گۆتنا سیاسەت ب بێ ئافرەت كێماسییە نە تەنها درووشمەكە، بەلكو ڕاستیەكا مێژوویی و جڤاكییە، ل دەستپێكێ دفێت بزانین هەبوونا ئافرەتێ د سیاسەتێ دا نە تەنها مافە، بەلكو پێدڤیەكێ جڤاكی و پێشكەفتنخوازە.
سیاسەت نە بتنێ وارەكێ زەلامانە، بەلكو بنەمایەكە بۆ پێشكەفتنا هەر جڤاكەكێ و بێ پشكداریا ئافرەتان د بڕیاردانێ دا، نیڤا شیانێن جڤاكی ون دبن. چونكی ب درێژاهیا مێژوویێ و هەتا نوكە ئافرەتێ ڕۆلەكێ جەوهەری د گوهۆڕینێن جڤاكی و سیستەمێن حوكمڕانیێ و سیاسەتێ دا هەیە و ڕۆلەكێ گرنگ و كاریگەر هەیە چونكو ئەو د سیاسەتێ دا نە بتنێ دەنگدەرن، بەلكو سەركردە و پشكدارێن سەرەكینە د دانانا قانوونان دا، د مێژوویا بزاڤا ڕزگاریخوازا كوردستانێ دا ژنێن كورد بێ پشك نەبوون و مل بە ملێ پیاوان د سەنگەرێن خەباتێ دا، چونكو ژن نیڤا جڤاكی پێكدئینن و پشكداریا وان د بریاران دا دەتە دیاركرن كو جڤاكەك دروست و پاشەڕۆژەكا ب هێز هەیە.
د مێژوویا مرۆڤایەتیێ دا، سیاسەت هەردەم وەك وارەكێ دژوار یان تایبەت ب زەلامان ڤە هاتیە ناساندن، لێ گوهۆڕینێن سەردەمی و پێشكەفتنێن جڤاكی سەلماندن كو سیاسەت نە تەنها دەسهەلاتە، بەلكو رێڤەبرنا ژیانا جڤاكێ‌ یە ب هەمی وارێن وێ ڤە. ژ بەر ڤێ چەندێ، هەر سیستەمەك یان جڤاكەك بێ پشكداریا ئافرەتان بڕیاران بدەت، سیستەمەكێ ب كێماسی و نیڤچەیی بەرهەم دئینیت، چونكی ئافرەت نیڤا جڤاكا خۆ تەمام دكەت و خۆدان هزرەكا جودا و كوورترە بۆ ئاریشەیێن ڕۆژانە.
ل دەڤەرا مە و جیهانێ ژی، ژ كەڤنار دا هەتا دگەهت نوكە دەستتێوەردانێن حزبایەتی یان نەبوونا دەرفەتێن یەكسان ل جڤاكێ مە ئافرەت د ڕێیا سیاسەتێ دا ڕووبەڕووی گەلەك بەربەستان بوویە، لێ سەرەڕای ڤان هەمی ئاستەنگان ژنێن سەركردە سەلماندن كو ئەو نە تەنها ژمارەكن د ڕێژەیێن پشكداریكرنێ دا، بەلكو خۆدان شیانێن مەزنن د سەركردایەتیكرنێ دا، دانوستاندن و چارەسەركرنا قەیرانان دا چونكی جڤاكێ كو نیڤا شیانێن خۆ بێبەهر بكەت، وەك ئینسانەكییە كو ب پێیەكی بڕێڤە بچیت.
ژ بەر ڤێ چەندێ، هاندانەكا بەردەوام بۆ گەنج و ئافرەتان و دروستكرنا ژینگەیەكا سیاسی یا بێ ترس و ئارام، كلیلا ئاڤاكرنا جڤاكەكا پێشكەفتنخواز و دادپەروەرە. مێژوو و ڕۆژا ئەم ئەڤڕۆ تێدا دژین پرن ژ نموونەیێن ئافرەتێن بزاڤكەر یێن كو شیاینە نەخشەیا سیاسی و كارگێری ب گوهۆڕن.
ل دوماهیێ، من دڤێت بێژم پێشڤەبرنا ڕۆلێ ئافرەتێ د سیاسەتێ دا نە تەنها مژارەكە تایبەت ب مافێن ژنان ڤە، بەلكو پێدڤیەكێ نەتەوەیی و جڤاكییە بۆ پێشكەفتنا هەمی جڤاكێ.
نموونە: نموونێن جۆراوجۆر هەنە ژ ژنێن سەركردە و پێشمەرگە یێن كو د شۆرشان دا ڕۆلەكێ مەزن گێڕاینە، هەروەسا دایكێن شەهیدان كو ب خۆڕاگریا خۆ بووینە قوتابخانەیا بەرخۆدان و بلندكرنا هیڤیێن نەتەوەیی، و بووینە هاندەرەكێ سەرەكی بۆ بەردەوامیدانا خەباتێ. جیهانا ئەڤرۆ دا، سیاسەت تنێ شەڕ و هەڵبژاردن نینە، بەلكو دیپلۆماسی و دانوستاندن ژی نە.
ژنێن كورد ل چەندین فۆرم و كۆنفڕانسێن ناڤدەولەتی وەكو نوونەرێن هەرێما كوردستانێ پشكداری كرینە و شیایینە پەیوەندیێن سیاسی و دیپلۆماسی یێن هەرێمێ ل گەل وەلاتێن جیهانێ بهێز بێخن و نیاسا دۆزا رەوا یا گەلێ كورد بدەنە ناساندن.