بەرپرسەكێ دەستەیا گەشتوگوزارێ راگەهاند، پێداچوون د پلانا گەشتوگوزارێ دا بۆ سالا بۆری دێ هێتە كرن و د دەمێ نوكە دا دەست ب بەرهەڤكرنا پلانا ئەڤ سالە ژی هاتیە كرن و دخوازین ب زۆرترین پڕۆژەیێن وەبەرهێنانێ د كەرتێ گەشتیاری دا بهێنە بجهئینان.
سیروان تۆفیق، رێڤەبەرێ بازاڕكرنێ ل دەستەیا گەشتوگوزارێ بۆ رۆژناما ئەڤرۆ دیار كر، دەستەیا گەشتوگوزارێ دێ پێداچوونێ د پلانا سالا بۆری یا گەشتوگوزارێ دا كەت، داكو دیار ببیت هەتا چ رادە پلانا گەشتیاری هاتیە بجهئینان و پلانا ئەڤ سالە ژی دهێتە بەرهەڤكرن و گۆت: «پلانا مە یا گەشتوگوزارێ بۆ سالا 2024ێ ئەوە، كو هەژمارا گەشتیاران بهێتە زێدەكرن و پڕۆژەیێن وەبەرهێنانێ د كەرتێ گەشتوگوزارێ دا بهێنە زێدەكرن، هەروەسا كار دهێتە كرن پشكداریێ د چەندین كۆنفڕانس و پێشەنگەهێن گەشتیاری دا بكەین».
سیروان تۆفیق گۆتژی: «پلان هەیە سال بۆ سالێ ئینانا هەژمارا گەشتیاران بۆ جهێن گەشتیاری بهێتە زێدەكرن و ل گورەی ئەڤێ پلانێ ژی هەتا سالا 2030ێ هەژمارا گەشتیاران دێ گەهیتە 20 ملیۆن گەشتیاران بۆ هەرێما كوردستانێ ئەڤێ چەندێ ژی دێ كاریگەریێن زۆر ل سەر ئابوورێ‌ هەرێما كوردستانێ و پەیداكرنا دەلیڤەیێن كاری هەبن».

ئامێدیێ، مەحمود نهێلی:

ب مەرەما چارەسەركرنا كێشە و گرفتێن ل پێشیا كەرتێ چاندنێ ل سنوورێ دەڤەرداریا ئامێدیێ و دانانا میكانیزمەكا گونجای، پێنگاڤێن باش هاتینە هاڤێتن و رێنمایێن گونجایی بۆ هاتینە دانان.
ئەندازیار هەكار حەمید، رێڤەبەرێ چاندنا دەڤەرداریا ئامێدیێ بۆ رۆژناما ئەڤرۆ دیار كر، ژ بۆ چارەسەركرنا وان ئاریشە و گرفتێن ل هەمبەر جۆتیار و كەرتێ چاندنێ وان پێنگاڤێن باش هاڤێتینە و میكانیزمێن نوو گرتینە بەر و گۆت: «بۆ ڤێ یەكێ مە كۆمبوونەك ل گەل بەرپرسێن پشكان سازكریە و تێدا بەحسێ كێشە و گرفت و كێماسیێن كەرتێ چاندنێ ل سنوورێ دەڤەداریا ئامێدیێ و چاوانیا پێشخستنا ڤی كەرتی و كێمكرنا رووتینیێ هاتە كرن».
ناڤهاتی گۆتژی: «هەر د كۆمبوونێ دا چەندین رێكارێن چارەسەریا پشكەك ژ وان گرفتان هاتە گەنگەشەكرن و بڕیار و رێنمایێن پێدڤی هاتنە دان، دیسا مەبەست ژ ڤێ یەكێ پێشڤەبرنا كەرتێ چاندنێ و پشتەڤانیكرنا جۆتیارایە».

هەولێر، قائید میرۆ:

پەیڤدارێ وەزارەتا ئاڤاكرن و ئاكنجیكرنێ یا حوكمەتا هەرێما كوردستانێ‌ ئاشكرا كر، ژڤانێ پێشكێشكرنا فۆرمێن یەكەیێن ئاكنجیبوونێ هاتیە درێژكرن و پڕانیا وان كەسێن داخوازا یەكەیێن ئاكنجیكرنێ كری، فۆرم ب شاشی تژیكرینە و 22 هزار فۆرم ب شاشی هاتینە پێشكێشكرن.
مەریوان مەلا حەسەن، پەیڤدارێ وەزارەتا ئاڤاكرنێ بۆ رۆژناما ئەڤرۆ دیار كر، دووماهی ژڤانێ پێشكێشكرنا فۆرمێن یەكەیێن كرێدار و كێمدەرامەتان دووماهیا سالا بۆری بوو، بەلێ ژ بەركو 22 هزار وەلاتیان ب شێوەیەكێ شاش فۆرمێن وەرگرتنا یەكەیێن ئاكنجیبوونێ پێشكێشكربوون، لەو وەزیرێ ئاڤاكرنێ بڕیار دا ژڤانێ پێشكێشكرنا فۆرمان هەتا دووماهیا ڤێ مەهێ‌ بهێتە درێژكرن، هەتا دەلیڤا زێدەتر بۆ وەلاتیان هەبیت و فۆرمێن خوە پێشكێش بكەن.
مەریوان مەلا حەسەن گۆت: «هەتا نها 23 هزار كەسان فۆرمێن وەرگرتنا شوقەیان پێشكێش كرینە، بەلێ پڕانیا وەلاتیان ب شێوەیەكێ شاش فۆرمە تژی كرینە، چونكی د ڤێت هەموو هووركاریێن ناڤا فۆرمێ ب تەمامی بهێنە تۆماركرن و زانیاریێن هوور ل دۆر هەر كەسەكی بهێنە ئاشكراكرن، مەرجێن سەرەكی ژی دیارن و كەسێن مەرج تێدا نەبن ناڤێ وان ناچیتە د پشككێشانێ دا».

دهۆك، لەزگین جوقی:

سەرۆكێ‌ باژێرڤانیا دەڤەرداریا شێخان دیار كر، ب درێژاهیا نەهـ كیلۆمەتران جاددەیا پەرستگەها لالش دێ‌ بیتە جۆتساید، ئەڤە ژی دێ‌ بیتە ئەگەر قەرەبالغا زیارەتكاران د دەمێ‌ جەژنێن ئێزدیان دا ل پەرستگەها لالشێ‌ نەمینیت.
خالد نەرمۆ، سەرۆكێ‌ باژێرڤانیا دەڤەرداریا شێخان راگەهاند، كار یێ‌ هێتە كرن بۆ جۆتسایدكرنا جاددەیا پەرستگەها لالشێ‌ و گۆت: «ڤەدیتن هاتینە كرن و پلان هاتیە دانان ئەڤ سالە دەست ب پڕۆژەیێ‌ جۆتسایدكرنا جاددەیا پەرستگەها لالشێ‌ ب درێژاهیا نەه كیلۆمەتران بهێتە كرن، هیشتا پارەیێ‌ پێدڤی بۆ بجهئینانا پڕۆژەی نەهاتیە دابینكرن، ئەڤ پڕۆژە گەلەكێ‌ گرنگە دێ‌ گەلەك خزمەتا دەڤەرا شێخان كەت».
ناڤهاتی گۆتژی: «حوكمەتا هەرێما كوردستانێ‌ چەندین پڕۆژە ل پەرستگەها لالشێ‌ ئەنجامداینە و بەردەوام كار بۆ پتر خزمەتكرنا لالشێ‌ دهێتە كرن».

دهوك، لەزگین جوقی:

سەرپەرشتێ‌ پڕۆژەیی نووژەنكرنا پەرستگەها لالش دیار كر، گوژمێ‌ پتر ژ دو ملیار دیناران بۆ نووژەنكرنا پەرستگەها لالش هاتنە تەرخانكرن و دبێژیت: جاددە و دیوارێن پالپشت ل گەل رائێخستنا بەرێن سروشتی پڕۆژە ل پەرستگەها لالش دێ‌ هێنە ئەنجامدان.
ئەندازیار، خالد نەرمۆ، سەرپەرشتێ‌ پڕۆژەیێ‌ نووژەنكرنا پەرستگەها لالش بۆ ئەڤرۆ خویا كر، بەردەوامی دان ب نووژەنكرنا پەرستگەها لالش ب هەڤكاریا پەرلەمانتارێن پارتی ل بەغدا و رێڤەبەریا گشتی یا ئێزدیان ل بەغدا، ئیدارا پارێزگەها نەینەوا گوژمێ‌ دو ملیار دیناران بۆ نووژەنكرنا پەرستگەها لالش تەرخانكرن و گۆت: «جاددەیا لالش دێ‌ هێتە چێكرن، ب پشتەڤانی و هاریكاریا حوكمەتا هەرێما كوردستانێ‌ جاددەیا پەرستگەها لالش بوویە جۆتساید، ئەڤ پڕۆژە دێ‌ هێتە تەمامكرن هەتا دگەهیتە د ناڤ لالشێ‌ دا، زێدەباری چێكرنا دیوارێن پالپشت ل گەل رائێخستنا بەرێن سروشتی ل پەرستگەها لالش».
گۆتژی: «بەردەوام پەرستگەها لالش دهێتە نووژەنكرن و حوكمەتا هەرێما كوردستانێ‌ گەلەك پشتەڤانیا پڕۆژەیێ‌ نووژەنكرنا پەرستگەها لالش كریە، هەتا نوكە پڕۆژەیێ‌ نووژەنكرنا لالش یێ‌ بەردەوامە چەندین مەزارگەه و نیشانگەهێن ئایینی ب پشتەڤانی و هاریكاریا خێرخوازان ژی هاتینە نووژەنكرن».

سالار محەمەد دۆسكی:

رێڤەبەرێ ئەوقافێ ل دهۆكێ ئاشكەرا كر، نوكە كار ل سەر دروستكرنا سەندیكایەكێ دهێتەكرن بۆ كەسانێن مریان دشوون و د چارچووڤەكێ یاسایی و ساخلەمی دا دهێنە كۆمكرن و چەند مزگەڤتێن مەزن دناڤا سەنتەرێ باژێری دا دێ ب ڤی كارێ پیرۆز رابن.

مەلا سەرمەد ئالیخان، رێڤەبەرێ ئەوقافا قەزا دهۆكێ د دیدارەكێ دا بۆ رۆژناما ئەڤرۆ گۆت: ل گەل مری شویێن دهۆك و سێمێل مە كومبوون ئەنجامداینە و نێزیكی (60) كەسان ژ (ژن و زەلامان) ب ڤی كاری رادبن و ئەڤ كارە دهێـتەكرن كو چارچووڤەكێ فەرمی بخوە ڤەبگریت و سەندیكا یان كۆمەلەك بۆ بهێـتە دروستكرن و خشتە و بەرنامێ خوە هەبیت و هەتا (5) مزگەفتێن مەزن ل رۆژهەلات و رۆژئاڤا بۆ شووشتنا مریان بهێنە دابینكرن و ل گەل رێنمایێن ساخلەمیێ و چاڤدێریەكا باش بۆ بهێتەكرن.
مەلا سەرمەد دیار كر ژی، هەتا نوكە ب تنێ هزرا ل سەر مری شویێن موسلمان هاتیەكرن كو دناڤا ڤێ كومەلێ دا خوە بینن، لێ دێ داخوازێ ژ ئاینێن دی ژی كەن ئەو ژی دشێن خوە بینن وەك بەشەكێ ڤێ سەندیكایێ و د چارچووڤەكێ قانوویێ ئێكگرتی دا هەموو بهێنە كومكرن.
رێڤەبەرێ ئەوقافا دهۆك ئەو ژی گۆت: پشتی دەست ب كاربوونامە كو ماوێ پترە ژ هەیڤەكێ ژ كارێن هەرە دەسپێكی كو كاری ل سەر دكەین خزمەتكرنا مزگەڤتانە ب شێوەكێ گشتی، پێشوەخت نڤیسار ژ رێڤەبەریا ئەوقافێ بۆ رێڤەبەریا گشتی یا ئەوقافێ هاتبوو بلندكرن و بۆ كارگێری یا پارێزگەهێ و ب سوپاسی ڤە رازیبوون ل سەر دانا گازا سپی بۆ وەرزێ زڤستانێ هاتیە كو هەر مزگەفتەكێ 100 لترێن گازێ بۆ بهێنە دابینكرن و مە نڤیسار بلندكریە وەك خواستیە ئەو برگە بهێتە راستڤەكرن و ئەو رێژە بۆ 200 لتران بهێتە زێدەكرن، و نە ب تنێ بۆ ئەوقافا دهۆك، بەلكو بۆ هەموو رێڤەبەریێن ئەوقافێ ل هەموو قەزایان و رەنگە رێژا گازێ ل قەزایەكێ بۆ قەزایەكا دی جوداهی هەبیت، ل دووڤ سنورێ جوگرافی و دەڤەرێن چیایی.
مەلا سەرمەد ئالیخان ئەو ژی گۆت: نێزیكی (176) مزگەڤتان ل سنورێ ئەوقافا دهۆكێ هەنە و (148) مزگەڤتان گوتارا رۆژا ئەینی تێدا دهێتە خواندن و ئەوێن مای نڤێژ تێدا دهێنەكرن، نوكە پێنچ مزگەڤت یێ دهێنە ئاڤاكرن و شەش مزگەڤت ژی یێ دهێنە نووژەنكرن و نێزیكترین دەم دێ كەڤنە خزمەتا خەلكێ باژێران دا.
ناڤبری ئەو ژی گۆت: بەری دو سالان كونفرانسەك ل هەولێرێ هاتەبەستن و ل دووڤ راسپاردەیێن وەزیرێ ئەوقاف و كارۆبارێن ئاینی ئێدی كار ل سەر وێ چەندێ هاتەكرن كو هەر مزگەڤتەكا بهێتە دروستكرن سەروسیمایێ كوردەواری بخوە ڤەبگریت و رێڤەبەریا ئەندازی ل وەزارەتێ كومبوون ئەنجامدان و رێكەفتن لسەر چەند شێوازان هاتەكرن.
ل دور كێمبوونا فەرمانبەران ژی رێڤەبەرێ ئەوقاف و كارۆبارێن ئاینی ل دهۆك گۆت: میلاكێ مە یێ كێمە و ئەڤە راستیەكە ناهێتە ڤەشارتن، لێ ب سوپاسی ڤە وەزیرێ ئەوقاف و كارۆبارێن ئاینی د. پشتیوان سادق رازیبوون دیاركریە كو ب شێوازێ (مقتوع) هاریكاریەك بۆ ئەوان مامۆستایێن خوبەخش ئەوێن دچنە دەرڤەی باژێری و گوتارێن رۆژێن ئەینی دخوینن بۆ هاتیە دابینكرن، هەمان دەم ژی رێڤەبەرێ گشتیێ ئەوقافێ و وەزیرێ ئەوقافێ و هەتا داخوازا مە چوویە دەف سەرۆكێ حوكمەتا هەرێمێ‌.
زێدەتر دبێژیت: ل سەر دابینكرنا هندەك گرێبەستان بۆ ئەوقافێ چونكە مە گەلەك پێدڤی پێ هەیە، چونكە گەنج هەنە دەرچووینە ژ زانكۆیێ و د هەمان دەم گەلەك مامۆستایێن مە هاتینە خانەنشینكرن و گەلەك دنەخوش ن و نەچارین مە پێدڤی ب هندەك گەنجێن شارەزا هەیە و جهێ وان مامۆستا بگرن و هەتا مە پێدڤی ب ستافێ خزمەت گوزاران هەیە، راستە میلاكێ مە یێ كێمە لێ مزگەڤتێن مە نەراوستیانە و خەلكەكێ خێرخواز هەیە و بەردەوام خزمەتا مزگەڤتا دكەت و ئەم دەست خوشیێ لێ دكەین.