مامۆستایەکێ زانکۆیێ ل ئەمریکا دیار کر، رۆژهەلاتاڤین بەر ب گوهۆڕینەکا نوو ڤە دچیت ئانکۆ ئەم د تێگەهێ زانستێن سیاسی دا دبێژینێ سیستەمێ نوو، بێگومان دڤێت کوردان د سیستەمێ نوو دا پێگەهەکێ خوە یێ بهێز هەبیت و ژ بەر ڤێ یەکێ ژی گرنگە د ڤان هەلبژارتنان دا پارتی بهێزتر بیت.
د. ناسر باباخانی مامۆستایێ زانکۆیێ ل ئەمریکا د دیدارەکا تایبەت دا بۆ ئەڤرۆ دیار کر، نها هێزێن جیهانێ کار بۆ سیستەمەکێ نوو ل رۆژهەلاتا ناڤین دکەن، شەرێ نها د ناڤبەرا ئسرائیلێ ل گەل حزبوللا و ئیرانێ د راستی دا بۆ ئاڤاکرنا سیستەمەکێ نوو یە، کار ژ بۆ ڤێ یەکێ دهێتە کرن، وەلاتێن رۆژهەلاتا ناڤین ژی هەر یەک ل گۆر بەرژەوەندیێن خوە سەرەدەریێ ل گەل رەوشا نها دکەن، دیارە ئیران ل هەمبەر ڤان گوهۆڕینان ئاستەنگیان دروست دکەت و ژ بەر ڤێ یەکێ ژی نها بەرەیەک نوو و بهێز ل دژی ئیرانێ هەیە و دبیت گوهۆڕینێن گەلەک مەزن ل دەڤەرێ روو بدەن.
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هەرێما کوردستانێ ژی ب ڤان هەلبژارتنان دەربازی قۆناغەکا نوو دبیت، جارێ بەری هەر تشتەکێ گەلەک گرنگە ئەڤ هەلبژارتنە دوور ژ هەموو ئاژاوەگەریەکێ بهێنە کرن، ئارامی و ئێمناهیا هەرێما کوردستانێ زۆر گرنگە، دڤێت هەموو ئالیێن سیاسی ڤێ راستیێ بدەنە بەرچاڤ، چونکی دڤێت ژبیر نەکەین هەرێما کوردستانێ ب خوونا هزاران شەهیدان ئەڤرۆکە بوویە راستیەک ل دەڤەرێ و دڤێت هەموو وەلاتیێن هەرێما کوردستانێ ژی ڤێ یەکێ باش بزانن و خوە ل هەمبەر پاشەرۆژا هەرێما کوردستانێ بەرپرسیار ببینن و گۆت: (دڤێت هندەک ئالیێن سیاسی تنێ ژ بۆ بدەستڤەئینانا هندەک دەنگان ب داخۆیانایێن خوە نەبنە ئەگەرێ ئالۆزیان ل هەرێما کوردستانێ، چونکی خەلکی ئارامی و ژیانەکا خوەش دڤێت و دڤێت هێزێن سیاسی ڤێ راستیێ باش بدەنە بەرچاڤ).
د. ناسر باباخانی ئەو یەک ژی دیار کر، پارتی هێزا هەری مەزن و کاریگەرە ل کوردستانێ و بێگومان ئەرکێن پارتی ژی گەلەک زەحمەتن و ئەز وەسا دبینم دێ د ڤان هەلبژارتنان دا دیسان پارتی سەرکەفتنەکا مەزن بدەستڤە ئینیت و دێ هەر هێزا ئێکێ بیت، دیارە ژ بۆ پاراستنا و پێشڤەبرنا هەرێما کوردستانێ پارتی بەرنامێن خوە هەیە و کارەکێ مەزن ژی دکەت، لێ دڤێت ئالیێ دی ژی د هاریکار بن و ئاستەنگیان دروست نەکەن، مخابن هەلوەستێ هندەک ئالیان د هەوا هەلبژارتنان دا یا باش نینە و پێدڤیە پشتی هەلبژارتنان ئەو هەلوەستێ نەباش نەمینیت، چونکی ئەو یەک د بەرژەوەندیا خەلکێ کوردستانێ دا نینە و گۆت: (هێڤیدارم وەلاتیێن هەرێما کوردستانێ ل گۆر راستیا هەی دەنگێ خوە بدەن، مە پێدڤی ب هەرێمەکا ئارام هەیە کو کاروانێ ئاڤەدانیێ بەردەوام بیت و رێگری ل پیلانێن دوژمنان بهێتە کرن، دیارە کیژ هێزا سیاسی دشێت ڤێ بکەت، ژ بەر هندێ دڤێت ئەم ل گۆر ڤێ راستیێ دەنگێ خوە بدەین).
نيشاندان