ئه‌م دێ ڤان شیره‌تان پۆلین كه‌ین و كه‌ینه‌ سێ جۆر:
1- هنده‌ك شیره‌ت ژبو پشته‌ڤانیا ده‌سته‌یا وانه‌گۆتنێ و یا كارگێری:
أ-پێشوازیا مرۆڤایه‌تی و هه‌می رێزگرتن بیت؛ بۆ نموونه‌ دێ سالا خوه ب كۆمبوونه‌كێ ل گه‌ل مامۆستایان ده‌ست پێ كه‌ی و به‌ری كو تو ئه‌ركێ وان ده‌ستنیشان بكه‌ی؛ دێ پرسیارا حالێ وان كه‌ی و چا‌وا ژیانا خوه‌ برێڤه‌دبه‌ن؟
ب- سه‌ركردایه‌تیا هه‌ڤپشك ژبۆ دابه‌شكرنا ئه‌رك و كاران و خوه‌ دویركرن ژخۆسه‌پاندنێ ژبۆ دانا بریاران.
ج-پێدڤییه‌ رێڤه‌به‌ر هه‌می كاودان و فشارێن ده‌روونی یێن مامۆستایان ل به‌رچاڤ وه‌ربگریت؛ هه‌ر چو نه‌بیت ل هه‌فتییا ئێكێ ژ ده‌وامێ و بارێ وان گران نه‌كه‌ت.
2- هنده‌ك شیره‌ت ژبۆ‌ پێشوازیكرنا قوتابیان:
رۆژا ئێكێ ژ ده‌وامێ گه‌له‌ك یا گرنگ و هه‌ستیاره‌ و هه‌كه‌ كارگێرییا قوتابخانێ د شاره‌زا نه‌بن، ره‌نگه‌ ده‌روونێ گه‌له‌ك قوتابیان تێكبچیت ب تایبه‌تی قوتابیێ ئێكێ سه‌ره‌تایی و قوتابیێ حه‌فتێ ئه‌ڤێ ژ سه‌ره‌تایی دهێته‌ ڤه‌گوهاستن بۆ ناڤنجی، یا فه‌ره‌ رێڤه‌به‌ر و كارگێریا قوتابخانێ ئه‌ڤ به‌ربه‌ستێ ترس و تێكچوونێ ل ده‌ف قوتابی بشكێنن و ئێكسه‌ر ده‌ست ب خواندنێ نه‌كه‌ن و بلا پێشوازییا قوتابیان ب چالاكیه‌كا دانه‌نیاسین و خۆشبێریێ بیت، و ئه‌گه‌ر د شیان دا بیت هنده‌ك شریناهی ژی بهێنه‌ دابه‌شكرن داكو ڤیانا قوتابخانێ ل ده‌ف قوتابی زێده‌ ببیت و بشێت خوه‌ بگونجینیت، هه‌روه‌سا یا فه‌ره‌ دوپاتی ل سه‌ر ئاڤاكرنا كه‌سایه‌تیا قوتابی بهێته‌كرن نه‌كو گرنگی و ته‌ركیزێ بێخنه‌ سه‌ر هندێ كا دێ تێكرایێ وی چه‌ند بیت، ئانكو قوتابخانه‌ نه‌ بتنێ گۆڕە‌پانه‌ بۆ تاقیكرنان و ئه‌ركێن قوتابخانێ یه،‌ به‌لێ جهێ ئاڤاكرنا مێشك و به‌هره‌یێن قوتابی یه‌ و به‌رچاڤكرنا به‌هره‌مه‌ندایه‌ ژی، هه‌روه‌سا به‌شێ رێنمایییا ده‌روونی و په‌روه‌رده‌ی زوی بهێته‌ ئه‌كتیڤكرن و ڤه‌كۆله‌رێ ده‌روونی بهێته‌ راسپاردن ژبۆ دویڤچوونا وان حاله‌تان یێن زوی خوه‌ نه‌گونجینن یانژی ئه‌ڤ قوتابیێن رۆژا ئێكێ دكه‌نه‌ گری، یانژی داخوازدكه‌ن كو ده‌یبابێن وان ل گه‌ل وان بهێنه‌ د پۆلێ ڤه‌، پێدڤییه‌ ده‌ملده‌ست هنده‌ك پلان بهێنه‌ دانان ژبۆ كونترۆلكرنا ڤان جۆره‌ حاله‌تان…
3- جۆرێ سیێ (ژینگه‌ها قوتابخانێ و جڤاكێ ده‌وروبه‌ر)
أ-پێدڤیه‌ رێڤه‌به‌ر ب خوه دویڤچوونا پۆلێ و ته‌ختێن داری و رۆناهیێ و ده‌ستشۆیان و ئامیرێن هوینكرنێ و گه‌رمكرنێ بكه‌ت ژبه‌ركو ژینگه‌ها پاقژ و رێكخستی هه‌سته‌كا خۆش و ئارامیه‌كا ده‌روونی ل ده‌ف قوتابی په‌یدا دكه‌ت.
ب-خورتكرنا په‌یوه‌ندیان وسكرێن باوه‌ریێ ل گه‌ل سه‌میانێن قوتابیان:
پێدڤیه‌ رێڤه‌به‌ر ل ده‌ستپێكا سالێ نامه‌كا هه‌می باوه‌ری و رێزگرتن و گه‌شبینی بۆ سه‌میانان بهنێریت و پێكڤه‌ رویننه‌ خوار و هه‌ردولا، رێكبكه‌ڤن ژبۆ هندێ ئه‌م هه‌ڤپشكین د فێركرن و په‌روه‌رده‌كرن و چاڤدێریا قوتابیان دا.