ب ئیرادێ و هێزێ و یاسایێ کیانێ سیاسی هەبوونا خۆ دسەپینیت و سەروەریا خۆ دپارێزیت.
سەروەری ئانکو مافێ دەستهەلاتداریا دەستەیا دەستهەلاتدار ل سەر دەولەتێ و هەمی دامەزراوێن وێ، بێی مایتێکرنەکا دەرەکی، ئانکو دەولەت خۆدانا بریارا خۆ بیت و چ راسپاردە ل سەر نەبن.
ئیراق دەولەتەکا فیدرالیا سەربەخۆیە و لدویڤ دەستوورێ دەولەتێ و یاسایێن نێڤدەولەتی سەروەریا تەمام هەیە، ژبەر هندێ مافێ وێ یە دەستهەلاتێن خۆ یێن تەمام بکاربینیت بێی مایتێکرنا دەرەکی، ئەڤ مافە ژ هەمی هەرێمێن دەولەتێ ڤەدگریت، و ئەرکێ وێ یە سەروەریا خۆ بپارێزیت و رێز ل سەروەریا وێ بهێتە گرتن و زێدەگاڤی ل سەر نەهێتەکرن.
هەرێما کوردستانێ ژی ل گۆرەی دەستووری هەرێمەکا فیدرالییە د چارچووڤێ دەولەتا ئیراقێ دا، هەمان ماف هەنە، هەروەکو هێز و ئیرادە و یاسا ژی هەنە کو بكاريت خۆ بپارێزیت، د هەمان دەم دا ئەرکێ دەولەتا ئیراقێ یە ژی هەرێما کوردستانێ وەکو هەمی دەڤەرێن دی یێن ئیراقێ بپارێزیت و رێز لێ بگریت.
هيزێن ئەمریکا و هەڤپەیمانا نێڤدەولەتی ل هەرێما کوردستانێ د چارچووڤێ بریارا جڤاتا ئاسایشا نێڤدەولەتی ٦٨٨ ژ بوهارا سالا ١٩٩١ وەرە هەبوونا خۆ یا کاڕا نیشادایە بۆ دویرکرنا دەستدرێژیێن رژێما دەستهەلاتدار ل ئیراقێ و دویرکرنا هێزێن لەشکرێ وێ ل هەرێمێ و پاشڤەبرنا گەفێن هێزێن دەرەکی، ئەڤە بۆ هەرێما کوردستانێ گرنگ و پێدڤی بوو و هەر هەڤپەیمانا نێڤدەولەتی بۆ رژێما دکتاتۆری روخاندی و پشتەڤانی ل ئاڤاکرنا ئیراقا دیموکراتیا فیدرالی کری و ب پەسەندکرنا دەستوورێ هەمیشەیی و دانپێدان ب هەرێما کوردستانێ وەکو هەرێمەکا دەستووری و سەقامگیربوونا رەوشا ئیراقێ، ئێدی بەهانەیا مانا هێزێن نێڤدەولەتیێن(رزگارکەر، داگیرکەر) نەما، لەوان کو ئەرکێ وان هێزان ب دوماهی هاتی، ئەو هێز ل کانوونا ئێکێ یا سالا ٢٠١١ هاتنە ڤەکێشان و ئەو رۆژ ب رۆژا سەروەریێ هاتە ناسکرن. لێ جارەکا دی پشتی سەرهەلدانا داعش و داگیرنا گەلەک باژار و دەڤەرێن سووریا و ئیراقێ و کوردستانێ ل سالا ٢٠١٤، و ل سەر داخوازا فەرمی یا حوكمەتا ئیراقێ هەڤپەیمانیەکا نێڤدەولەتی ب سەرکردایەتیا ئەمریکا بۆ شەڕی دژی داعش هاتە چێکرن و هاتنە ئیراقێ و هەرێما کوردستانێ دا کو هاریکایا ئیراقێ و هەرێما کوردستانێ بکەت بۆ رزگارکرنا دەڤەرێن داگیرکری و ژناڤبرنا داعشێ. و وەکو ئەڤ ئەرکە بجهئینای، ئێدی جارەکا دی بەهانەیا مانەڤەیا ڤێ هێزا هاریکار یا نێڤدەولەتی نەما، و لدویڤ رێکەفتنا هەروو لایەنان(ئیراقێ و هەڤپەیمانان)، ل ٣٠ ئیلۆنا ٢٠٢٦ ئەو هێز ژ ئیراقێ و هەرێما کوردستانێ هاتنە ڤەکێشان و چوون. و یا سروشتی یە ئاهەنگێن خاترخواستنێ و سوپاسداریێ ب چەپک و گولان بۆ ڤان هێزان بهێنە گێران، چونکی هاتنا هێزێن هەڤپەیمانان ڤێ جارێ بۆ هاریکاریێ و پشتەڤانیێ بوونە.
پسیارەک ل ڤێرە دهێتە پێش، ئەرێ ئیراق ژ لایێ هێزێن هەڤپەیمانان ڤە یا داگیرکری بوو دا رۆژا ڤەکێشانا هێزێن وان ب رۆژا سەروەریێ بهێتە ناسکرن!؟، و ئەگەر ب دەرچوونا هێزێن هەڤپەیامانا ئیراق ئازاد ببیت، ئەرێ ژ باندۆڕا دەولەتێن هەرێمایەتی ئازاد بوویە!؟، لەوان یا باشتر بوو ب ڤێ هەلکەفتنێ ئاهەنگێن سەرکەفتنێ ل سەر تیرۆرێ و خاترخواستنا هەڤپەیمانان ب خەلاتکرنا وان هاتبانە گێران!.
کوردستان ب چاڤێ دۆستینیێ و پشتەڤانیێ هەڤپەیمانان دبینیت و ب هێزەکا پشتراستکەر دادنیت، ژبەر هندێ ڤەکێشانا وان بۆ کوردستانیان جهێ نەئارامیێ و دلگرانیێ یە!، نەمازە کو کورد چاڤترسیاینە و باوەری ب سیاسەتێن دەولەتێن داگیرکەرێن هەرێمایەتی نینە، لەوا مافدارن گومانەکا پترس هەبیت ژ دەستێوەردان و مایتيکرنێن دوژمنکارانە یێن دەردۆرێن هەرێما کوردستانێ، لێ ل وێ باوەرێنە سەرەرای تەماهی و چلەکیا داگیرکەران، لێ ئەو د رێپێدای و دەستبەردای نابن بۆ دەستدرێژیکرنێ ل سەر هەرێما کوردستانێ.
سەرۆک بارزانی د پەیاما خۆدا ب هەلکەفتنا ڤەکێشانا هێزێن هەڤپەیمانان دبێژیت:
دەربارەی هەرێما کوردستانێ ژی گەلەک کەس ژ بەر پەرۆشیێ و هندەک ژی ژ بەر کین و لێکدانێن نەدورست وەسا هزردکن کو ب نەمانا هێزێن هەڤپەیمانان، ئێدی هەرێم ژی دێ کەڤیتە بن گەف و مەترسیێ و دێ دوماهیک پێ هێت. ئەز دخوازم خەلکێ خۆشتڤی یێ کوردستانێ ژ وێ ئیێکێ پشتڕاست بکەم کو هەماهەنگیەکا گەلەک باش ل گەل حوكمەتا ئیراقا فیدرال دا هەیە بۆ بەرسڤدانا هەر جۆرەکێ گەف و مەترسیێ، چ ئەو گەف د بن ناڤێ داعشێ دا بیت ئان ژی هەر ناڤەکێ دی بیت.
هەر کەس و لایەنەکێ خەیالا وێ ئیێکێ هەبیت ببتە گەف و زیانێ بگەهینتە ئارامیا هەرێما کوردستانێ، بلا بزانیت کو ل کوردستانێ ب قەبارێ پێدڤی پێشمەرگە و قەهرەمان و گیانفدایێن وەلاتی هەنە کو بەرەڤانیێ ژ خەلک و ئاخا کوردستانێ بکەن و هەمی گەف و دەستدرێژیان تێکبشکێنن. هێزا پێشمەرگەیێن کوردستانێ ژی کو ڕەهـ و ڕیشالێن وێ د مێژوويا خەباتا ڕزگاریخوازیا کوردستانێ دا هەنە و زادێ خوێنا شەهیدان و ڕۆندکێن چاڤێن دایکێن شەهیدانە، دێ هەر مینیت. هێزا پێشمەرگەیێن کوردستانێ ب هەماهەنگیا تەمام دگەل هێزێن ئیراقا فیدرال دا، ئامادەنە بۆ بەرەڤانیێ، پاراستنا ئارامیا وەلات و نەهێلانا هەمی جۆرێن گەف و مەترسیان.
هەروەسا بەرێز مه‌سرۆر بارزانی سەرۆکێ حوكمەتا هەرێما کوردستانێ دبێژیت: پشتی ڤەکێشانا هێزێن هه‌ڤپه‌یمانێن نیێڤدەولەتی، هێزا پێشمەرگەی یا ئاماده‌یه‌ بۆ به‌رهه‌نگاربوونا هەر هێرش و مەترسییەکێ. هەروەسا دیار ژی كر، دووماهیهاتنا كارێ هەڤپەیمانان ڕامانا دووماهی هاتنا پەیوەندییان نینە، بەلکو شێوازێ پەیوەندییان د بیاڤێن جودا دا دێ د بەردەوام بن، ئه‌و وه‌لاتییان پشتڕاست دكه‌ت ژ هه‌بوونا مه‌ترسییا تیرۆرێ كو هێزێن ئیراقێ و پێشمه‌رگه‌ی شیانێن باش هه‌نه‌ و ئاماده‌نه‌ بۆ پاراستنا هه‌رێما كوردستانێ.
بەرێز نێچیرڤان بارزانی سەرۆکێ هەريما کوردستانێ د لایەکێ گۆتارا خۆدا ل ئاهەنگا رۆژا سەروەریا ئیراقێ دبێژیت: دەم هاتییە هەمی کێشەیێن د ناڤ مالا ئيراقێ دا چارەسەر بکەین، ژ پەیوەندییێن د ناڤبەرا هەولێر و بەغدایێ دا، هەتا دۆسیا چەکی و مافێن هەمی پێکهاتەیان، ل سەر بنەمایێن دەستووری و ب ئیرادەکا نیشتیمانی یا ئيراقی یا پاقژ، نەکو بهێلین ڤەگوهۆڕن بۆ قەیرانان و بۆ نەوەیێن بهێن بمینن. ئەم چاڤەرێ ئيراقەکا دەستووری، فیدرالی و جێگیرین، کو ب تەمامی خوەدانا سەروەرییا خۆ بیت، وەلاتەک ژیان و ئاسایشا هەمی پێکهاتەیان بێی جوداهی بپارێزیت. وەلاتیەک پەیوەندییێن هەڤسەنگ ل گەل جیران و هەڤالێن خۆ ل سەر بنەمایێ بەرژەوەندییێن لێکگوهۆر دابمەزرینیت و نەبیتە گۆڕەپانا ململانێ، بەلکو ببیتە دەستپێکەر و ناڤەندا ئاشتی و دانوستاندن و سەقامگیریێ ل هەمی دەڤەرێ. هەروەسا د فەرمۆت: ئەڤ ئيراقە بەرپرسیاریا هەڤپشکا مە هەمیانە. و ئەم ل هەرێما کوردستانێ، وەک هەر دەم، دێ بینە هاریکار و پشته‌ڤان بۆ هەر گاڤەکێ کو ببیتە ئەگەرێ بهێزکرنا سەروەری و ئاسایش و سەقامگیریا ئيراقێ. و دێ ل گەل حوكمەتا فیدرالی و هەمی هێز و پێکهاتەیێن ئيراقی کار کەین ل سەر چارەسەرکرنا ناکۆکی و کێشەیان ب رێیا دانوستاندن و تێگەهشتنێ ل سەر بنەمایێ دەستووری و د هەمان دەم دا ئەم داکۆکیێ ل سەر خورتکرنا هەماهەنگیێ و هاریکاریێ د ناڤبەرا پێشمەرگەى و سوپایێ ئيراقێ و هەمی پۆلێن هێزێن چەکدار و دەزگەهێن ئەمنی دا دکەین.
ئەڤ هەر سێ پەیامێن گرنگ تێرا هندێ هەنە خەلکێ هەرێما کوردستانێ پشتراست ببیت کو چ مەترسی نینن و هەر زێدەگاڤیەک دێ ب ئیرادەيا مللەتی و ب هێزا پێشمەرگەی و ب پێگیریێن دەستووری يێن ئیراقێ و ب پشتەڤانیا دۆستێن نێڤدەولەتی هێنە ژناڤبرن.
سەربۆڕا ئیراقێ یا خویناوی و یا کوردستانێ یا دەردەسەری تێرا هندێ هەیە پەند وانە ژێ بهێنە وەرگرتن، ئێدی ل سەر کاربدەستانە، ئیراقا دیموکراتیا فیدرالیا دەستووری يا راستەقینە ئاڤاکەن و مافێ هەمی پيکهاتێن جڤاکیێن وێ دابینکەن و ئاسایش و سەقامگیریێ جێگیرکەن و هەريما کوردستانێ ژی ب کیانێ خۆ یێ فیدرالی شاد ببیت.
هەرێما کوردستانێ کیانەکێ دەستوورى یە و هۆکارێن هێزێ بۆ بەرگریکرنێ هەنە، هێزا ئیرادەيا مللەتی و پێشمەرگەیێ کوردستانێ بنگەهێ بەرخۆدانێ یە و دۆستینیا جڤاکێ نێڤدەولەتی ل گەل هەرێمێ پێگیریەکا سیاسی و سنجی بۆ بەرەڤانیکرنێ ژ هەرێمێ هەیە و دێ یا پاراستی بیت.
کوردستانێ پێشمەرگەیەکێ رێکخستی و قانوونی هەیە و ب وێ هێزێ شۆرشا ئیلۆنێ و شۆرشا گولانێ و سەرهەلدان کریە و باشورێ کوردستانێ رزگارکریە و پاراستیە، هەرێما کوردستانێ دامەزراندیە و پشکداری د روخاندنا رژێما دکتاتۆر دا و ئاڤاکرنا ئیراقا نوی دا کریە،پێشمەرگەى رۆلەکێ سەرەکی د سەقامگیرکرنا ئیراقێ و شکاندن و ژناڤبرنا تیرۆریستێن داعش و پاراستنا هەرێما کوردستانێ دا هەبوويە، نهۆ ژی ب هەمی شیان و باوەری ڤە د ئامادەباشیێ دایە بۆ بەرسڤدانا هەر دوژمنکاریەکێ.
گەلێ کوردستانێ یێ خەباتکەر و خۆگوریکەر و خۆراگر، دەستبەرداری ماف و دەستکەفتیێن خۆ نابیت و هەر دێ سەرکەفتی بیت.

ل ٢٥ ئیلۆنا ٢٠١٧ و د چارچوڤەکێ یاساییدا و ل سەر پشنیارا سەروک بارزانی سەروکێ هەرێما کوردستانێ، کۆمسیۆنا هەلبژارتن و راپرسیا هەرێما کوردستانێ ڕیفڕاندۆما سەربەخۆیا کوردستانێ ئەنجامدا، و ب رێژەیا ٩٣٪ ژ پشکداربوویان كو گۆتی؛ بەلێ بۆ سەربەخۆیا کوردستانێ و سەرکەفتنەکا هەرا مەزن بۆ کورد و کوردستانێ تۆمارکر، ئەڤ ڕۆژە ب رۆژەکا نەتەوەیی و نیشتیمانیا مرۆڤێ کوردستانێ دهێتە هژمارتن و ب تیپێن زێرین ل تۆمارا مێژوویا کوردستانێ هاتە تۆمارکرن، ئێدی ئارمانجا گەلێ کوردستانێ ب زەلالی هاتە دیارکر و پێگیریەکا سیاسی و جڤاکی و سنجی هاتە چێکرن کو پێدڤییە ل دویڤ کاودانان و هۆکارێن خۆیی و بابەتی کار بۆ بهێتەکرن، هەتاکو ئەو ئارمانج بجهدهێت.
ل نەهەمین بیرەوەریا ریفراندۆمێ سەرۆک بارزانی ڤێ رۆژا پیرۆز ب ڤێ دەستەواژەیێ: (دەنگەک بۆ مێژوویێ و یادەک بۆ نفشان) زیندی دکەت.
هەر مللەتەکی مافێ بریاردانا چارەنڤیسێ خۆ هەیە، کو دوژمن و داگیرکەر و جڤاكا نێڤدەولەتی رێ نەدەن مللەت دەربڕینەکا ئازاد ژ رایا خۆ بدەت و ل سەر سیاسەتا داگیرکرنا کوردستانێ و چەوساندنا گەلێ وێ بەردەوامبن، ل وی دەمی مافێ مللەتی یە پەنایێ ببەتە بەر وێ رێباز و شێوازێ یا بشێت ئازادانە دەربڕینێ ژ رایا خۆ بکەت و هەبوونا خۆ بسەپینیت.
شۆرشێن رزگاریخوازێن گەلێ کوردستانێ دەربڕینێ ژ ئارمانجا مللەتی دکەن، کو دڤێت ب ئازادی بژیت لێ دوژمن و داگیرکەر دژ راوەستان و ب ئاگر و ئاسنی سەرەدەری دگەلدا دکر.
شۆرشا ئیلۆنا نیشتیمانی ب سەرۆکاتیا بارزانیێ نەمر، کو پتریا مللەتی خۆ دایە ل گەل و د ماوەیەکێ کێم دا پتریا باشورێ کوردستانێ رزگار بکەت ریفراندەمەکا نەتەوەیی بوو، لێ دوژمن و داگیرکەر ب شەڕی و سیاسەتێ و پیلانان دژ راوەستان.
هەروەسا شۆرشا گولانێ یا رزگاریخواز کو د ماوەکێ کیم دا شیا مللەتی رێکبێخیتە ڤە، ریفراندۆمەکا دیترا نەتەوایەتی بوو، لێ هەروەکو جاران دوژمن و داگیرکەر دژ راوەستان و کیمیاباران و ئەنفالکرن ژی کرن.
سەرهلدانا گەلێ کوردستانێ ل ئادارا ١٩٩١ ریفراندۆمەکا دیتر یا نەتەوەیی بوو، لێ هەر زوی ئێخستە بەر هێرشەکا هۆڤانە و کۆچا ملیۆنی لێ کەفت.
ل هەر سێ ویستگەهان دا مللەتی خەبات کر و قوربانی دان دا رزگار ببیت و سەرەرای هەمی شەڕ و سیاسەتێن ژناڤبرنێ، لێ ل دوماهیێ ئیرادەیا مللەتی سەرکەفت و شیا هەرێما کوردستانێ بدامەزرینیت.
هندەک جاران هندەک ناڤەند و چاڤدێرێن نێڤدەولەتی و حەتا کاربدەستێن حوكمەتێن دەولەتێن داگیرکەر پسیارەک دئازراند کو شۆرشین کوردستانێ خواستا کوردستانیان نینە و ئەو درووشم و ئارمانجێن بلندکرین دەربڕینێ ژ دلخوازیا کوردستانێ ناکەن، ئەڤجا ریفراندۆما ٢٥ ئیلۆنا ٢٠١٧ یاکو ٩٣ ٪ ژ خەلکێ باشورێ کوردستانێ، گۆتی بەلێ بۆ سەربەخۆیا کوردستانێ بەرسڤا هەمیان دا و خۆیاکر کۆ مللەتی سەربەخۆ دڤێت.
سەرۆک بارزانی د کتێبا خۆ دا بۆ دیرۆکێ دبێژیت: کوردستانێ بنەمایێن دەولەتینیێ هەنە و مافێ وێ یە دەربڕینی ژ ڤیانا خۆ بکەت، ئەو دەستوور یێ کریە بنەما بۆ پێکڤەژیانا پێکهاتێن ئیراقێ هاتییە بنپێکرن، کو د دیباجەیا دەستوری دا هاتیە پێگیریکرن ب ڤی دەستووری گەرەنتیا مانا ئیراقێ یە ب ڤی ئاوایێ هەڤگرتی.
ریفراندۆم و سەربەخۆیا کوردستانێ مافەکێ رەوایێ گەلێ کوردستانێ یە و گونجایە ل گەل بهایێن مرۆڤی و ئایینی و پرانسیب و باوەرنامە و قانوونێن مافێن مرۆڤی و گەلان و کەمە نەتەوەیان یێن رێکخراوا نەتەوەیێن هەڤگرتی و کۆمەلا گشتیا نەتەوەیێن هەڤگرتی و ل سەر وان بنەما و گۆرەی وان هەمی هۆکار و فاکتەران مللەتی هەرێما کوردستانێ بریار ل چارەنڤیسێ خۆ دا و گۆتی؛ بەلێ بۆ سەرخۆبوونا کوردستانێ و بهیڤینە د رۆژەكا نێزیک دا ئەو بریار بجهبهێت.
ریفراندۆم کو مافەکێ سروشتیە و پرۆسەکا ئاشتیانەیە، لێ ژ لایێ داگیرکەرێن کوردستانێ و نۆکەرێن وان و جڤاكا نێڤدەولەتی ڤە، رێگری لێ هاتەکرن، هەروەکو رێگری ل هەمی شۆرش و سەرهلدانێن کوردستانێ کرین.
بەلێ ریفڕاندۆم وەکو هەمی شۆرشێن کوردستانێ دەڕبرین بۆ ژ ئیرادەیا مللەتی و بریارەکا خۆمالی بوو و لسەر پشنیار و دەستپێشخەریا سەرۆک بارزانی بوو و ل کۆمبوونا حەفتی خزیرانا ٢٠١٧ یا لایەنێن سیاسیێن کوردستانێ پەسەندکر و پشتەڤانی لێکر، لەوا هەمی ئامادەکاری بۆ هاتنەکرن و جەماوەرێ مللەتی ب کەیف و خۆشی و ب ئاهەنگ و شاهیان ڤە پشکداری د هەوا پرۆپاگندەیێ و دەنگدانێ دا کرن و ئەو پرۆسە ب سەرکەفتنەکا هەرا باش ب ئەنجام گەهاند و مزگینەکا دلخۆشکەر ب هەمی کوردستانیان و دۆستێن وان راگەهاند و پەیام ژ ئیرادەیا مللەتی گەهاندە هەمی جیهانی دەربڕی و قازۆخەک ل ناڤ چاڤێن دوژمن و داگیرکەر و نۆکەرێن وان دا. ڤێ سەرکەفتنێ راستیا مللەتی نیشا دا و مێژوویەک نوی تۆمارکر.
٢٥ ئیلۆنا ٢٠١٧ رۆژەکا مێژوویی بوو، دەنگەکێ بلند بوو بۆ دۆست و دوژمنان، هشیاربوونەڤەیا نەتەوەیی بوو، رۆژا سەرکەفتنا ئیرادەیا مللەتی بوو، رۆژا راستڤەکرنا مێژوویێ بوو، ئەڤ رۆژە ب تیپێن زێڕی ل سەر بەرپەرێن تۆمارێن مێژوویێ هاتە نڤیسین و دێ هەر یا گەشداربیت بۆ مرۆڤێن پشکدار و های ژێ هەیی و دێ بیتە بیرەوەریەکا پیرۆز و نەخشەرێک بۆ نفشێن نوی و ل هەمی دەمان دێ ب شانازی ڤە، ئەڤ بیرەوەریە دهێتە بیرئینان و زیندیکرن.
بژی کوردستان و سەرکەفتی بیت ئیرادەیا مللەتی.

بارزانیێ نەمر دبێژیت:. (ئەڤە شەرەفەکا مەزنە، کو وەکو پێشمەرگەیەک د شۆرشا ئازادیێ دا پشکدار ببم). هەروەسا د فەرمووت: (هندی چەکێ پێشمەرگەیاتیێ د دەستێن من دا بیت، ئەز خئدانێ بریارا خۆ مە).
سەرولۆک مسعود بارزانی دبێژیت: (ب سەرفرازی ڤە دبێژین بۆ من پیرۆزترین و بلندترین پلە و پایە پێشمەرگەیاتییە). هەروەسا دبێژیت (پێشمەرگە ژ دایکبوویێ خوین و خەبات و رۆندکێن گەلێ کوردستانێ یە، چەکێ پێشمەرگەی پارچە ئاسن و کوگەهـ و ئامرازێ شەرکرنێ نینە، چەکێ پێشمەرگەی دیرۆک و فیداکاری و کەرامەت بیروباوەرا وی یە، چەکێ پێشمەرگەی ئەو سۆز و پێگیربوونەیە کو هەردەم بۆ گەل و ئاخ و نیشتیمانێ وی یێ هەی).
ئەز بخۆ ژی ل سەر رێبازا پارتی و بارزانی بوویمە پێشمەرگەیێ کوردستانێ، ئەرکێ من دگەل پێکهاتێن پێشمەرگەی خەباتکرن بوو ژبۆ رزگارکرن و پاراستنا کوردستانێ، ئانکو پێشمەرگەیاتی ئەرکەکێ نەتەوەیی و نیشتیمانی و مرۆڤی یە. پێشمەرگە ئەو هێزا خۆبەخشا رێکخستیا چەکداریا کوردستانێ یە، هاتیە دامەزراندن و رێکخستن داکو خەباتا چەکداری بکەت و گیانێ خۆ پێشکێشی رزگارکرن و پاراستنا کوردستانێ بکەت،
پێشمەرگە هێزا لەشکرێ کوردستانێ یە، پێدڤیەکا نەتەوەیی و نیشتیمانیا کورد و کوردستانێ یە یا هاتیە پیکئینان ژبۆ رزگارکرن و پاراستنا کوردستانێ.
هەر ئێکێ چەکێ پێشمەرگەیاتیێ ب هەلگریت، خۆ ب پێشمەرگەیێ کوردستانی دزانیت، و ئارمانجا وی رزگارکرن و پاراستنا کوردستانێ یە، و ئەڤ ئەرکە ب سەرفرازترین کارێن نەتەوەی و نیشتیمانی و جڤاکیێن کوردستانێ دهێتە نیاسین، چونکی پێشمەرگە ئەو کوردێ دلسۆزە یێ خەبات و تێکۆشینێ دکەت و قوبانیێ ب خوین و گیان و سەر و مالێ خۆ دەت ژبۆ رزگارکرن و پاراستنا کوردستانێ.
پێشمەرگە گرنگترین و کاریگەرترین هوکارێ دابینکرنا ئاسایشا نەتەوەیا کوردستانێ یە. و ژبەر گرنگیا رولێ پێشمەرگەی، ل هەرێما کوردستانێ وەزارەتەک بناڤێ وەزارەتا پێشمەرگەی دامەزراندیە،و لدویڤ یاسایێ کاروبارێن پێشمەرگەی هاتینە رێکخستن و برێڤەبرن.
سەرۆک بارزانی د فەرموود: (دەمێ پۆل بریمەری حاکمێ ئەمریکی ل ئیراقێ هەولدا پێشمەرگەی ب رێزا میلیشیا دانیت و حەل کەت، من گۆتێ: پێشمەرگە میلیشیات نینە، پێشمەرگە ب بریارەکێ دروست نەبوویە حەتا ب بریارەکێ حەل ببیت، نە ب بریارا من و نە ب بریارا تە و نە ب بریارا هیچ کەسەکی، پێشمەرگە ب خوین و رۆندکێن مللەتەکی دروست بوویە، خەلکێ دی ب بریارەکێ دروست بووینە و دشێن ب بریارەکێ حەل ببن، کو بریمەری گۆتی ئەڤە بۆ من خەتا سۆرە، من بەرسڤ لێدا و گۆتێ ئەڤە بۆ من دەه جاران خەتا سوورە و پێشمەرگە حەل نابیت. و ئەڤە ئەز چوومە کوردستانێ زەلام بە وەرە پێشمەرگەی حەلکە.. باشە)!.
پێشمەرگەی ل سەردەمێ شۆرشا رزگاریخوازا کوردستانێ یاسایا لەشکرێ شۆرشگێرێ کوردستانێ هەبوو و ل سەر دچوو، و پشتی دامەزراندنا هەرێما کوردستانێ پەرلەمانێ کوردستانێ یاسایا وەزاتەتا کاروبارێن پێشمەرگەی دەرئینا و کارپێکر، و ل سالا ٢٠٠٥ ێ وەرە بوویە دامەزراوەکا دەستووریا کارپێکری ل ئاستێ دەولەتا ئیراقێ و بودجە بۆ هاتیە تەرخانکرن.
ل برگا ٥ ژ بەندێ ١٢١ ێ دا هاتیە:
ژ تایبەتمەندیێن حکومەتا هەرێمێ یە ب هەر پێدڤیەکا کارگێریەکا هەرێمێ رابیت و ب تایبەتی ئاڤاکرن و رێکخستنا هێزێن ئاسایشا ناڤخۆیا هەریمێ، وەکو پۆلیسا و ئاسایشێ و زێرەڤانێن هەرێمێ (پێشمەرگە). وسا دیاردبیت کو ل هەمی ئاستان دا پێشمەرگە، پێشمەرگەیێ کوردستانێ یە، هەر تاکەک کو دبیتە پێشمەرگە، خۆ دەتە نیاسین ب پێشمەرگەیێ کوردستانێ، و حەتا ئەو هێزێن سیاسیێن هێزێن پێشمەرگەی پێکئیناین ب پێشمەرگەیێن کوردستانێ دەنە نیاسین، هەوەکو مللەت ژی یێ ب ڤی ئەرکی رابیت ب پێشمەرگەیێ کوردستانێ نیاس دکەت، و ل ئاستێ حوکمەتا کوردستانێ ژی هەر بناڤێ پێشمەرگەیێ کوردستانێ نیاسیە، و ل ئاستێ ئیراقێ ژی هێزێن پێشمەرگەی یاسایی کریە، و ل ئاستێ جیهانێ ژی هەر بناڤێ پێشمەرگەیێ کوردستانێ هاتیە نیاسین. هەر چەندە د هندەک قووناغان دا ژ ئەنجامێن ناکۆکیێن سیاسی، هێزێن سیاسی ململانێ بپێکهاتێن پێشمەرگەی کرینە و دژی هەڤدو بکارئیناینە لێ هەر دوی دەمی دا ژی هەر د سەنگەرێ کوردستانێ دابوونە، و ل هەمبەری داگیرکەرێن کوردستانێ ملبملێ هەڤ بوونە دژی دوژمنێن کوردستانێ. ژبەر هندێ پێدڤیەکا نەتەوەیی و نیشتیمانی بوویە ناکۆکیێن سیاسی د ناڤ پێکهاتێن پێشمەرگەیدا نەمینن و بهێنە ئێکخستن، و خۆشبەختانە ئەڤرۆکە ٢١ ێ ئەیلولا ٢٠٢٦ ب ئامادەبوونا رێزدار نێچیرڤان بارزانی سەرۆکێ هەرێما کوردستانێ و رێزدار مەسرور بارزانی سەرۆکێ حوکمەتا هەریما کوردستانێ و ئامادەبوونا کاربدەستێن پەیوەندیدار رێورەسمێن راگەهاندنا ئێکخستنا پێشمەرگەیێ کوردستانێ هاتنە برێڤەبرن و وەکو سازیەکا فەرمیا کوردستانێ هاتە ناسکرن، رێزدار نێچیرڤان بارزانی گۆت: دڤێت پێشمەرگە هێزەکا نیشتیمانی بیت دوور بیت ژ دەستێوەردان و ناکوکیێن حزبی، هەروەسا د فەرمۆد: دڤێت پێشمەرگە ل سەر هەڤرکیێن حزباتیێ بمینیت جونکی هێزا حزبی نینە بەلێ هێزا کوردستانێ یە، چ هێزەک ل دەرڤەی وەزارەتا کاروبارێن پێشمەرگەی نامینیت، داخوازێ ژ حکومەتا ئیراقا فیدرال دکەین ل دویڤ دەستووری و یاسایێ سەرەدەریێ دگەل پێشمەرگەی دا بکەت. پێشمەرگە خودانێ دیرۆکەکا پرشنگدار، لەوما ئەڤروکە ئەم ڤێ دیرۆکێ و سەرجەم ڤان قوربانیدانان د ناڤ ئێک دەزگەهێ نیشتیمانی دا کۆمڤەدکەین، دیرۆکەکا چەندین نفشێن پێشمەرگەی دروست کرینە، دکەینە هێزەکا ئێکگرتی بۆ پاراستنا پاشەرۆژا کوردستانێ ، باشترین وەفاداری ژی شەهیدێن مە ئەوە کو قوربانیدانا وان بکەینە بنەمایێ پێکڤەکارکرنێ و ئێکرێزیا ناڤخۆیا مە.
هەروەسا رێزدار مەسرۆر بارزانی د فەرمود: ئەڤرۆ رۆژەکا دیرۆکی یە بۆ کوردستانێ و بۆ پێشمەرگەی و رۆژەکا گەلەک تایبەتە ژی بۆ من بخۆ، کو هەر ژ رۆژا ئێکێ یا دەستبکاربوونا من وەکو سەرۆکێ حوکمەتا هەرێما کوردستانێ، د کارنامەیا کابینەیا نەهێ یا حوکمەتێ دا مە سۆز دا ژی ب هەموو شیانێن خۆڤە کار بۆ ئێکگرتنا هێزا پێشمەرگەیێ کوردستانێ بکەین، لەوما دەمێ چار سالێن بۆری دا ل بن رێنمایی و سەرپەرشتیا راستەوخۆ یا سەرۆک بارزانی کو رۆلەکێ کاریگەر د ئیکخستنا هێزێن پێشمەرگەی دا هەبوو.و ب هەڤکاری و پشتەڤانیا کاک نێچیرڤان بارزانی سەرەکێ هەرێما کوردستانێ و دۆستێن مە ل ئەمریکا و هیزین هەڤپەیمانان، پشتی چەندین کۆمبوون و کارکرنا چر و کارێ بێ راوەستان، مە شیایە بگەهینە ڤێ قووناغا نهۆ کو ئەڤرۆ ئێکگرتنا هێزێن پێشمەرگەی رابگەهینین. ئەڤ ئێکگرتنە، چەند گرنگە لێ قووناغا داهاتی گەلەک گرنگترە، کو ئەو ژی پێک دهێت، ژ قووناغا پێشڤەبرنا شیانێن سەربازی و دابینکرنا چەکێ پێشکەفتی و بەرگریا ئاسمانی و پێشخستنا شیانسازیا پێشکەفتی یا هەمە لایەنێن پێشمەرگەی و ب تایبەتی شیانێن مرۆڤی، و گرنگیدان ب ئاست و جۆرێ مەشقا لەشی و هشیاریا پێشمەرگەی ب گۆرەی پیڤەر و ستاندارێن سەربازیێن یێن نێڤدەولەتی و بکەینە هێزەکا نیشتیمانیا پیشەیا رێکخستی و هەڤگرتی و ل ئاستێ ئەرک و بەرپسیاریا نیشتیمانی دابیت بۆ بەرهنگاریا ئالینکاریا و پاراستنا ئاسایش و سەقامگیریا هەرێما کوردستانێ.
سەرفرازە پێشمەرگەیێ کوردستانێ ب ئەرکێ خویێ نەتەوەیی و نیشتیمانی.
پیرۆزبیت ئێکخستنا پێشمەرگەیێ کوردستانێ.
بـژی پێشمەرگـە.

حزب رێكخستنا سیاسیا كۆمێن تاكانە، ژێیاتیەكا ئازاد و ژ خۆڕایی بۆ بیروهزر و باوەری و ئارمانجێن دیاركری هەیە و د رێكخستنەكێ دا ل دویڤ هەیكەلەكێ دیاركری كۆمڤەدبن و ئەرك و كاران دابەش دكەن و خۆ پێگیر ب پەیرەوێ ناڤخۆیی ڤە دكەت ژبۆ بجهئینانا كارنامە یا خۆ و گەهشتن ب ئارمانجێن خۆ د چارچووڤەیێ وەلاتی دا، هەروەكو دشێت چالاكیێن خۆ ل دەرڤەی سنوورێ وەلاتی دا ژی ئەنجامبدەت. ئەڤە دامەزراوەكا مەدەنییە و سیاسەتێ و دەولەتداریێ دكەت.
هۆز پێكهایەكا جڤاكییا رەسەنە ژ كۆمەكا خەلكی پێكدهێت، رێشت یان خزمانی یان گرێدانەكا جوگرافی پێكڤە گرێددەت و تاگیریێ بۆ مەزنێ هوۆێ (ئاغا، بەگ، شێخ) دكەن و ملكەچی فەرمانێن وی دبن، و وەكو هێزەكا جڤاكی خۆ نیشاددەت و بەرەڤانیێ ژ بەرژەوەندیێن خۆ دكەت و پێدڤیا قووناغا خۆیە.
پێكڤەگرێدانا هۆزێ یا سنوورداركریە ب پێكهاتێن وێ هۆزێ و د چارچووڤەیێ جوگرافیا وێ دا و هەردەمێ ئەندامێ هۆزێ ژ وی سنووری دەركەفت و شییا بەرژەوەندیێن خۆ ل سەر بنگەهێ كار و شیانێن خۆ یێن تایبەت بجهبینیت، ئەو پەیوەندی و ژێیاتی دێ سست و لاواز بیت و بەر ب ژ ناڤچوونێ چیت. ل بارودۆخێ نەمان و لاوازبوونا دەستهەلاتا مەدەنی و قانوونی، رۆلێ هۆزێ خورت دبیت و پەنابرن بۆ بەر هۆزێ بهێز دكەڤیت ژبۆ خۆ پاراستنێ و بجهئینانا بەرژەوەندیان.
مرۆڤ كو ژیندارەكێ جڤاكی یە، هەردەم ب هەڤرایە ل گەل هەڤدو، هەر تاكەك گرێدای خێزانەكێ یە و هەر چەند خێزان بنەمالەكێ پێكدئینن و هەر چەند بنەمال ئیجاخەكێ پێكدئینن و هەر چەند ئیجاخ گوندەكی پێكدئینن و هەر چەند گوند و ئیجاخ هۆزەكێ پێكدئینن، و هەر چەند هۆز خێلەكێ (قەبیلە)كێ پێكدئینن، هەر چەند خێل مللەتەكی پێك دئینن و مللەت د رووبەرەكێ جوگرافی دا هەبوونەكا نەتەوەیی نیشا دەت و د كیانەكێ سیاسی و یاسایی دا دەولەتێ ئاڤا دكەت.
هەر هۆزەك و خێلەك رێكخستنەكا جڤاكی یە ب هەڤگرتنا پێكهاتێن وێ دەستهەلاتەكێ پێكدئینیت و كاروبارێن خۆ برێڤەدبەن و خۆ دپارێزن. هەروەكو چێدبیت هۆز یان خێل وەرارێ بكەن و پێشڤە بچن خۆ ل گەل پێشڤەچوونێن سەردەمیانە بگونجینن و بۆ خۆ رێكخستنەكا سیاسی یان سەنتەرەكێ مەدەنی، چێكەن و كاروبارێن خۆ یێن مەدەنی و باژێرڤانی ل دویڤ قانوونێ برێڤە ببەن و پەیوەندیا جڤاكی و تاگیریا مەزنێ خۆ بپارێزن.
هەمی مرۆڤان ل هەر جهەكێ جیهانێ بیت بنەمایەكێ رێشتا هەبوونا پەیوەندیێن جڤاكی هەنە، هندی قەبارێ وێ بەرفرەه بیت و شێوازێن كاركرنێ و ئامیرەیێن بەرهەمئینانێ بهێنە گوهۆرین ئەو پەیوەندی ژی دهێنە گوهۆرین و سستی دگەڤیتە هندەكان و پێدڤیا هەبوونا وان نامینیت، چونكی جهگیر بۆ چێدبن.
پێكهاتێن جڤاكی و پەیوەندیێن تاكێن جڤاكی ل سەر بنگەهێ پەیوەندیێن كاری و بەرهەمئینانێ ناسنامەیا خۆ چێدكەن و بەرژەوەندیێن خۆ بجهدئینن و دپارێزن و ب گوهۆرینا پەیوەندیێن بەرهەمئینانێ و ئابووری پەیوەندیێن جڤاكی دهێنە گوهۆرین ژ پەیوەندیێن خوینێ بۆ گونداتیێ و هۆزاتیێ و مللەتینیێ و دەولەتینیێ و جیهانیێ.
دامەزراوێن دەولەتێ، سازیێن حوكمەتێ‌، چالاكیێن باژێرڤانی، كارخانە، چێكرخانە، بنگەهێن پیشەسازی، سەنتەرێن خواندنێ و فێركرنێ، رێكخستنێن سیاسی و پیشەیی و رەوشەنبیری و تۆڕێن پەیوەندیێن زانستی و تەكنولۆژی رۆلەكێ سەرەكی د گوهۆرینا ژێیاتیا تاكی و پەیوەندیێن جڤاكی دا دبینن.
باژار، دەولەت ل سەر بنگەهێ قانوونی و سیستەمێن مەدەنی چێدبیت و ب قانوونێ ڤە دهێتە برێڤەبرن، و قانوون ل سەر بنگەهێ ئازادی و ئاسایشا تاكان دهێنە دانان و هاژۆتن.
پێكهاتێن جڤاكی هەتا رەهەندێ نەتەوەیی نەوەرگرن و بەرنامەكێ نەتەوەیی نەدانن و كاری بۆ نەكەن، نكارن ب ئەركێ بەرەڤانیێ ژ مللەتی راببن، ژ بەر هندێ بزاڤێن هۆز و خێلان نابێژنێ شۆرش، بەلێ دشێت ل گەل پێكهاتەیێن دی یێن جڤاكی و سیاسی بەرنامەكێ ئارمانجبەر دانن و پشكداریێ د شۆرشا نەتەوەیا رزگارخواز دا بكەن و بەرسینگا داگیركەران بگرن.
هەروەكو چێدبیت سەرۆك یان مەزنێ خێلەكێ پارتیەكێ چێكەت كو قەبارەك مەزنترە و تێگەهیێ ئازادیێ و نوونەراتیا مللەتی ل گەل خۆ هەلدگریت و خۆ ملكەچی پەیرەو و سیستەمێ وێ بكەت و كاری پێ بكەت، ئانكو خۆ بێخیتە ژێر پەیرەوێ رێكخستنەكا مەدەنی. د هەمان دەمدا هەر مرۆڤەك كو ژێیاتیەكا جڤاكی هەیە، دەمێ دچیتە د ناڤ پارتەكێ دا، هندەك خەسلەتێن خۆ یێن جڤاكی ژی دگەل خۆ دبەت، و هندەك جاران رێڤەبرنا كاران ژی دئێخیتە بن باندۆرا باوەری و گێول و بۆچوونا خۆ یا جڤاكی و ئایینی، لێ نەچارە ژی ملكەچی پەیرەو و قانوونێ ببیت.
مرۆڤ دەمێ ژ گوندان كو پەیوەندیێن وێ ل سەر بنگەهیێ كشتوكالی و ب خۆدانكرنا گیانەوەران بوویە و د قەوارەیێ هۆزەكیێ دا ژیایە، دەمێ دچیتە باژاری كو پەیوەندیێن جڤاكی ل وێرێ ل سەر بنگەهێ ئابوورێ تاكەكەسی، فەرمانبەریێ و كرێكاریێ و بازرگانیێ بوویە دێ كەڤیتە ل ژێر سیستەمەكێ دی یێ پەیوەندیان، دبیژنێ سیستەمێ مەدەنی، یان یێ قانوونی، چونكی باژار ب قانوونێ و سیستەمی دهێتە برێڤەبرن، ئێدی مرۆڤ دێ د قووناغا مەدەنیەتێ و سەروەریا قانوونێ دا ژیت و ژ پەیوەندیێن هۆزەكیێ دەربازبیت.
ژ دامەزراوەیێن مەدەنی حزبا سیاسییە، چونكی حزب رێكخستنەكا سیاسی و نەتەوەیی و نیشتیمانی یە، ل سەر بنگەهێ هەڤگرتنا تاكێن جڤاكییێن هەڤ باوەر پێكدهێت، و ژ بۆ ئارمانجین نەتەوەیی و نیشتیمانی و ئابووری و مرۆڤی خەباتێ دكەت و پەیوەندیێن وێ ل سەر بنەمایێن دەستنیشانكری یێن لهەڤتێگەهشتنێ و راوێژكاریێ و بەرپسیاریا ب كۆم چێدبیت و د چارچووڤێ پەیرەوێ ناڤخۆ و سیستەمەكێ دارێژتی دا چالاكیێن خۆ ئەنجامددەت.
یێ ل باژاری بیت و كارەكێ مەدەنی بكەت، دڤێت ملكەچی قانوون و سیستەمێ دەولەتێ بیت، هەروەكو یێ ژێیاتیێ بۆ رێكخستنا سیاسی بكەت دڤێت ل سەر پەیرەوێ وێ بچیت و بەرنامێ وێ بجهبینیت.
یا خۆیایە گوهۆرین و پێشڤەبرنا بیروباوەر و رەفتارێن مرۆڤی كارەكێ ب ساناهی نینە، بەلكو كارەكێ دۆمدرێژە و قەپخوازی و ئاستەنگێن خۆ هەنە، چونكی نە هەر كەسێ ل باژاری ئاكنجی بوو یان باوەرنامەك وەرگرت یان كارەك مەدەنی ب دەستخۆڤە ئینا دێ داب و نەریت و رەفتارێن خۆیێن جڤاكی گوهۆریت بیتە مرۆڤەك مەدەنی د هزركرن و رەفتاران دا، بەلێ خۆگونجاندن ل گەل رەوشا گەهشتیێ خۆ دسەپینیت و گوهۆرینێ چێدكەت.
باژێر و ئارامی و پێگیریكرن ب قانوونێ و ب سیستەمێن مەدەنی ل بۆرینا دەمی رەوشەنبیری و رەفتارێن مەدەنی چێدكەت و هۆسا قانوون سەروەر دبیت و مەدەنیەت جێگیردبیت و هەڤوەلاتی پشتراست بن و وەلات ئارام و سەقامگیر بیت.

شۆرش پرۆسه‌یا گوهۆرینا بنه‌كی و رهوریشالیا وارێن سیاسی و جڤاكی و ئابوورییه‌ د وه‌لاتی دا، ملله‌ت ب رێكا سه‌ركردایه‌تیه‌كا رێكخستی د چارچووڤێ به‌رنامه‌كێ دارێژتی دا پێ رادبیت، ئارمانج ژێ هه‌لوه‌شاندنا رژێمێ و سیسته‌مێ وێ یێ حكومرانی و ئاڤاكرنا سیسته‌مه‌كێ نوی كو ده‌ربرینێ ژ ئیراده‌یا ملله‌تی بكه‌ت و به‌رژه‌وه‌ندیێن وی بجهبینیت.
پارتی رێكخستنه‌كا سیاسییه‌ ژ وان كه‌سان پێكدهێت یێن هه‌ڤبیروباوه‌ر و هه‌ڤ ئارمانج، هه‌ڤدگرن و ب هه‌ڤڕا خه‌باتێ بۆ گه‌هشتن ب ئارمانجێن پارتێ و بجهئنانانا كارناما وێ دكه‌ن. كو بارزانیێ نه‌مر پارتیا دیموكراتیا كوردستانێ دامه‌زراندی و پرۆگرام و په‌یره‌وێ ناڤخۆ و په‌یمانا مللی داناین، هینگی بارێ گرانێ رزگاركرن و پاراستن و برێڤه‌برنا كوردستانێ ل سه‌ر ملێن خۆ دانا و ب به‌رپرسیاریا خۆ زانی و ب ئه‌رك رابوو ئه‌وا پێدڤییه‌ بكه‌ت دا ملله‌تی ب ئارمانجێن وی یێن نه‌ته‌وه‌یی و جڤاكی بگه‌هینیت و گوهۆرینێن بنه‌كی و رهوریشالی یێن سیاسی و جڤاكی و ئابووری د كوردستانێ و ئیراقێ دا بكه‌ت، ئه‌ڤه‌ ب خۆ كریاره‌كا شۆرشگێریه‌ و ب شۆرش و سه‌رهلدانان دهێته‌كرن، له‌وان هه‌ر زی پارتی رێكخستنێن خۆ چێكرن و به‌رفرهكرن و ئه‌رك و كار دابه‌شكرن وده‌ست ب چالاكیێن جوراوجور كرن و گه‌له‌ك ژوان ئه‌ركان بجهئینان.
ل په‌یمانا مللی یا دامه‌زراندنا پارتیدا هاتیه‌: (ب رێكا خه‌باتا سیاسی كاردكه‌ین ژبۆ د دروستكرنا ده‌وله‌تا هه‌ڤگرتیا دیموكراتیا كوردستانێ ل عیراقێ). و د به‌ندێ ئێكێ یێ پرۆگرامێ پارتی یێ كۆنگره‌یێ ئیكێ دا هاتیه‌: (ژ ئارمانجێن سیاسی سه‌ربه‌خۆیا ته‌مام یا كوردستانێ كو ب ڤان رێكێن خوارێ دێ ب وێ ئارمانجێ گه‌هین: ١-خه‌بات پیناڤی دروستكرنا ده‌وله‌ته‌كا هه‌ڤگرتی د ئیراقێ دا، بناڤێ ده‌وله‌تا هه‌ڤگرتیا دیموكراتیا كوردستانێ. هتد). ئه‌ڤه‌ ئارمانج و ئه‌رك و به‌رپرسیاریێن پارتی بوونه‌ ژ دامه‌زراندنێ و كار و خه‌باتێن هه‌مه‌جۆر بۆ كرینه‌.
ئه‌ڤ پرانسیبه‌ بوونه‌ پێگیریه‌كا كارپێكه‌ر و ل دویڤ بارودۆخان كار و بزاڤ بۆ كریه‌. پارتی ب سه‌رۆكاتیا بارزانیێ نه‌مر ب ڤان بیروباوه‌ر و بنگه‌هێ خۆیێ جه‌ماوه‌ری بوو نوینه‌را راسته‌قینه‌یا گه‌لێ كوردستانێ و سه‌ركردایه‌تیا وی كر و ب ئه‌ركێ خۆ یێ نه‌ته‌وه‌یی و نیشتیمانی و جڤاكی رابوو.
پاشگه‌زبوونا حوكمه‌تا ئیراقێ ژ سۆز په‌یمانێن خۆ به‌رامبه‌ر پارتی و گه‌لێ كوردستانێ، پارتی هشیاریا خۆ وه‌رگرت و به‌رهه‌ڤیێن ریبریبوونێ كرن.
كو ل ١١ ئیلۆنێ هێزێن له‌شكرێ ئیراقێ له‌شكه‌ركێشی ل سه‌ر كوردستانێ كری و چه‌ندین ده‌ڤه‌رێن كوردستانێ بومبارانكرین و شه‌ڕ دژی كوردستانێ هه‌لكری، پارتی به‌رگری كر و ل ١٩ ئیلۆنا ١٩٦١ مه‌كته‌با سیاسی یا پارتی بریار دا رویبری زێده‌گاڤیێن حوكمه‌تێ ببیت و شۆرشێ هه‌لگیرسینیت، هۆسا پارتی و جه‌ماوه‌رێ كوردستانێ به‌رسینگا وێ سیاسه‌تێ گرت و سه‌رهلدان كر و شۆرشا ئه‌یلولا رزگایخوازا نیشتیمانی ب سه‌رۆكاتیا بارزانیێ نه‌مر ل ١١ ئیلۆنا سالا ١٩٦١ ل ژێر درووشمێ دیموكراتی بۆ ئیراقێ و ئۆتونۆمی بۆ كوردستانێ هاته‌ راگه‌هاندن.
ل شۆرشا ئیلۆنێ‌ نیشتیمانی خه‌باتا چه‌كداری و شۆرشا جڤاكی و ره‌وشه‌نبیری و میدیایی هاته‌كرن، شۆرشه‌كا مللی و جه‌ماوه‌ریا هه‌می ته‌خ و تویژێن جڤاكی و هه‌می پێكهاتێن نه‌ته‌وه‌یی و ئایینی یین كوردستانێ بوو، و چه‌ندین ده‌ستكه‌فتێن مێژوویی بده‌ستڤه‌ئینان، ژ وان رزگاركرنا گه‌له‌ك ده‌ڤه‌رێن كوردستانێ و دانپێدانا فه‌رمی یا حوكمه‌تا ئیراقێ ب مافێن نه‌ته‌وه‌یێن گه‌لێ كوردستانێ.
بارزانیێ نه‌مر دفه‌رمۆت: شۆرشا ئیلۆنێ لاپه‌رێن كه‌ڤن یێن مێژوویا مه‌ ره‌نگین كرن. هه‌روه‌سا دبێژیت: مه‌ كوردان رۆژه‌كێ شه‌ڕه‌ك نه‌كریه‌ مه‌ ده‌ست پێ كر بیت، ئه‌م به‌ره‌ڤانیێ ژ خۆ و مافێن خۆ دكه‌ین. شه‌رێ مه‌ پێناڤی نه‌مانا شه‌ری یه‌. ئه‌و شه‌ڕێ ئه‌م دكه‌ین، شه‌ره‌كێ ره‌وایه‌. هه‌روه‌سا دفه‌رمۆت: هه‌تا ده‌ستێن من تفه‌نگێ دگرن، دێ بۆ ئازادیا كوردستانێ تێكۆشم، من دڤێت ئالایێ‌ كوردستانێ بلند بكه‌م و نه‌هێلم جاره‌كا دی كوردستان دیل و داگیركری بیت. ئه‌ڤه‌ شه‌ره‌فه‌كا مه‌زنه‌، كو وه‌كو پێشمه‌رگه‌یه‌ك د شۆرشا ئازادیێ دا پشكدار ببم. هه‌روه‌سا دفه‌رمۆت: دڤیت ملله‌تێ مه‌ هه‌ر بگه‌هیته‌ مافین خۆ یێن ره‌وا، شۆرشا مه‌ ل سه‌ر حه‌قیێ یه‌، مافێن گه‌لێ مه‌ دحه‌قن، ئه‌ڤ ساله‌ نه‌بیت ساله‌كا دی، لێ هه‌ر دڤێت دانپێدانێ ب حه‌قێ مه‌ بكه‌ن. هه‌روه‌سا دبێژیت: ده‌مێ مه‌ ده‌ست ب خه‌باتێ كری بۆ كوردستانێ بوو، لێ نوكه‌ بارێ هه‌می ئیراقێ ل سه‌ر مللێن مه‌یه‌، دڤێت هه‌ولان بۆ ئیراقێ بده‌ین و وان ژی رزگار بكه‌ین و ل سه‌ر ڤێ رێبازێ پارتی خه‌بات كریه‌ هه‌تاكو شیایی رژێما دكتاتۆری برۆخینیت و ئیراقا دیموكراتیا فیدرالیا ده‌ستووری د به‌رژه‌وه‌ندیا هه‌می ئیراقیان دا ئاڤا بكه‌ت.
سه‌رۆك بارزانی دبێژیت: شۆرشا ئیلۆنێ سه‌رهلدانا ئیراده‌ و باوه‌ری بخۆبوون و سه‌ربلندیا مرۆڤێ كوردستانێ بوو، بنه‌مایه‌كێ موكم و رێكخستی بوو بۆ به‌رده‌وامیا خه‌باتێ و راوه‌ستانا گه‌لێ كوردستانێ ل به‌رامبه‌ر زۆرداریێ، ڤێ شۆرشا مه‌زن ب به‌هایێن خۆیێن بلند و ب پێداگری و خۆراگریا بێ وێنه‌یا یا سه‌ركردایه‌تییێن پێشمه‌رگه‌ی و جه‌ماوه‌ری، دوزا ره‌وایا گه‌لێ مه‌ ب پێنگاڤێن مه‌زن به‌ر ب پێشڤه‌ بر، شۆرشا ئیلۆنێ ل ژێر رێبه‌رایه‌تیا بارزانیێ نه‌مر بوو ژێده‌رێ هێزێ و ئیلهامبه‌خشیێ بۆ قووناغێن دی یێن خه‌باتا رزگاریخوازا گه‌لێ مه‌ و خه‌باتكارێن كورد ل ته‌ڤایا پارچه‌یێن دی یێن كوردستانێ.
هێژا نێچیرڤان بارزانی دبێژیت: شۆرشا مه‌زنا ئیلۆنی، دایكا شۆرشێن كوردستانێ، د قووناغه‌كا سه‌خت و دژوار دا كو نكۆلی ل بوون و مافێن گه‌لێ كوردستانێ دهاته‌كرن، بوو هێڤێنێ هشیاری و بیر و ناسنامه‌یا نه‌ته‌وه‌یی و نیشتیمانی. شۆرش ب كۆمكرنا هه‌می چین و تویژێ و پێكهاتێن ئایینی و نه‌ته‌وه‌یی یێن كوردستانێ ل ژێر ئێك چه‌تر ئیراده‌كا پۆلایین ئاڤاكر و ده‌نگێ ره‌وا یێ ئازادا گه‌لێ كوردستانێ گه‌هانده‌ته‌ڤ جیهانێ و بنه‌مایێ دانپێدانا فه‌رمی یا ئێكێ‌ و ده‌ستكه‌فتیێن ده‌ستووری یێن باشتر دانا.
هێژا مه‌سرۆر بارزانی دبێژیت: شێست و پێنجه‌مین سالرۆژ دا هه‌لگیرسانا شۆرشا مه‌زنا ئیلۆنێ، ب رێبه‌ریا رێبه‌رێ مه‌ یێ نیشتیمانی جه‌نابێ بارزانیێ نه‌مر، ب رێزه‌كا زۆرڤه‌ یادا هه‌می پێشمه‌رگه‌ و خه‌باتكه‌ر و تێكۆشه‌ر و ته‌ڤ پشكداربوویێن وێ شۆرشا جه‌ماوه‌ری و سه‌رتاسه‌ریا كوردستانێ دكه‌ین، كو هه‌موو پیكهاتێن ئایینی و نه‌ته‌وه‌یی یێن كوردستانێ پشكداری تێداكری و چه‌ندین ده‌ستكه‌فتیێن مێژوویی بده‌ستڤه‌ئیناین، كو گرنگترینا وان نه‌چاركرنا رژێما ئیراقێ بوو ل چارچووڤێ رێكه‌ككه‌فتننامه‌یا ١١ ئادارا ١٩٧٠ دا دانپێدانی ب مافێن گه‌لێ كوردستانێ بكه‌ت.
ئه‌ڤه‌ پارتیا بارزانیێ نه‌مر و سه‌رۆك بارزانی و رێبوارێن وێ رێبازێنه‌ و د به‌رده‌وامن ل سه‌ر شۆرش و خه‌باتا خۆ هه‌تا گه‌هشتن ب هه‌موو ئارمانجێن ملله‌تی یێن كو ل ریفراندۆما ٢٥ ئه‌یلولا ٢٠١٧ ملله‌تی ل سه‌ر پشنیارا سه‌رۆك بارزانی بریارا خۆ ل سه‌ر دای و گۆتی، به‌لێ بۆ سه‌ربه‌خۆیا كوردستانێ.
كوردستان ب سه‌ركردایه‌تیا پارتی و ب سه‌رۆكاتیا سه‌رۆك بارزانی، خۆدانا گه‌له‌كێ دلسۆز، پێشمه‌رگه‌یه‌كێ قه‌هره‌مان، شۆرشا ئیلۆنێ، رێكه‌فتنا ١١ ئادارێ، شۆرشا گولانێ، سه‌رهه‌لدانێ، دامه‌زراندنا هه‌رێما كوردستانێ، ئۆتونۆمی، فیدرالیه‌تێ، رۆخاندنا دكتاتۆریه‌تێ، ئاڤا كرنا ئیراقا دیموكراتی و فیدرالی و ده‌ستووری و ریفراندۆما سه‌ربه‌خۆیا كوردستانێ یه‌، هه‌ر دێ یا خۆراگر و سه‌ركه‌فتی بیت.
ل بیره‌وه‌ریا ٦٥ سالیا شۆرشا ئیلۆنا نیشتیمانی.. سلاڤ بۆ گیانێ بارزانیێ نه‌مر سه‌ركێشێ شۆرشێ و ئدریسێ جانه‌مه‌رگ و ته‌ڤایا شه‌هیدێن كوردستانێ.
سلاڤ بۆ پێشمه‌رگه‌یێن قه‌هره‌مان یێن شیایین ب خه‌بات و قوربانیدانا خۆ مه‌زنترین داستانێن سه‌روه‌ریێ تۆماركه‌ن.
سلاڤ ل گه‌لێ كوردستانێ یێ دلسۆز و خۆراگر.

دۆزێن نەتەوەیی ب بریاردانا چارەنڤیسیا مللەتی ب دروستاهی چارەسەر دبیت، ئەڤە ژی د دەولەتین رژێمێن دكتاتۆری و شۆفینی دا، ب رێكا خەبات و شۆرش و سەرهلدان بجهدهێت و د دەولەتێن دیموكراتی دا پرانسیپێن گشتی و ئازاد دا بجهدهێت. و ل هەردو رەوشان دا دڤێت هێز و شیانێن بجهئینانێ و سەقایەك و بارود‌وخەكێ گونجای یێن ناڤخۆیی و بابەتی بۆ هەبیت.
كوردان ژ كەڤن دا ئازادی و دەولەت ڤیایە و كار و خەبات بۆ كریە و ل هندەك سەردەمان دەولەت و میرنشین ل كوردستانێ چێكرینە، پاشی كەفتینەڤە بەر لێمشتێن دڕندانەیێن دوژمن و داگیركەرێن كوردستانێ و ژناڤبرینە، لێ ئەڤ حەز و ڤیانە هەر هەبووینە و كرینە ئارمانجێن بزاڤ و شۆرش و سەرهلدانێن سیاسیین كوردستانێ، لێ مخابن هێزێن دەرەكی و داگیركەران نەهێلا كوردستان ب ئارمانجین خۆیێن نەتەوەیی شاد ببیت و كوردستان داگیركر و دابەشكر و لیكڤەكر، و سیاسەتێن بۆهژاندنێ و ژناڤبرنێ ل دژی كوردستانێ بكارئینان!. و سەرەرای وان هەمی سیاسەتێن سەركوتكەر و دوژمنكارانە لێ كورد و كوردستان هەر مان و خەباتا رزگاریخوازا كوردستانێ ب شێوازێن جۆراجۆر درێژی كێشایە و دبەردەوامن.
حەز و ڤیانێن كوردستانیان دیارن و ئارمانج زەلالە و ل ریفڕاندۆمێ، راپرسینا تەڤایا ٢٥ ئیلۆنا ٢٠٢٥ ێ گەلێ باشۆرێ كوردستانێ ب ئاشكەرایی دەنگێ خۆ دا بۆ سەربەخۆیا كوردستانێ و ئەڤ ئارمانجا تەڤ كوردستانیانە، بەلێ بجهئینانا وێ دكەڤیتە بن هۆكارین ناڤخۆیی و بابەتی. یێن ناڤخۆیی خۆ ئەگەر هێزێن سیاسیێن كوردستانێ د هەڤگرتی ژی نەبن، لێ رایا مللەتی دیارە و بریارەكا پێگیرە و دڤێت ل ئاستێ ناڤخۆ ب هەڤگرتن پلانەكا گونجای بۆ بهێتە دارێژتن و كار بۆ بهێتەكرن دا هۆكارێن بابەتی بۆ بەرهەڤ بن وهەبوونا كوردستانا سەربەخۆ بهێتە پەژراندن. هۆكارێن بابەتی یێن رێگر گەلەكن، ل ئاستێ دەولەتێن داگیركەر هەر ئێك بتنێ و ل ئاستێ دەولەتێن هەرێمایەتی پێكڤە و ل ئاستێ نێڤدەولەتی.
یا ئاشكەرایە هەر دەولەتەكا داگیركەر دانێ ب هەبوونا پارچەكا كوردستانێ د سنوورێ وێ دەولەتێ دا ناكەت و سیاسەتێن سەركوتكرنێ و بەهژاندنا كوردان دهاژۆن و د بەرهەڤ نینن دانپێدانێ ب مافێن نەتەوەیێن كوردستانێ بكەن و ل ئاستێ دەولەتێن هەرێمایەتی یێن داگیركەر، رێكەفتنێن هەرێمایەتی هەنە بۆ سەپاندنا سیاسەتێن سەركوتكەر و لێدانا هەر بزاڤەكا رزگاریخوازیا كوردستانێ ل هەر پارچەكێ و ل ئاستێ نێڤدەولەتی ژی خۆ كوردستانا مەزن د چارچووڤی رێكەفتنێن نێڤدەولەتی دا دابەشكریە و لێكڤەكریە و حەتا نوكە پاشگەز نەبووینە ژ وان ریكەفتنان و پشتەڤانیا بزاڤا كوردستانێ بۆ سەربەخۆ یێ ناكەن و رێگریێ لێ دكەن!.
د ژیواری دا بزاڤا رزگاریخواز و شۆرشێن چەكداری ل دژی داگیركەران بەردامبوونە و ل ئەنجامێ خەبات و قوبانیدانەكا مەزن یا سەدەیەكی ل باشورێ كوردستانێ ژ سەردەمێ بزاڤێن شێخ مەحموودی، و شۆرشێن بارزان و دامەزراندنا پارتیا دیموكراتیا كوردستانێ و شۆرشا ئیلۆنا نیشتیمانی ب سەرۆكاتیا بارزانیێ نەمر و ریكەفتنا ١١ ئادارا ١٩٧٠ و دانپێدان ب مافێن ئوتونۆمی و شۆرشا گولانێ ب سەرۆكاتیا رێزدار مسعود بارزانی و بەرەیا كوردستانی و سەرهلدانا ١٩٩١ و بریارا ژمارەیا ٦٨٨ یا جڤاتا تەناهیا نێڤدەولەتی و رۆخاندنا رژێما دكتاتۆری و ئاڤاكرنا ئیراقا نوی تنێ هەرێما كوردستانێ وەكو كیانەكێ كوردستانیێ فیدرالی یێ دەستووریێ دانپێدای د چارچووڤەیێ دەولەتا ئیراقێ دا هەبوونەكا نەتەوەیی نیشادایە و جێگیركریە، ئەو ژی دكەڤیتە ل ژێر گەفێن سیاسی و ئابووری و ئاسایشێ و هێشتا هەمی دەڤەرێن كوردستانێ بۆ نەڤەگەراندینە!.
ل باكورا دەولەتا دۆستەكی و شۆرشێن شێخێ نەهری و شێخێ پیرانی و سەید رزای و پشتی چل سالێن خەبات و قوربانیدانا پەكەكێ ل چارێكا دوماهیێ یێ سەدەیێ بیستێ هەتا نوكە، تنێ پرۆسەیا ئاشتیێ د چارچووڤێ چاكسازیێن ناڤخۆی یێن دەولەتا توركیا دهێتە هاژۆتن و نەگەهشتیە ئاستێ لێكتێگەهشتن و رێكەفتنەكێ بناڤێ مافێن نەتەوەیێن كوردستانێ.
ل رۆژئاڤا یا هەستەكا نەتەوەیا ب هێز و بزاڤەكا سیاسی و رەوشەنبیریا لاواز هەیی، پشتی چەندین سالێن شەڕ و پێكدادانێ و رزگاركرنا دەڤەرین كوردستانێ ب سەركردایەتیا پەیەدێ و هەسەدێ و روخاندنا رژێما دكتاتۆری، ب چاڤدێریا ئەمریكا دانوستاندن هاژۆتن و وێ سەركردایەتیێ سیاسەتا تێكەلكرنا هێز و پێكهاتێن خۆ ل گەل دەولەتا سووریا پەژراند بەرانبەر هندەك مافێن رەوشەنبیری و ئیداری، هەر چاوا بیت ئەڤە بۆ رۆژئاڤا دەستكەفتیەكە، چونكی كورد ل رۆژئاڤا د فەرهەنگا سیاسیا سووریا دا نەبوون و ئەڤرۆ كرنە هەڤپشك و زمانێ كوردی كرە زمانەكێ فەرمی، ب هیڤینە هەمی مافێن وان یێن مایی ژی بهێنە دەستەبەركرن.
ل رۆژهەلاتێ خۆدانا دەولەتا میدیا و كۆمارا كوردستانێ و شۆرشا شیایی ل سالا ١٩٧٩ پتریا دەڤەرین كوردستانێ رزگاركەت، هەرا دهێتە لێدان و سەركوتكرن و هێشتا پرسا كوردی نەئێخستیە بەر دانوستاندنێ و چارەسەركرنێ!.
حەز و ڤیان و ئارمانج گەلەكن بەلێ یا بدەستڤە هاتی كێمەكە ژ مافێن رەوا یێن گەلێ كوردستانێ.
كوردستان خۆدان دۆزەك رەوایە، بەلێ ژیوارەكێ نەخواستی ل سەر هاتیە سەپاندن و د ناڤبەرا ئارمانجێ و ژیواری دا سیاسەت دهێتە هاژۆتن بۆ بدەستڤەئینانا ئەوا د شیانان دا و ئەڤە ململانەك و هەڤڕكیەكا بەردەوامە د ناڤبەرا داخوازەكا رەوا یا مللەتی و رەتكرنەكا نەرەوا یا داگیركەر و ستەمكاران و ل دوماهیێ سەركەفتن هەر بۆ مافدارایە و ل وێ ئۆمێدێینە ببینین هەر چار پارچەیێن كوردستانێ د ئازاد و دەولەتا كوردستانێ یا سەربەخۆ.

رۆژا ١٧ ی تەباخا ٢٠٢٦ نڤیسینگەها بەرێز مەسرۆر بارزانی سەرۆكێ حوكمەتا هەرێما كوردستانێ و جهێ رێڤەبەرێ ئاژانسا پاراستنا كوردستانێ كەفتنە بەر هێرشێن درۆنێن ئیرانێ، هەروەكو بەری نوكە ژی بارەگایێ سەرۆك بارزانی و سەرۆكێ هەرێما كوردستانێ و هندەك دامەزراوەیێن دی یێن هەرێما كوردستانێ كرینە ئارمانجا مۆشەك و درۆنان، ئەڤ دەستدرێژییە رویرەشی و شەرمزارییە بۆ ئەنجامدەر و پشتەڤان و ئەوێن كەیف پێهاتین!. رویرەشكرن و شەرمزاركرن ل ئاستێ كوردستانێ و ئیراقێ و دەولەتێن هەڤسوی و تەڤ جیهانێ ئاراستەی ئەنجامدەران كرینە.
ئەڤ رەفتارانە ژ خەسلەتێن دوژمن و داگیركەرێن كوردستانێنە، دەستدرێژیێن دوژمنكارارانەنە ل سەر سەر وەلاتی ب هەمی پێكهاتەیێن وێ یێن هێمایی و مادی و مۆرالی.
مخابنی ڤە هەرێما كوردستانێ یا ئارام و یا دەستێێ دۆستینیێ و پێكڤە ژیانا ئاشتیانە بۆ هەمی دراوسێ و جیهانێ درێژ دكەت و ب كریار ئاشتیێ و ئارامیێ دخوازیت، بكەڤیتە بەر حنگ و لێدانێن دوژمن و نەیاران.، ئەڤەیە ئەوا دبێژنێ (نەشێتە كەری دێ هەلدەتە پاڵیێ!)، ئەمریكا و ئسرائیلێ ئیران وێرانكر، یا حنگێن خۆ ل هەرێما كوردستانێ ددەت!.
ل كارڤەدانێن شەڕێ ئەمریكا و ئسرائیلی ل دژی ئیرانێ، ئیرانێ و دویڤەلانكێن وێ یێن چەكدار هەرێما كوردستانێ یا ئارام و بێلایەن كرە ئارمانجا دەستدرێژیێن خۆ و بۆ چەندین جاران باژار و دامەزراوێن حكومی و ئابووری و حەتا یێن سەرۆكاتیا دامەزراوەیێن هەرێمێ كرینە ئارمانجێن مۆشەك و درۆنێن خۆ!. ئەڤە گوپیتكا بێ سنجیێ و پیچاتیێ و كرێتیێ یە، دیارە ئەڤە د نەساخن و جەرگ و دلێن وان تژی كەرب و كینن ل بەرانبەر ئاشتیی و ئارامیێ و مرۆڤایەتیێ.
ئەڤە وێ دگەهینیت كو دوژمن و داگیركەران كەرب و كینەكا مەزن ژ كورد و كوردستانێ و سەرۆك و سەركردە و هێمایێن وێ هەنە، وەسا هزردكەن، ب ڤان گەف و دەستدرێیان دێ ئیرادەیا مللەتی شكێنن و دی مللەتی نەچاركەن سەرێ خۆ بۆ بچەمینیت!.
ئەو یێن د ئاشۆپەكا ڤالا و د خەونێن بێ بنەما دا دژین، كوردستانی مللەتەكێ خۆراگرە و یێ رژدە ل سەر بەرخۆدانا خۆ پێناڤی مافێن خۆ.
هەلبەت ئەڤ كریارێن دوژمنكاری بزاڤێن تێكدەرانەنە و د مەترسیدارن و دهێنە هژمارتن هێرش ل سەر هەر تاكەكێ كوردستانێ، و دەستدرێژی و گەفەكا راستەوخۆیە بۆ سەر دامودەزگەهێن دەستووری و شەرعی یێن هەرێما كوردستانێ و ئەولەهییا هەرێما كوردستانێ، دڤێت هەمی لایەك ئەڤێ چەندێ بزانن كو ئەڤ هێرشە نەشێن ئیرادەیا گەلێ مە لاوازكەن.
سەبارەت ڤان دەستدرێژیان؛ بارەگایێ بارزانی دبێژیت: زۆر ب توندی ئیدانەیا ڤان هێرشێن دوژمنكارانە دكەین، هەرێما كوردستانێ چ دەما بەشەك نەبوویە ژ شەڕ و گرژیێن ل ناڤچەیێ هەیین و ئەڤ جۆرین هێرشین نەرەوا كو چ بیانۆ بۆ نینن، هەولدانە بۆ تێكدانا سەقامگیریا هەرێما كوردستانێ، ب دلنیایی بكارئینانا درۆن و مۆشەكان چارەسەریا كێشەیان ناكەت.
هەروەسا رێزدار نێچیرڤان بارزانی دبێژیت: ب توندی سەركونەیا ڤان هێرشان دكەین، ئەڤ هێرشە ب تەواوی رەتكراون و پەرەساندنەكا مەترسیدارن.
و ژلایی خۆ ڤە رێزدار مەسرۆر بارزانی دبێژیت: ب توندی ئەڤ هێرشێن نەرەوا سەركونە و شەرمزاردكەم و ئەڤە پینگاڤەكا مەترسیدارە و گەفەكا راستەوخۆیە ل سەر ئارامی و سەقامگیریا هەرێما كوردستانێ، ئەڤ هێرشە چ جاران نەشێن مە براوەستینن ل بەردەوامبوونێ ژ ئەنجامدانا ئەركێن خۆ و پاراستنا هەڤوەلاتیێن مە.
هەلبەت سەرۆك و سەركردەیێن هەریما كوردستانێ ژبلی ئەركێن وان یێن گرنگ، ناڤونیشان و ناسنامەیێن نەتەوەیی و نیشتیمانینە، و هێمایێن هەڤگرتنا مللەتینە، ئەون دەربڕینێ ژ ماف و داخوازیێن مللەتی دكەن و خۆ لێ دكەن خۆدان و ئیرادەیا تەڤایی چێدكەن و مللەتی ئاراستە دكەن و هیڤی و ئومێدان گەش دكەن و گرۆتینێ ددەنێ.
هەر مللەتەكی و جڤاكەكی و ئایینەكی هێما و بەهایێن خۆ یێن پیرۆز هەنە، كارتێكرنا كاریگەر و راستەوخۆ ل مللەتی و پێكهاتێن جڤاكی دكەن و ئاراستە دكەن، مللەت لێ كۆمڤە دبیت و پێ داخبار دبیت و گوهداریێ بۆ دكەت.
پێدڤیێن مێژوویی، مرۆڤی، جڤاكی، نەتەوەیی و ئایینی بۆ كوردستانێ سەرۆك و رێبەر چێكرینە و بووینە هێمایێن روحی یێن تەڤ پێكهاتێن جڤاكیێن كوردستانێ ب جوداهیێن خۆ یێن ئەتنی و ئایینی ڤە و بووینە هێز و دەستهەلاتێن رەوا یێن كوردستانێ و سەنگا خۆ یا خۆمالی و هەرێمایەتی و جیهانی چێكریە، سەرۆك بارزانی و هەردو جێگرێن وی سەرۆك و سەركردەیێن كوردستانێ نە، هێمایێن روحیێن گەلێ كوردستانێ نە، دوژمن و داگیركەر و دویڤەلانكێن وان كەرب ژێ ڤەدبن و بۆ خۆ كرینە ئارمانج و بەرێ تیرا خۆ دایێ ب وێ باوەرێ هەكە ئەڤە هنگافتن دێ ئیرادەیا مللەتی شكێت و سەرێ خۆ بۆ چەمینیت. لێ نزانن یان ژبیرا خۆ دبەن سەرۆك و مللەت گیان و جەستەكن، هەبوونەكا پێكڤەیە و مللەتێ كوردستانێ خۆراگرە و ب سەرۆك و رێبەرێن خۆڤە دبەستن و پێ سەرفرازە و كوردستانی نە دەستبەرداری سەرۆك ورێبەرێن خۆ دبیت و نە ژ رێبازا خۆ دویردكەڤیت.
كوردستانا خۆدان رێبازەكا جێگیر و سەرۆكەكێ حەكیم خۆراگر و سەركەفتی یە.
پاراستی بیت كوردستان ب سەرۆك و رێبەرێن وێ ڤە، رویرەش و شەرمزاربن دوژمن و داگیركەر.

پارتیا دیموكراتیا كوردستانێ ب سەرۆكاتیا بارزانیێ نەمر و پاشی ب سەرۆكاتیا سەرۆك مسعود بارزانی ئێكەمین و تاكە رێكخستنا سیاسییە ب دروستاهی دەربڕین ژ ماف و ئارمانجێن نەتەوەیێن كوردستانێ كرین و دكەت و نوونەرایەتیا راستەقینەیا گەلێ كوردستانێ دكەت، و خۆ ل دۆزا وێ یا رەوا دكەتە خۆدان و خەبات و تیكۆشینێ بۆ دكەت و گوری و قوڕبانیان بۆ دەت.
پارتی ل سەر كەلەپۆرێ نەتەوەیێ شەهید شێخ عەبدولسەلامێ بارزانی و شێخ ئەحمەدێ خۆدانێ بارزان و بیرۆكا مەلا مستەفایێ بارزانی (چ شۆرشەك بیێ پارتیەكا رێكخستی و سەركردایەتیەكا راستەقینە سەرناكەڤیت)، و سەربۆڕا وی یا نیشتیمانپەروەری و خەباتگێری د چارچووڤەیێ پرۆگرامەكێ گونجای بۆ خەباتا رزگاریخوازا كوردستانێ هاتیە دامەزراندن و دەست ب خەبات و تێكۆشینێ كریە، ئێدی پارتی بوویە بزاڤ و شۆرش و سەرهلدانا گەلێ كوردستانێ بۆ ئارمانجێن نەتەوەیی. و ژبەركو دامەزرێنەرێ پارتی بارزانی یە، هەمی فەرمۆدەیێن بارزانیێ نەمر و سەرۆك مسعود بارزانی دەربڕینێ ژ رێبازا پارتی و بارزانی دكەن.
بارزانیێ نەمر گەلەك فەرمۆدەیێن گرنگ و دەربر و ب مەبەست هەنە، ئەو دەربڕینێ ژبیرۆكا وی یا نەتەوەیی و نیشتیمانیا كوردستانی و رزگاریخوازی دكەن، هەر وەكو د فەرمۆوت: (كوردستان ئێك پارچەیە، ئەو سنوورێن كوردستانێ ژیكجودا دكەت دەستكردن، لەوا ب باوەر ڤە دبێژم ئەم دەستبەرداری ئێك بوهۆست ژ ئاخا كوردستانێ نابین). مەبەستا وی كوردستان ئێك وەلاتە، و ژیوارێ پارچەكرنێ رەتدكەت، و ئەم كوردستانی راستیەكێ دزانین ئەو ژی كوردستان وەلاتێ كوردان و هەڤئاكنجیێن وێ یە، و هندی هەینە دێ خەباتێ بۆ رزگاركرنا وێ كەین و ئێك بهۆستا وەلاتێ خۆ بۆ كەسێ ناهێلین و دەستان ژێ بەرنادەین، لەوا ژی دبێژیت: (هیڤیدارم بشێم رۆژەكێ ژ رۆژان ئالایێ كوردستانێ ل جهەكێ كوردستانێ بلند كەم ئەڤجا ئەو جهـ ئیراق، توركیا، ئیران بیت چ جوداهی نینە)، و ل سەر ڤێ باوەرێ خەبات دژی هەمی داگیركەرێن كوردستانێ كریە و د هەوارا برایێن خۆ ل باكۆر و رۆژهەلات ژی چوویە و قوربانی ژی داینە، كو ئارمانجا وی رزگاركرنا كوردستانێ بوویە، و داكو كوردان ژی ناسنامەیا خۆ یا نەتەوەیی هەبیت. هەوەسا دبێژیت: (یا ژ ژیانێ پیرۆزتر كوردستانە)، مەبەستا وی كوردستان وەلاتەكێ خۆشتڤی یە و هەژی هندێ یە مرۆڤ خۆ بۆ بكەتە گۆری و قوربان، و ناسناڤێ شەهیدیێ پێناڤی كوردستانێ وەرگریت كو ئەڤ قوربانیە پیرۆزتر و سەرفرازترە ژ ژیانەكا بن دەست و سەرشۆر. لەوا دفەرمۆت (مرنەكا د رێكا كوردستانێ دا بیت هزار ژیان گۆری بن)، یانكو ژیان بێی وەلاتەكێ ئازاد مرنە، لەوا ب ئەرك و پیرۆز دزانیت مرۆڤ خۆ بكەتە قوربانی پێناڤی وەلاتەكێ ئازاد و سەربەخۆ. راستیەكا هەی وەكو رۆژێ یا گەش، ئەو ژی ئەوە كو بارزانیێ نەمر هەمی ژیانا خۆ پێناڤی كورد و كوردستانێ تەرخانكر بوو و هەر ل سەر وێ رێبازێ ژی ل دەربەدەریێ مالئاڤاهی كر.
سەرۆك مسعود بارزانی دبێژیت: (كورد نەتەوەیەكە، خۆدان دیرۆك و جوگرافیا و زمان و رەوشەنبیری و رەوشت و تیتالێن خۆ یێن تایبەتە و ب هزاران سالە ل سەر ئاخا خۆ دژیت، ب درێژاهیا ڤی ماوەی یێ پێگیربوویە ب هەمی بنەمایێن لێبۆرینێ و پێكڤەژیانێ، جهێ سەرفرازیێ یە رهوریشالێن رەوشەنبیریا پێكڤەژیانێ ل گەل نەتەوە و ئولێن دیتر د ناڤا كوردان دا دكوور و دیرۆكینە، د ماوەیێ بۆری دا، نەتەوەیا كورد شیایە خۆ ژ گەلەك بزاڤێن بۆهژاندنێ و ژ ناڤبرنێ رزگار بكەت و بەرسینگێ هەر بزاڤەكا بۆ ڤێ مەرەمێ دئێتەكرن بگریت)، هەروەسا سەرۆك بارزانی دبێژیت: (ئەز ب خۆ ل وێ رۆژێ ژ دایكبوویمە، ل ژێر سیبەرا ئالا كوردستانێ ل (ساپڵاغ) ژ دایكبوومە، و هەموو دەقیقەكێ ژی ئامادەمە ل ژێر سیبەرا وی ئاڵای و بۆ وی ئاڵای بمرم). و ل سەر ڤێ رێبازێ سەرۆك بارزانی دەست ب خەباتێ كر و كوردستان ژ ئوتونۆمی بۆ فیدرالزمێ و ریفراندۆما سەرخۆبوونێ بر.
ل ١٦ ی تەباخا ١٩٤٦ بارزانیێ نەمر پارتیا دیموكراتیا كوردستانێ وەكو رێكخستنەكا سیاسیا نەتەوەیا رزگاریخواز یا هەڤچەرخ دامەزراند و هەڤگرتنەكا سیاسییا كوردستانا ئیراقێ پێكئینا و هیڤی و ئومێدێن كوردپەروەران گەشكرن و هەر زوی ریكخستنێن خۆ ب بەرفرەهی چێكرن.
د پەیمانا مللی یا دامەزراندنا پارتی دا هاتیە: (ب رێكا خەباتا سیاسی كاردكەین ژبۆ دروستكرنا دەولەتا هەڤگرتی یا دیموكراتیا كوردستانێ ل ئیراقێ، كو هەر ئێك ژ ویلایەتێن مووسل و هەولێر و كەركووك و سلێمانیێ و خانەقینێ ب خۆڤە بگریت).
و د بەندێ ئێكێ یێ پرۆگرامێ پارتی یێ كۆنگرەیێ ئێكێ دا هاتیە: ژ ئارمانجێن سیاسی: (سەربەخۆیا تەمام یا كوردستانێ كو ب ڤان رێكێن خوارێ دێ ب وێ ئارمانجێ گەهین: ١-خەبات پێناڤی دروستكرنا دەولەتەكا هەڤگرتی د ئیراقێ دا بناڤێ دەولەتا هەڤگرتی یا دیموكراتیا كوردستانێ.
ب ڤێ دیتنێ دۆزا كوردستانێ ل دەف پارتی یا زەلال بوو و ل هەمی كۆنگرەیێن خۆ دا پارتی داكۆكی ل سەر ڤێ رێبازا نەتەویی كریە و پتریا مللەتی خۆ دا دگەل و بوو نوونەرا راستەقینەیا مللەتی و مافێن وی یێن رەوا.
ل كۆنفرانسێ باكۆ ل سالا ١٩٤٨ بارزانیێ نەمر دفەرمۆت: ئەی مللەتێ كوردێ مەزلۆم و فیداكار ئەم ب شەرەفا بنەمایێن دیموكراتیا خۆ و پاكیا گیانێ خۆ یێ نیشتیمانپەروەر سۆز و پەیمانان ددەین كو هەڤپشكێن ژیان و خۆشیێ نەبین هەتا مافێن تەیێن داگیركری بۆ تە ڤەنەگەرینین، ل رێكا رزگاربوونا تە ژ زولم و ستەما دەستهەلاتا بیانیان. سۆز و پەیمان بیت كو قازانج و بەرژەوەندیا خۆ یا كەسۆكی بكەینە قوربانی بەرژەوەندیا گشتی یا تە، هەمی حەز و ڤیانێن خۆ بكوژین بۆ دەرخستن و ڤەژاندنا مەرەم و ئارمانجێن تە یێن بلند بۆ بهێزكرنا ئێكەتیا ناڤخۆیی و پێشخستنا پێشڤەچوونا مللەتی و نەتەوا كورد.
پارتی د چارچووڤەیێ رێبازا خۆ یا نەتەوەیی دا ل دویڤ بارودۆخی درووشمێن گونجای ل گەل هۆكارێن خۆیی و بابەتی بلندكرینە و خەبات بۆ كریە.
هەر ژ دامەزراندنێ و د هەمی قووناغان دا پارتی دیموكراسیەت بۆ ئیراقێ داخوازكریە وەكو ئارمانجەكا نەگوهۆڕ جێگیركریە، ژ وێ باوەرێ چارەسەریا دۆزا نەتەوەیا كوردستانێ ب رێكێن دیمۆكراتی بجهدهێت. و هەمی بزاڤا وێ یا سیاسی و چەكداری و جەماوەری و مەدیایی و دبلۆماسی ژبۆ مافێن كورد و كوردستانێ بوو و هەر مافەكێ نەتەوەیی ژی بۆ كوردستانێ بوو.
ل ١١ ئیلۆنا ١٩٦١ شۆرشا ئیلۆنا نیشتیمانی ب سەرۆكاتیا بارزانیێ نەمر درووشمێ دیمۆكراسی بۆ ئیراقێ و ئۆتونۆمی بۆ كوردستانێ بلندكربوو، حەتا ل رێككەفتنا ١١ ئادارا ١٩٧٠ حوكمەتا ئیراقێ دانپێدان ب مافێن نەتەوەی یێن كوردستانێ و ئۆتونۆمی بۆ كوردستانێ كری، پشتی پاشگەزبوونا رژێما ئیراقێ ژ رێككەفتنێ و هەلنگفتنا ٦ ی ئادارا ١٩٧٥ ێ، جارەكا دی پارتی ل ٢٦ گولانا ١٩٧٦ ێ شۆرشا گولانێ درێژی دا شۆرشا چەكداری ل ژێر دروشمێ دیمۆكراسی بۆ ئیراقێ و ئۆتونۆمیێ راستەقینە بۆ كوردستانێ، و پشتی سەرهلدانێ ل ٤ ێ چریا ئێكا سالا ١٩٩٢ ێ سەرۆك بارزانی پشنیارا فیدرالی بۆ كوردستانێ كر و پەرلەمانێ كوردستانێ فیدرالیەت پەسەند كر و راگەهاند و ل شەڕێ ئازادیا ئیراقێ ل ٢٠٠٣ سەرۆك بارزانی داكۆكی ل سەر دیمۆكراسیكرن فیدرالیكرن و دەستوریكرنا ئیراقا نوی كر و هاتە پەسەندكرن. و پشتی شەڕێ تیرۆرستێن داعشێ و ل سەر پشنیارا سەرۆك بارزانی ل ٢٥ ئیلۆنا ٢٠١٧ ێ ریفراندۆما سەربەخۆیا كوردستانێ هاتەكرن و خەلكێ هەرێما كوردستانێ ب رێژەیا هەرا بلند پەسەند كر.یا پێدڤیە بزانین بەری دامەزراندنا پارتی ناڤێ كوردستانێ د هەمی نڤیسین فەرمی و گفتوگەیان دا یێ قەدغەكری بوو و پارتی ئێكەمین پارتی بۆ ناڤێ پارتی و ئارمانجێن وێ یێن نەتەوایەتی ب زەلالی ل سەر ناڤێ كوردستانێ جێگركەت و نیشا بدەت و كاری بۆ بكەت و بدەتە قەبوولكرن و كوردستانێ ب وەلاتێ كوردان ب فەرمی بدەتە نیاسین و جێگیركرن و بناڤێ كوردستانێ گفتوگۆ و دانوستاندن و رێكەفتنان بكەت.
ئەڤەیە رێبازا پارتی و بارزانی ژ دامەزراندنێ و حەتا نوكە ئارمانجا وی مافێن نەتەوەیێن گەلێ كوردستانێ یە، و دێ هەرا بەردەوام بیت.
ل كۆنگرەیی چاردێ ل٣-٦ چریا دوێ ٢٠٢٢، ئەوێ ل باژێرێ دهۆكێ هاتیە بەستن، پارتی ل بەندێ ئێكی یێ پرۆگرامێ ب ڤی رەنگی خۆ پیناسەكریە: (پارتیا دیمۆكراتیا كوردستانێ پارتیەكا دیمۆكراتیا نیشتیمانیا جەماوەریە، باوەری ب مافێن مرۆڤی، دادپەروەریا جڤاكی، گەشەدانا درێژخایەن، تەعەدودیا سیاسی و نەتەوەیی و ئایینی و رەوشەنبیری، پێكڤەژیانا ئاشتیانە، ئازادیان و وەكهەڤیێ و مافی چارەنڤیسێ نەتەوەیا كورد و گەلێ كوردستانێ ب رێكین مەدەنی و دیمۆكراتی هەیە و پشتبەستن ب رێباز و كەلەپۆڕێ بارزانیی نەمر خەباتێ دكەت و سوودی ژ سەربۆڕێن گەلێن دی دبینیت).
و ئارمانجێن پارتی یێن نەتەوەیی ل بەندێ چارێ یێ پرۆگرامی ب ڤی رەنگی دیاركرینە:
ئێك: بجهئینانا مافێ چارەنڤیسێ نەتەوا كورد و گەلێ كوردستانێ ب ب رێكێن خەباتا ئاشتیانە و دیموكراتی.
دو: پشتەڤانیا دۆزین رەوایێن كوردان ل پارچەیێن دی یێن كوردستانێ ژبوونا بجهئینان و دابینكرنا مافێن وان یێن نەتەوەیی و نیشتیمانی ب رێكێن خەباتا ئاشتیانە و دیمۆكراسی.
یێ بڤێت پارتی باش بنیاسیت دڤێت پەرتووكا سەرۆك بارزانی بارزانی و بزاڤا رزگایخوازا كوردی ب هەمی بەرگێن وێڤە، و مێژوویا پارتی دیموكراتی كوردستان و پەیرەو و پرۆگرامێن هەمی كۆنگرەیین وێ بخوینیت، دا بزانیت پارتی چەند هێزەكا سیاسی و جڤاكی و نەتەوەیا مەزن و دلسۆز و پێگیر و سەرفەرازە.
پشتراست بن پشتبەستبوون و پێگیریكرن ب ڤێ رێبازا پیرۆز پارتی سەركەفتیە و كوردستان ژی دێ ب ئارمانجێن خۆ را گەهیت.
پیرۆزبیت ٨٠ سالیا دامەزراندنا پارتی.
نەمری بۆ شەهیدان و سەر كاروانێ وان بارزانیێ نەمر و ئدریسێ جانەمەرگ.
بژی پارتی و سەركەفتی بیت خەباتا وێ ب سەرۆكاتیا جەنابێ رێزدار سەرۆك مسعود بارزانی.
بژی كورد .. بژی كوردستان..

زمانێ گفتوگۆیێ شێوازەكێ ئاخفتنكرنا ئارامە پشتبەستە ب نیازپاكیێ و گوهداریكرنەكا باش و ریزگرتنێ ل رایا یێ دیتر و لێكگوهۆرینا بیروهزر و بۆچوونان، ب شێوەیەكی كو ناكۆكی چێ نەبن و بگەهنە لێكتیگەهشتنەكا هەڤپشك ل سەر پرس و كێشەیێن هەیین.
هەر دەمێ كێشەك یان ناكۆكیەك هەبیت، واتە مافەكێ هاتیە پێشیلكرن و مافداری ماف هەیە داخوازا مافێن خۆ بكەت، و دڤێت ل هەر وی دەمی دا پێشیلكار بەرهەڤیا خۆ نیشابدەت بۆ چارەسەریێ و دەرگەهێ گفتوگۆیێ و دانوستاندنێ ڤەكەت، دا ئەو پرس نەبیتە ململانێ و پێكدادان.
بەژراندنا هەبوونا پرسەكا هەڤپشك، وێ دگەهینیت كو ئەڤە پتر ژ لایەنەكی یە، ئانكو دو لایەن و پترن و پێدڤی ب دانوستاندنێ نە و ئەڤە ب گۆتنەكا باش و دەستپێشخەریەكا گونجای و گوهداریكرنەكا سەرخۆ و لەزنەكرن د بەرسڤدانێ دا سەقایەكێ گونجای بۆ چارەسەركرنێ چێدكەت، بەروڤاژی دەنگبلندی و تووڕەیی و ڕكاتی و ئاخفتنێن زڤر و مەرج دانان و گەڤ، كارڤەدانا نەرێنی چێدكەت و پرسێ ئالۆزتر لێدكەت و كێشەیێ مەزنتر لێ دكەت و لیكتێگەهشتنێ دویردئێخیت.
مرۆڤ چ تاك چ كۆم، چ د كارەكێ جڤاكی دابیت یان ئابووری یان یێ سیاسی پێدڤی ب گفتوگۆ و دانوستاندنێ یە دا ب ئارامی بەرژەوەند بجهبیت، ئەڤێ ژی شێواز و میكانزم و زمانێ خۆ یێ تایبەت هەیە.
ئەڤە بۆ مرۆڤی وەكو تاك د جڤاكێ دا گەلەك گرنگە و بۆ خێزانێ كو بنگەهێ چێكرنا جڤاكی یە گرنگترە و بۆ هەمی پێكهاتێن جڤاكی و هەمی پرۆسەیا ژیانێ هەمان گرنگی هەیە، لەوان پا پێدڤییە مرۆڤ خۆ د هەمی رێرەوا ژیانێ بگەهینیت و بزانیت چاوا دێ باشتر سەرەدەریێ دگەلدا كەت و یا چێترینە ئارامیێ و سەرخۆیێ و زمانخۆشیێ د گفتوگۆیان دا بكاربینیت.
زمانێ گفتوگۆیێ تایبەتمەندیا خۆ هەیە، هەروەكو دیبلۆماسیەتێ زمانێ خۆ یێ تایبەت هەی، نیشادانا نیازپاكیێ و بكارئینانا پەیڤێن دلخۆشكەر و چێكرنا باوەریێ رۆلەكێ گرنگ بۆ لێكنێزیكبوونی و لێكتێگەهشتنێ و گەهشتن ب ئەنجامێن ئەرێنی دبینن.
توندی و دژواری و گۆشار و گەف وەكو ئامرازەك دهێتە بكارئینان بۆ نەچاركرنێ و هندەك دبێژنێ دبلۆماسیەتا توند یان یا نەچاركرنێ، لێ ئەڤە ناكەڤنە د خانەیا دپلۆماسیەتێ دا و پتریا جاران ئەنجامێن نەرێنی لێ دەردكەڤن.
د كارلێكییا جڤاكی دا، هەروەكو د كارێ سیاسی دا هزر و گۆتن و كارێن باش رێخۆشكەرن بۆ ڤەكرنا دەرگەهێن دانوستاندنێ و لێكتێگەهشتنێ، لێ دەمێ ئەو نەبن، گفتوگۆ دبیتە شەڕێ راگەهاندنا پەیڤ و زاراڤان و بەر ب خرابیێ ڤە دچیت!.
د سیاسەتێ و گفتوگۆیان دا مەرج نینە هەمی داخواز و مەرج بجهبهێن و ب زمانێ دپلۆماسیەتێ پەیڤ و زاراڤ رۆلێ خۆ ل سەر دژواریا گفتوگۆیان دبینیت، بۆ نموونە ل جهێ خۆ بدەستڤەبەردان دشێن بێژن ل بەرهاتن و ل جهێ دەستبەردان دشێن بێژین لێكتێگەهشتن و ل جهێ مەرجان بێژن داخواز، ل جهێ رەدكرنێ و دیاركرنا نەرازیبوونێ دشێن ب شێوازەكێ سەرخۆ و ئارام بێژن، ئەڤ دیدارا باش بوو، دێ لێنێرین و ئەم پیدڤی پتر دیداراینە، ئەم د وە دگەهین، بەلێ دڤێت باوەری چێبیت، ئەڤ بابەتە پێدڤی پتر ڤەكۆلینێ یە و پێدڤیە ڤەگەرین ل گەل هەڤال باخڤین!.
ئەڤ پەیڤێن نەرم، ئارامیێ و باوەریێ چێدكەت و دەرگەهێن گفتوگۆیێ ڤەكری دهێلن و رێ خۆش دكەن بۆ لیكتێگەهشتنێ و چارەسەركرنا قەیرانان.
و دەمێ نیازپاكی نەبیت و لێك دویری و ڕكاتی هەبیت، دەربرینێن توند دەردكەڤن، پرس پتر ئاسێ دبیت و كێشە ئالۆزتر لێ دهێن، ئێدی دەڕبرینێن توند و زڤر دەردكەڤن وەكو ئەم د پشتراست نینین ئەم د نیگەرانین ئەم د رازی نینین، ئەم رەد دكەین، ئەم مەحكۆم دكەین، مافێ مەیە ب پێرابوونێن خۆ رابین و دەستهەلاتێن خۆ بكاربینین.
د هەمی رەوشان دا دڤێت تێك بگەهن كو پێكڤە د باشن و بهێزن و ئەڤە پێدڤیەكا جڤاكی و نەتەوەیی و سیاسی یە دڤێت كار بۆ بهێتەكرن.
د داب و نەریتێن كوردەواریێ دا، هەمی ئێل و هۆز و بنەمالان برا گەورەیی هەیە، گوهداری بۆ هەیە و رێز لێ دهێتە گرتن و بریار یا ویە و ملكەچ بوون بۆ هەیە!.
و د سیستەمێ حوكمرانیا مەدەنی دا دەستوور و قانوون هەنە و قانوون سەروەرە و یا كارپێكەرە، هۆسا ئارامی و سەقامگیری چێدبیت.
ئەڤجا د ڤێ قووناغێ دا هەرێما كوردستانێ یا خواستینە یان برا گەورەیێ بپەژرینیت و ل وی دەمی برایێ گەورە و سەرۆك و رێبەرێ مللەتی سەرۆك بارزانی یە، نەمازە كو ل كوردستانێ كەس ژ جەنابێ وی هێژاتر و دلسۆزتر و سەربۆرتر و شارەزاتر و ب شیانتر نینە، كو پێدڤییە ڤەگەریان و گوهداری بۆ هەبیت و فەرمانێن وێ بجهبیینن، یان قانوون سەروەربیت و قانوونان بجهبینینن و كاڕا بكەت و پێگیری پێ بكەن.
و د هەردو رەوشان دا دڤێت گوهداری و ملكەچ بوون بۆ هەبیت، دا پرۆسەیا سیاسی و هەمی بیاڤێن ژیانێ بباشی برێڤە بچن. پسیار ل ڤێرە ئەوە ئەرێ دێ هۆسا چیتە سەری، نە برا گەورەیی هەبیت و نە قانوون سەروەر بیت!؟

چەند نەخۆشە مرۆڤ كەسەكێ پەككەفتی یان دین یان هەژار یان لاواز یان یێ بەلنگاز ببینیت و نەشێت چ بۆ بكەت ژ وێ تەنگاڤیێ دەرباز بكەت، گەلەك یا نەخۆشە تو گەنجەكی ببینی زانكۆیا تەمام كری و باوەرنامەكا وەرگرتی و كارەك ب دەست نەكەڤیت، هەروەسا یا نەخۆشە تو ببینی ل بەر تەحرا چلێ هاڤینێ كۆمێن پالا ل جهێن شۆلی د راوەستا بن و كەس بكار نەئێخیت، ئەو ژی یا نەخۆشە نهێنیەك نەبیت تێڤە بحەویێت، و پارێ دختور و دەرمانان نەبیت، یا ژ هەمیان نەخۆشتر بەریكا ڤالا بیت و قەستا مالا خۆ بكەت!.
چ گونەهە ئەڤ مرۆڤێ نازك و نازدار یێ بێ بەهربیت ژ پێدڤیێن بنەكیێن ژیانێ و دڤان دەرد و ژانان دا بنالیت!. دهەمان دەم دا ببینی هندەكێن دی د هەمی بیاڤان دا ببەرفرەهی و خۆشگوزەرانێ دا بژین، بۆ وان دلا بخوازە بیت!، هەكو دبێژن: (هندەك بۆ دمرن و هندەك پێ دمرن). راستیەك هەیە دڤێت ل بەرچاڤ بیت، ئەو ژی هەر دەولەمەندیەكا نەرەوا ژ مافخوارنەكا نە رەوا دهێت و بێزاریێ و نەرازیبوونێ چێدكەت و كێشە لێ دكەڤن!. و هەستەك چێدبیت كو ستەم و چەوساندنا هەی.ئەڤە ستەم و چەوساندنا مرۆڤییە چ سروشتی بیت یان چێكری بیت.
گەلەك جۆرێن چەوساندنی هەنە، یا جڤاكی و یا چینایەتی و یا سیاسی و یا ئایینی و یا ئابووری و یا رەگەزی و یا ئەتنی و رەنگی و یا سروشتی. هندەك هەنە چ جۆرێن ستەم و چەوساندنێ نەدیتینە، هەكە د دەولەتەكا سەربەخۆ و دجڤاكەكێ بەختەوەر دابیت و هەنە هندەك دیتینە و كوردان تایبەتی چینا هەژار و ژ وان ئافرەتان هەمی دیتینە، كو ئافرەتە، چەوساندنا رەگەزی دیتیە، كو كوردە چەوساندنا نەتەوەی دیتیە، كو هەژارە چەوساندنا چینایەتی دیتیە، ژبلی گڤاشتنێن جڤاكی و ئایینی و سیاسی و سروشتی و د هەمی ڤان جۆران دا، مرۆڤ ململانا خۆ دكەت ژبۆنا ئازادیێ و ئاسایشێ و ژیانەكا بەختەوەر.
ئانكو د ڤێ هەبوونێ دا بەختەوەری پێدڤییە و ئارمانجە.مرۆڤی تەمەنەكێ ژیانێ هەیە و هەكە تو ب چار قووناغ دانی، چارێكا ئێكێ یا نەبخۆیێ و بێ دەستهەلاتیێ یە، یا ب خۆدانكرن و پەروەردەكرن و فێركرن و پیگەهاندنێ یە، ئەوژی چاوا و ب چ شێوە و ب چ ژیر و ب چ كەرستە!؟، لەوا مەرج نینە كەسانەك ساخلەم و چاك و ووچ ژێ چێبیت!، و چاریكا دی یا خۆ ئاڤاكرن و پیكئینان و بەرپرسیاریێ و بەرهەمداریێ یە، ئەو ژی ژبەر كۆمەكا هۆكاران مەرج نینە مرۆڤێ سەركەفتی بیت!، و قووناغا ل دویڤدا قووناغا گەهشتنێ و ئارامیێ و سەقامگیریێ و پشتراستبوونێ یە، ئەو ژی ل ژێر باندۆرا هەردو قووناغێن بەرێ، ب ئەرێنی یان ب نەرێنی ب ئەنجام دهێت و قووناغا دوماهیێ ژی ئەو ژی هەكە تەمەنی هاریكار بیت و قووناغێن بەر ب ئەرێنی بن، دێ ئارامیەكا ب پەند و وانە و سەربۆڕ بیت و بێهیڤیبوون سەرهەلدەت و بەر ب پیربوونێ‌ و لاوازبوونێ‌ و نەمانێ ڤە چیت!. و هەر قووناغەكێ ژی گوهۆرینێن خۆیێن تایبەت یێن جەستەیی و ئەركان و هزركرنێ و كەساتیێ هەنە، ئاستەنگ و هەلنگفتنێن خۆ هەنە و ژ ئێكی بۆ ئێكێ دی جوداهی هەنە و ژینگە و بارودۆخێن جڤاكی و ئابووری و ئایینی و سیاسی باندۆرا خۆ دكەت.
و ل هەمی وان قووناغان مرۆڤ دكەڤیتە بەر ئێش و نەخۆشی و دەردەسەری و بێ بەهرییێ ژ گەلەك پێدڤیان و ئەوێ ب بەختە یێ ساخلەم و د ژینگەهەكا باش و ئارام دا مەزن د بیت و بشێت هیڤی و خواست و ئارمانجێن خۆ بجهبینیت.
مرۆڤی دڤێت ب ئارامی و ب سەرفەرازی و ب بەختەوەری بژیت، بەلێ بێ بەختیا مرۆڤییە، كو ب گرفت و كێشە و ئالۆزی و ب كەسەر بژیت، خۆ هەنە هەر ژبوونێ پەككەفتی و لاواز و دەبەنگ و ددین كو د ئێش و ئازارندانە و سەرئێشێ بۆ یێن دی ژی چێدكەن د هەژاریی دا دژین و هەنە د ساخلەم و د ژینگەهەكا ساخلەم و باش دا دژین و رێ یا وان یا خۆش و ڤەوژارتیە، و ب دفن بلندی دژین!.
هەمی مرۆڤ ب پێكهاتێن خۆ یێن جەستەیی و ب هەستان ڤە وەكهەڤ هەڤن، لەوا یا پێدڤییە خۆ ئەگەر هندەك جوداهیێن چینایەتی و ئەتنی و ئایینی ژی هەبن، پێدڤییە وژدان و دادپەروەری ژی هەبیت و مافێن ژیانێ و بەختەوەریێ بەر ب هەمیان بكەڤیت.
بەختەوەری پێدڤیا مرۆڤانە چ تاك چ كۆم چ جڤاك چ مللەت، لەو بوویە ئارمانجەكا سەركی یا مرۆڤی و كار و بزاڤێ بۆ دكەت.
بەختەوەری هەستێن ناڤخۆیێن مرۆڤی یە، كو مرۆڤی پشتراست و دلخۆش و رازی دكەن و دكەڤیتە ل ژێر باندۆرا هۆكارین ساخلەمی و ژیری و دەروونی و جڤاكی و سیاسی و ئابووری و رەوشەنبیری. بەختەوەری حەز و ڤیانا مرۆڤی یە، لەوا ل هەر جهـ و دەمان بوویە هیڤی و ئارمانجا مرۆڤی بۆ خۆ و بۆ جڤاكی و ل وی دەمی بجهـ دهێت دەمێ هەمی پێدڤیێن مرۆڤی و جڤاكی یێن بنەكی وەكو ئاسایشێ و ئازادی و مافێن ئابووری دابین دبن و مرۆڤ پێ ئارام ببیت و مرۆڤ خواستیێ بەختەوەریێ و پێشڤەچوونا بەردەوامە لەو دڤێت كاری بۆ بكەت.
ل هەمی ئەرك وكاران هەر مرۆڤ لێگەرێ بەختەوەریێ یە، ئەڤ بەختەوەریە د وارەكێ سەقامگیر ب داهینانێ و سەركەفتنێ دكاری دا و ب هەڤگونجاندنا جڤاكی و ب دەستكەفتیێن مادی و مۆرالی دهێت.
هەلبەت بنەمایێن بەختەوەریێ یێن هەڤپشك هەنە، بەلێ جوداهی ل رادەیێ بەختەوەریێ ژ تەمەنەكی بۆ ئێكێ دی و ژ تاكەكی بۆ ئێكێ دی و ژ جڤاكەكی بۆ ئێكی دی و ژ كولتوورەكی بۆ ئێكێ دی هەنە و د ژیانێ دا گەلەك ب دەرد و كەسەران دمرن و ناگەهنە ئارمانج و مەبەستێن خۆ و هندەك ژی دبنە گۆری و قوربانیێن رەنجا خۆ و نابینن، هندەك ژی دبنە گۆری و قوربان بۆ ئارمانج و مەرەمێن هندەكێن دی، و هەنە ژی ل سەر خۆین و گیان و كەدا هندەكێن دی بەختەوەریەكا دەمكی دبینن!.
ئەڤ مرۆڤێ هۆسا نازك و خۆشتڤی د ڤێ ژیانا پڕی ئالۆزی و ركەبەری و پێكدادان دل هەژی ژیانەكا بەختەوەرە، ئەڤ بەختەوەرییە ژ بەرپرسیاریا تاكی و خێزانێ و جڤاكی و دامەزراوێن گشتی و دەستهەلاتدارییە، هەر ئیك ل رادێ ئەرك و كارێ خۆ ژێ بەرپرسە.
خۆ ئەڤە حەز و پێدڤیەكا ب ساناهی نینە، لەوان هەردەم د هەمی ژینگەهـ و بارودۆخان دا بوویە ئارمانجەكا كار بۆ كری یا بەردەوام، هەر بیروباوەرەك و ئایینەك و سازیەكا گشتی و رێكخستنەكا سیاسی، ژ تاكی تا دەولەتێ بەختەوەریا تاكی و جڤاكی پێناڤی ئارامیێ و سەقامگیریا جڤاكی و نیشتیمانی و دەولەتێ د كارنامەیا خۆدا دانایە و تنێ هندەك دەولەت تێدا سەركەفتی بووینە و شیاینە خەلكێ خۆ بەختەوەر بكەن بجهئینانا دادپەروەریا جڤاكی و ئابووری و خۆشگوزەرانیا تاكان و ئاسایشا ناڤخۆیی و خزمەتێن بنەكی و ب ڤێ چەندێ نیشتیمانێ خۆ ئارام و سەقامگیركریە.
مرۆڤ پێدڤی ژیانەكا ئارامە و هەژی سەرفرازیێ و بەختەوەریێ یە، دا بهایێ مرۆڤی بزانین و بەهایێن مرۆڤایەتیێ بجهبینین و پێكڤە كار ژبۆ دابینكرنا ئارامیێ و بەختەوەریێ كەین.