د جیهانا فوتبۆلا سەردەمی دا، ئاراستەیێن زانستی یێن كارگێریێن وەرزشی دوپات دكەن كو كەس نەشێت دیرۆكێ ب چاپینیت، چێدبیت یانەیەك یان تیمەك ب چەنسی ئەنجامێ یاریەكێ ببەت، یان د هەلكەڤتەكا نەئاسایی دەستكەڤتەكێ بدەستخوەڤە بینیت، لێ یانەیێن مەزن و پرۆژێن سەركەڤتی بێ پلان چێنابن، ژبەر كو ئاڤاكرنا هەر دەزگەهەكێ وەرزشی پێدڤی ب پرۆژەیەكێ زانستی یێ درێژخایەن هەیە كو چەندین سالان ڤەكێشیت، ژبەر ڤێ چەندێ ئەوا ئەڤرۆ دوەرزشا مە دا رووددەت و ئەم دبینین، نە تنێ قەیرانا ئەنجامانە، بەلكو نیشانا لاوازیا دیتن و بەرزەبوونا ناسنامەیێ یە، ژبەر كو ئەگەر ئەم ب شێوازەكێ زانستی بەری خوە بدەینە ڕەوشا یانەیێن مە یێن كوردستانێ ب تایبەتی ئەوێن نها پشكدار دخولا ستێرێن ئیراقێ دا، دێ بینین كو مەترسیدارترین دیاردا تەكنیكی یا بەرۆكێن وەرزشا مە گرتی، ئەوژی پشتبەستنا راستەوخوە و زێدەیا یانەیێن مە لسەر یاریزانێن ژدەرڤەی هەرێما كوردستانێ ب رێژەیا 75% ئەگەر پتر ژی نەبیت، ئەڤە ئامارە نیشانا نەبوونا پلاندانانێ یە، ژبەر كو پارەكێ ئێكجار مەزن بۆ ئینانا یاریزانێن دەرڤە دهێنە مەزاختن، داكو ئەنجامێن وەختی بدەستڤە بینن، ددەمەكی دا ئەڤە یاریزانە بێ چ پرۆژێن درێژخایەن دهێن و دچن بێ كو چ مفایێن چێگیر یێن تەكنیكی بدەنە پاشەرۆژا یانەیێن مە، یان گەشەپێدانا ئاستێ گشتی یێ وەرزشا هەرێمێ، سەربۆرا ژی هووسا بۆ مە دیاركریە، كو هەر دەمێ پشتەڤانییا دارایی كێم ببیت ژبەر هەر رەوشەكێ، تیمێن مە یێن ڤەگەریاینە خالا دەستپێكی، ژبەر كو مە ئەو رێژا یاریزانێن خۆمالی نینن كو بشێن دگەل تیمێن مەزن یان خولێن بهێزبەردەوام بن، چونكو هەر یانەیەك یان خولەكا نافخویی تنێ ب قەبارێ مەزاختنا پارەی، یان ئینانا ناڤێن دیار یێن بیانی ناهێتە پیڤان، بەلكو هەلسەنگاندنا راستەقینە لدۆر كارێ وان یێ ئاڤاكرن و پێگەهاندنا یاریزانێ خومالی دیاردبیت، ئەگەر مەزاختنا دارایی یا مەزن نەبیتە ئەگەرێ گەشپێدانا ژێرخانەیا وەرزشی و ئاڤاكرنا تیمان لسەر ئاستێ ژیێن جودا و بەرهەڤكرنا كادرێ راهێنانێ و ئارمانجێن خوە یێن سەرەكی بجهنائینیت، چونكو نەڤیێن نوو ب چەنسی دروست نابن، بەلكو ژ ئەنجامێ كارەكێ ئەكادیمی یێ رێكخستی دهێنە پێش، بەلێ پشت بەستنا تمام لسەر یاریزانێن بیانی ژبۆ تێركرنا حەزا بەروەختا جەماوەری چ جاران یانەیەكا خودان بەرنامە چێ ناكەت، یا من دڤێت بێژم ڤەگەریانا یانەیێن كوردستانێ بۆ رێرەوا وان یا دروست، پێدڤی ب شۆرەشا بریارا دەزگەهێن وەرزشی یێن بلند ل هەرێما كوردستانێ و كارڤەدانێن عاتفی نینن، بەلكو پێدڤی ب جێگیركرنا پرنسیپ و رێسایێن زانستی ییێن كارگێری هەیە، دارشتنا پرۆژیەكێ تەكنیكی یێ روون، دیسان وەبەرهێنانا راستەقینە دبەهرەمەرندێن نافخویی دا، دیسان هەلسەنگاندن و بەردەوامییا كارێ كارگێریێن یانەیان لسەر بنەمایێ بەرهەمێ كاركرنێ بیت، نەك ئەنجامێن وەختی، وی دەمی بتنێ دێ شێن بینە خودان یانە و تیمێن باش كو بشێن هەڤركییێ لسەر ناسناڤان بكەن، نەكو ب تنێ پشكداریێن وەختی و بێ ئارمانج بن.

دجیهانا فوتبۆلێ دا چ تشتەك وەكو ژدەستدانا ئەنجام و خالێن یاریێ دلێ پشتەڤانان نا ئێشینیت، ب تایبەتی دەمێ ئەو یانەیا وان ڤیان لسەر هەی، دناڤا یاریگەها خوەدا دەلیڤەیا سەركەڤتنێ ژ دەست ددەت، ژبەر هەر تیمەكا بڤێت بگەهیتە گۆپیتكا سەفەرازیێ، پێدڤییە مفای ژ ئەرد و جەماوەرێ خوە بینیت، دیارە ژدەستدانا شەش خالان ژسێ یاریێن دەستپێكێ یێن یانەیا دهۆك دخولا ستێرێن ئیراقێ دا، ئەوێن ب وەكهەڤی ب داوی هاتین پتر ژ تێبینەیەكێ تا نها لسەر ئاستێ ئەلهویێن چیا پەیداكرینە، ژبەر كو دەمێ ددوو یاریان دا لسەر ئێك تو چار خالان دناڤ ئەرد و جەماوەرێ خوەدا ژ دەست ددەی، ئەڤە ئاماژەیە كو تیم تووشی فوبیا یاریگەها خوە بوویە، ئەڤرۆكە ل شوونا پشتەڤان هاریكاربن بۆ سەركەڤتنا تیمێ یێن بووینە هۆكارێ گڤاشتنا دەروونی لسەر یاریزانان، ئەڤە ب شكەستنەكا تەكتیكی دناڤ ئەردێ خوەدا دهێتە قەلەم دان، دیسان دەمێ پێنچ گۆل دسێ یاریاندا دهێنە تۆماركرن وێ نیشانددەت كو كێشە بتنێ چەنس نینە، بەلكو هەماهەنگی دناڤبەرا هێلا بەرگێریێ و گۆلپارێزی یا لاۆازە، ئەگەر ئەم وان گوهۆرینێن نە دروست، ژلایێ دەستەكا راهێنانێ ڤە ژبیر نەكەین، دەمێ یاریزانێن خوە یێن هێلا هێرشبەرێ دەردئێخیت و یێن بەرگیرییێ دئینتە دناڤا یاریگەهێ دا، ئەڤە وەدكەت كو دهۆك ب تمامی ڤەگەریێتە دەڤەرا سزایا خوە و ببیتە ئەگەرێ هندێ كو تەپە بەردەوام ددەڤەرا مەترسیێ دا بیت و رێژەیا دروستبوونا شاشیان زێدەببیت، ژبلی نە چێگیربوون لسەر پێكهاتییەكێ سەرەكی ئاریشەیەكا دی یە، داكو دهۆك بشێت سنوورەكی بۆ ژدەستدانا ڤان خالێن زێرین ب دانیت، پێدڤییە راهێنەرێ ئیرانی یەحیا گۆلمحەمەدی ڤان رێكارێن تەكتیكی و دەروونی لبەر چاڤ وەربگریت، یا ئێكی َو سەرەكی فەلسەفا خوە یا پلانا یاریێ ب گوهۆریت، پێدڤییە لسەر كو بێژیتە یاریزانێن خوە پاراستنا تەپێ دناڤا نیڤا یاریگەها هەڤرك دا بكەن داكو گڤاشتنێ لسەر تیما خوە كێم بكەت، هند پشت بەستنێ لسەر تەپێن درێژ و بێ مفا نەكەت، یا دویێ رێكخستنەكا باشتر دهێلا بەرگێریێ دا بكەت ب تایبەت دتەپێن بلند ئەوێن ژلایاڤە دهێن كو ئەو ئەگەرێ سەرەكییێ وان گۆلانە یێن كو لسەر دهۆكێ دهێنە ئۆماركرن، یا سێیێ دڤێت هێزا هێلا پێشییێ ب گوهۆرینێن نە دروست ژ دەست نەدەت داكو رێ نەدەتە تیما هەڤرك كو پتر بهێنە پێش، یا چارێ هەموو بزاڤان بكەت راهێنانێن دەروونی یێن تایبەت ب یاریزانان بكەت، بۆ هندێ نەكەڤنە لبن گڤاشتنێ ب تایبەت دوان یاریاندا یێن كو دناڤا جەماوەرێ خوە یێ مەزن دا دكەن، یا من دڤێت بێژم رەنگە هندەك بێژن كو هێشتا زوویە و دهۆك پێدڤی پتر ب دەمی یە كو لسەر شاشییان راوەستیت، بەلێ ب بوچوونا من ژ دەستدانا شەش خالان ژ سێ یاریان زەنگەكەكا هۆشداریێ یە، دەم هات ئێدی كادرێ راهێنانێ ب خوەدا بچیت و ڤێ ئاریشەیێ بلەز چارەربكەت، داكو تیم ڤەگەریێتە رێرەوا سەركەڤتنان، بەری دەم ب سەر ڤە بچیت و خەونا هەڤركیێ وەكو سەربۆرێن پێشین لسەر ناسناڤێ خۆلێ ژدەست بچیت.

دیارە لڤی وەرزی كارگێریا یانەیا زاخۆ پتر ژ هەر دەمەكی پووتە دایە تیما خوە یا فوتبۆلێ ئەوا پشكدار دخولا ستێرێن ئیراقێ دا، پشتی بازارێ ڤەگوهاستنا یاریزانان ب ئینانا ناڤێن مەزن و بوهایەكێ گران رێزێن خوە پێ موكمكرین، بۆ هندێ پەیامەكێ بدەتە هەموو یانەیێن ئیراقێ كو ئەڤ سالە تنێ بۆ پشكداریێ بەشدار نابیت، بەلكو چاڤێ وێ دێ ل دروستكرنا دیرۆكەكا نوو بیت، ئەوژی برنا ئێكەم ناسناڤێ خولێ، بەلێ ددەستپێكا وەرزی دا بدەستڤەئینانا تنێ سەركەڤتنەكێ ژ سێ یاریان دگەل تیمێن ژخوە كێمتر پرسیارەكا جدی لدەڤ پشتەڤان و حەژێكەر و چاڤدێران پەیدا دكەت، ئەرێ كومكرنا ڤان هەموو ستێران تێرا هندێ هەیە كو ناسناڤێ خولێ بدەستڤە بینن، یان كێشەیەكا تەكتیكی درێڤەبرنا ڤێ تیما مەزندا هەیە؟ ژبەركو پێكهاتییێ زاخۆ لڤی وەرزی ناڤێن هەرە دیار تێدا نە ژوانا گۆلكەرێ وەرزێ بوری شیزۆرد دیمترۆڤ ل هێلا پێشیێ، دیسان هەبوونا هەر ئێك ژ ئاكام هاشم ل بەرگیریێ و مایسترو هارۆن ئەحمەد، عەلی جاسم، شێركو كەریم، ئەمجەد عەتوان و ئورینیوی ل هێلا ناڤین و هێرشبەریێ، ژبلی وان پیشەكارێن نها و یێن وەرزێ بوری یێن كو بەرەڤانییێ ژ درێسێ یانەیێ دكەن، ئەڤ كاروانێ ژ ستێران دڤێت پتر باوەریێ بدەنە تیمێ، بەلێ ئەنجامێن دەستپێكێ هووسا نیشان ددەن كو ئینانا ناڤێن مەزن ب تنێ بەس نینە ئەگەر تە پلانەكا تەكتیكی یا تمام ل پشت نەبیت، دیارە هەتا نها راهێنەرێ فرەنسی لورانت بانید نەشیایە ڤان ستێران دناڤ ئێك پێكهاتییێ بهێز دا بكار بینیت، كێشەیا سەرەكی نەبوونا ناسنامەیا تەكتیكی یا روون بوویە، پێدڤی یە راهێنەر شێوازێ یاریا خوە ب گوهۆریت و بزانیت دێ چەوا مفایی ژ شیانێن ڤان یاریزان بینیت، ب گرێدانا هەر سێ هێلان پێكڤە، نەك ب تنێ پشت بەستنێ لسەر شیانێن كەسوكی بكەت، هەروەسا دەمێ ئەڤ ناڤێن مەزن پێكڤە یاریێ دكەن، پێدڤییە ب روونی ئەركێ هەر یاریزانەكی دیاربیت داكو زاخۆ هەڤسەنگیا دناڤبەرا هێرشبرنێ و بەرگێریێ پەیدابكەت، دیسان دەمێ تەپە ژێ دهێتە ستاندن نەكەڤیتە لبن فشارێدا، ژبەر كو ئەڤ یاریزانە ژ یانەیێن جورو جور هاتینە پێدڤییە ددەمەكێ كورت دا گیانێ یاریا بكۆم دناڤبەرا واندا ئاڤابكەت، چونكو بتنێ ستێر ئەنجامێن یاریان و دەستكەڤتان ئێكلاناكەن، بەلكو تیم ناسناڤان دئینن، ژلایەكێ دیڤە پێدڤییە پشتەڤانێن زاخۆ و كارگێریا یانەیێ و دەستەكا راهێنانێ بزاڤێ بكەن، گڤاشتنا دەروونی و راگەهاندنێ لسەر یاریزانێن خوە كێم بكەن، داكو بشێن ب ئارامی یاریێ بكەن، زێدەباری هندێ خولا ئیراقێ یا درێژە و پێدڤی ب نەفسەكا مەزن و بهێز هەیە، لەوما پێدڤییە زاخۆ بشێت رەفتارێ دگەل هەموو رەوشان بكەت، ب تایبەت یێن گرێدای هنگاڤتن و سزایان داكو ئاستێ خوە ژ دەست نەدەت، یا من دڤێت ل دووماهییێ بێژم مافێ جەماوەرێ زاخۆ ژ هەر دەمەكی پترە چاڤەرێ ئاهەنگا برنا ناسناڤی ببیت، بەلێ پێدڤییە بزانن كو ناڤێن مەزن تنێ ئالایێ هەڤركییێ بلند ناكەن، بەلكو تەكتیكا دروست و خەبات بەردەوام و گیانێ ئێكگرتنێ دێ تیمێ بەرەڤ ئارمانجێ ببەت، ئەڤە ژی كارێ سەرەكییێ دەستەكا راهێنانێ یە.

دبێژن كلیل و نهێنییا سەرەكی یا ب دەستڤەبرنا ناسناڤێن خۆلێن درێژ یێن جیهانا فوتبۆلێ دا، هەبوونا یەدەكێن خودان شیانێن، هەر تیمەكا ئەڤ چەكە د دەست دا بیت، دێ شێت بیتە هەڤركەكا بهێز ژبۆ بدەستڤەبرنا ناسناڤێ خولێ، بەلێ ئەڤە ڕامانا هندێ نینە كو بتنێ ب یەدەكێن باش دێ شێی گەهییە هەمی هیڤی و ئومێدێن خوە، ددەه سالێن بوریدا ئەگەر ئەم خولا ئیراقێ یا مەزنان بكەینە نموونە، یانەیێن پایتەختێ ئیراقێ جەوییە و شورتە و زەورا بەردەوام هەڤركی لسەر ناسناڤێ خولێ دكرن، ژبەركو ژدەما جێبەجێكرنا سیستەمێ پیشەكاریێ، دهەر وەرزەكی دا پێكهاتیێن خوە ب یاریزانێن ئاست بلند و بهێز تمام دكرن، بۆ هندێ دناڤا بازنێ هەڤركییێ دا بمینن، دبەرامبەردا یانەیێن دی دژی ژبەر كێشەیێن دارایی، یان ژی هزرا كارگێریا كلاسیكی یا تنێ بۆ مانێ دخولێدا وپشت بەستن ب كورێن یانەیێ، یان تنێ هەڤركی لسەر ناسناڤێ كوپا ئیراقێ وەكر كو ئارمانجێن وان دبەرتەنك بن، بەلێ دیارە دڤان پێنچ سالێن داویێ دا گورانكاریێن ریشەیی پەیدابوون، گڤاشتنێن راگەهاندنێ و حەزا جەماوەری بوونە پالدەرێن بهێز كو كارگێریێن یانەیێن كوردستانێ ژی بلڤن و گورانكاریێ دپێكهاتیێن خوەدا بكەن، خوونێن نوو یێن خودان شیان بینە دناڤ رێزێن خوەدا و ئەنجامێن باش تۆماربكەن، ئەگەر ئەم بزانین كو یانەیا دهۆك شیا ناسناڤێ خولا یانەیێن گەنداڤی، دیسان كوپا ئیراقێ بدەستڤە بینیت، هەردو یانەیێن زاخۆ و هەولێر وەكو خودانێن رێزبەندیا سێیێ پشكداریا خولا كەنداڤی دبەرژوەندییا خوەدا ئێكلا بكەن، ب دیتنا من دگەل دەستپێكرنا هەڤركیێن گەرا ئێكێ ژ خولا ستێرێن ئیراقێ، یانەیێن كوردستانێ دێ ب شێوازەكێ جودا ژ وەرزێن بوری دەركەڤن، ژ بەركو وان  راهێنەرێن خودان شیان و یارێزانێن ئاست بلند ئیناینە، لسەر كورسیا یەدەكان ژی چارەسەریێن تەكنیكی یێن بهێز هەنە كو دشێن ئەنجامێن یاریان ددەمێن ئالۆز دا بگوهۆرن، بەلێ پرسیارا گرنگ ئەوە ئەرێ یەدەكێن باش بتنێ دێ تیما تە ڤیان لسەر هەی بەرب ناسناڤان بەت، ئەز دبێژم نەخێر، ژبەر كو دخولەكا درێژدا گەشتێن دوور دناڤبەرا پارێزگەهان دا هەنە، ئەو تیم دێ ب سەركەڤیت یا بشێت ئاستێ شیانێن جەستەیی یێن یاریزانێن خوە پارێزیت و خوە دوور بێخیت ژ هنگاڤتنێن دژوار، یا دیتر راهێنەرێن تیمێ بشێن ب كومكرنا ژمارەیا زوور یا ستێران كۆنترۆلا گیانێ تیمێ و رێگریێ ل ئاریشەیێن دەرۆنی و یاریزانێن یەدەك بكەت، دیسان بشێن هەر زوو پشتی هەردۆراندنەكەكێ یان وەكهەڤییەكێ ڤەگەریێنە سەركەڤتنان، ژبلی هندێ ساقامگیریا دارایی و پشتەڤانییا كارگێریێ یۆ تیمێ ژ هەموو لایان ڤە هەبیت، بزانیت دێ چەوا رەفتارێ دگەل وان یاریان كەت یێن كو ژدەرڤەی یاریگەها خوە ئەنجامددەت وخالان ژدەست نەدەت، یامن دڤێت بێژم كو بدەستڤەبرنا ناسناڤێ خولێ مافێ هەر تیمەكا پشكدارە، بەلێ تنێ ئەو تیم دێ گەهیتە گۆپیتكا سەرفەرازیێ یا كو ژبلی یەدەكێن بهێز خودان نەفسەكا درێژ بیت، ئەڤان خالێن سەری  ب گرنگی وەربگریت، ب هیڤیا هندێ یانەیێن مە یین كوردستانێ ببنە هەڤركێن راستەقینە لسەر ناسناڤێ خولا ڤی وەرزی و ئەم ئێك ژوان ل پودیوما خەلاتكرنێ بینین.

ئەڤرۆ 16 تەباخێ یە، مللەتێ كورد و لایەنگرێن رێبازا بارزانییێ نەمر دێ سالیادا بورینا 80 سالان لسەر دامەزراندنا پارتی دیموكراتی كوردستانێ پیرۆز كەن، د ڤێ مێژوویا پر سەروەری دا، پارتی ب تنێ حزبەكا سیاسی یا چەكداری نەبوویە ژبۆ داكوكیكرنێ ژ مافێن مللەتێ كورد، بەلكو هەردەم هزر د ئاڤاكرنا تەخ و تویژن جودا یێن جڤاكی دا كرییە، د ناڤا ڤان تەخان دا سەكتەرێ وەرزشی و گەنجان  بوویە كو هەردەم د پێشەنكا كار و بەرنامەیێن پارتی دا بوویە، هەر ب گەرماتییا شورەشێ تا ئەڤرۆ خوە ل وەرزشێ كریە خودان و بدیتنەكا كوور بەرێ خوە دایە وەرزشێ وەكو لایەنەكێ گرنكێ ژیانێ كو ئارمانجا وێ یا سەرەكی خزمەتكرن و پەروەردەكرنا لاوانە، پەیاما دیرۆكی یا جەنابێ سەرۆك مەسعوود بارزانی دەمێ دبێژیت (رۆلێ وەرزشێ ژ هیچ لایەنەكێ سیاسی كێمتر نینە بۆ ناسناندنا مللەتێ كورد ل جیهانێ) نیشانا تێگەهشتنا كوور و ئاست بەرزە بۆ رۆل و سەنگا وەرزشێ د جیهانا ئەڤرۆدا، ب دیتنا سەرۆكی دا وەرزش ب تنێ یاری یان دەم بوراندن نینە، بەلكو هێزەكا نەرم و هۆكارەكێ كارا یێ دیبلۆماسییەتێ یە كو دشێت سنوران ببریت و دەنگ و روخسارێ شارستانی یێ مللەتێ كورد ب گەهینتە مەیدانێن دەولەتی، دەمێ ئالایێ كوردستانێ د قارەمانیێن جیهانی دا ب رێكا وەرزشڤانان دهێتە  بلندكرن، كاریگەریا وێ ب دەهان كومبوونێن سیاسی گرنكترە، سەرۆك بارزانی بڤێ ئاخڤتنێ وەرزشڤان كرینە بالیۆزێن راستەقینە یێن دۆزا رەوایا مللەتێ كورد د ناڤ گوكەلگەهێ نێفدەولەتی دا، ئەڤ دیتنا مەزن یا سەرۆكی، بوویە نەخشەرێیەكا كرداری بۆ هەموو بەرپرسێن پارتی یێن كو كار د ناڤا حكومرانییا كوردستانێ دكەن ب تایبەتی رۆلێ بەرچاڤێ بەرێزان نێجیرڤان بارزانی سەرۆكێ هەرێما كوردستانێ و مەسرور بارزانی سەرۆكێ حكومەتا هەرێما كوردستانێ دهێتە پێش، كو ب بەردەوامی و دهەمی قووناغان دا پشتەڤانێن راستەقینە یێن یانە و ئێكەتیێن وەرزشی و وەرزشڤانان بووینە، پشتەڤانییا وان یا بەردەوام و بەرهەڤكرنا هەر تشتەكێ پێدڤی بۆ سەركەڤتنا كاروانێ تیمێن كوردستانێ ژبۆ پشكداریێ دخول و قارەمانیێن نافخۆ و دەرڤەدا بەلگەیێ ڤێ چەندێ نە، ژبلی پشتەڤانییا وان یا بەردەوام  بۆ ئاڤاكرنا ژێرخانەیا وەرزشی ژ یاریگەه و هۆلێن دەولەتی، دیسان  پشتەڤانییا وان برێكا هەردو رێكخراوێن ئێكەتیا قوتابی ولاوێن كوردستانێ و ئێكەتیا ئافرەتێن كوردستانێ ب دروستكرنا ب دەهان یاریگەهان بۆ باژێر و گوندێن كوردستانێ، ژبلی دابینكرن و بەلاڤكرنا كەل و پەلێن وەرزشی ل سەر هزاران ژ تیمێن مللی بێ جوداهی، بەلگەیەكێ دی یێ پشتەڤانییا سەركردێن پارتی یە بۆ بزاڤا وەرزشی، ژبەر هندێ ژی  چ جاران رێگری ل حەزێن گەنجان نەكریە، د هەموو كاودانان دا پالپشتی لێكریە، ژبەر كو باش دزانیت وەرزش چییە و ئارمانجێن وەرزشێ چ نە، وەرزش هۆكارەكە بۆ دوورئێخستنا لاوان ژ مەترسی و دیاردێن زیان بەخش، دیسان بۆ ئاڤاكرنا ئەندروستییا جەستەیی و وهزری یا جڤاكی، هەروەسا بۆ چاندنا گیانێ هەڤركییا ساخلەم و كوردپەروەریێ د دلێ نەڤێن نوو دا، ژبەر كو ب باوەریا پارتی وەرزش سەكتەرەكێ پیرۆز و پاقژە، هەردەم دگەل هەموو كاودانان دا دەرگەه ڤەكری هێلایە داكو وەرزشڤانێن كوردستانێ بەردەوام هەڤركییان دگەل تیمێن ئیراقێ بكەن، داكو پتر شارەزاهییێ وەرگرن و ئاستێ خوە پتر پێشبێخن بۆ هندێ پاشەرۆژەكا باشتر هەبیت و ناڤێ خوە و ولات و مللەتێ خوە بلند بكەن، لەوما ژبەر ڤێ پووتەدانێ  بەرهەمەكێ زێرین هەبوویە، ئەڤرۆ وەرزشڤانێن كوردستانێ شانازیێ پێ دبن، ئەنجامێن دیرۆكی یێ یانە و وەرزشڤانێن كوردستانێ لسەر ئاستێ نافخویێ و دەرڤە دا،  بدەستڤە ئینانا مەدالیێن رەنگین دقارەمانیێن دەولەتی و ئۆلمپی دا ب یاریێن جودا وەكو فوتبۆلێ، باسكێت بۆلێ، ڤۆلی بۆلێ ،تێنسا ئەردی و مێزێ، یاریێن جەنگی، شەترەنج و پایسكلان لسەر ئاستێ كوڕان وكچان، دیسان خەلاتكرنا وان ژلایێ سەركردایەتییا پارتی ڤە بەرهەمێ ڤێ پشتەڤانییا بەردەوامە، دیارە خزمەتكرنا وەرزشێ لدەڤ پارتی دیموكراتی كوردستان، تنێ دروشمەكێ راگەهاندنێ نەبوویە، بەلكو بەشەك بوویە ژ ئادیۆلۆژیا ئاڤاكرنا مرۆڤێ كورد، ژبەر هندێ د سالیادا 80 یێ یا دامەزراندنا پارتی دا، وەرزشڤانێن كوردستانێ ب رێز و پێزانین ڤە بەرێ خوە ددەنە ڤێ مێژوویا پر ژ پشتەڤانیێ، ئەڤرۆ وەرزشا كوردستانێ ژ سیبەرا ڤێ رێبازێ دا گەهشتیە ئاستەكێ هووسا كو نە بتنێ ل سەر ئاستێ ناوچەیێ، بەلكو د مەیدانێن جیهانی دا ژی ئالایێ كوردستانێ یێ بلند دبیت و بەردەوام بیت  ب جهئینانا پەیاما سەرۆكێ كوردان، دا كو وەرزش بالیۆزێ راستەقینەبیت بۆ مللەتێ كورد.

سوبەهی دێ كاروانێ نوو یێ خولا ستێرێن ئیراقێ یا فوتبۆلێ دەستپێكەت، هیڤی و ئومێدێن پشتەڤان و حەژێكەرێن فوتبۆلێ ئەوە خولا ڤی وەرزی ژ هەموو لایەكیڤە جێواز بیت بەرامبەر كێماسیێن وەرزێ بوری، فێدراسیونا فوتبۆلا ئیراقێ ب چاڤەكێ رەخنەیی و ئاڤاكەر بەرێ خوە بدەنە نافخویا یاریگەهان، یا مۆدرێن و دادپەروەر و ب هێز بیت، دخولەكێدا سەركەڤتن و گەرماتیا وێ ب شێوەیەكێ راستەوخۆ یا گرێدای ئاست و پشكداریا بهێز یا یانەیێن كوردستانێ بیت، ئەوێن هەردەم بووینە هۆكارێن مەزن یێن بلندكرنا ئاستێ هەڤركییێ، لەوما پێدڤییە ئەڤ سالە تیمێن هەرێما كوردستانێ ب پلانەكا راست لسەر بنیاتەكێ جێگیر پشكداریێ بكەن، مفای ژ سەربۆر و شاشیێن پێشین وەرگرن، ئێك ژ مەزنترین ئاریشەیێن وەرزێ بوری گوهۆڕینا بلەز یاراهێنەران بوو ئەوا بوویە ئەگەر سەقامگیریا تەكتیكی یا تیمێ تێكدایی، ژبلی هندێ پێدڤییە كارگێریا یانەیێ و جەماوەرێ ژ ئەنجامێن تیمێ دبێهنفرهبن، پشتەڤانییا دارایی و مەعنوی بۆ راهێنەر و یاریزانان بەردەوامبیت، دیسان دگورانكاریێن زڤستانێ و هاڤینێ دا هۆشیاری بریارێ بدەن، ژلایەكێ دیڤە بادەكا دادڤانییێ ئێك ژ پرسیارێن گرنگێن وەرزێ بوری بوو كو تیبنیێن زوور لسەر هەبوون، بۆ سەركەڤتنا خولێ فیدراسیۆنا ئیراقی دكەڤیتە لژێر بەرپرسیارتییەكا ئەخلاقی و پیشەیی داكو دادپەروەریێ دناڤبەرا هەموو یانەیان دا جێبەجێبكەت، ئەكەر پێدڤی بیت پشتبەستنێ ددیدارێن مەزن و ئێكلاكەردا لسەر دادڤانێن دەرڤە بكەت، ئەگەر دادڤانێ خومالی ل ئاستێ پێدڤی نەبن ژبلی سزادانێ وان رێ پێ نەهێتەدان بەردەوامییێ درێڤەبرنا یاریاندا بكەن، هەروەسا خوە ژ پاشئێخستنا یاریان دوور بێخین، ژبەركو پاشئێخستن خشتەی خولێ تێكددەت ژبلی هندێ جوش و خروشا یاریگەهان دمرینیت، هەروەسا كارتێكرنێ ل شیانێن یاریزانان دكەت، دیسان پووتەی ب كوالیتییا ڤەگوهاستنا راستەوخۆ یاریان بدەت، پێدڤییە بگەهیتە ئاستەكێ پرۆڤیشنال كو ژ هەژی ناڤێ خولێ بیت و جوانییا یاریێ نیشا بینەران بدەت، چونكو جەماوەر فێقیێ یاریگەهانە و گیانێ فوتبۆلێ نە، ئامادەبوونا وان دناڤا پەلۆكێن یاریگەهان دا خوشییێ ددەنە هەر یاریەكێ، پێدڤییە ب گیانەكێ وەرزشی ڕەفتارێن دگەل هەموو روودانێن یاریان بكەن، ب تمامی خوە دووربێخن ژ ئاخڤتنێن نەشرین و ئاژاوەگیریێ، روویەكێ جوان نیشا جیهانێ بدەن و ئەنجامان ب هەموو رەنگان قوبوول بكەن، یا من دڤێت بێژم وەرزێ نوو دەرفەتەكە بۆ هندێ سنورەك بۆ شاشیێن بەرێ بهێتە دان، ب دادپەروەریا فێدرسیۆنا ئیراقێ یا فوتبۆلێ، سەبرا كارگێری و جەماوەری، ئاستێ بلندێ یێ یانەیێن كوردستانێ، رەفتارێن جوانێن پشتەڤانان، كوالیتییا یاریگەهان، سیستەمەكێ ئەلكترۆنی یێ پێشكەڤتی بۆ فرۆتنا پلێتێن یاریان و رێكخستنا چوونا جەماوەری وگرنگیدان ب تەندروستیا یاریزانان، خول دێ گەهیتە وی ئاستی یێ كو ئەم شانازیێ پێ دبین، ب هیڤییا هندێ یانەیێن مە یێن كوردستانێ بگەهنە  ئارمانجێن خوە یێن ژهەژی.

كێشەیا داریی یێن یانەیێن هەرێما كوردستانێ، نەخاسمە ئەو یانەیێن پشكداریێ دخولێن ئیراقێ یێن فەرمی دا دكەن، نەبابەتەكێ نوویە، بەلكو ئەڤ كێشەیە تێكچوونا بنیاتێ وەرزشێ د ناڤا جەرگێ یانەیان دا نیشان ددەت، ژبەر كو ئەو میزانییا دارایی یا فەرمی ئەوا ژلایەنێن پەیوەندیدارڤە بۆ ڤان یانەیان دهێتە تەرخانكرن ب چ ئۆپشنان ڤە تێرا كەمپێن راهێنانێ یا كرینا یاریزانێن ئاست بلند ناكەت ژبۆ پشكداریێ دخۆل و قارەمانییێن مەزن دا، یا دروست ژی وەكو جیهان هەموو لسەر چیت ئەوە، پێدڤییە  ئەو پارەیێ دهێتە تەرخانكرن بۆ هەر یانەیەكێ هند بیت كو د دو دەرگەهان دا بهێتە خەرجكرن، ئێك بۆ پشكداریێ دخول و قارەمانییاندا، یا دیتر ژی بۆ چێكرنا شەنگستێ یاریان، ژبەر كو ئەڤ رەوشا نها ئەم دبینین راستەوخوە بارگرانیا خوە دئێخیتە ل سەر پتر ژ 90 سەدێ ژ یانەیێن كوردستانێ هەتا یێن كو پشكداریێ لسەر ئاستێ كوردستانێ ژی دكەن، چونكو زۆربەیا ڤان یانەیان نە خودان كومپانیێن مەزنن كو پشتەڤانییێ بۆ بكەن، نە ژی خودان دەستەكەكا شەرەفی نە كو ددەمێن تەنگاڤ دا هاریكاریێ لێ بكەن، تنێ ئێك دەرگە هەیە ئەوژی پشتەڤانییا حكومەتێ یە، لسەر هندێ را كو حكومەتێ لدووڤ شیانان چ كێمتر خەمی نەكریە بۆ بەردوامییا یانەیێن مە دناڤا هەڤركییان، بەلێ ئەڤرۆكە زۆربەی كارگێرێن یانەیان دناڤا دەریایەكا قەرزان مەلەڤانیا دكەن، دناڤا ناڤەندێن وەرزشی دا ئاماژە بۆ هندێ دچن كو برین و كێمكرنا ڤێ میزانییێ بۆ وەزارەتا دارایی دزڤرن، بەلێ دراستی دا بێ سەروبەری و نەبوونا پلانەكا ستراتیژی یا درێژخایەن ئاریشەیا بنەرەتییە، ئەگەر ئەم قەیرانا دارایی ژی ژێ بینە دەر، ژبەر هندێ كو ئاستێ هەڤركییا یانەیێن مە دگەل یانەیێن باشوور و ناڤەراستا ئیراقێ بگونجیت ئەو یانەیێن كو ژلایێ وەزارەتێن نەفتێ و ڤەگوهاستنێ ڤە ب ملیۆنان دۆلاران بودجە وەردگرن، پێدڤییە میزانیێن یانەیێن مە ئەگەر مە بڤێت ئەم هەڤركییێ لسەر ناسناڤان بكەین د لوچیكی بن، ب كێماسی سێ تا پێنچ ملیون دۆلاران بهێنە تەرخانكرن بۆ یانەیێن مە یێن كو پشكداریێ دخولێن مەزنێن ئیراقێ دا دكەن وەكو خولا ستێرێن ئیراقێ یێن فوتبۆلێ و یێن كێمتر نەبن ژ ئێك ملیۆنان، یێن هەرێمێ ژی دو سەد تا دو سەد و پێنجی هزار دۆلاربن، ئەگەر مە بڤێت ئەم وەرزشا خوە پێشبێخین، ژبەر كو ئەڤ ژمارەیا خەرجیاتان ئەو زێدەبوون تێدا نینە بەلكو پێدڤییەكا سەرەكی یا وەرزشا پیشەكاریە، تا كو كارگێریا یانەیان و سپۆنسەرێن كەرتێ تایبەت ژی بشێن پشكەكا دی یا تێچوویان  ب ستویێ خوەڤە بگرن، دیارە ئاستی تەكنیكی یێ ئاریشەیان تنێ دبوراێ فوتبۆلێ نینە، بەلكو دهەموو یاریێن دی وەكو باسكتبۆلێ، ڤۆلی بۆلێ، تەپا دەستی، یاریێن گورەپان و مەیدانێ و یاریێن تاك و هەتا دووماهییێ نزم بووینە، بۆ هندێ ئەم جارەكادی وەرزشا خوە ڤەگەرینە ڤە و وان یاریێن نها نەماین یان پاشڤە چووین ساخ كەینە ڤە، مە پێدڤی بڤان خالان هەیە، یا ئێكێ دابینكرنا دارایی یا بەردەوام هەیە ئەڤە ژی پێدڤییە یاسەیەك بۆ هەبیت، هەر یانەیەك ب گورەیی مەزنییا خوە  ناڤ و دەنگییا خوە وەرگریت، یا دویێ راسپاردنا كارگێریێن یانەیان ب كەسێن وەرزشی و شارەزایێن كاركێری و بسپۆر و بێ مەحسوبیەت، یا سێیێ پشتەڤانیا وەرزشا قوتابخانەیان و ئەكادیمیان ژبۆ ئاڤاكرنا بنەمایەكێ دروست ژ یاریزانێن گەنج بكەن، یا من دڤێت بێژم، دڤێ قۆناغا مەترسیدار دا ئەوا وەرزشا كوردستانێ تێدا دبوریت مە پێدڤی ب لژنەیەكا ئێكلاكەر هەیە ژبۆ دانا سنورەكی بۆ هەلوەشاندنا ڤێ جورە كاركرنێ، ژبەر كو ئەوا وەرزشا نها دهێتە كرن ژ نەبوونا یاسایەكا وەرزشی ل هەرێما كوردستانێ، راوەستاندنا كارێ لژنەیا ئۆلمپی، نەبوونا چ دەستهەلاتان لدەڤ رێڤەبەریا گشتی یا وەرزشی ئەوا وەكو بینەر بەرێ خوە ددەنە یانەیێن مەزن بێ كو بزانێن كا ژێدەرێن وان یێ دارایی ژ كیڤە دهێن و كێڤە دچن، ئەز پێشنیار دكەم كو لژنەیەكا بالا ب سەرۆكاتییا بەرپرسێ ئێكێ یێ وەرزشی ل هەرێمێ و جێگراتییا نوونەرەكێ پلە بلند ژ وەزارەتا دارایی بهێتە دامەزراندن، كو ئەندامێن وێ پێكبهێن ژ سەرۆكێن یانەیێن كوردستانێ یێن پشكدار دخولێن ئیراقێ و هەرێما كوردستانێ دا، دگەل دەستەكەكا رۆژنامەڤانێن سەربەخۆ یێن وەرزشی، كو تێدا سەرۆكێن یانەیان ئاریشەیێن خوە بێ راپۆرتێن كاغەزی بێخنە بەردەم بەرپرسێ دارایی و وەرزشی، بڤێ شێوەی دێ شێن بریارێن بلەز دەن و یانەیێن مە ژ قەیرانێن دارایی رزگار كەن، ئەڤە ناهێتە كرن ئەگەر ئەڤ لژنە رازیبوونا حكومەتا هەرێما كوردستانێ وەرنەگریت بۆ پشتەڤانیكرنێ، ژبلی هندێ لژنەیەكا چاڤدیریێ بۆ خەرجیاتێن ڤان یانەیان هەبیت، ژبەر كو هەتا نها كێشیا سەرەكی ئەوە كو حكومەتێ چ ستاندەرێن جێگیر یێن پشتەڤانییێ نینن كو یانە لدووڤ وی پارێ پێ دهێتەدان كارێ خوە لسەر ئاڤابكەت، ژبلی هندێ دائێخستنا دەرگەهێ هەر یانەیەكێ دووركەڤتنا وێ ژ هەڤركییان، بتنێ مانا یان راوەستاندنا یاریەكێ ب تنێ نینە، بەلكو شكاندنا ئومێدا سەدان گەنجان و ژناڤبرنا بزاڤێن چەندین سالانە، دەم هاتییە كو هەموو لایەك بزاڤێ بكەن رێگە چارەیەكێ ببینن ژبۆ دەربازبوونا یانەیێن مە ژ قەیرانان، ئەوا بەری چەند رۆژان ل یانەیا دهۆك دیاربووی ئێكەم زەنگلا مەترسییێ بوو، ئەگەر زوو چارەنەبیت، سوبەهی دێ ل یانەیەكا دژی دیاربیت.

ئەڤرۆ ل پرانیا یانەیێن كوردستانێ ب تایبەت ئەوێن دخولێن مەزن دا پشكداریان دكەن، پێدڤییەكا مەزن ب هەبوونا پەیڤدارێ یان (ئاخڤتنكەرێ) فەرمی یێن خودان بسپۆری ژ نافخویا راگەهاندنا وەرزشی یا كوردستانێ هەیە، ئەڤ چەندە دێ پێنگاڤەكا ئەرینی و گرنك بیت بۆ رێكخستنا كارێ كارگێری یێ یانەیان، بەلێ ئێك ژ مەزنترین ئاستەنگێن ل هەمبەر پەیڤدارێن فەرمی كو دبنە رێگر بەرامبەری كارێ وان، نەبوونا داتا و پێزانینێن دروست و كێمیا شەفافیەتێ یە ل دەف وان، ب تایبەتی دەمێ پرسیارەكا هەستیار لسەر گرێبەستان، ئاریشەیێن دارایی، یان بریارێن كارگێری یێن یانەیێ دهێنە كرن، د دەمەكی دا كو پێدڤی یە ئاخفتنكەر بخوە دناڤ جەرگێ بریارێ دا بیت و ئاگەهداری هەموو هووركاریان با، ئەم ژ پەیڤدارێن فەرمی یێن یانەیێن كوردستانێ ناخوازین كو ل سەر شاشەیان بەحسێ دادڤانییێ، كێشەیێن دگەل فیدارسیۆنێن جودا، یان گوتگوتكێن بازاری بكەت، بەلكو ئەركێ وی یێ سەرەكی ئەوە گەهشتنا راستیا پەیاما فەرمی  دناڤبەرا كارگێریا یانەیێ و راگەهاندنا وەرزشی ب ساناهی بكەت، داكو جەماوەرێ كوردستانێ یێ چاڤەرێ نووچەیان، پێزانینێن راست و دروست پێ بگەهن ل شوونا وان دەنگو باسێن نەراست و پروپاگەندەیێن كو پەیچ و تۆرێن جڤاكی پێ تژی بووین، گەلەك یا فەرە كارگێریێن یانەیێن كوردستانێ هەتا یێن ئیراقێ ژی تێبگەهن كو پەیڤدارێ فەرمی چەكەكێ راگەهاندنێ یێ بهێزە بۆ گەهاندنا پەیامێن وان یێن وەرزشی، رێكخستنا پەیوەندیان دگەل پشتەڤانان، پێدڤییە پەیڤدار ببیتە پرەكا لێك تێگەهشتنێ دناڤبەرا یانەیێ و جیهانا دەرڤەدا، دیسان پەیڤدارێ فەرمی یێن یانەیێن كوردستانی لسەر وێ چەندێ د هشیار بن كو ئەو لسەر شاشە و مایكرۆفونان نوونەراتیا دیرۆك و ناڤێ یانەیێ دكەن، د هەر پەیڤەكا دبێژن چ ب قەسد بیت یان ژ نشكەكێ ڤە بیت، دەمێ پرسیارەك ژێ دهێتە كرن و ئەو خوە ژ بەرسڤێ لادەت یان توورە دبیت، لڤێرێ پەیام ئەوە كو كارگێریا یانەیێ ب تمامی یا بێ دەنگە یان كەڤتییە دئاریشەیان دا، ژبەر هندێ دخولێن مەدا، رۆلێ پەیڤدارێ فەرمی گەلەك ژ هندێ مەزنترە كو تنێ ناڤەكێ شەرەفی یێ بێ دەستهەلات بیت، یان پۆستەك بیت بۆ زێدەكرنێ لسەر سیڤیێ هندەك كەسان، پێدڤییە هندەك سالوخت لدەڤ هەبن یا ژهەمیا گرنكتر یێ هێمن بیت و بشێت كونترۆلێ لسەر خوە دهەموو رەوشاندابكەت، پێدڤی یێ شارەزا بیت دیاسیێن خولێ و رێنمایێن فیدراسیۆنێ و هووركاریێن كارگێری دا، دەمێ دئاخڤیت پەیڤێن وی دزانستی بن و سۆز و عاتیفە تێدا نەبن، ژبلی هندێ خودان زمانەكێ شرین بیت و بشێت پەیامێن ئالۆز ب ساناهیترین شێوە بگەهینیت، یێ  راستگوبیت و خودان پەیوەندیەكا بهێز  دگەل هەموو دەزگایێن راگەهاندنێ هەبیت و بزانیت كیژ دەم یێ گونجایە كو زانیاریێن پێدڤی لدۆر یانەیێ بدەت، یا من دڤێت بێژم كو دناڤبەرا یانەیێ و دەزگەهێن راگەهاندنێ دا كارێ رۆژانە، ئاخفتنگەر ب كارێ فەرمی رادبیت برێكا بەیاننامە و روونكرنان، نەوەك ئەوا نها ئەم دبینین كو جار هەیە ب تیبەت دەمێ برێڤەبرنا خولان دا سەرۆك و كارگێریێن یانەیان  لسەر سۆشیال میدیایێ بەرسڤا پشتەڤانان یان كێشەو شاشیێن دادڤانان ددەن.

ل گەل نێزیكبوونا پشككێشانا خولا ستێرێن ئیراقێ یا فوتبۆلێ، رەنگە پرسیارا ژ هەموویان گرنكتر دناڤا جادەیا وەرزشی یا ئیراقێ ب گشتی و كوردستانێ ب تایبەتی ئەوبیت، ئەرێ خولا ڤی وەرزی دێ بیتە دەرگەهێ گۆرانكاریەكا بنەرەتی د رێكخستنا خولێ دا، یان دێ دیسان كەڤیتە دناڤا بازنەیێ كێشەیێن دووبارە دا؟ ئەگەر ئەم بزانین ل وەرزێ بوری پتر ژ تێبینیەكێ لسەر كاروانێ خولێ هەبوون چ یێن گرێدای رێكخستنێ ڤە، هەروەسا شاشیێن دادڤانان، بۆ بەرسڤدانا ڤێ پرسیارێ، ئیراق دشێت مفای ژ ئەزمونێن وەلاتێن پێشكەڤتی وەرگریت، ئێكەم و گرنكترین پێنگاڤ بۆ سەركەڤتنا هەر خولەكێ، ساقامگیری و پابەندبوونە ب ژڤان و خشتێ یاریان، ئەركێ فیدراسیونا ئیراقێ و لژنەیا بەریكانەیان ئەوبیت یا رژدبیت د نەهێلانا دیاردەیا پاشخستنا یاریان، ژبەر كو خولا بهێز پێدڤی ب بەردەوامییێ هەیە، پاشخستنا بەردەوام ژبەر هەر ئەگەرەكی، ژبلی كو جوش و خورش و گرنگییا هەڤركییێ لدەڤ جەماوەری دكوژیت و زیانێ دگەهینتە ئاستێ تەكنیكی یێ یاریزانان، بارێ دارایێ یێ یانەیان ژی گران دكەت، ژبلی هندێ سەركەڤتنا ڤی وەرزی پێدڤی ب هەماهەنگیەكا سێقۆلی دناڤبەرا یانەیان، لژنەیا بەریكانەیان و كۆمپانیێن ڤەگوهاستنا تەلەفزیونی هەیە، ژبەر كو یانە بخوە وەبەرهێنەرێن سەرەكی یێن یاریێ نە، راگەهاندن ژی ئەوە پەنجەرەیە ئەوا ڤی بەرهەمی نیشا جیهانێ ددەت، لەوا پێدڤی یە دەمێ یاریان ب رازەمەندی و دانوستاندنا هەموو یانەیان بهێتە دیاركرن، نە ب سەپاندنا تاكلایانە ژلایێ لژنێ ڤە،چونكو پاشگوهێخستنا خواستا پشتەڤان و گەنالان دێ بیتە ئەگەرێ ڤالابوونا یاریگەهان و كێمبوونا رێژەیا بینەران، دڤێ چارچووڤەی دا پێشنیارەك هەیە كو پێدڤییە بهێتە جێبەجێكرن، ئەوژی بەلاڤكرنا یاریێن ئێك رۆژ لسەر دەمێن جێواز ل هەردو وەرزێن زڤستانێ و هاڤینێ، ئەڤە ژی دێ دەلیڤێ دەتە حەزژێكەرێن فوتبۆلێ پتر ژ یاریەكێ بینن، ژبلی هندێ یاریەك هەبیت بناڤێ یاریا حەڤتییێ ئەڤ یاریێ رۆژەكا تایبەت هەبیت بۆ نموونە یاریێن كلاسیكویێ و دێربیان یێن جەماوەری وەكو شورتە و جەوییە یان دهۆك و زاخۆ و هەولێر بۆ هندێ سرنجا میدیایی و سەرمایەداران ب كێشیتە لسەر وێ یاریێ، یا من دڤێت بێژم پێدڤییە فیدراسیونا ئیراقێ تێگەهشتنا خوە بۆ فوتبۆلێ ب گوهۆریت، ژبەر كو خول نەتنێ كەیف خوشی یە، بەلكو پێشەسازی و وەبەرهێنانە، ئەگەر خول پشتی پشككێشانێ ب شێوازێ بازرگانی یێ پرۆفیشینال بهێتە برێڤەبرن، داهاتیێن پلێت، سپۆنسەر و ریكلامان دێ بارێ دارایی یێ یانەیان گۆهوریت ژ پشتبەستنا ب پارەیێ حكومەتی تا رادەیەكی رزگار كەت، ئەز باوەرم ئەگەر فیدراسیونا ئیراقێ یافوتبۆلێ پشتی ئەنجامدانا ڤێ پشككێشانێ ڤان خالان بكەتە كریار، دێ شێت وەرزەكێ رێكخستی، كێم كێشە و پر داهات پێشكێشی جەماوەرێ وەرزشی یێ ئیراقێ و كوردستانێ كەت، بەلێ هەر دێ مێنیت كونترۆلكرنا شاشیێن دادڤانێن یاریان كلیلا سەركەڤتنا خولا نوو، دگەل داخوازیێن سەركەڤتنێ بۆ هەموو یانەیێن كوردستانێ.

دجیهانا فوتبۆلێ دا قووناغا بەری دەستپێكرنا وەرزێ نوو دهێتە هژمارتن بەرێ بنیاتێ سەرەكی كو ئاستێ تیمێ  لسەر بهێتە ئاڤاكرن، بەری بكەڤنە دناڤا هەڤركیێن خۆلێ دا، دڤێ قووناغێ دا هەموو یانە كاردكەن بۆ بەرهەڤكرنا یاریزانێن خوە ژ هەموو لایانڤە، جەستەیی، تەكنیكی و دەروونی، داكو ئەو لێكتێگەهشتن، هەماهەنگی وگونجاندنا پێدڤی دناڤبەرا واندا پەیداببیت ژبۆ بدەستڤەئینانا ئەنجامێن باش و گەهشتن ب ئارمانجێ، رەنگە پرسیارەك نها بهێتە پێش ب تایبەتی بۆ پشتەڤانێن  یانەیێن مە یێن كوردستانێ ئەوێن پشكدار دخولا ستێرێن ئیراقێ دا، ئەرێ بەری دەستپێكرنا وەرزێ نوو چ بهێتە كرن داكو پشكدارییەكا سەرفەراز بكەن؟ یا ئێكێ چونكو خولا ئیراقێ ب هێزا پێكدادانێن دژوار دهێتە نیاسین، پێدڤییە گرنگییێ ب شیانێن جەستەیی یێن یاریزان د كەمپێن راهێنانێ دا ژبۆ ئاڤاكرنا هێزا زەڤلەكان و لەزاتییێ و خۆراگریێ بهێتەكرن، داكو یاریزان بشێت 90 خولەكان ب هەمان هێز یاریێ بكەن، یا دویێ راهێنەر گرنگییەكیێ بدەنە لایەنێ تەكنیكی و راهێنانێن بهێز لسەر كونترۆلكرنا تەپێ، پاسدان شوتكرن، لایەنێ پلان تەكتیكا یاریێ داكو تێگەهشتنەكا هەڤپشك دناڤبەر خودا دروستبكەن ب تایبەت دگەل وان پیشەكارێن بیانی یێن نوو هاتینە دناڤا رێزێن تیمێ دا، یا سێیێ دەمێ فشار لسەر یانەیەكێ زێدەن دبن، لایەنێ دەروونی دبیتە كیلیلا سەركەڤتنێ، دڤان كەمپان دا كار لسەر بلندكرنا باوەری بخوەبوونێ، گیانێ شەركرنێ و رێكخستنێ بهێتەكرن، ئەڤ چەندە ژی برێكا كومبوونێن تایبەت و هاندانا بەردەوام دهێتە بدەسڤەئینان، یا چارێ بەری دەستپێكرنا خولێ یانەیێن مە پێدڤی ب ئەنجامدانا یاریێن هەڤالینی یێن بهێز هەنە، ئەڤ یاریە دێ بنە دەلیڤەكا زێرین بۆ بجهئینانا وان پلانێن دراهێنان دا هاتینە وەرگرتن، دیسان بۆ دیاركرنا خالێن لاوازیێ و هێزێ یێن تیمێ بەری دەستپێكرنا خولێ، یا پێنجێ كارگێریێن یانەیان كار لسەر سەقامگیریا دارایی بدرێژاهییا وەرزی بكەن، دیسان ئیمزاكرنا گرێبەستان دگەل سپۆنسەرێن مەزن بكەن ومفای ژ ریكلامێن ناڤا یاریگەهێ و درێسێن یانەیێ و فرۆتنا پلێتان بكەن، ب عەقلیەتەكا بازرگانی كاربكەن بۆ هندێ هەر چ نەبیت گڤاشتنێ لسەر حكومەتێ كێمبكەن، یا شەشێ پێدڤی یە یانە باوەریێ بدەنە پروژێ دەستەكێن خوە یێن راهێنانێ، دەمێن پێدڤی بدەنێ داكو بشێن پلانێن خوە یێن تەكتیكی بجهبینن، مفای ژ سەربۆرێن خوە یێن پێشین وەرگرن، ژبەركو گوهارتنا دو تا سێ راهێنەران دوەرزەكی دا نیشانا بێ پلانێ یە، یا حەڤتێ چونكو یانەیێن مە ژبەر بلندبوونا بهایێ گرینا یاریزانان نەشێن سالانە 15 تا 20 یاریزانان ئەگەر پتر ژی نەبن بكرن، پێدڤی یانەیێن مە كار لسەر ئاڤاكرنا ئەكادیمیێن خوە لسەر ستانداردێن نوو بكەن، ب تایبەت یاریزانێن بەهرمەند، داكو ل پاشەرۆژێ  ببنە خوونێن نوو بۆ تیما ئێكێ، دیسان رێژەیا یاریزانێن بیانی كێمتر لێ بهێن، بەلێ هەر دێ مینیت دلسۆزیا پشتەڤانان بۆ تیما خوە خالا هەرە سەرەكی بۆ سەركەڤتنا كاروانێ وان، دگەل داخوازیێن سەركەڤتنێ بۆ هەموو یانەیێن كوردستانێ دخولا نوو یا ئیراقێ دا.