژ جهەكی ھاتینە و ل بامەرنێ ئاكنجی بووینە، چ ئەو جهێ هەنێ گوند بیت یان دەڤەر بیت یان عەشیر بیت و دەما دبێژین 47 جه، ئەم بەحسا 47 عەقلیەتان دكەین، 47 دابونەریتان و لێ هەر زوی دناڤ شیرازێ ژیانا ل بامەرنێ هەیی خوە د گونجاندن و د بوونە بامەرنی و ب مەبەستا، كەسێ نەدگۆت ئەز خەلكێ ڤی جهیمە و دڤێت هین وەك من بكەن، لێ هەمیان گوت ئەم بامەرنیمە و خوە دگەل دابونەریت و پێكڤە ژیانا ل بامەرنێ هەی د گونجاندن و ژ ڤی روانگەی، مە بۆ دیدارا ئەڤ سالە بیر ل وێ چەندێ كر، ئەم نموونا پێكڤە ژیانا خوە ژ بامەرنێ دەربێخین و ڤان هەمی ناسنامەیێن جودا یێن ل هەرێما كوردستانێ هەین، نەشێن د بن سیھوانا هەرێمێ دا ببنە ئێك ناسنامە و ئەڤە دێ چاوا چێبیت، پێنەڤێت دڤێت ڤەكۆلین و خواندنێن رەوشەنبیری و ئەكادیمی بۆ ڤێ چەندێ هەبن و مە ئەڤە كر، د هەمی بیاڤەكی دا ئەم دێ چاوا شێین ڤان هەمی ناسنامەیێن لاوەكی ئێخینە د خزمەتا ناسنامەیەكا ب هێز و ئێكگرتی دا.
بوویە ب دیتنا من وەك نڤیسەرێ ڤێ نڤیسینێ، پێدڤییە ئەم ئێدی ب رێكێن زانستی ل سەر پرسێن خوە یێن نەتەوایەتی و نیشتیمانی راوەستین، پێكڤەژیانا مە هەی، ئێكگرتنا مە، پەیوەندیێن جڤاكی و ئەڤرۆكە ل سەر ناسنامەیێ بوو و سوبەهی ل سەر پێكڤەژیانێ و دێ چاوا ئێكدو قەبیل كەین و دوزبا ل سەر شۆرشا ئەنترنێتێ و دێ چاوا شێین پاراستی بین و شوینا ئەو ژمە بخۆت و زیانێ بگەهینتە مە، ئەم بشێین چاڤرۆهنیەكێ ل سەر دروست بكەین و مفای ژێ وەربگرین.

تورێن كومەلایەتی ژبلی بەلاڤكرنا دەنگوباس و تشتێن سەیروسەمەر، یا بوویە تورەك هەڤالان دگەهینتە ئێك و هەڤالێن نوی د لیستا هەڤالێن مرۆڤیدا زێدە دكەت، چەندین جاران یا ب سەرێ من ب خوە هاتی، كەسەكێ هاتیە دەستێ من و یا گۆتی ئەم هەڤالێن ئێك یێن فەیسبووكێ نە، ناڤێ تە و فەیسبووكێ تە و چ وێنە ل سەرە و تۆ چاوان هەڤالێ منی و ب دەهان پرسیارێن دی، ل دووماهیێ دێ چمە دەستێ ویڤە و بێژمێ ئها بیرا من هات و دێ هندەك دگەل ویدا بەحسا تورێن كومەلایەتی و فەیسبووكێ كەم.
یا راستی بیت، هەڤالینیا وی بۆ من ل سەر فەیسبووكێ خۆشتر بوو و زێدەتر دانوستاندنا من و وی دگەل بابەتان دهات.
ئەڤە ژی ب مەبەستا ئەم نوكە بەرەف قوناغەكێ دچین، جۆرێ پەیوەندی و تێكەلیێن مە ژی گۆهۆڕین ب سەردا هاتن، لێ ئەڤە بابەتێ من نەبوو و یا من دڤیا بێژم، هەڤالەكێ من یێ فەیسبووكێ ئەز دیتم و دكانداربوو، گازی من كر و گۆت سەیدایێ بامەرنی وەرە چایەكێ ڤەخوو و گازی دو چایان بۆ من و خوە كر و شیشەكێ تەحینێ ئینا دەر و گۆت: تامكە تەحینا ئامێدیێ، دگەل چایێ چەندا خۆشە!
راستی بیت تەحینا ئامێدیێ یا خۆشە و یا دەڤگرە و تاما وێ دناڤ پەحنكا دەڤێ مرۆڤیدا دمینیت، گۆت: تو چ دبێژی بۆ باجانسوركا كوردی؟ بەری ئەو زێدەتر بێژیت، من گۆتێ ب شانازیڤە بەرهەمەكێ خۆمالی یە و دیاردكەت، كو خەلكێ مە ژی زێدەتر حەز ژ تشتێ خۆمالی دكەت و دڤێت پشتەڤانیێ ژی لێ بكەت.
گۆت: تو هزر دكەی، كو ئەڤە راست باجانسوركا كوردی بیت؟ من گۆتێ بەلێ، هەر چەندە جارەكێ ئەز ژ سەرسنكێ ڤە دهاتمە دهۆكێ و ل راستا سكرینێ كەسەكی دو سندوق و تەرازیەك ل بەر سینگی بوون، من گۆتێ ئەڤ باجانە یێن كیرێ نە؟ گۆت ئەڤە یێن كودی یێن عەسلینە و یێن مەجلمەختێ نە، هەر چەندە كەنیا من هات و من گۆتێ ما تو دزانی مەجلمەختێ دكەڤیتە كیرێ؟
گۆت: نەخێر بەلێ ناڤودەنگیا وێ بڤی جۆرێ باجانسوركێ یێ چووی و ئها دڤێت ئەم ل سەر ڤێ كاری بكەین، تشتێ خۆمالی بیینە پێش و چاوان نوكە كڕینا باجانسوركا كوردی بهایێ خوە هەیە و سوبەهی دێ جۆتیار ژی زێدەتر دێ بەرەف چاندنا وێ چن.

ئەڤ (دیاردەیا) ئەز ژێ بەحس دكەم، هەر تشتەكێ نەبیت و كەسەك هزرێ تێدا بكەت و بكەتە پرۆژە، چ ئەو پرۆژێ هەنێ یێ بچویك بیت ل سەر ئاستێ تاكی یان یێ مەزن بیت ل سەر ئاستێ گشتی و د هەردووكاندا دیاردە هەر دیاردەیە، بتنێ هندەكان مفایێن خۆ زێدەتر هەنە ژ زیانێن وێ و هندەكێن دی ئەگەر بوونە دیاردە و چاڤلێكرن، رەنگە بۆ هندەكان زیانێن وێ ژ مفایێ وێ زێدەتر بن.
ئەگەر هندەك نموونان بینم، دەما مرۆڤ قەستا ئامێدیێ یان بامەرنێ و بۆ رەخێ زاخۆ دكەت، دێ دیاردەیەكێ بینیت، مەنقەلەكا ئاسنی ل سەر چەند پێپكانە و دو چایدانكێن چایێ یێ ل سەر پەلا و رەخێن چایدانكی ژ خولییێ و تەنییێ یێن رەش بووین و دو كورسیك ژی ل بەر وێ مەنقەلێ نە و گەنجەك یێ باهینكێ ل پەلێن سەر مەنقەلێ دكەت. هەر چەندە بەری چەند سالا درێكا ئامێدیێ دا هندەك جاران تشتەكێ هوسا دكەڤتە بەرچاڤێن مرۆڤی، لێ د نوكەدا ئەڤ دیاردەیە ل گەلەك جهان دهێتەدیتنێ و ژ مفایێن وێ، كەسەك دێ بیتە خودان كار، گەشتیار یان شوفێر یان رێڤینگ دێ ل بەر راوەستن و چایەكا سەر پەلان ڤەخۆن و هندەك ل بەر بێهنا خۆ ڤەدەن و ژبەركو ئەڤ دیاردەیە ل سەر ئاستێ تاكی یە، زیانێن وێ نینن بتنێ مفایێن وێ هەنە و هەم بیرۆكەیەكا جوانە و تشتەكێ شارستانییە و دێ روویەكێ جوان ژی دەتە جهێن گەشتیاری و دەتە رێك و بانان و تا ڤێرە، ئەڤ دیاردەیا من ئینایی وەك نموونە تشتەكێ جوانە. ژبلی ڤێ ژی ئینانا فێقی بۆ سەر لێڤێن جاددێ، كو مە ل وەرزێ بهارێ ددیت خەلكی بەلگێن مێوان، حلی ترشك و بەرە بەرە دێ هژیر چێبن و تری چێبیت و گوهیشك و كەزان و كتكێن هژیرا و مێویژ و هەتا دووماهیێ، ئەڤێ دیاردێ مفایێن خۆ ژ چەند ئالیانڤە هەنە، ئێك متایێ جۆتیاری دێ هێتە فرۆشتنێ و بهایێ كرییا رێكێ و گومركێ دێ ژ سەر رابیت و یا گرنگ ژی چەند كەسەك دێ بنە خۆدان كار و ژبەركو دهۆك باژێرەكێ گەشتیارییە، دێ ب ڤی فێقی و زەرزەواتی رەوشەكێ و خۆشیەكێ بۆ گەشتیارێن بیانی ژی دروست كەین.
ژ دیاردێن دی، كو هەر دیاردەیەك ژ بیرۆكەیەكێ دروست دبیت، رەنگە زیانێن وێ زێدەتر بن ژ باشیێن وێ، بۆ نموونە بەری چەندەكێ من وێنەیەك دیت و هۆسا ل سەر نڤیسی بوو، (….. خزمەتا تایبەت بۆ تازیان)، ئەو ژی پێشكێشكرنا شرینیەكێ كو قەسپ بوون و دیسا جەزوویێ قەهوێ بوو، رەنگە ئێكەم جار ئەم بێژین دێ تشتەكێ جوان بیت، لێ بۆ ڤێ دیاردەیێ ئەز هندەك خرابیێن وێ ئینم، كو زێدەترن ژ مفایێن وێ، كو رەنگە بیرۆكە یا جوان بیت كو دێ هندەك كەس دەست بكار بن، لێ زیانێن وێ، دێ بۆ خودانێ بەهییێ بیتە بارگرانی و وەك ئەم دزانین خەلكێ مە گەلەك حەز ژ چاڤلێكرنێ دكەت و یێ هەبیت و نەبیت، دڤێت ئەو ژی هەمان تشت بكەت و ژلایەكێ دیڤە، ئەرێ ئەو نموونا ب بەرچاڤێن من كەفتی، قەسب و قەهوە، ئەرێ (قەسپ) فێقیەكە لدەف مە هەیە هەتا ب ڤی رەنگی ئەم رەواجێ بۆ بكەین، كی دێ ژڤێ دیاردێ مفادار بیت؟! كو بێی ئەم بزانین، ئەم دبینە پالێ پیشییێ خەلكەكێ دی و ئەو دێ ل سەر حسابا مە بەرهەمێ خۆ فرۆشن!

دنیا هەر ئەڤ دنیایەیە یا ئەم تێدا دژین و ئاخرەت ژی هەر ئەو ئاخرەتە یا پشتی مرنێ دهێت و ژلایێ (مەلا) ڤە دهێتە بەحسكرن، بوچی من گوت مەلا؟ ژبەركو ڤێ چیرۆكا خوە هەیە و رەنگە بۆ بەری سەد سالان زێدەتر بزڤڕیت، دگۆت (ل گوندەكی مەلایەكی هەر بەحسێ‌ دنیایێ و ئاخرەتێ دكر و گوندییەكی گۆت: دنیا ئەڤەیە یا ئەم تێدا، مەبەستا وی، گوندێ وی بوو و دڤێت بچم رۆژەكێ(ئاخرەت)ێ ژی ببینم و ژ گوندێ خوە زێدەتر نە دیتبوو.
كارێ خوە كر و خاترا خوە ژ گوندیان هەمیان خاست و چوو هەتا ل گوندەكێ دی دەركەفتی و ئەو گوند ژ گوندێن وان مەزنتر بوو و ئێكسەر ل سەر پییێ خوە زڤری و گۆت: ئەڤە من دنیا هەمی دیت.
مەبەستا من ب ئینانا ڤێ ڤەگێڕانێ، ئەم چاوان ل دنیایێ بگەڕین؟ گەڕیان چاڤێ مرۆڤی ل گەلەك تشتان ڤەدكەت و ئەو گەڕیانا ئەز ژێ بەحسدكەم، گەڕیانەكا راستە راست بیت، بینینا دەریایێ، بیابانێ، دارستانێن مەزن و هەكە پرسیارێ ژمن بكەی، دێ بێژم كوچكێن پادشاهێن یابانێ و چینێ و دێ بێژم ئەهرامێن مسرێ و هێشتا گەلەكن ئەڤێن من دڤێت ب چاڤێن خوە ببینم، لێ یا راستی بیت ئەز بەحسێ‌ ڤێ بتنێ ناكەم، بۆ نموونە من گەلەك فلمێن مسری یێن دیتین و هەكو ل كولانێ ژن ب دەنگێ بلند د ئاخڤیت و ژیانا وان یا جڤاكی، ل وەلاتێ چینێ و خارنگەهێن وان یێن مللی و ئەو خوارنێن ئەو دخوون، ل وەلاتێ كورییا و جوداهیا بنەمالێ، كو جڤاك هەمی ل سەر بنەمالێ دهێتە ناسكرن و ل هندێ، من دڤێت هندیا ژ نزیك بینم، ڤێ قەدەرا مرۆڤان و هەژاریا وان، ئەو چاوان دشێن ب ژین و من دڤێت وەلاتێ رووسیا ببینم، ئەو رۆمانێن من خواندین و من وێنەیەك ل سەر جڤاكێ وێرێ و رەوشت و تیتالێن وان د سەرێ خوەدا وێنەكرین و هەكە دگەل خواندەڤایێ خوە یێ راستگۆ بم و چەند ئەڤ هزرە خوە ل سەرێ من ددەن، ئەز زێدەتر ب بەرێخۆدانا فلمان و خواندنا پەرتووكان ڤە دهێمە گرێدان.

مەبەستا من ب ئەم هەمی، یانكۆ گۆتنا من یا گشتگیرە و رەنگە هەر ئێك ژ مە بارا خوە ب رەنگەكی و قەبارەكی تێدا هەبیت. بۆچی من گۆتی ئەم هەمی رەخنێ دگرین؟ رێك من بەحسا ئەم رەخنێ دگرین، لێ ئەم ل رێكێن چارەسەریێ ناگەرین و ئەڤا ئەز دبێژم هەمی جومگەیێن ژیانێ ڤەدگریت و جڤاكێ و خزمەتگوزاری و ئابووری و سیاسی ژی.
د ڤی دەمی دا رەخنە و رەخنە گرتن یا بوویە قاچكێ دەڤێ هەر كەسی و هەردو كەسان ملێن خوە گەهاندنە ئێك، گلە و گازندە كرن و رەخنە گرتن. تشتێ سەیر، كەس نە دبێژیت من دیتنەكا دی یا هەی و كەس چ بەهانەیان ژی نائینیت و ئەو كەسێ رەخنێ دگریت، هەمی ل سەر دكۆكن كو ئەڤە راستییە و ئەڤ بابەتێ ئەز دنڤیسم یان ئەز دئازرینم، ئەز بەحسێ مژارەكا تایبەت ناكەم، بەلكو گۆتنا من یان ئازراندنا من بۆ بابەتێ رەخنێ و رەخنەگرتنێ بابەتەكێ گشتگیرە؛ ئەڤ گشتگیریا ئەز ژێ دبێژم، خوە ئەگەر ئەڤ كەسێ ئەم رەخنێ ژی لێ دگرین یان ئەو دیاردەیا ئەم رەخنە ژی دكەین، كەس نابێژیت ئەڤە بەحسێ منە و یان دڤێت شرۆڤەكرنەكێ بدەم و من ژی دیتنا خوە هەبیت و ئەو ژی دێ هێت و رەخنێ گریت، ل ڤێرە رەخنەگر و ئەڤێ رەخنە لێ دهێتە گرتنێ هەردو بەرانبەری ئێك دبن و ئەنجام چ تشتەك ناهێتە چارەسەركرن، ژبەركو ئەم نەشیاینە رەخنەیا خوە دروست ئاراستە بكەین یان ئەم ب ترس رەخنێ دگرین و نەشێین تلا خوە ل كەسەكی یان ئالیەكی درێژ بكەین و ئەڤە ژبلی كو ئەگەر مە رەخنە هەبن ژی، مە رێكێن چارەسەریێ نینن، بوویە رەخنەیا مە سەر ناگریت.
جارێ رەخنە چییە؟
دبیت ئەم ب ئاسانی بێژین، رەخنەگرتن یان كو ل دەڤ مرۆڤی یان ب دیتنا مرۆڤی تشتەكێ نەدروست یێ هەی و دڤێت بهێتە راستڤەكرن، لێ ئەڤ رەخنەیا هەنێ بتنێ ئالیەكە و ئەو ئالی ژی ئەم ب خوەینە ژبەركو ئەم یێ رەخنێ دگرین، لێ ئەڤێ ئەم رەخنێ لێ دگرین یێ ل بەرانبەری مە، ئەو یێ ل رەخەكی و ئەم یێن ل رەخەكی و رەخنەگرتن، یانكو ئەم یێ تشتەكی سەرئاڤ دكەین و دڤێت ئەو رۆهنكرنێ بدەت و ئەو مە سەر راست بكەت و ئەگەر كێماسی ل دەف وی دەركەفتن، دڤێت قانوون جهێ خوە بگریت و مرۆڤ پەنایێ بەر جهێن قانوونی ببەت و لدویڤ بەندێن قانوونی ئەو لێك تێكنەگەهشتنە بهێتە چارەسەركرن.
ئەم د رەخنێ دگەهین یان نە؟
ئەگەر ڤێ بكەمە پەرسیار، ئەرێ ئەو رەخنەیا ئەم دگرین مە دڤێت كەسەك بهێت و چارەسەریەكێ بۆ ڤێ رەخنێ بگریت یان ژی مە دڤێت ئەم راییا گشتی دروست بكەین؟ ئەگەر مە بڤێت ئەم رەخنێ بگرین ژبۆ چارەسەركرنێ، دڤێت رەخنەیا مە بۆ وی لایەنی یان وی كەسی یا ئاراستەكری بیت یێ مە مەبەست پێ هەی و ئەگەر چێنەبوو، ژنوی ئەم ل رێكێن قانوونی بگەرین و ژخوە ئەگەر مە بڤێت رایا گشتی دروست بكەین، دڤێت رەخنا مە یا واقعی بیت، دا دویڤچوون بۆ بهێتەكرنێ و رێكێن چارەسەریێ بۆ هەبن.

بۆچی مللەتێ دخەوە؟ هەكە ئەز ڤێ بكەمە پرسیار و نڤیسینا خوە بۆ بكەمە بەرسڤ و مەبەستا خوە ژ نڤستنا مللەتی دیار بكەم، رێك من بەحسا خەلكێ مەیە، ئەڤێن ب شەڤێ هشیار دمینن و هەتا نیڤرۆ ژێ د خەودا، بۆچی من گوت مللەت؟ ئەڤ زاراڤە ژكەڤن ل گەلەك دەڤەران دهێتە ڤەگێران، بۆ نموونە دا بچینە ناڤ مللەتی یان بۆ مە بەحسێ دەنگوباسێن مللەتی بكە و نوكە دهۆكێ و ب دەوروبەرانڤە یا بوویە مللەت.
وێ رۆژێ هەڤالەكێ من كو ئاكنجییێ ئێك ژ گوندێن دەرڤەی باژێرییە و دڤیا ژڤانەكی بدانیت دا پێكڤە قەستا بازارێ دهۆكێ بكەین، گۆت: (دەمژمێر نەهی سپێدێ باشە؟) بكەنیڤە من گوتێ هەتا نێزیكی نیڤرۆ ژی مللەت یێ دخەوە و نیڤا خەبەنكێن بازارێ دهۆكێ هێشتا قفل یا پێڤە، راستی بۆ هەڤالێ تشتەكێ سەیر بوو و گۆت: سەیدایێ بامەرنی، ئەڤە تو چ دبێژی؟! هەر وەكو من تێئینایە دەر، هەڤالێ من باوەر ژ من ناكەت و هەتا مە ژڤانەك دانایی و مە هەر تشت ب چاڤێن خوە دیتین و من گوتێ: ئەز دێ بۆ تە بەحسێ بەری چەند شەڤان كەم، مە قەستا گوندێ ئەز لێ ژ دایكبوویم كربوو و ئەم ل دیوانێ د رووشنتی بووین و هەتا مێهڤان ڤەرەڤین و مە كارێ هاتنا هاتنەڤەیێ كری، دەمژمێر بوو ئێك و پیچەك، پشتی نیڤا شەڤێ و مەدا رێ و گەهشتینە كومەلگەها باگێرا و ئەم كەفتینە ناڤ خەبسێ و ترۆمبێل ب ترۆمبێلێ ڤە هەتا ئەم گەهشتینە مال، بۆ دەمێژمێر دو و پتر، هەڤالێ من ئێكسەر گۆت، ئەرێ بامەرنی ئایا ئەڤە یا تەندروستە؟ من ب خوە چ بەرسڤ نەبوون، ئایا ژ حكومەتێ یە و بێكاریێ و ژ نەبوونا موچەیی، پا ئەڤ خەلكە ڤێ پانزینێ ب چ دكریت و هێشتا ئەز یێ دناڤ هزرێن خوەدا و دەما هەڤالێ من ملێ من هەژاندی و ل هیڤیا بەرسڤا خوە، ئەز و برایێ خوە، پشت و پشت ل سەر پشتا كەری بووین و بابێ من دگۆت: لەزێ بكەن ئەڤرۆ مە كرە درەنگ، بۆ زانین هێشتا حەتاڤێ چاڤێ نە دەرئێخستبوو.