، هەرهین محەمەد:

پێشمەرگە و مافپەروەر راستی عەبدولعەزیز دۆسكی، بەربژارێ‌ هەژمار (20) لیستا (190) یا پارتی دیموكراتی كوردستان ل بازنێ دهۆكێ‌ ل دۆر بەربژاركرنا خۆ بۆ پەرلەمانێ‌ كوردستانێ‌ گۆت: وەكو ئەز پێشمەگە دێ‌ بەرگریێ‌ ژماف و ئەرك و بەرژەوەندیێن پێشمەرگەیێن قارەمان كەم، وەكو د پەیرەوێ‌ پارتی دیموكراتی كوردستان دا هاتی كو ژ چاردە خالان پیكهاتیە و خالا پێنجێ‌ بەحسێ‌ پێشمەرگە و شەهیدان و ئەنفالكریان دكەت و ئەز بخوە ژی وەكو پێشمەرگەیەك هەكە چوومە پەرلەمانی دێ‌ بەرگریێ‌ ژ شەهید و ئەنفالكریان و خێزانێن وان كەم و هەردیسان وەكو كورێ‌ جۆتیارەكی مە و ل باگێرا ژیایمە و من كارێ‌ جۆتیاریێ‌ یێ‌ كری و سێ‌ سالان پشكداری فەستیڤالا تری و هنگڤینی بوویمە ئەوا هاتیە رێكخستن ژ لایێ‌ رێڤەبەریا گشتی یا چاندنێ‌ ل دهۆكێ‌ و هاتیمە هەلبژارتن ژی ژ چار جۆتیارێن نموونە و هاتیمە خەلات كرن ژلایێ‌ رێڤەبەریا چاندنێ‌ ڤە و هەردیسان پەرلەمانێ‌ كوردستانێ‌ ژی و ژبەركو ئەز جۆتیارم ل پەرلەمانێ‌ كوردستانێ‌ دێ‌ خوە ل ئەوان كێشەو ئاریشەیان كەمە خودان یێن كو دكەڤنە د رێیا جۆتیاران دا.
بەربژارێ‌ پارتی دیموكراتی كوردستان زێدەتر گۆت: من ئەو سۆز دایە ئەوان كەسان یێن دەنگێ‌ خوە ددەنە من كا چاوا من ب تڤەنگا خوە بەرگری ژ ئاخ و كەرامەتا كوردان كریە وەسا ل پەرلەمانێ‌ كوردستانێ‌ ژی بەرگریێ‌ ژ هەموو مافێن وان بكەم و هەكە دەركەفتم و چوومە پەرلەمانی دێ‌ هەر كارێ پێشمەرگایەتیێ و جۆتیاریێ‌ ژی ل گەل كەم و نەشێم وان زەڤی و زاران بهێلم ئەوێن باب و باپیرێن مە ب خوها ئەنیا خوە هەردەم شین دكرن.

رەمەزان زەكەریا

جابر مەلا محەمەد ئەمین بەربژارێ هەژمار 12 ل سەر لیستا ژمارە 190 یا پارتی دیموكراتی كوردستان بۆ خولا شەشێ یا پەرلەمانێ كوردستانێ بازنەیێ دهۆكێ‌ بەرنامەیێ كارێ خۆ ئاشكراكر و گۆت : ب پرۆژەیێن گرنگ ب هەڤكاریا لایەنێن پەیوەندیدار دێ بزاڤا بۆ پێشڤەبرنا بیاڤێ گەشتیاری كەم .
بەربژار جابر مەلا محەمەد ئەمین د دیدارەكێ دا بۆ رۆژناما ئەڤرۆ گۆت: ل دەمێ ب دەستڤەئینانا باوەریا خەلكێ خۆ بۆ گەهشتن ب پەرلەمانێ كوردستانێ، وەك كاندیدێ پارتی دیموكراتی كوردستان ل چارچۆڤێ بەرنامە و درووشمێ (ئارامی و ئاڤەدانی و پێكڤەیی و خۆڕاگری) دا دێ ب روحیەتا پێشمەرگەیانە خەباتێ كەم و دەنگێ دەڤەرێ گەهینم.
ناڤبری گۆت ژی: گەنج سامانێ گرنگێ وەلاتێ مەنە، مە پلان هەیە كو گەنج ب بنە میحوەرێ كارێ مە د پەرلەمانی دا، پلانا مەیە كو كار بكەین بۆ كێمكرنا رێژەیا بێكاریێ د ناڤ گەنجان دا.
ناڤهاتی گۆت : پارێزگەها دهۆكێ و دەوروبەرێن وێ خودانێ جهێن گەشتیاری و شوونەواری یێن گرنگن‌، ب پرۆژەیێن گرنگ ب هەڤكاریا لایەنێن پەیوەندیدار دێ بزاڤا وێ چەندێ كەین دهۆك و قەزا و ناحیێن وێ پتر پشتەڤانیا حكومەتێ ب دەست بینن بۆ پێشڤەبرنا بیاڤێ گەشتیاری.
خویا ژی كر كو دەڤەرا مە د بیاڤێ چاندنێ دا پێگەهەكێ‌ مەزن هەیە و ژیانا هەژمارەكا زۆر ژ خەلكێ مە ل سەر چاندنێ یە، دێ ب پرۆژەیێن گرنگ و ستراتیژی پێشكێشكەین و دەنگەكێ بلند بین بۆ داخوازیێن جۆتیاران.
ناڤهاتی ئاشكرا كر كو خەلكێ پارێزگەها دهۆكێ هەردەم ل پێش بوویە بۆ خۆگوریكرنێ بۆ ئازادیا وەلاتی، بەرنامە مە هەیە كو پشتەڤانێ سەرەكی بین بۆ داخوازیێن بنەمالێن شەهید و ئەنفالكری و زیندانیێن سیاسی و پێشمەرگەیان و گۆت : د بیاڤێ پەروەردە و ساخلەمیێ دا دێ بزاڤا وێ چەندێ كەین كو دەنگێ زیندی و بلندێ خەلكێ خۆ بین ل هۆلا پەرلەمانی ب پێشكێشكرنا پرۆژەیان بۆ پێشڤەبرنا بیاڤێ پەروەردە و ساخلەمیێ.

دهۆك، لەزگین جوقی:

شریڤ شریڤ موسا، بەربژارێ‌ هەژمار 32 ل سەر لیستا 190 یا پارتی دیموكراتی كوردستان بۆ پەرلەمانێ كوردستانێ دیار كر پارتی بەرنامەیەكێ تژی خزمەت بۆ خەلكێ كوردستانێ هەیە، دەمێ باوەڕیا خەلكێ خۆ ب دەستڤە دئینن دێ كار ل سەر بجهئینانا بەرنامە و پرۆگرامی پارتی كەین دێ درووشمێن لیستا 190 ئێخینە د خزمەتا خەلكی دا و دێ‌ پتر خزمەتكرنا خەلكێ خۆ كەین.
شریڤ شریڤ موسا، دیار كر، ئێك ژ كارێن مە یێن گرنگ ل پەرلەمانی كوردستانێ دێ ئەو بیت بۆ تاخا گەنجان كاربكەین و پتر دەلیڤەیێن كاری بۆ گەنجان پەیدا ببن، چونكو گەنجێن مە خودان هێز و شیانن، ئەم دێ ل پەرلەمانێ كوردستانێ بۆ پتر خزمەتكرنا گەنجان كاركەین.
گۆتژی، ل دەمێ قەیرانان ب تنێ پارتی دیموكراتی كوردستان خۆ ل خەلكی دكەتە خودان و هەر پارتی بوویە قەوارەیێ هەرێما كوردستانێ پاراستی و كار بۆ ب دەستڤەئینانا هەمی مافێن خەلكێ هەرێما كوردستانێ دكەت، لەورا ژی دەنگدان بۆ لیستا 190 دەنگدانە بۆ پتر پاراستن و ب دەستڤەئێناتا مافێن خەلكێ هەرێما كوردستانێ.
هەروەسا شریڤ شریڤ، راگەهاند د وارێن چاندنێ و گەشتوگوزارێ و پەروەردە و ساخلەمیێ دا و رێك وپرا و ئاڤەدانی وكارەب و ئاڤێ دا دێ پتر خزمەتكرنا خەلكێ خۆ كەین هەر كارەكێ گرێدایێ ژیارا خەلكی بیت ئەم دێ كار كەین بۆ خەلكی بهێنە كرن .
شریڤ شریڤ موسا، زێدەتر گۆت، هەر یاسایەكا گرێدایی ژیارا خەلكی و پاراستنا قەوارەیێ هەرێما كوردستانێ و خۆشكرنا ژیارا هەمی تاخ و جینین جڤاكی بیت دێ ل پەرلەمانێ كوردستانێ كار ل سەر كەین و دێ بینە بەڕەڤانەكێ سەر سەختێ پاراستنا بەرژەوەندیێن خەلكێ خۆ دێ بۆ دب ەستڤەئینانا پتریا مافێن وەلاتیان كار كەین و داخوازێ ژ هەمی دەنگدەران دكەین ل رۆژا 20/10/2024ێ بچنە سەر سندۆقێن دەنگدانێ و لیستا خەبات و پێشمەرگەی لیستا 190 هەلبژێرن.

سالار محەمەد دۆسكی:

مەلا حسێن كواشی، بەربژارێ‌ لیستا (190) هەژمار (17) بۆ ئەڤرۆ گۆت: هەلبژارتن باشترین دەلیڤەیە بۆ خەلكی وی كەسی هەلبژێرن ئەوێ‌ خزمەتا مللەتێ‌ كورد دكەت و كار بۆ پاراستنا ئاخ و ئاڤا هەرێما كوردستانێ‌ بكەت و پاراستنا رەوشت و تیتالێن كوردستانێ‌ و مرۆڤێ‌ ئازادە و گرنگە مرۆڤ وژدانا خوە ئارام بكەت و رۆژا قیامەتێ‌ دێ‌ پرسیار ژ مرۆڤی هێتەكرن كا تە دەنگێ‌ خوە دایە چ لیستە و چ مرۆڤی.
مەلا حسێن كواشی، بەربژارێ‌ پارتی دیموكراتی كوردستان ئەو ژی گۆت: قوتابی تەخەكا گرنگا جڤاكێ‌ كوردستانێ‌ نە و گرنگە بچنە سەر سندوقێن دەنگدانێ‌ و دەنگ بۆ پاشەرۆژا كوردستانێ‌ بدەن و تایبەت شەشێ‌ ئامادەیی و پەیمانگەه و زانكۆیا و ئەڤێن دەرچووین و ب چاڤەكێ‌ گەشبین تەماشە بكەن و قەستا سندۆقێن دەنگدانێ‌ بكەن.
ناڤبری ئاماژە كر كو د ناڤا جڤاكێ‌ كوردی دا گەلەك جاران گازندە هەنە و گەلەك جاران گازندا دكەین و گەلەك جاران ماف دهێنە خوارن و هندەك جاران ئەف تشتە من ب چاڤێن خوە دیتی نە، ب ژڤانین كۆمەكا ئاریشە و گازندا ل گەل خوە ببینە پەرلەمانی، پێخمەت بنەجهكرنا ئاشتی و ئازادیێ‌ و چەسپاندنا قانوونێ‌ و زڤڕاندنا مافێ‌ خەلكی بۆ خەلكی و كاركرن بۆ بەرژوەندی یا خەلكێ‌ مە دچوارچووڤەیێ‌ ئاینێ‌ پیرۆزێ‌ ئیسلامێ‌ دا.
هەمان بەربژارێ‌ پارتی دیموكراتی كوردستان ئەو ژی گۆت: لیستا پارتی د مێژوویا خوە دا لیستا مەلا و زانا بوویە هەر د كەڤن دا و شۆڕەشێن كوردان هەر هەمی ب دەستێ‌ شێخ و مەلا و قازیان بووینە و ئەڤە جهێ‌ سەرفەرازی یا هەر پارتیەكی و هەر كوردەكی یە.
بەربژارێ‌ پارتی بەحسێ‌ پرۆگرامێ‌ خوە كر و گۆت: ژ پرۆگرامێن كار ل سەر دكەم هەكە خودێ‌ دەلیڤە دا من و ب دەست ڤە هات، دێ‌ كاركەم بۆ زڤڕاندنا مافێن مامۆستایێن ئاینی و ئەو كەسێن ل مزگەڤتا كار دكەن و دێ‌ كار كەین زێدەتر مامۆستایان ل قوتابخانان سەنگ و قیمەتێ‌ خوە هەبیت، وەك خەلكەكێ‌ گوندێ‌ كواشێ‌ دێ‌ كار كەین ئاف و هەوایێ‌ كوردستانێ‌ ب گشتی و دەڤەرا كواشێ‌ ب تایبەتی بهێتە پاقژكرن.
ناڤبری هێشتا گۆت: د ئەڤان كاودانێن نازك دا و هەمی دەردورێن كوردستانێ‌ نەخۆشی خودێ‌ كەرم ل گەل كوردستانێ‌ كریە هەتا رادەكێ‌ باش وەلاتێ‌ مە یێ‌ پاراستی یە و ل دەڤەرا مە دا پارتی دیموكراتی كوردستان دەستەكێ‌ گرنگ هەبوویە دپاراستن و ئێمناهی یا هەرێما كوردستانێ‌ دا و خوە كریە پەرچان بۆ كوردستانێ‌ و خەباتا پارتی یا بەرنیاسە و دڤێت ئەڤە نەهێتە ژبیركرن.

دیدار: هۆشەنگ تاجر:

چاڤدێرەکێ سیاسی ل کەرکووکێ دیار کر، ئەڤ هەلبژارتنە د رەوشەکا گەلەک تایبەت دا دهێتە کرن و هەموو هێز ژی نها دژبەریا پارتی دکەن، پارتی هێزا هەری مەزن یا کوردستانێ یە، پارتی هێزا سەرەکی یا پاراستنا ناسنامەیا گەلێ کوردستانێ یە.

کاوە ئەحمەد چاڤدێرێ سیاسی ل کەرکووکێ د دیدارەکا تایبەت دا بۆ رۆژنامەیا ئەڤرۆ دیار کر، ئەڤ هەلبژارتنە د رەوشەکا تایبەت دا دهێنە کرن، چونکی رۆژهەلاتا ناڤین بەر ب گوهۆڕێنەکا مەزن ڤە دچیت و بێگومان ئەو یەک دێ کاریگەریا خوە ل سەر هەرێما کوردستانێ ژی هەبیت، جارێ گەلەک یا گرنگە ئەڤ هەلبژارتنە ب رەنگەکێ سەرکەفتیانە بهێنە کرن، چونکی پێدڤیا هەرێما کوردستانێ ب هندێ یا هەی هەلبژارتن بهێنە کرن، بێگومان ئەڤ هەلبژارتنە بۆ چارەنڤیسێ هەرێما کوردستانێ ژی یا گرنگە.
چاڤدێرێ سیاسی ئەو یەک ژی دیار کر، هەر کەس دزانیت پارتی دیموکراتی کوردستان د دەمێ ٧٨ سالێن بۆری دا خزمەتەکا گەلەک مەزن بۆ پاراستنا گەلێ کوردستانێ کریە، پارتی هێزا سەرەکی یا پاراستنا ناسناما گەلێ کوردستانێ یە، پارتی دیموکراتی کوردستان هێزەکا هەری مەزن و کاریگەرە کو شیایە هەرێما کوردستانێ ل هەمبەر ئێرشێن بەغدا و هێزێن دی بپارێزیت، ژ بەر ڤێ یەکێ ژی پارتی خوەدانا جەماوەرەکێ گەلەک مەزنە و د هەمان دەمی دا هەم ل هەرێما کوردستانێ و بەغدا و هەم ژی ل دەڤەرێ گەلەک هێز دژبەریا پارتی دیموکراتی کوردستان دکەن و گۆت: (هەبوونا سەرۆک بارزانی و سەرۆکێ هەرێمێ و سەرۆکێ حوکمەتێ د رەوشا نها دا بۆ هەموو کوردان گەلەک گرنگە، پارتی دیموکراتی کوردستان سەلماندیە هەر جهەکێ ئەو لێ بیت ل وێرێ ئارامی هەیە، ئاڤەدانی هەیە و پێشکەفتن هەیە، ژ بەر ڤێ یەکێ ژی نها گەلەک هێز دژبەریا پارتی دکەن، چونکی وان نەڤێت هەرێما کوردستانێ د بیاڤێ ئابووری، سیاسی و جڤاکی دا پێشکەڤیت، پارتی هەردەم ل هەمبەر پیلانێ دوژمنان بۆ پاراستنا کوردستانێ یا خوراگر بوویە و ئەنجامێن وێ ژی ئەڤرۆکە پتر دیارن کا د چەند سالێن بۆری دا پارتی چەند خزمەتا ئاڤەدانی و پێشڤەبرنا کوردستانێ کریە).
کاوە ئەحمەد د دووماهیا ئاخڤتنا خوە دا ئەو یەک ژی دیار کر، دڤێت هێزێن سیاسی ڤێ باش بزانن پارتی مالا مەزنە، هەروەسا خۆلا نوو یا پەرلەمانێ کوردستانێ ژی گەلەک گرنگە و دێ هەموو هێزێن سیاسی دیسان ل ژێر چەترێ پەرلەمانی کۆمبن، چونکی نها خەلکێ هەرێما کوردستانێ ئاڤەدانی و ژیانەکا خوەش دڤێت، ژ بۆ ڤێ یەکێ ژی گرنگە هەموو هێزێن سیاسی پشتی هەلبژارتنان پێکڤە بۆ پاشەرۆژەکا گەش کار بکەن، بێگومان سەرکەفتنا پارتی دیموکراتی کوردستان د ڤان هەلبژارتنان دا گەلەک گرنگە، چونکی پارتی سەلماندیە د تەنگاڤیان و زەحمەتیان دا وێ خزمەتا کوردستانێ یا کری و هەروەسا دەرگەهێ پارتی هەردەم بۆ ئالیێن دی ڤەکرینە دا پێکڤە کار بۆ خزمەتا کوردستانێ بکەن.