ئه‌ڤرۆ، سالار دۆسكی:

مامۆستایه‌كێ‌ زانكۆیا دهۆكێ‌ ئاشكراكر كو نوكه‌ وه‌زاره‌تا خواندنا بلند كریه‌ بریار كو هه‌ر پشه‌كا بهێته‌ڤه‌كرن دڤێت سیسته‌مێ‌ بولونی بهێته‌ په‌یروكرن، ئاشكراكر ژی كو سیسته‌مێ‌ ناڤبری ل گه‌ل ژینگه‌ها كوردستانێ‌ ناهێته‌ گونجاندن و گرنگه‌ سیسته‌مێ‌ كورساتا بهێته‌ په‌یروكرن و بتنێ‌ گوهورین چاكسازی تێدا بهێنه‌كرن.

د. ردوان صدیق سه‌عید بریارده‌رێ‌ پشكا رابه‌ری په‌روه‌رده‌ ل كولیژا په‌روه‌ردا بنیات ل زانكۆیا دهۆكێ‌ بۆ به‌رپه‌رێ‌ په‌روه‌رده‌ و زانكۆ ل رۆژناما ئه‌ڤرۆ گۆت: سیسته‌مێ‌ بولونی ل ئه‌ورۆپا كار ل سه‌ر هاتیه‌كرن و تایبه‌ت ده‌مێ‌ قوتابی دهێته‌ ڤه‌گوهاستن ژ وه‌لاته‌كی بۆ وه‌لاته‌كێ‌ دی و پێشتر ئاریشه‌ په‌یدا دبوون ب هه‌بوونا ڤی سیسته‌می ئێدی ئه‌ڤ ئاریشه‌ نه‌مان و كێشه‌ هاته‌ چاره‌سه‌ركرن، هه‌بوونا ڤی سیسته‌می ل كردستانێ‌ پێنگاڤه‌كا باشه‌ و كاره‌كێ‌ جوانه‌ به‌لێ‌ ل كوردستانێ‌ هه‌مان ده‌م ژی ئاریشه‌ هه‌نه‌ چونكه‌ قوتابی هه‌تا پولا دوازدێ‌ زمانێ‌ كوردی دخوینت و دهێته‌ زانكۆیێ‌ دبیته‌ زمانێ‌ ئنگلیزی و گه‌له‌ك قوتابی هه‌نه‌ بزمانێ‌ ئنگلیزی گه‌له‌ك دلاوازن و نه‌شێت ئه‌ڤان بابه‌تان بخوینت و تایبه‌ت زانستێن مرۆڤایه‌تی وه‌ك ده‌رووناسیێ‌ وه‌ك جڤاك نیاسی و گه‌له‌ك په‌رتووكێن دی هه‌می بزمانێ‌ عه‌ره‌بی نه‌ و ئه‌ڤه‌ ژی دبیته‌ ئاریشه‌كا مه‌زن بۆ قوتابی و مامۆستا ژی و ئاستێ‌ قوتابی لاواز دیار دكه‌ت و ئێك ژ مه‌رجێن ڤی سیسته‌می قوتابی دچیته‌ ناڤ  په‌رتووكان چالاكیان دكه‌ت و راپورتا دروست دكه‌ت.

هه‌مان مامۆستایێ‌ زانكۆیێ‌ گۆت: ل دووڤ ڤی سیسته‌می ل گه‌له‌ك وه‌لاتان هه‌تا دوازده‌ی شه‌ڤێ‌ په‌رتووكخانه‌ ل كه‌مپینا زانكۆیێ‌ یا ڤه‌كریه‌ و قوتابی مفایی ژێ‌ وه‌ردگرن و كه‌سانێن خوبه‌خش ل به‌ر په‌رتووكخانێ‌ كار دكه‌ن، ئایا مه‌ ل كوردستانێ‌ كه‌سان هه‌نه‌ ل به‌ر په‌رتووكخانا كار بكه‌ن خوبه‌خش؟ به‌رسف نه‌خێره‌.

دردوان زێده‌تر ژی گۆت: گه‌له‌ك كونفرانس هاتنه‌ ئه‌نجامدان بۆ ئێكگرتنا پرۆگرامێن خواندنێ‌ و ئانكو رێبازێن خواندنێ‌ ل كولیژا په‌روه‌ردا بنیات و ئه‌ڤه‌ ل سه‌ر ئاستێ‌ هه‌رێما كوردستانێ‌ و گه‌له‌ك پرۆگرامێن خواندنێ‌ ئێكگرتن تێدا هاته‌كرن، ره‌نگه‌ سیسته‌مێ‌ بولونی بۆ تایبه‌تمه‌ندی و زانستێن مرۆڤایه‌تی نه‌یێ‌ گونجای بیت چونكه‌ ژێده‌رێن كوردی نینن و دڤێت زمانێ‌ عه‌ره‌بی گه‌له‌كێ‌ باش بیت چونكه‌ پتریا ژێده‌رێن دهێنه‌ بكارئینان ل په‌رتووكخانا زمانێ‌ عه‌ره‌بی نه‌ و قوتابی ژی بزمانێ‌ عه‌ره‌بی گه‌له‌ك لاوازن.

هێشتا گۆت: ل دووڤ سیسته‌مێ‌ پولونا دێ‌ قوتابی ب حه‌زا خوه‌ بابه‌تان بخوه‌ هه‌لبژێریت و دیسا ل وه‌لاتێن پێشكه‌فتی هه‌ر سمسته‌ره‌كی دێ‌ قوتابیێن نوو وه‌رگری، ل دووڤ ڤێ‌ ئاریشا نوكه‌ یا قوتابیێن پو دوازدێ‌ بیت تو دشێی قوتابیێن خوه‌ بكه‌یه‌ دو سمسته‌ر بهێنه‌ وه‌رگرتن و دیسا خواندنا مه‌ ل كوردستانێ‌ چار سالن به‌لكو ل وه‌لاتێن ئه‌ورۆپا خواندن سێ‌ سالن به‌لكو ل كوردستانێ‌ باوه‌رناما ئه‌كادیمی هه‌یه‌  به‌لكو ئه‌وان باوه‌رناما پیشه‌ی هه‌یه‌  و دیسا ل دووڤ وی سیسته‌می قوتابی ماف هه‌یه‌ سه‌ردانا كولیژان بكه‌ت و ماوه‌كی ته‌ماشه‌ی بابه‌ ت و پرۆگرامێن خواندنێ‌ بكه‌ت و دووڤ دا بخوه‌ هه‌لبژێریت، ل كوردستانێ‌ هێشتا سیسته‌م مه‌كه‌زی یه‌ و گه‌له‌ك قوتابی ل كولیژه‌كێ‌ یان پشكه‌كێ‌ دهێنه‌ وه‌رگرتن و نه‌ لدووڤ ڤیان و حه‌زا وی بوویه‌ و هه‌ر چ پێزانین ل سه‌ر وێ‌ پشكێ‌ نینن و گه‌له‌ك جوداهی هه‌یه‌ دناڤبه‌را ژینگه‌ها كوردستانێ‌ و ژینگه‌ها وه‌لاتێن ئه‌ورۆپادا.

د. ردوان ئه‌و ژی گۆت: دێ‌ باشتر بیت زانكۆیێن كوردستانێ‌ سیسته‌مێ‌ كورساتا هه‌بیت و به‌رده‌وامیێ‌ بده‌نێ‌ و هه‌مان ده‌م گوهورینا ل ئه‌وی سیسته‌می بكه‌ن و ئه‌ڤ سیسته‌مه‌ زێده‌تر گونجای تره‌ ل زانكۆیێن كوردستانێ‌  و گه‌له‌ك جاران سیسته‌مێ‌ خواندنێ‌ هاته‌ گوهورین و نوكه‌ وه‌زاره‌تێ‌ كریه‌ بریار هه‌ر پشكه‌كا ڤه‌بیت دڤێت سیسته‌مێ‌ پولونا بیت و نابیت ژ سیسته‌مێن دی بهێنه‌ خواندن.

هه‌ولێر، قائید میرۆ

بڕیاره‌ كۆنفڕانسه‌ك لدۆر ئاریشه‌یێن كه‌رتێ په‌روه‌ردێ بهێته‌ ئه‌نجامدان و شاره‌زایه‌كا كه‌رتێ په‌روه‌ردێ ژی ئاشكراكر، سیسته‌مێ لاوازێ په‌روه‌ردێ بۆیه‌ ئه‌گه‌رێ لاوازبوون و داكه‌تنا ئاستێ زانستی و په‌روه‌ردێ هه‌روه‌سا دبێژیت، پێدڤیه‌ سیسته‌مه‌كێ پێشكه‌فتیێ كوردی بۆ په‌روه‌ردێ بهێته‌ دارشتن.

ره‌هێل دزه‌یی، شاره‌زا ل كه‌رتێ په‌روه‌ردێ بۆ رۆژناما ئه‌ڤرۆ دیاركر” كه‌رتێ په‌روه‌ردێ لهه‌رێما كوردستانێ ب سیسته‌مه‌كێ كلاسیك تێته‌ بجه ئینان و دگه‌ل جیهانا ئه‌ڤرۆ ناگونجیت، له‌وڕا پێدڤیه‌ كار بهێته‌كرن بۆ ڤێ چه‌ندێ سیسته‌مێ په‌روه‌ردێ بهێته‌ گۆهڕین بۆ سیسته‌مه‌كێ پێشكه‌فتیێ كوردی و دگه‌ل سه‌رده‌مێ پێشكه‌فتنا جیهانێ بگونجیت، به‌رۆڤاژی به‌رده‌وامبوون لسه‌ر سیسته‌مێ نوكه‌ دێ بیته‌ ئه‌گه‌رێ لاوازبوونا زێده‌تر یا كه‌رتێ په‌روه‌ردێ و پاشڤه‌چوونا ئاستێ زانستی و په‌روه‌رده‌یی ل هه‌رێما كوردستانێ، چونكه‌ ئه‌و سیسته‌مێ نوكه‌ هه‌ی ل قوتابخانان تێته‌ خواندن سیسته‌مه‌كێ زۆر لاوازه‌ و نه‌شێت قوتابی ئاڤا بكه‌ت بۆ پاشه‌ڕۆژێ ل جیهانا پێشكه‌فتی چو سیسته‌مه‌كێ وه‌ك هه‌رێما كوردستانێ نه‌مایه‌ و پێدڤیه‌ كار بۆ ڤێ چه‌ندێ بهێته‌كرن مینا وه‌لاتێن پێشكه‌فتی په‌روه‌رده‌ ببیته‌ جهێ گرنگیا حوكمه‌تێ و جڤاكی، ئه‌ڤێ چه‌ندێ ژی پێدڤی ب مه‌زاختنا بودجه‌یه‌كێ زۆر هه‌یه‌، چونكه‌ سیسته‌مێ پێشكه‌فتی دا دڤێت 20 قوتابی زێده‌تر ل ناڤا پۆلێ نه‌بن و دوو مامۆستاژی ئه‌ڤێ پۆلێ بڕێڤه‌ببه‌ن، هه‌تا ژبلی مامۆستای هاریكارێ مامۆستای ژی هه‌بیت ل هه‌موو پۆله‌كێ، هه‌روه‌سا ئامیرێن پێشكه‌فتی و ئاڤاهیێن پێشكه‌فتی بهێنه‌ دابینكرن بۆ قوتابخانان، نه‌ك دو ده‌وام و سێ ده‌وام ل ئێك ئاڤاهیێ بێسه‌رۆ به‌ر بهێته‌ كرن.

ره‌هێل دزه‌یی ئاماژه‌كر” ل وه‌لاتێن پێشكه‌فتی قوتابخانان ئه‌هلی نینه‌ و نابیت خواندن ل هه‌رێما كوردستانێ ببیته‌ پاره‌ و ژلایێ كه‌رتێ تایبه‌ت بهێته‌ رێڤه‌برن، ژبه‌ركو كه‌رتێ تایبه‌ت نه‌شێت قوتابخانێ بڕێڤه‌ببه‌ت و مه‌ره‌م تنێ وه‌رگرتنا پاره‌ و مفایه‌، ئه‌ز ل وه‌لاتێ نه‌رویج مامۆستا بووینه‌ و مووچێ مامۆستای ل وه‌لاته‌كێ وه‌كی نه‌رویج پێنج هزار دۆلارن و تنێ ئێك قوتابخانا تایبه‌ت هاتیه‌ ڤه‌كرن ئه‌وژی جوداهی نینه‌ دگه‌ل قوتابخانێن حوكمه‌تێ، ئه‌م هژماره‌ك كه‌سێن شاره‌زا و بسپۆر نوكه‌ كار دكه‌ین بۆ ئه‌نجامدانا كۆنفڕانسه‌كێ په‌روه‌ده‌یی لهه‌رێما كوردستانێ دگه‌ل په‌رله‌مان و لایه‌نێن په‌یوه‌ندیدار كار دكه‌ین بۆ گێڕانا كۆنفڕانسێ په‌روه‌رده‌یی، كو تێدا دێ كار بۆ دارشتنا سیسته‌مه‌كێ نوویێ په‌روه‌ردێ هێته‌كرن و سیسته‌مێ نوكه‌ دێ هێته‌ گۆهڕین، بێگومان هاریكاری هه‌بن دێ سیسته‌مێ په‌روه‌ردێ بهێته‌ گۆهڕین و سیسته‌مه‌كێ پێشكه‌فتی دێ هێته‌ دانان، بتایبه‌تی ڤان سالێن دوماهیێ ئاستێ په‌روه‌ردێ و خواندنێ زۆر داكه‌تیه‌ لهه‌رێما كوردستانێ و دڤێت له‌زێ بهێته‌كرن بۆ گۆهڕینا كه‌رتێ په‌روه‌ردێ و بجه ئینانا پلانه‌كا نوو، هنده‌ك وانه‌ هه‌نه‌ ل ده‌رڤه‌ هاتینه‌ وه‌رگرتن و تنێ هاتینه‌ كۆپی كرن بێی به‌رچاف گرتنا ره‌وشا هه‌رێما كوردستانێ.

دیدار، نیوار محه‌مه‌دسه‌لیم:

ئه‌ندازیار، شێرزاد قادر مه‌حمود، رێڤه‌به‌رێ‌ گشتی یێ‌ رێك و پرا و ئاڤه‌ندانكرن و بنه‌جهكرنێ‌ ل پارێزگه‌ها دهۆكێ‌ د دیداره‌كێ‌ دا بۆ رۆژناما ئه‌ڤرۆ دیاركر كو كو چه‌ندین پرۆژێن وان نها د قووناغێن دیزان و راگه‌هاندنێ‌ دانه‌ و بۆ وه‌زرێ‌ زڤستانێ‌ ژی كاره‌كێ‌ باش هاتیه‌ كرن و نها ده‌ست ب چێكرنا رێیێن گوندان ژی هاتیه‌ كرن، به‌لێ‌ هێژ كار ل دووڤ یا پێدڤی نه‌هاتیه‌ كرن و ل ماوێ‌ بهێت دێ‌ كار باشتر یێ‌ دیار بیت و گۆت: “ئاخا چه‌پێن زریزه‌ یا خاڤه‌ و خوه‌ ناگریت باشترین چاره‌سه‌ری ئه‌وه‌ رێیه‌كا پێگوهۆڕ بۆ بهێته‌ چێكرن”.

ئه‌ڤرۆ: به‌رچاڤترین پرۆژێن هه‌وه‌ یێن 2021ێ‌ چ بوون؟

ئه‌ندازیار شێرزاد قادر: ل سالا 2021ێ‌ رێڤه‌به‌ریا گشتی یا رێك و پرا ئاڤه‌دانكرن و بنه‌جهكرنێ‌ ل پارێزگه‌ها دهۆكێ‌ ب پشته‌ڤانیا كابینا نه‌هێ‌ یا حوكمه‌تا هه‌رێما كوردستانێ‌ چه‌ندین پرۆژێن رێیێن سه‌ره‌كی ب رێژاهیا 62.5كم و ب گۆژمێ‌ 105 ملیار و 804 ملیۆن و 535 هزار دیناران پرۆژێن خزمه‌تگۆزاری ل سنورێ‌ پارێزگه‌ها دهۆكێ‌ بۆ وه‌لاتیان ئه‌نجام داینه‌ ژ وان: چێكرنا رێیا ئاكرێ‌ – قه‌ندیل ل گه‌ل سه‌خبێركرنا سایدێ‌ كه‌ڤنێ‌ قووناغا ئێكێ‌. چێكرنا رێیا ئاكرێ‌ – قه‌ندیل ل گه‌ل سه‌خبێركرنا سایدێ‌ كه‌ڤنێ‌ قووناغا دویێ‌. چێكرنا رێیا ئیبراهیم خه‌لیل – دێره‌بوون – سحێلا. چێكرنا سایدێ‌ دویێ‌ یێ‌ رێیا سه‌ره‌كی دهۆك – هه‌ولێر پارچا چره‌ – رۆڤیا – به‌رده‌ره‌ش. هه‌روه‌سا پرۆژێ‌ چێكرنا ئه‌نده‌رپاسا سێمێلێ‌. پرۆژێ‌ چێكرنا ئه‌نده‌رپاسا نیوزاخۆ.

ژ لایه‌كێ‌ دی ڤه‌ رێڤه‌به‌را گشتی یا رێك و پرا و ئاڤه‌دانكرن و بنه‌جهكرنێ‌ رێیێن چه‌ندین گوندا یێن لاوه‌كی ب درێژاهیا 192 كیلۆمه‌تران و ب گۆژمێ‌ 45 ملیار و 708 ملیۆن و 176 هزار دیناران خزمه‌تێن جودا بۆ نێزیكی 83 گۆندان ئه‌نجام داینه‌.

ئه‌ڤرۆ: به‌رچاڤترین پلانێن هه‌وه‌ یێن داهاتی چنه‌؟

ئه‌ندازیار شێرزاد قادر: نها چه‌ندین پرۆژه‌ ل به‌ر ده‌ستێ‌ مه‌ هه‌نه‌ وه‌كو دیزاین كار ل سه‌ر دكه‌ین بۆ جۆتسایدكرنا هنده‌ك رێیێن گرنگ ل ده‌ڤه‌رێ‌ ب تایبه‌ت هنده‌ك ده‌ڤه‌رێن گه‌شتیاری یێن هه‌ین و ل هنده‌ك ده‌مێن سالێ‌ ل وان جهان گه‌له‌ك دبوو قه‌ره‌بالغ، هه‌ر چه‌نده‌ د پلانێن پێشتر دا، بڕیار بوو هه‌موو رێیێن سه‌ره‌كی ببنه‌ جۆتساید، به‌لێ‌ ژ به‌ر شه‌رێ‌ داعش و قه‌یرانا دارایی هاتنه‌ راوه‌ستاندن. مه‌ هنده‌ك دیزاین یێن داخواز كرین وه‌كو رێیا سوواره‌تووكا بۆ شێلادزێ‌ ئه‌و یێ‌ ڤه‌كۆلینا ل سه‌ر دكه‌ین ژ لایێ‌ ئاخێ‌ و باران و بایولۆژی و توبۆگرافی، گه‌له‌ك ئاریشه‌ یێن د وێرێ‌ دا هه‌ین وه‌كو باران و پر و رووبار.

ل زرێزه‌ ئاریشه‌ یا سالانه‌یه‌، ژ به‌ر كو رێیه‌كا له‌شكری بوو و ل سه‌ر ده‌مێ‌ رژێمێ‌ بۆ مه‌ره‌مێن له‌شكری هاتبوو چێكرن، سالانه‌ دهێته‌ نووژه‌نكرن و هه‌ر ژ ناڤ دچیته‌ ڤه‌، مه‌ ژی بۆ مه‌ره‌ما چاره‌سه‌ریا ڤێ‌ كێشێ‌ ب رێیا ڤه‌كۆلینه‌كێ‌ هنده‌ك بژارده‌ یێن داناینه‌ به‌ر سینگێ‌ وه‌زاره‌تا خوه‌، ئه‌و ژی ئه‌ون یان چاره‌سه‌ریا وێ‌ رێ‌ ب ره‌نگه‌كێ‌ هه‌رده‌می بهێته‌ كرن و هه‌تا كووراتیا 30 مه‌تران مه‌ كوور كریه‌، به‌لێ‌ ئاخا وێ‌ نه‌یا بنه‌جهه‌ و خوه‌ ناگریت و مه‌ وه‌زاره‌ت ل سه‌ر ڤێ‌ چه‌ندێ‌ ئاگه‌هدار ژی كریه‌. هه‌لبژارده‌كا دی ل به‌ر مه‌ ئه‌وه‌ كو رێیه‌كا پێگوهۆڕ دروست بكه‌ین و هنده‌ك گۆندێن دی ژی پێڤه‌ گرێده‌ین كو پتر داخوازی ل سه‌ر ڤێ‌ هه‌یه‌. دیسا هه‌لبژاردا تۆنێلێ‌ ژی یا ل به‌ر ده‌ست و دبیت ئه‌و ژ هه‌موویان گۆنجیای تر بیت، به‌لێ‌ تێچوویێ‌ وێ‌ گه‌له‌كه‌.

جادده‌كا گه‌له‌ك كه‌ڤن ژی یا ل دینارته‌ هه‌یی و بزاڤ یێن دهێنه‌ كرن ڤه‌كۆلینه‌ك ل سه‌ر وێ‌ جاددێ‌ ژی بهێته‌ دروستكرن، ژ به‌ر كو ده‌ڤه‌ر یا به‌رفره‌ه بوویی و پێدڤی ب به‌رفره‌هكرنێ‌ یه‌ و رووبه‌رێ‌ وێ‌ حه‌فت كیلۆمه‌ترن.

ل ئالۆكا ژی بۆچوونه‌ك مه‌ یا هه‌یی ژ به‌ر كو ناڤبه‌را وێ‌ و فایدیێ‌ رێژا وه‌لاتیان یا زێده‌ بوویی، یان سایده‌كی زێده‌ كه‌ین، یان ژی وێ‌ بۆ خه‌لكێ‌ وێ‌ ده‌ڤه‌رێ‌ بهێلین وه‌كو جادده‌كا خزمه‌تگۆزاری و جادده‌كا پێگوهۆڕ بۆ هاتنوچوونا گشتی دروست بكه‌ین.

ل زاویته‌ ژی بۆچوونه‌ك یا هه‌یی كو تۆنێله‌ك بهێته‌ دروستكرن كو پازده‌ ملیار دینار دبیت تێچوویێ‌ وێ‌ بیت. ل به‌رده‌ره‌ش و كه‌له‌كچی ژ به‌ر كو رێیه‌كا نێڤده‌وله‌تی یه‌ ئێدی جادده‌، خوه‌ ل به‌ر وێ‌ قه‌ره‌بالغێ‌ ناگریت و مه‌ پێشنیاز كریه‌ جادده‌كا نوو بۆ هاتنوچوونێ‌ بهێته‌ چێكرن و ئه‌ڤێ‌ پێشتر وه‌كو جادده‌كا خزمه‌تگۆزاری بۆ وه‌لاتیان بیت.

دیزانه‌ك ژی هاتیه‌ راگه‌هاندن كو ل دووریانا شێخان هه‌تا رۆڤیا كو سایده‌ك یێ‌ دروسته‌ و چو ئاریشه‌ نینن، به‌لێ‌ سایدێ‌ دی پێدڤی به‌رفره‌هكرنێ‌ یه‌ چونكو ب سه‌خبێریێ‌ چاره‌ نابیت و هندی دهێته‌ سه‌خبێركرن هه‌ر وه‌كو به‌رێ‌ لێ‌ دهێته‌ ڤه‌. ئه‌ڤه‌ د قووناغا راگه‌هاندنێ‌ دایه‌، به‌لێ‌ یێن پێشتر هه‌موو هێشتا یێ‌ د قووناغا دیزاینێ‌ دا.

ئه‌ڤرۆ: پێشتر دهاته‌ گۆتن كو دێ‌ رێیه‌كا ب له‌ز رێیا ناڤبه‌را دهۆك و هه‌ولێر گه‌له‌ك كورت كه‌ت، ئه‌ڤ بابه‌ته‌ گه‌هشته‌ كیڤه‌؟

ئه‌ندازیار شێرزاد قادر: ئه‌ڤ پرۆژه‌ یێ‌ سالا 2012ێ‌ بوو، نه‌خشه‌یێ‌ وێ‌ یێ‌ هاتیه‌ وه‌رگرتن و ل جڤاتا وه‌زیرانه‌ و چو ئاریشه‌ ل سه‌ر نینه‌ و جهێ‌ وی ژی یێ‌ دروسته‌، به‌لێ‌ پلانا حوكمه‌تێ‌ یه‌ جارێ‌ مه‌ دڤێت ئه‌و رێیێن مه‌ هه‌ین باشتر لێ‌ بكه‌ین و ئه‌ڤێن نه‌بووینه‌ دو ساید بكه‌ینه‌ دو ساید ژنوو ده‌ست ب چێكرنا جاددا ب له‌ز بهێته‌ كرن.

ئه‌ڤرۆ: هوون پێشبینی دكه‌ین هه‌تا كه‌نگی جاددێن دهۆكێ‌ هه‌موو ببنه‌ جوتساید؟

ئه‌ندازیار شێرزاد قادر: هه‌كه‌ بودجه‌ هه‌بیت، دبیت د چار هه‌تا پێنج سالان دا، هه‌موو جادده‌ ببنه‌ جوتساید، به‌لێ‌ هه‌كه‌ ب ڤێ‌ ره‌وشێ‌ بیت چو تشتێ‌ پشت راست نینه‌.

ئه‌ڤرۆ: ئه‌م یێ‌ به‌ر ب وه‌رزێ‌ زڤستانێ‌ دچین، به‌فر و باران و ب تایبه‌ت ژی به‌فر گه‌له‌ك جاران رێیان دگریت، هه‌وه‌ كو رێڤه‌به‌ریا گشتی یا رێك و پرا چو پلان هه‌نه‌ وه‌كو ئاماده‌كاری بۆ ڤێ‌ ره‌وشێ‌؟

ئه‌ندازیار شێرزاد قادر: مه‌ رێڤه‌به‌ریا سه‌خبێركرنا رێك و پرا ئاگه‌هدار كرینه‌ و وان ب خوه‌ ژی به‌رهه‌ڤی كرینه‌ و به‌رده‌وام ژی د كاری دا، نها رێیا پاقژ دكه‌ن و سه‌ر رێیان و وان هه‌موو ئه‌گه‌رێن دبنه‌ ئه‌گه‌رێ‌ له‌هیان. وه‌كو ملێن رێ‌ و جوك و سولینان.

ئه‌ڤرۆ: بۆ وه‌رزێ‌ زڤستانێ‌ ئامیرێن پێدڤی هه‌نه‌؟

ئه‌ندازیار شێرزاد قادر: هندی جادده‌ زێده‌ دبن، پێدڤیا مه‌ ب ئامیران زێده‌تر لێ‌ دهێت، هه‌تا راده‌كی ئامیر یێن هه‌ین، به‌لێ‌ بۆ ده‌ڤه‌را ئامێدیێ‌ و رامالینا به‌فرێ‌ مه‌ هنده‌ك ئامیره‌ داخواز كرینه‌. گه‌شتیار ژی هنده‌ك جاران گازندان بۆ مه‌ دروست دكه‌ن كو به‌ری تیمێن مه‌ بگه‌هنه‌ وێرێ‌ ئه‌و دچنه‌ وێرێ‌.

ئه‌ڤرۆ: بۆ تۆنێلان هه‌وه‌ چ پلان ل به‌ر هه‌نه‌؟

ئه‌ندازیار شێرزاد قادر: دیزاینا تۆنێلا مه‌تین یا دپلانێ‌ دا و ئێك ژ تۆنێلێن گه‌له‌ك گرنگه‌ بۆ ده‌رگه‌هێ سنوری یێ سه‌رزێری كو رێیا بامه‌رنێ‌ و سه‌رزێری پێكڤه‌ گرێدده‌ت، به‌لێ‌ ژ به‌ر كو تێچوویێ‌ وێ‌ گه‌له‌ك نها كار ل سه‌ر ناهێته‌ كرن. دیسا ل چیایێ‌ پیرسی ژی بۆچوونه‌ك هه‌یه‌ كو تۆنێله‌ك ل وێرێ‌ بهێته‌ چێكرن، به‌لێ‌ هێژ چو بڕیار نینن ژ به‌ر تێچوویێ‌ وان یێ‌ زۆر. ئه‌م وه‌كو رێڤه‌به‌ریا رێك و پرا پتر گرنگیێ‌ دده‌ینه‌ تۆنێلا چیایێ‌ مه‌تینی هه‌ر بۆ گه‌شتوگۆزارێ‌ و نێزیكیا رێ‌ و رزگاربوون ژ به‌فرا چیایێ‌ مه‌تینی و گه‌له‌ك ئاریشێن دی، دێ‌ یا باش بیت.

ئه‌ڤرۆ: ئه‌و چو فاكته‌رن كارتێكرنێ‌ ل خراب بوونا جاددان دكه‌ت؟

ئه‌ندازیار شێرزاد قادر: ب ره‌نگه‌كێ‌ گشتی جاددێن مه‌ خوه‌ ل به‌ر وێ‌ رێژا زۆر یا هاتنوچوونا ترۆمبێلان ل سه‌ر ناگرن، مه‌ وه‌كو خه‌لكێ‌ هه‌رێما كوردستانێ‌ ب گشتی ژی چو رێیێن هاتنوچوونا پێگوهۆڕ نینن، بۆ نمۆنه‌ هه‌كه‌ ل دهۆكێ‌ یان ژی هه‌رێما كوردستانێ‌ ژێده‌ره‌كێ‌ دی یێ‌ هاتنوچوونێ‌ ژبلی ترۆمبێلێ‌ هه‌بایه‌ دبیت ره‌وشا جاددا باشتر بایه‌، ل گه‌ل هندێ‌ ژی پێشبینی دكه‌ین هه‌كه‌ هێلا شه‌مه‌نده‌فرێ‌ بهێته‌ چێكرن، قه‌ره‌بالغ هه‌تا راده‌كی ل سه‌ر جاددان كێم ببیت.

ئه‌ڤ ئاریشه‌ ل پارێزگه‌ها دهۆكێ‌ گه‌له‌ك به‌رچاڤتر دهێته‌ دیتن ژ به‌ر كو ده‌رگه‌هێ‌ ئیبراهیم خه‌لیل یێ‌ نێڤده‌وله‌تی و گرنگ ل گه‌ل توركیا یێ‌ لێ‌، ترۆمبێل ژ دهۆكێ‌ دچنه‌ هه‌موو عیراقێ‌ و جاره‌كا دژی ژ هه‌موو عیراقێ‌ هه‌ر دهێن و ل دهۆكێ‌ ده‌رباز دبن.

ئه‌ڤرۆ: هه‌كه‌ ل دووماهیێ‌ ته‌ بڤێت تشته‌كی بێژی؟

ئه‌ندازیار شێرزاد قادر: ئه‌ڤ ساله‌ مه‌ گه‌له‌ك بزاڤ كرن رێیا سه‌خبێر كه‌ین و ته‌سان نه‌هێلین، رێیێن گوندان ژی چێكه‌ین، به‌لێ‌ كارێ‌ مه‌ هێش گه‌له‌ك به‌رچاڤ نه‌بوویه‌ و ل دووڤ داخوازیا وان نینه‌، چونكو چه‌ندین سال بوو كار یێ‌ راوه‌ستیایی، ژ نوو مه‌ دووباره‌ یێ‌ ده‌ست پێ كری و دێ‌ د به‌رده‌وام بین و ب ئانه‌یا خودێ‌ دێ‌ د ماوێ‌ بهێت دا كارێن باشتر هێنه‌ كرن.